Awˬ lawn 28
Yaˬhoˉvaˬ leh Yeˍsuˆ nawˬ awˬ pon te laˇ ve htaꞈ awˬ bon uiˍ ve tehꞈ hpeuꞈ maw piˇ ve
Nawˬ ve awˬ chawˇ nawˬ htaꞈ daꞈ jaˇ ve laꞈ shawnˍ peꞈ laˇ htaˇ, nawˬ hkʼaˬ hkʼe dawˇ ve le? Nawˬ ha lehˬ jaˇ leh nawˬ awˬ chawˇ htaꞈ awˬ bon uiˍ jaˇ kʼoˆ piˇ gaˇ tuˬ yoˬ. Yaˬhoˉvaˬ leh Yeˍsuˆ nawˬ htaꞈ awˬ hpfuhˇ hkʼaˆ jaˇ ve laꞈ shawnˍ peꞈ laˇ ve yoˬ. Laꞈ shawnˍ chi aˬ htoꞈ ma le, leh nawˬ awˬ hpfuhˇ shiˍ ve tehꞈ hkʼaˬ hkʼe hpeuꞈ maw piˇ gʼa tuˬ le?
1. Yaˬhoˉvaˬ leh Yeˍsuˆ ngaˬ hui awˬ pon te laˇ ve htaꞈ awˬ bon uiˍ ve tehꞈ hkʼaˬ hkʼe hpeuꞈ maw piˇ gʼa ve le?
Liꞈ hpu hkʼaw ka tiꞈ te taˍ laˇ ve, ‘Yeˍsuˆ htaꞈ hkʼa yonˍ ve chaw hkʼa peu˗eˬ’ co co taiˍ taiˍ ve a shaꞈ gʼa tuˬ yoˬ. (Yoˇhanˬ 3:16) Ngaˬ hui hkʼaˬ hkʼe te gʼa ve le? Ngaˬ hui awˬ lawn teˇ hpaˍ dawˇ cheˆ leh te ve hkʼaw ngaˬ hui yonˍ ve tehꞈ gʼa te tawˆ la ve yoˬ. (Yaˍkoˆ 2:17) Ngaˬ hui te ve leh yaw ve hkʼaw yonˍ ve tehꞈ te tawˆ la htaˇ, ngaˬ hui Yeˍsuˆ leh yawˇ ve Awˬ pa Yaˬhoˉvaˬ geh meuˆ daꞈ maˇ la tuˬ yoˬ.—Yoˇhanˬ liꞈ 14:21 gʼaw sheˍ.
2. Yaˬhoˉvaˬ leh Yeˍsuˆ ngaˬ hui awˬ pon te laˇ ve htaꞈ awˬ hpfuhˇ shiˍ ve tehꞈ hkʼaˬ htaˆ hpeuꞈ maw piˇ gʼa ve le?
Yeˍsuˆ maˇ suh sheˍ teˇ haˉ htaˇ, yawˇ htaiˍ hkʼawꞈ laˇ ve htaꞈ awˬ bon uiˍ ve tehꞈ hpeuꞈ maw piˇ gʼa tuˬ teˇ hkʼaˇ cawˬ sheˍ ve tehꞈ, awˬ laꞈ gʼawˇ hui htaꞈ kʼoˆ piˇ ve yoˬ. Yeˍsuˆ yawˇ hui htaꞈ a yeˇ uiˍ jaˇ ve awˬ yanˇ chi ve hkʼaw teˇ geh hpawnˬ daꞈ la tehꞈ kʼoˆ piˇ ve yoˬ. Hpawnˬ daꞈ ve chi htaꞈ Liꞈ hpu hkʼaw ‘Jawˇmawˇ ve mvuhˇ haˉ awˍ caˇ ve’ maˇ heˆ leh Yeˍsuˆ suh ve dawˇ nawˇ tuˬ hpawnˬ daꞈ ve tehꞈ kʼoˆ ve yoˬ. (1 Kawˇrenˍhtuˆ 11:20) Yeˍsuˆ yawˇ ve tcuh yaˇ leh awˬ tehˬ ve Hkriꞈ yaˇ teˇ gʼaˇ le le htaꞈ, yawˇ suh ve dawˇ nawˇ tuˬ hpawnˬ daꞈ ve te tcuh gaˇ ve yoˬ. Yeˍsuˆ kʼoˆ ve, “ngaˬ htaꞈ dawˇ nawˇ tuˬ chi hkʼe te˗oˆ.” (Luˉkaꞈ 22:19) Nawˬ Yeˍsuˆ suh ve dawˇ nawˇ tuˬ hpawnˬ daꞈ˗e htaˇ, Yaˬhoˉvaˬ leh Yeˍsuˆ chaw yaˇ htaꞈ haꞈ laˇ ve htaꞈ nawˬ awˬ bon uiˍ ve tehꞈ hpeuꞈ maw piˇ ve yoˬ.
Henˇ shiˍ maˇ la tuˬ
Yaˬhoˉvaˬ leh Yeˍsuˆ haꞈ laˇ ve htaꞈ nawˬ awˬ bon uiˍ ve tehꞈ hkʼaˬ ve teˇ hkʼaˇ hkʼaw kʼawꞈ hpeuꞈ maw piˇ gʼa sheˍ ve le, leh aˬ htoꞈ ma pa taw Yeˍsuˆ suh ve dawˇ nawˇ tuˬ hpawnˬ daꞈ˗e ve lehˬ a yeˇ uiˍ jaˇ ve le, teˇ geh henˇ sheˍ.
3. Ngaˬ hui awˬ bon uiˍ ve tehꞈ hkʼaˬ hkʼe te tawˆ la gʼa ve le?
Tawˇ pa haˉ te kʼo, nawˬ iˉ kaˆ kʼa htaˇ chaw teˇ gʼaˇ nawˬ htaꞈ ga laˇ ve kʼo, nawˬ hkʼaˬ hkʼe dawˇ tuˬ le? Nawˬ awˬ lawn oˇ ve htaꞈ leunˇ tuˬ laˇ? Maˇ heˆ leh, nawˬ awˬ bon uiˍ ve tehꞈ teˇ ceuˬ ceuˬ te tawˆ la tuˬ laˇ?
Yaˬhoˉvaˬ ngaˬ hui htaꞈ ga laˇ ve pa taw, ngaˬ hui co co taiˍ taiˍ a shaꞈ teꞈ chehˇ gʼa ve yoˬ. 1 Yoˇhanˬ liꞈ 4:8-10 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Aˬ htoꞈ ma pa taw Yeˍsuˆ htaiˍ hkʼawꞈ laˇ ve lehˬ daꞈ jaˇ ve laꞈ shawnˍ hpehꞈ ve le?
-
Yaˬhoˉvaˬ leh Yeˍsuˆ nawˬ awˬ pon te laˇ ve htaꞈ nawˬ hkʼaˬ hkʼe dawˇ ve le?
Yaˬhoˉvaˬ leh Yeˍsuˆ ngaˬ hui awˬ pon te laˇ ve htaꞈ awˬ bon uiˍ ve tehꞈ hpeuꞈ maw piˇ tuˬ, ngaˬ hui aˬ htoꞈ ma te gʼa ve le? 2 Kawˇrenˍhtuˆ liꞈ 5:15 leh 1 Yoˇhanˬ liꞈ 4:11; 5:3 gʼaw sheˍ. Liꞈ hpu awˬ tawn teˇ tawn peuˬ teˇ tawn gʼaw peuˬ hkʼawꞈ nawˉ, na hkawˇ chi htaꞈ tawˇ yaw daꞈ sheˍ:
-
Liꞈ hpu chi teˇ tawn hkʼaw, ngaˬ hui awˬ bon uiˍ ve tehꞈ hkʼaˬ hkʼe te hpeuꞈ maw piˇ gʼa ve le?
4. Yeˍsuˆ htaꞈ henˇ yuˬ ve
Ngaˬ hui Gʼuiˬ sha htaꞈ awˬ bon uiˍ ve tehꞈ hpeuꞈ maw piˇ gʼa ve teˇ hkʼaˇ cawˬ sheˍ ve lehˬ, Yeˍsuˆ htaꞈ henˇ yuˬ ve yoˬ. 1 Peˍtruˆ liꞈ 2:21 gʼaw leh na hkawˇ chi htaꞈ tawˇ yaw daꞈ sheˍ:
-
Ngaˬ hui Yeˍsuˆ ve hkui ha awˬ hkʼaˇ suh gʼaꞈ kʼai gʼa tuˬ hkʼaˬ hkʼe gʼa te ve le?
Yeˍsuˆ lehˬ Gʼuiˬ sha ve tawˇ hkawˇ htaꞈ haꞈ ve, daꞈ ve awˬ lawn sha tanˇ hto toˇ ve, leh shu htaꞈ ga piˇ ve
5. Yeˍsuˆ suh ve dawˇ nawˇ tuˬ hpawnˬ daꞈ ve hkʼaw kʼai ve
‘Jawˇmawˇ ve mvuhˇ haˉ awˍ caˇ ve’ hpawnˬ daꞈ ve awˉ lawˉ teˇ pawˆ htaˇ, aˬ htoꞈ ma te ve le? Luˉkaꞈ liꞈ 22:14, 19, 20 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
‘Jawˇmawˇ ve mvuhˇ haˉ awˍ caˇ ve’ hpawnˬ daꞈ ve awˉ lawˉ teˇ pawˆ htaˇ Yeˍsuˆ aˬ htoꞈ ma te ve le?
-
Hkaoˍ monˇ leh a pehˉ meuˇ gʼuiˬ aˬ htoꞈ ma htaꞈ kʼoˆ gaˇ ve le?—Kaˇ nanˉ ehˉ 19 leh 20 hkʼaw nyi sheˍ.
Yeˍsuˆ lehˬ yawˇ ve awˬ laꞈ gʼawˇ htaꞈ teˇ hkʼawꞈ le le yawˇ suh ve awˬ nyi gaˬ la htaˇ, ‘Jawˇmawˇ ve mvuhˇ haˉ awˍ caˇ ve’ hpawnˬ daꞈ ve te tcuh gaˇ ve yoˬ. Yaˬhoˉvaˬ ve Shaˉhkiˆhkanˍ ve chaw Yeˍsuˆ kʼoˆ laˇ ve hkʼe, teˇ hkʼawꞈ le le Yeˍsuˆ suh ve dawˇ nawˇ tuˬ hpawnˬ daꞈ ve te ve yoˬ. A yeˇ uiˍ ve hpawnˬ daꞈ ve chi htaꞈ caˉ daꞈ ve awˬ lawn shiˍ tuˬ, VDO hpaw sheˍ. Peuˬ leh na hkawˇ chi htaꞈ tawˇ yaw daꞈ sheˍ:
-
Yeˍsuˆ suh ve dawˇ nawˇ tuˬ hpawnˬ daꞈ ve hkʼaw aˬ htoꞈ ma te ve le?
Hkaoˍ monˇ leh a pehˉ meuˇ gʼuiˬ lehˬ tcuhˉ kuiˬ cawˬ ve yoˬ. Hkaoˍ monˇ lehˬ Yeˍsuˆ biˇ jaˇ ve a shaꞈ tanˇ laˇ ve awˬ to htaꞈ kʼoˆ gaˇ ve yoˬ. A pehˉ meuˇ gʼuiˬ lehˬ Yeˍsuˆ ve awˬ suhˍ htaꞈ kʼoˆ gaˇ ve yoˬ
Chaw teˇ hpaˍ kʼoˆ ve: “Yeˍsuˆ htaꞈ yonˍ ve kʼo, a shaꞈ gʼa ponˬ tuˬ yoˬ.”
-
Yeˍsuˆ htaꞈ yonˍ ve ceh tiˉ maˇ lawꞈ tehꞈ nawˬ Yoˇhanˬ liꞈ 3:16 leh Yaˍkoˆ liꞈ 2:17 htaꞈ yehˇ leh hkʼaˬ hkʼe te kʼoˆ maˍ piˇ gʼa ve le?
A yeˇ uiˍ ve awˬ lawn
Ngaˬ hui Yeˍsuˆ te laˇ ve htaꞈ awˬ bon uiˍ ve tehꞈ hpeuꞈ maw piˇ gʼa ve lehˬ, yawˇ htaꞈ yonˍ ve tehꞈ te tawˆ la ve, leh yawˇ suh ve dawˇ nawˇ tuˬ hpawnˬ daꞈ ve hkʼaw kʼai ve yoˬ.
Kʼawꞈ gʼaꞈ na ve
-
Yeˍsuˆ htaꞈ yonˍ ve aˬ htoꞈ ma kʼoˆ gaˇ ve le?
-
Yaˬhoˉvaˬ leh Yeˍsuˆ nawˬ awˬ pon te laˇ ve htaꞈ awˬ bon uiˍ ve tehꞈ hpeuꞈ maw piˇ tuˬ, nawˬ aˬ htoꞈ ma te gaˇ ve le?
-
Aˬ htoꞈ ma pa taw Yeˍsuˆ suh ve dawˇ nawˇ tuˬ hpawnˬ daꞈ ve hkʼaw kʼai ve lehˬ a yeˇ uiˍ jaˇ ve le?
Kʼawꞈ caˉ nyi gʼa ve
Yeˍsuˆ suh ve pa taw ngaˬ hui aˬ htoꞈ ma te gaˇ tuˬ te laˇ ve le?
Yeˍsuˆ yawˇ ve awˬ to yehˇ leh Yaˬhoˉvaˬ htaꞈ chiˇ mvuh ve (9:28)
Yonˍ ve htaꞈ caˉ daꞈ ve awˬ lawn leh ngaˬ hui yonˍ ve tehꞈ hkʼaˬ hkʼe te hpeuꞈ maw piˇ gʼa ve htaꞈ gʼaw nyi sheˍ.
Yaˇ miˇ teˇ gʼaˇ Yeˍsuˆ htaiˍ hkʼawꞈ laˇ ve awˬ lawn na gʼa la htaˇ, yawˇ ve a shaꞈ teꞈ hkʼaˇ hkʼaˬ hkʼe te daꞈ la ve htaꞈ shiˍ tuˬ, “Ngaˬ ve awˬ to daꞈ kehˬ la leh ngaˬ ve a shaꞈ awˬ hpfuhˇ hkʼaˆ jaˇ ve tehꞈ shiˍ la ve,” awˬ lawn chi htaꞈ gʼaw nyi sheˍ.
“Liꞈ hpu a shaꞈ htaꞈ pa gʼa ve” (Shaw nyi kuiˬ Taꞈ yehˬ 2011 hkʼawꞈ ha pa 8 maˬ 1 nyi)
Aˬ htoꞈ ma pa taw Yeˍsuˆ suh ve dawˇ nawˇ tuˬ hpawnˬ daꞈ ve hkʼaw, hkaoˍ monˇ caˇ leh a pehˉ meuˇ gʼuiˬ dawˬ ve chaw a ciˉ ceh tiˉ cawˬ ve le?
You May Also Like
NGAˬ HUI HTAꞈ CAˉ DAꞈ VE AWˬ LAWN
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ ve hk’aˬ hk’e te henˇ ve le?
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ tuˬ nawˬ Liꞈ hpu hk’aˬ ve teˇ maˬ yehˇ ve kaꞈ hpehꞈ ve yoˬ. Awˬ chawˇ maˇ heˆ leh yehˬ k’a hk’aw ve chaw htaꞈ Liꞈ hpu teˇ geh henˇ tuˬ jehˬ piˇ kaꞈ g’a ve yoˬ.
