Awˬ lawn 25
Gʼuiˬ sha ngaˬ hui ve a shaꞈ teꞈ hkʼaˇ hkʼaˬ hkʼe cawˬ tcuh gaˇ ve le?
Liꞈ hpu hkʼaw kʼoˆ laˇ ve, chaw yaˇ ve “a shaꞈ ngeh leh dawˇ haˍ ve hkʼaw gʼa chehˇ taˍ ve yoˬ.” (Yawˇbaˆ 14:1) Awˬ tehˬ kʼo Gʼuiˬ sha ngaˬ hui ve a shaꞈ teꞈ hkʼaˇ chi hkʼe hpehꞈ tcuh gaˇ ve laˇ? Oˇ hkʼe maˇ heˆ kʼo, Gʼuiˬ sha ngaˬ hui ve a shaꞈ teꞈ hkʼaˇ hkʼaˬ hkʼe cawˬ tcuh gaˇ ve le? Gʼuiˬ sha dawˇ teh taˍ ve awˬ ceuˬ hkʼa peu˗eˬ hpehꞈ la gʼa˗aw laˇ? Liꞈ hpu hkʼaw hkʼawꞈ laˇ ve htaꞈ nawˬ awˬ gʼaˇ gʼa tuˬ yoˬ.
1. Yaˬhoˉvaˬ ngaˬ hui htaꞈ hkʼaˬ hkʼe ve a shaꞈ cawˬ tcuh gaˇ ve le?
Yaˬhoˉvaˬ ngaˬ hui htaꞈ daꞈ jaˇ ve a shaꞈ cawˬ tcuh gaˇ ve yoˬ. Chaw yaˇ awˉ lawˉ teˇ ca hpanˍ htaˇ, Gʼuiˬ sha yawˇ huiˉ maˬ htaꞈ daꞈ jaˇ nyi sha jaˇ ve Paˍraˍdiˇsuˆ hkʼaw chehˇ tcuh ve yoˬ. Oˇ ve lehˬ Eˍdenˍ hko hpehꞈ ve yoˬ. “Gʼuiˬ sha yawˇ huiˉ maˬ htaꞈ bon naꞈ piˇ leh kʼoˆ ve, ‘yaˇ maˇ maˇ cawˬ la piˇ˗oˆ. Chaw yaˇ teˇ hpaˍ, miˬ guiˬ hkʼoˆ biˇ la piˇ˗oˆ. Ngaˇ teˇ hpaˍ, ngaˆ teˇ hpaˍ leh haiˬ ve to nuˇ to shaˆ hkʼa peu˗eˬ ve awˬ hkʼoˆ htaꞈ uˉ peunˍ chehˇ˗oˆ.’” (Awˬ hkuiˉ puiˍ 1:28) Yaˬhoˉvaˬ yawˇ hui htaꞈ yaˇ maˇ maˇ cawˬ tcuh gaˇ ve, miˬ guiˬ hkʼa peu˗eˬ htaꞈ Paˍraˍdiˇsuˆ hpehꞈ tuˬ te tcuh gaˇ ve, leh to nuˇ to shaˆ htaꞈ nyi haꞈ shaˉ tcuh gaˇ ve yoˬ. Gʼuiˬ sha teˇ gʼaˇ le le htaꞈ maˇ naˬ maˇ gawˬ tcuh gaˇ leh co co taiˍ taiˍ a shaꞈ cawˬ tcuh gaˇ ve yoˬ.
Chi beuꞈ teˇ co˗e oˇ hkʼe maˇ hpehꞈ ve htawˇ, a Gʼuiˬ sha ve a loˍ maˇ pa. (Iˉsaˍyaˆ 46:10, 11) Yaˬhoˉvaˬ lehˬ yawˇ ve hkawˇ na yuˬ ve chaw htaꞈ daꞈ jaˇ nyi sha jaˇ ve miˬ guiˬ hkʼoˆ lo co co taiˍ taiˍ ha lehˬ tcuh gaˇ ve yoˬ.—Hpeuꞈ maˍ ve 21:3, 4 gʼaw sheˍ.
2. Chi beuꞈ kaꞈ ngaˬ hui ve a shaꞈ teꞈ hkʼaˇ ha lehˬ ve cawˬ tuˬ aˬ htoꞈ ma gʼa te ve le?
Yaˬhoˉvaˬ lehˬ chaw yaˇ yawˇ htaꞈ shiˍ daꞈ leh oˉ kʼoˍ pui tcuh gaˇ ve yoˬ. Chi htaꞈ pa taw, yawˇ ngaˬ hui htaꞈ ‘Gʼuiˬ sha ve tawˇ hkawˇ htaꞈ na yuˬ leh te gʼa tuˬ’ hpanˍ laˇ ve yoˬ. (Luˉkaꞈ 11:28 gʼaw sheˍ.) Yaˬhoˉvaˬ ngaˬ hui yawˇ htaꞈ meuˆ daꞈ tcuh gaˇ ve, ‘yawˇ kʼoˆ laˇ ve kanˉ hkʼa peu˗eˬ htaꞈ te tcuh gaˇ ve yoˬ. Yawˇ htaꞈ haꞈ leh, nyi ma awˬ tawˬ hkʼa gaˬ yawˇ ve kanˉ htaꞈ te tcuh gaˇ ve yoˬ.’ (Bon maˍ ve 10:12; Chiˇ mvuh ve 25:14) Ngaˬ hui chi hkʼe te ve kʼo, shoꞈ shaꞈ ve awˬ ceuˬ gʼa hpuˇ ve htawˇ, ngaˬ hui ha lehˬ tuˬ yoˬ. Ngaˬ hui Yaˬhoˉvaˬ htaꞈ oˉ kʼoˍ pui leh yawˇ kʼoˆ laˇ ve awˬ hkʼaˇ suh gʼaꞈ te ve kʼo, ngaˬ hui kaꞈ awˬ tehˬ awˬ na ha lehˬ ve a shaꞈ cawˬ tuˬ yoˬ.
Henˇ shiˍ maˇ la tuˬ
Yaˬhoˉvaˬ miˬ guiˬ hpanˍ htaˇ yawˇ ngaˬ hui htaꞈ haꞈ jaˇ ve tehꞈ hkʼaˬ hkʼe hpeuꞈ maw laˇ ve le, leh yawˇ ngaˬ hui htaꞈ hkʼaˬ hkʼe ve a shaꞈ cawˬ tcuh gaˇ ve le, teˇ geh henˇ sheˍ.
3. Yaˬhoˉvaˬ ngaˬ hui htaꞈ ha lehˬ ve a shaꞈ cawˬ tcuh gaˇ ve
VDO hpaw leh na hkawˇ chi htaꞈ tawˇ yaw daꞈ sheˍ:
-
Aˬ htoꞈ ma pa taw Gʼuiˬ sha daꞈ jaˇ ve miˬ guiˬ htaꞈ te hpanˍ ve le?
Liꞈ hpu hkʼaw maˍ laˇ ve, “Gʼuiˬ sha lehˬ chaw yaˇ ve nyi ma hkʼaw co co taiˍ taiˍ a shaꞈ teꞈ chehˇ gaˇ tuˬ piˇ laˇ taˍ peuˬ.” (Cuˇ yiˍ piˇ ve 3:11, Miˬ guiˬ awˬ suhˉ yuˬ tawˆ ve Liꞈ hpu) Na hkawˇ chi htaꞈ tawˇ yaw daꞈ sheˍ:
-
Liꞈ hpu chi teˇ tawn Yaˬhoˉvaˬ htaꞈ caˉ daꞈ ve awˬ lawn nawˬ htaꞈ aˬ htoꞈ ma maˍ laˇ ve le?
4. Yaˬhoˉvaˬ ve a loˍ maˇ pa
Chiˇ mvuh ve liꞈ 37:11, 29 leh Iˉsaˍyaˆ liꞈ 55:11 gʼaw leh na hkawˇ chi htaꞈ tawˇ yaw daꞈ sheˍ:
-
Yaˬhoˉvaˬ ve a loˍ maˇ pa ve tehꞈ ngaˬ hui hkʼaˬ hkʼe te shiˍ ve le?
Yehˬ nyi haꞈ shaˉ paˍ maˇ cawˬ ve htawˇ kʼawꞈ gu te gʼa ve yoˬ. Chi hkʼa shuˍ shuˍ, miˬ guiˬ luˬ kʼai taˍ ve htaꞈ Gʼuiˬ sha kʼawꞈ gu te leh yawˇ htaꞈ haꞈ ve chaw htaꞈ oˇ kaˬ lo chehˇ tcuh tuˬ yoˬ
5. Yaˬhoˉvaˬ htaꞈ oˉ kʼoˍ pui ve lehˬ ngaˬ hui ha lehˬ tuˬ te laˇ ve
Ngaˬ hui aˬ htoꞈ ma pa taw a shaꞈ teꞈ chehˇ ve shiˍ ve kʼo, ngaˬ hui ha lehˬ ve a shaꞈ cawˬ tuˬ yoˬ. VDO hpaw leh na hkawˇ chi htaꞈ tawˇ yaw daꞈ sheˍ:
-
Yaˇ miˇ chi teˇ gʼaˇ aˬ htoꞈ ma pa taw a shaꞈ teꞈ chehˇ ve shiˍ la htaˇ, yawˇ aˬ htoꞈ ma awˬ bon gʼa ve le?
Cuˇ yiˍ piˇ ve liꞈ 12:13 gʼaw leh na hkawˇ chi htaꞈ tawˇ yaw daꞈ sheˍ:
-
Yaˬhoˉvaˬ ngaˬ hui awˬ pon laiˉ ceuˬ te laˇ ve pa taw, ngaˬ hui yawˇ awˬ bon htaꞈ chiˇ mvuh tuˬ aˬ htoꞈ ma te piˇ gʼa ve le?
Chaw teˇ hpaˍ na nyi laˇ ve: “Ngaˬ gʼa tuꞈ gʼa hkanˍ tuˬ ve kʼo, aˬ htoꞈ ma pa taw Gʼuiˬ sha ngaˬ htaꞈ a shaꞈ teꞈ chehˇ tcuh laˇ ve le?”
-
Nawˬ hkʼaˬ hkʼe hkʼawꞈ piˇ tuˬ le?
A yeˇ uiˍ ve awˬ lawn
Yaˬhoˉvaˬ ngaˬ hui htaꞈ daꞈ jaˇ nyi sha jaˇ ve miˬ guiˬ chi hkʼoˆ lo co co taiˍ taiˍ a shaꞈ teꞈ leh ha lehˬ tcuh gaˇ ve yoˬ. Ngaˬ hui Yaˬhoˉvaˬ htaꞈ nyi ma awˬ tawˬ hkʼa gaˬ oˉ kʼoˍ pui ve kʼo, chi teˇ hkui kaꞈ ngaˬ hui ha lehˬ ve cawˬ tuˬ yoˬ.
Kʼawꞈ gʼaꞈ na ve
-
Yaˬhoˉvaˬ lehˬ Aˍdanˍ leh Eˇvaꞈ htaꞈ hkʼaˬ hkʼe ve a shaꞈ cawˬ tcuh gaˇ ve le?
-
Yaˬhoˉvaˬ lehˬ chaw yaˇ awˬ pon yawˇ ve a loˍ maˇ pa ve ngaˬ hui hkʼaˬ hkʼe te shiˍ gʼa ve le?
-
Ngaˬ hui ve a shaꞈ ha lehˬ ve cawˬ tuˬ hkʼaˬ hkʼe gʼa te ve le?
Kʼawꞈ caˉ nyi gʼa ve
Aˬ htoꞈ ma pa taw Eˍdenˍ hko awˬ tehˬ cawˬ jaw ve tehꞈ ngaˬ hui hkʼa dehꞈ yonˍ gʼa ve le?
Ngaˬ hui ve miˬ guiˬ hkʼaˬ htaˆ kaꞈ yeˬ chehˇ ve yoˬ tehꞈ, hkʼaˬ hkʼe te yonˍ gʼa ve le?
“Miˬ guiˬ htaꞈ te luˬ tuˬ laˇ?” (Vehˆsaiˉ hkʼaw ve awˬ lawn)
Ngaˬ hui ve a shaꞈ teꞈ hkʼaˇ hkʼaˬ hkʼe ve dawˇ law kuiˬ cawˬ ve le? Liꞈ hpu hkʼaw hkʼawꞈ laˇ ve htaꞈ gʼaw nyi sheˍ.
“Aˬ htoꞈ ma pa taw ngaˬ hui paw la ve le?” (Vehˆsaiˉ hkʼaw ve awˬ lawn)
Hawˉ hkʼaˆ teˇ gʼaˇ yawˇ ve a shaꞈ teꞈ hkʼaˇ hkʼaw mehˉ kʼai taˍ ve awˬ ceuˬ htaꞈ hkʼaˬ hkʼe mawˬ ve htaꞈ nyi sheˍ.
Chi teˇ hkui ngaˬ ve a shaꞈ teꞈ hkʼaˇ dawˇ law kui cawˬ ve (3:55)
a Aˬ htoꞈ ma pa taw chi beuꞈ teˇ co˗e ngaˬ hui ve a shaꞈ Gʼuiˬ sha dawˇ teh taˍ ve hkʼe maˇ hpehꞈ ve le? Awˬ gʼuˇ suhˍ teˇ lawn hkʼaw ngaˬ hui gʼa shiˍ tuˬ yoˬ.
You May Also Like
NGAˬ HUI HTAꞈ CAˉ DAꞈ VE AWˬ LAWN
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ ve hk’aˬ hk’e te henˇ ve le?
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ tuˬ nawˬ Liꞈ hpu hk’aˬ ve teˇ maˬ yehˇ ve kaꞈ hpehꞈ ve yoˬ. Awˬ chawˇ maˇ heˆ leh yehˬ k’a hk’aw ve chaw htaꞈ Liꞈ hpu teˇ geh henˇ tuˬ jehˬ piˇ kaꞈ g’a ve yoˬ.
