Aˍdanˍ leh Eˇvaꞈ chaw yaˇ awˉ lawˉ teˇ ca Gʼuiˬ sha ve hkawˇ maˇ na ve pa taw, ngaˬ hui venˇ baˆ yaˇ hpehꞈ la ve, tuꞈ hkanˍ ve awˬ ceuˬ gʼa hpuˇ ve, leh gʼa suh ve yoˬ. a Yaꞈ hkʼaˇ, ngaˬ hui dawˇ law kuiˬ cawˬ ve yoˬ. Awˬ lawn kʼo, Yaˬhoˉvaˬ yawˇ ve Yaˇ hpu Yeˍsuˆ miˬ guiˬ hkʼoˆ peu laˇ leh ngaˬ hui ve venˇ baˆ leh suh ve htaꞈ ponˬ tuˬ ga laˇ ve yoˬ. Htaiˍ hkʼawꞈ ve lehˬ chaw htaꞈ htaiˍ hkʼawꞈ ve, maˇ heˆ leh mawˇ teˇ ceuˬ ceuˬ htaꞈ vuiˬ hkʼawꞈ ve tehꞈ kʼoˆ gaˇ ve yoˬ. Liꞈ hpu hkʼaw kʼoˆ ve, Yeˍsuˆ biˇ jaˇ ve a shaꞈ tanˇ laˇ leh ngaˬ hui awˬ pon htaiˍ hkʼawꞈ laˇ ve yoˬ. (Maꞈhtehˍ 20:28 gʼaw sheˍ.) Yeˍsuˆ biˇ jaˇ ve chaw hpehꞈ ve pa taw, miˬ guiˬ hkʼoˆ co co taiˍ taiˍ a shaꞈ teꞈ chehˇ gʼa ve yoˬ. Yaꞈ hkʼaˇ, yawˇ ngaˬ hui awˬ pon a shaꞈ tanˇ laˇ leh, Aˍdanˍ leh Eˇvaꞈ te shonˇ kʼai ve awˬ ceuˬ hkʼa peu˗eˬ ngaˬ hui kʼawꞈ gʼa hkʼawꞈ tuˬ te laˇ ve yoˬ. Yeˍsuˆ hpeuꞈ maw laˇ ve, yawˇ leh Yaˬhoˉvaˬ ngaˬ hui htaꞈ haꞈ jaˇ ve yoˬ. Yeˍsuˆ suh ve htaꞈ ngaˬ hui awˬ hpfuhˇ shiˍ leh awˬ bon htaꞈ chiˇ mvuh piˇ tuˬ chi teˇ lawn hkʼaw ga laˇ tuˬ yoˬ.

1. Yeˍsuˆ suh ve pa taw chi beuꞈ teˇ co˗e ngaˬ hui awˬ pon awˬ bon aˬ htoꞈ ma cawˬ ve le?

Ngaˬ hui venˇ baˆ yaˇ hpehꞈ ve pa taw, laiˉ pawˆ kʼo Yaˬhoˉvaˬ nyi ma luˬ tuˬ te piˇ ve yoˬ. Yaꞈ hkʼaˇ, ngaˬ hui te yaꞈ taˍ ve htaꞈ dawˇ hpfuhˆ Yeˍsuˆ ve awˬ meh hkʼaw Yaˬhoˉvaˬ geh venˇ baˆ lawˬ hpehˇ ve, leh ngaˬ hui venˇ baˆ maˇ kʼawꞈ te tuˬ coˇ caˇ leh te ve kʼo, Yaˬhoˉvaˬ geh meuˆ daꞈ maˇ la gʼa ve yoˬ. (1 Yoˇhanˬ 2:1) Liꞈ hpu hkʼaw kʼoˆ ve, “Hkriꞈ lehˬ ngaˬ hui ve venˇ baˆ htaꞈ pa taw teˇ pawˆ gʼa suh ve yoˬ. Gʼuiˬ sha geh ngaˬ hui htaꞈ shiˍ kʼoꞈ˗e gʼa tuˬ, hteˇ ve cawˇ ve chaw teˇ gʼaˇ lehˬ, maˇ hteˇ maˇ cawˇ ve chaw hui awˬ pon hkanˍ suh ve yoˬ.”—1 Peˍtruˆ 3:18.

2. Yeˍsuˆ suh ve pa taw awˬ gʼuˇ suh hpawˇ ngaˬ hui awˬ pon awˬ bon aˬ htoꞈ ma cawˬ ve le?

‘Yeˍsuˆ htaꞈ hkʼa yonˍ ve chaw hkʼa peu˗eˬ maˇ gʼa luˬ maˇ gʼa sheˆ ve awˬ hkʼoˆ kaꞈ, co co taiˍ taiˍ ve a shaꞈ gʼa tuˬ,’ Yaˬhoˉvaˬ Yeˍsuˆ htaꞈ peu laˇ leh biˇ jaˇ ve a shaꞈ tanˇ laˇ tcuh ve yoˬ. (Yoˇhanˬ 3:16) Yeˍsuˆ ngaˬ hui awˬ pon te laˇ ve htaꞈ pa taw, maˇ maw kʼo Yaˬhoˉvaˬ lehˬ Aˍdanˍ maˇ na yuˬ leh maˇ daꞈ ve heuˆ la kuiˬ cawˬ ve hkʼa peu˗eˬ htaꞈ te luˬ tuˬ yoˬ. Ngaˬ hui Yeˍsuˆ htaiˍ hkʼawꞈ laˇ ve htaꞈ yonˍ ve kʼo, ngaˬ hui lehˬ daꞈ jaˇ nyi sha jaˇ ve miˬ guiˬ hkʼoˆ lo co co taiˍ taiˍ gʼa chehˇ tuˬ yoˬ!—Iˉsaˍyaˆ 65:21-23.

 Henˇ shiˍ maˇ la tuˬ

3. Yeˍsuˆ suh ve pa taw ngaˬ hui venˇ baˆ leh suh ve awˬ ceuˬ htaꞈ ponˬ laˇ gʼa ve

1. Aˍdanˍ biˇ jaˇ ve chaw hpehꞈ ve htawˇ, Gʼuiˬ sha ve hkawˇ maˇ na yuˬ ve pa taw, ngaˬ hui venˇ baˆ cawˬ leh gʼa suh ve

2. Yeˍsuˆ biˇ jaˇ ve chaw hpehꞈ leh Gʼuiˬ sha ve hkawˇ na yuˬ ve pa taw, ngaˬ hui biˇ jaˇ ve chaw hpehꞈ gʼa leh co co taiˍ taiˍ a shaꞈ gʼa tuˬ yoˬ

4. Yeˍsuˆ suh ve pa taw miˬ guiˬ yaˇ hkʼa peu˗eˬ awˬ bon gʼa tuˬ te laˇ ve

 5. Htaiˍ hkʼawꞈ ve lehˬ Yaˬhoˉvaˬ nawˬ htaꞈ peꞈ laˇ ve laꞈ shawnˍ hpehꞈ ve

Yaˬhoˉvaˬ geh awˬ chawˇ te ve chaw lehˬ htaiˍ hkʼawꞈ laˇ ve htaꞈ yawˇ geh gʼa ve laꞈ shawnˍ hpehꞈ ve tehꞈ shawˍ ve yoˬ. Gaˍlaˍtiˆ liꞈ 2:20 gʼaw leh na hkawˇ chi htaꞈ tawˇ yaw daꞈ sheˍ:

• Tcuh yaˇ Pawˇluꞈ lehˬ htaiˍ hkʼawꞈ ve htaꞈ Yaˬhoˉvaˬ geh gʼa ve laꞈ shawnˍ hpehꞈ ve tehꞈ yawˇ hkʼaˬ hkʼe kʼoˆ ve le?

Aˍdanˍ venˇ baˆ te ve pa taw, yawˇ leh yawˇ ve awˬ yaˇ awˬ duˬ kaꞈ gʼa suh˗e ve yoˬ. Yaꞈ hkʼaˇ, nawˬ co co taiˍ taiˍ a shaꞈ gʼa tuˬ Yaˬhoˉvaˬ yawˇ ve Yaˇ hpu peu laˇ leh hkanˍ suh tcuh ve yoˬ.

Nawˬ Liꞈ hpu awˬ tawn chi teˇ hpaˍ gʼaw htaˇ, yawˇ ve Yaˇ hpu tuꞈ hkanˍ ve gʼa hpuˇ ve htaꞈ Yaˬhoˉvaˬ hkʼaˬ hkʼe dawˇ ve le, dawˇ mawˬ nyi sheˍ. Yoˇhanˬ liꞈ 19:1-7, 16-18 gʼaw leh na hkawˇ chi htaꞈ tawˇ yaw daꞈ sheˍ:

• Yaˬhoˉvaˬ leh Yeˍsuˆ nawˬ awˬ pon te laˇ ve htaꞈ nawˬ hkʼaˬ hkʼe dawˇ ve le?

 A yeˇ uiˍ ve awˬ lawn

Yeˍsuˆ suh ve pa taw, Yaˬhoˉvaˬ ngaˬ hui htaꞈ venˇ baˆ hpehˇ laˇ gʼa leh, ngaˬ hui co co taiˍ taiˍ a shaꞈ teꞈ chehˇ gʼa ve yoˬ.

Kʼawꞈ gʼaꞈ na ve

• Aˬ htoꞈ ma pa taw Yeˍsuˆ gʼa suh˗e ve le?

• Yeˍsuˆ biˇ jaˇ ve chaw hpehꞈ ve pa taw, yawˇ chaw yaˇ awˬ pon aˬ htoꞈ ma te laˇ gʼa ve le?

• Yeˍsuˆ suh ve lehˬ nawˬ awˬ pon aˬ htoꞈ ma awˬ bon cawˬ ve le?