Awˬ lawn 26
Aˬ htoꞈ ma pa taw haiˬ ve leh tuꞈ hkanˍ ve awˬ ceuˬ cawˬ ve le?
Haiˬ ve awˬ ceuˬ gʼa hpuˇ htaˇ laiˉ gʼaˇ chi hkʼe na ve, “aˬ htoꞈ ma pa taw chi hkʼe gʼa hpuˇ ve le?” Liꞈ hpu hkʼaw hkʼawꞈ laˇ ve ngaˬ hui htaꞈ awˬ gʼaˇ peꞈ laˇ ve yoˬ!
1. Saˍtanˍ aˬ htoꞈ ma te ve pa taw miˬ guiˬ hkʼoˆ haiˬ ve awˬ ceuˬ cawˬ la ve le?
Saˍtanˍ Gʼuiˬ sha htaꞈ hpfuhˆ ve yoˬ. Yawˇ Gʼuiˬ sha hkʼe kanˇ paˆ cawˬ gaˇ ve pa taw, yawˇ Aˍdanˍ leh Eˇvaꞈ Gʼuiˬ sha hkawˇ maˇ na yuˬ tuˬ beˬ piˇ ve yoˬ. Yawˇ Eˇvaꞈ htaꞈ heˍ piˇ ve yoˬ. (Awˬ hkuiˉ puiˍ 3:1-5) Gʼuiˬ sha Eˇvaꞈ htaꞈ daꞈ ve awˬ ceuˬ maˇ piˇ gaˇ ve tehꞈ Saˍtanˍ heˍ piˇ ve yoˬ. Chaw yaˇ Gʼuiˬ sha hkawˇ maˇ na yuˬ ve kʼo, chi aꞈ kehˉ ha lehˬ ve cawˬ tuˬ yoˬ tehꞈ, Saˍtanˍ Eˇvaꞈ htaꞈ dawˇ tcuh ve yoˬ. Saˍtanˍ Eˇvaꞈ htaꞈ maˇ gʼa suh tehꞈ kʼoˆ piˇ ve yoˬ. Chi lehˬ awˉ lawˉ teˇ pawˆ heˍ ve yoˬ. Hkʼe te leh Liꞈ hpu hkʼaw Saˍtanˍ htaꞈ “heˍ shehˍ hpaˇ hpehꞈ leh, heˍ ve teˇ ceuˬ ve awˬ pa htawˇ hpehꞈ ve” tehꞈ kuˬ ve yoˬ.—Yoˇhanˬ 8:44.
2. Aˍdanˍ leh Eˇvaꞈ aˬ htoꞈ ma te ve le?
Yaˬhoˉvaˬ lehˬ Aˍdanˍ leh Eˇvaꞈ htaꞈ daꞈ ve awˬ ceuˬ te piˇ ve yoˬ. Gʼuiˬ sha kʼoˆ ve, yawˇ hui Eˍdenˍ hko hkʼaw hkʼa cawˬ ve iˉ shiˍ htaꞈ caˇ hpehꞈ ve yoˬ. Yaꞈ hkʼaˇ, yawˇ hui teˇ cehˬ ve awˬ shiˍ htaꞈ maˇ gʼa caˇ. (Awˬ hkuiˉ puiˍ 2:15-17) Yaꞈ hkʼaˇ, yawˇ hui dawˇ cheˆ leh Gʼuiˬ sha taˇ caˇ tehꞈ kʼoˆ ve iˉ shiˍ htaꞈ caˇ ve yoˬ. Eˇvaꞈ “iˉ shiˍ oˇ ve htaꞈ shaˉ yuˬ leh caˇ nyi ve yoˬ.” Peuˬ hkʼawꞈ nawˉ, Aˍdanˍ kaꞈ caˇ ve yoˬ. (Awˬ hkuiˉ puiˍ 3:6) Aˍdanˍ leh Eˇvaꞈ biˇ ve chaw hpehꞈ ve pa taw, yawˇ hui Gʼuiˬ sha hkawˇ na yuˬ tuˬ haˍ ve maˇ heˆ. Yaꞈ hkʼaˇ, yawˇ hui Gʼuiˬ sha hkawˇ maˇ na yuˬ. Yawˇ hui venˇ baˆ te leh Gʼuiˬ sha ve kanˇ paˆ awˬ hawˉ lo maˇ chehˇ gaˇ ve yoˬ. Yawˇ hui oˇ hkʼe te ve pa taw maˇ daꞈ ve heuˆ la kuiˬ cawˬ jaˇ ve yoˬ.—Awˬ hkuiˉ puiˍ 3:16-19.
3. Aˍdanˍ leh Eˇvaꞈ te ve ngaˬ hui htaꞈ heuˆ la kuiˬ hkʼaˬ hkʼe cawˬ ve le?
Aˍdanˍ leh Eˇvaꞈ venˇ baˆ te htaˇ, yawˇ hui maˇ biˇ ve chaw hpehꞈ la ve yoˬ. Chi htaꞈ pa taw, yawˇ ve awˬ yaˇ awˬ duˬ htawˇ maˇ biˇ ve chaw hpehꞈ la ve yoˬ. Liꞈ hpu hkʼaw Aˍdanˍ htaꞈ caˉ daꞈ ve kʼoˆ laˇ ve, “chaw teˇ gʼaˇ htaꞈ pa taw miˬ guiˬ hkʼoˆ lo venˇ baˆ loꞈ la leh, venˇ baˆ htaꞈ pa taw suh ve teˇ ceuˬ cawˬ la ve yoˬ. Hkʼe te leh, chaw hkʼa peu˗eˬ venˇ baˆ te peuˬ ve pa taw, chaw hkʼa peu˗eˬ awˬ hkʼoˆ htaꞈ suh ve teˇ ceuˬ gaˬ la ve yoˬ.”—Roˉmaꞈ 5:12.
Aˬ htoꞈ ma pa taw chi beuꞈ teˇ co˗e tuꞈ hkanˍ ve awˬ ceuˬ cawˬ ve le? Teˇ pawˆ pawˆ kʼo, ngaˬ hui te yaꞈ ve, maˇ heˆ leh awˬ nu ve chaw te yaꞈ ve pa taw, ngaˬ hui shoꞈ shaꞈ ve gʼa hpuˇ ve yoˬ. Leh teˇ pawˆ pawˆ kʼo, ngaˬ hui chehˇ kuiˬ chehˇ maˇ cawˇ ve pa taw, shoꞈ shaꞈ ve gʼa hpuˇ ve yoˬ.—Cuˇ yiˍ piˇ ve 9:11 gʼaw sheˍ.
Henˇ shiˍ maˇ la tuˬ
Aˬ htoꞈ ma pa taw miˬ guiˬ hkʼoˆ haiˬ ve leh tuꞈ hkanˍ ve awˬ ceuˬ, Gʼuiˬ sha geh laˬ ve maˇ heˆ tehꞈ ngaˬ hui hkʼa dehꞈ yonˍ gʼa ve le, leh ngaˬ hui tuꞈ hkanˍ ve gʼa hpuˇ htaˇ Gʼuiˬ sha hkʼaˬ hkʼe dawˇ ve le, teˇ geh henˇ sheˍ.
4. Tuꞈ hkanˍ ve a shu geh laˬ ve le?
Gʼuiˬ sha miˬ guiˬ htaꞈ uˉ peunˍ chehˇ ve tehꞈ laiˉ gʼaˇ dawˇ ve yoˬ. Yaꞈ hkʼaˇ, chi awˬ tehˬ hpehꞈ ve laˇ? VDO hpaw sheˍ.
Yaˍkoˆ liꞈ 1:13 leh 1 Yoˇhanˬ liꞈ 5:19 gʼaw leh na hkawˇ chi htaꞈ tawˇ yaw daꞈ sheˍ:
-
Haiˬ ve leh tuꞈ hkanˍ ve Gʼuiˬ sha geh laˬ ve laˇ?
5. Saˍtanˍ miˬ guiˬ htaꞈ uˉ peunˍ ve pa taw aˬ htoꞈ ma hpehꞈ la ve le?
Awˬ hkuiˉ puiˍ liꞈ 3:1-6 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Saˍtanˍ hkʼaˬ hkʼe heˍ ve le?—Kaˇ nanˉ ehˉ 4 leh 5 hkʼaw nyi sheˍ.
-
Gʼuiˬ sha chaw yaˇ htaꞈ daꞈ ve awˬ ceuˬ maˇ gʼa tcuh gaˇ ve tehꞈ Saˍtanˍ aˬ htoꞈ ma kʼoˆ ve le?
-
Chaw yaˇ ha lehˬ gʼa tuˬ Yaˬhoˉvaˬ uˉ peunˍ ve awˬ hawˉ lo gʼa chehˇ ve tehꞈ Saˍtanˍ kʼoˆ ve laˇ?
Cuˇ yiˍ piˇ ve liꞈ 8:9 gʼaw leh na hkawˇ chi htaꞈ tawˇ yaw daꞈ sheˍ:
-
Miˬ guiˬ chi htaꞈ Yaˬhoˉvaˬ maˇ uˉ peunˍ ve pa taw hkʼaˬ hkʼe hpehꞈ ve le?
-
Aˍdanˍ leh Eˇvaꞈ biˇ ve chaw hpehꞈ leh daꞈ jaˇ ve hko hkʼaw chehˇ taˍ ve yoˬ. Yaꞈ hkʼaˇ, yawˇ hui Saˍtanˍ hkawˇ na leh Yaˬhoˉvaˬ htaꞈ hpfuhˆ ve
-
Gʼuiˬ sha htaꞈ hpfuhˆ peuˬ hkʼaw nawˉ, miˬ guiˬ hkʼoˆ lo venˇ baˆ, tuꞈ hkanˍ ve, leh suh ve cawˬ la ve
-
Yaˬhoˉvaˬ lehˬ venˇ baˆ, tuꞈ hkanˍ ve, leh suh ve htaꞈ te luˬ piˇ tuˬ yoˬ. Chaw yaˇ biˇ jaˇ ve chaw kʼawꞈ hpehꞈ la leh daꞈ jaˇ nyi sha jaˇ ve miˬ guiˬ hkʼoˆ lo teˇ pawˆ gʼa kʼawꞈ chehˇ tuˬ yoˬ
6. Ngaˬ hui tuꞈ hkanˍ ve awˬ ceuˬ gʼa hpuˇ htaˇ Yaˬhoˉvaˬ ha kʼaˉ laˇ ve
Ngaˬ hui tuꞈ hkanˍ ve awˬ ceuˬ gʼa hpuˇ htaˇ Gʼuiˬ sha a yeˇ te laˇ˗aw laˇ? Jawˇmawˇ Daˍviˆ leh tcuh yaˇ Peˍtruˆ hkʼaˬ hkʼe kʼoˆ ve le? Chiˇ mvuh ve liꞈ 31:7 leh 1 Peˍtruˆ liꞈ 5:7 gʼaw leh na hkawˇ chi htaꞈ tawˇ yaw daꞈ sheˍ:
-
Ngaˬ hui tuꞈ hkanˍ ve awˬ ceuˬ gʼa hpuˇ htaˇ, Yaˬhoˉvaˬ nyi mawˬ leh ha kʼaˉ jaˇ ve tehꞈ nawˬ shiˍ htaˇ hkʼaˬ hkʼe dawˇ ve le?
7. Gʼuiˬ sha tuꞈ hkanˍ ve hkʼa peu˗eˬ htaꞈ te luˬ tuˬ yoˬ
Iˉsaˍyaˆ liꞈ 65:17 leh Hpeuꞈ maˍ ve liꞈ 21:3, 4 gʼaw leh na hkawˇ chi htaꞈ tawˇ yaw daꞈ sheˍ:
-
Chaw yaˇ haiˬ ve awˬ ceuˬ hkʼaˬ hkʼe taw gʼa hpuˇ ve htawˇ, Yaˬhoˉvaˬ shoꞈ shaꞈ ve hkʼa peu˗eˬ htaꞈ kʼawꞈ gu leh awˬ hkuiˉ puiˍ htaˇ hkʼe kʼawꞈ daꞈ la tcuh tuˬ yoˬ. Nawˬ chi hkʼe gʼa shiˍ ve pa taw awˬ gʼaˇ gʼa˗aw laˇ? Aˬ htoꞈ ma pa taw le?
Nawˬ shiˍ˗aˬ laˇ?
Saˍtanˍ awˉ lawˉ peuˇ teˇ pawˆ heˍ htaˇ, yawˇ Yaˬhoˉvaˬ htaꞈ she pfuhˍ leh awˬ meh te luˬ piˇ ve yoˬ. Yawˇ kʼoˆ ve, Gʼuiˬ sha lehˬ haꞈ pehnˇ ve leh hteˇ ve cawˇ ve hkʼaw uˉ peunˍ ve maˇ heˆ. Yaꞈ hkʼaˇ, maˇ maw kʼo Yaˬhoˉvaˬ lehˬ chaw yaˇ tuꞈ hkanˍ ve gʼa hpuˇ ve hkʼa peu˗eˬ htaꞈ te luˬ piˇ tuˬ yoˬ. Oˇ ve teˇ yanˇ htaˇ, yawˇ ve awˬ meh venˇ baˆ taˍ ve htaꞈ gʼa ponˬ tuˬ yoˬ. Chi hkʼe te ve lehˬ yawˇ uˉ peunˍ ve daꞈ jaˇ ve tehꞈ hpeuꞈ maw laˇ ve yoˬ. Yaˬhoˉvaˬ ve awˬ meh htaꞈ yawˆ yan tuˬ te piˇ ve lehˬ a yeˇ uiˍ jaˇ ve yoˬ.—Maꞈhtehˍ 6:9, 10.
Chaw teˇ hpaˍ kʼoˆ ve: “Ngaˬ hui tuꞈ hkanˍ ve gʼa hpuˇ ve lehˬ Gʼuiˬ sha ve a loˍ hpehꞈ ve yoˬ.”
-
Nawˬ hkʼaˬ hkʼe hkʼawꞈ piˇ tuˬ le?
A yeˇ uiˍ ve awˬ lawn
Saˍtanˍ leh chaw yaˇ awˉ lawˉ teˇ ca htaꞈ pa taw, miˬ guiˬ hkʼoˆ haiˬ ve awˬ ceuˬ cawˬ la ve yoˬ. Ngaˬ hui tuꞈ hkanˍ ve awˬ ceuˬ gʼa hpuˇ htaˇ, Yaˬhoˉvaˬ ha kʼaˉ jaˇ leh, maˇ maw kʼo yawˇ tuꞈ hkanˍ ve awˬ ceuˬ htaꞈ te luˬ piˇ tuˬ yoˬ.
Kʼawꞈ gʼaꞈ na ve
-
Saˍtanˍ Eˇvaꞈ htaꞈ aˬ htoꞈ ma awˬ lawn heˍ piˇ ve le?
-
Aˍdanˍ leh Eˇvaꞈ Gʼuiˬ sha htaꞈ hpfuhˆ htaˇ ngaˬ hui htaꞈ heuˆ la kuiˬ hkʼaˬ hkʼe cawˬ ve le?
-
Ngaˬ hui tuꞈ hkanˍ ve awˬ ceuˬ gʼa hpuˇ htaˇ Yaˬhoˉvaˬ ha kʼaˉ laˇ ve tehꞈ, ngaˬ hui hkʼaˬ hkʼe te shiˍ gʼa ve le?
Kʼawꞈ caˉ nyi gʼa ve
Liꞈ hpu hkʼaw venˇ baˆ ve tcuhˉ kuiˬ aˬ htoꞈ ma kʼoˆ maˍ laˇ ve htaꞈ nyi sheˍ.
“Venˇ baˆ lehˬ aˬ htoꞈ ma kʼoˆ gaˇ ve le?” (Vehˆsaiˉ hkʼaw ve awˬ lawn)
Eˍdenˍ hko hkʼaw Saˍtanˍ Gʼuiˬ sha htaꞈ hkʼaˬ hkʼe she pfuhˍ piˇ ve le?
Chaw laiˉ gʼaˇ htawˇ dawˇ nawˬ dawˇ cawˬ ve na hkawˇ hkʼawꞈ laˇ ve htaꞈ, gʼaw nyi sheˍ.
Hawˉ hkʼaˆ teˇ gʼaˇ tuꞈ hkanˍ ve htaꞈ caˉ daꞈ ve aˬ htoꞈ ma shiˍ la ve le?
You May Also Like
NGAˬ HUI HTAꞈ CAˉ DAꞈ VE AWˬ LAWN
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ ve hk’aˬ hk’e te henˇ ve le?
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ tuˬ nawˬ Liꞈ hpu hk’aˬ ve teˇ maˬ yehˇ ve kaꞈ hpehꞈ ve yoˬ. Awˬ chawˇ maˇ heˆ leh yehˬ k’a hk’aw ve chaw htaꞈ Liꞈ hpu teˇ geh henˇ tuˬ jehˬ piˇ kaꞈ g’a ve yoˬ.
