Nawˬ haꞈ ve chaw suh˗oˬ ve cawˬ˗aw laˇ? Awˬ yanˇ oˇ ve hkʼaw nawˬ nyi ma luˬ jaˇ leh chi hkʼe dawˇ ve yoˬ hehˉ. ‘Chaw yaˇ suh peuˬ kʼo hkʼaˬ hkʼe hpehꞈ ve le? Ngaˬ hui haꞈ ve chaw suh kʼai peuˬ ve htaꞈ gʼa kʼawꞈ mawˬ daꞈ tuˬ laˇ?’ Chi teˇ lawn leh awˬ gʼuˇ suhˍ teˇ lawn hkʼaw Liꞈ hpu hkʼaw hkʼawꞈ laˇ ve htaꞈ nawˬ awˬ gʼaˇ gʼa tuˬ yoˬ.

1. Chaw yaˇ suh peuˬ kʼo hkʼaˬ hkʼe hpehꞈ ve le?

Yeˍsuˆ lehˬ suh peuˬ ve chaw htaꞈ zuhꞈ loˆ˗e ve hkʼe hpehꞈ ve tehꞈ tehˆ maˍ laˇ ve yoˬ. Zuhꞈ loˆ˗e ve chaw yawˇ awˬ paˇ lo aˬ htoꞈ ma hpehꞈ la ve htaꞈ maˇ shiˍ. Suh peuˬ ve chaw lehˬ zuhꞈ muiˉ kʼa chehˇ ve htaꞈ hkʼaˬ hkʼe shuˍ ve le? Chaw yaˇ suh peuˬ hkʼawꞈ nawˉ naˬ ve maˇ kʼawꞈ cawˬ, yawˇ ve awˬ chawˇ leh yehˬ kʼa htaꞈ hkʼaˬ ma haꞈ ve htawˇ, maˇ kʼawꞈ dawˇ nawˇ puiˉ˗o. Awˬ lawn kʼo Liꞈ hpu hkʼaw kʼoˆ ve, “suh peuˬ ve chaw lehˬ teꞈ chiˉ maˇ shiˍ.”—Cuˇ yiˍ piˇ ve 9:5 gʼaw sheˍ.

2. Suh peuˬ ve chaw awˬ lawn htaꞈ ngaˬ hui awˬ tehˬ gʼa shiˍ htaˇ aˬ htoꞈ ma awˬ bon gʼa ve le?

Laiˉ gʼaˇ gʼa suh ve htaꞈ kawˆ leh suh peuˬ ve chaw htaꞈ kaꞈ kawˆ ve yoˬ! Yaꞈ hkʼaˇ, Liꞈ hpu hkʼaw suh ve awˬ lawn maˍ laˇ ve htaꞈ nawˬ gʼa shiˍ htaˇ, kawˆ tuˬ maˇ loˍ. Yeˍsuˆ kʼoˆ ve, “hteˇ ve cawˇ ve awˬ ceuˬ oˇ ve lehˬ, nawˬ hui htaꞈ hpehˇ laˇ tuˬ yoˬ.” (Yoˇhanˬ 8:32) Chaw yaˇ suh peuˬ hkʼawꞈ nawˉ, awˬ ha ku cawˬ sheˍ ve tehꞈ bon liˇ teˇ hpaˍ hpaˍ maˍ ve yoˬ. Yaꞈ hkʼaˇ, Liꞈ hpu hkʼaw oˇ hkʼe maˇ maˍ. Suh peuˬ ve chaw tuꞈ hkanˍ ve maˇ cawˬ. Yawˇ hui teꞈ chiˉ maˇ shiˍ, aˬ htoꞈ ma teˇ ceuˬ kaꞈ te maˇ gʼa, leh ngaˬ hui htaꞈ kaꞈ kawˆ tuˬ te laˇ maˇ gʼa. Chi htaꞈ pa taw, ngaˬ hui suh peuˬ ve chaw htaꞈ oˉ kʼoˍ pui leh mawˇ tanˇ piˇ tuˬ maˇ loˍ.

Chaw teˇ hpaˍ kʼoˆ ve, yawˇ hui suh peuˬ ve chaw geh tawˇ yaw daꞈ gʼa ve yoˬ. Yaꞈ hkʼaˇ, ngaˬ hui henˇ kʼai peuˬ ve hkʼe “suh peuˬ ve chaw teꞈ chiˉ maˇ shiˍ.” Chi htaꞈ pa taw, suh peuˬ ve chaw geh tawˇ yaw daꞈ gʼa ve tehꞈ kʼoˆ ve chaw lehˬ awˬ tehˬ kʼo, neˇ suh peuˬ ve chaw awˬ hkawˇ hkʼa shuˍ te chehˇ ve geh yaw daꞈ chehˇ ve yoˬ. Ngaˬ hui awˬ lawn chi htaꞈ shiˍ ve lehˬ, neˇ hui htaꞈ ponˬ tuˬ ga laˇ ve yoˬ. Ngaˬ hui suh peuˬ ve chaw htaꞈ caˉ daꞈ ve kʼo, neˇ ngaˬ hui htaꞈ kawˆ tuˬ te laˇ gʼa ve tehꞈ Yaˬhoˉvaˬ shiˍ ve pa taw, ngaˬ hui suh peuˬ ve chaw htaꞈ maˇ gʼa caˉ daꞈ tuˬ, yawˇ shaˍ tiꞈ peꞈ laˇ ve yoˬ.—Bon maˍ ve 18:10-12 gʼaw sheˍ.

3. Chaw yaˇ suh peuˬ hkʼawꞈ nawˉ hkʼaˬ hkʼe hpehꞈ ve le?

Suh ve htaꞈ caˉ daꞈ ve awˬ lawn chaw yaˇ ve yonˍ hkʼaˇ maˇ shuˍ daꞈ. Chi htaꞈ pa taw, yonˍ hkʼaˇ teˇ maˬ le le cawˇ ve tehꞈ kʼoˆ maˇ gʼa.

• Suh peuˬ ve chaw htaꞈ caˉ daꞈ ve awˬ lawn nawˬ awˬ paˇ lo chehˇ ve maˇ˗awˍ ve chaw hkʼaˬ hkʼe dawˇ ve le?

 4. Suh ve awˬ lawn htaꞈ ngaˬ hui awˬ tehˬ shiˍ htaˇ awˬ bon gʼa ve

Ngaˬ hui suh ve awˬ lawn htaꞈ awˬ tehˬ shiˍ htaˇ, suh peuˬ ve chaw htaꞈ ngaˬ hui kawˆ tuˬ maˇ loˍ. Cuˇ yiˍ piˇ ve liꞈ 9:10 gʼaw leh na hkawˇ chi htaꞈ tawˇ yaw daꞈ sheˍ:

• Suh peuˬ ve chaw ngaˬ hui htaꞈ kawˆ tuˬ te laˇ gʼa˗aw laˇ?

Ngaˬ hui suh ve awˬ lawn htaꞈ awˬ tehˬ shiˍ htaˇ, maˍ yaꞈ ve laiˉ lawn htaꞈ ngaˬ hui maˇ gʼaꞈ te. Tawˇ pa haˉ te kʼo, suh peuˬ ve chaw htaꞈ ngaˬ hui oˉ kʼoˍ maˇ pui, leh yawˇ hui htaꞈ mawˇ maˇ tanˇ piˇ. Iˉsaˍyaˆ liꞈ 8:19 leh Hpeuꞈ maˍ ve liꞈ 4:11 gʼaw leh na hkawˇ chi htaꞈ tawˇ yaw daꞈ sheˍ:

• Nawˬ dawˇ kʼo, ngaˬ hui suh peuˬ ve chaw htaꞈ oˉ kʼoˍ pui ve, maˇ heˆ leh yawˇ hui geh ga laˇ tuˬ lawˬ ve kʼo, Yaˬhoˉvaˬ hkʼaˬ hkʼe dawˇ tuˬ le?

5. Suh ve awˬ lawn htaꞈ ngaˬ hui awˬ tehˬ shiˍ ve lehˬ nyi ma sha tuˬ te laˇ ve

Laiˉ gʼaˇ yonˍ ve, yawˇ hui suh peuˬ kʼo ponˬ laˬ htaˇ yawˇ hui haiˬ ve awˬ ceuˬ te ve htaꞈ gʼa kʼawꞈ hkanˍ yuˬ ve yoˬ. Yaꞈ hkʼaˇ, suh peuˬ ve chaw lehˬ tuꞈ hkanˍ ve maˇ heˆ leh ciˍ yanˍ ve htaꞈ maˇ gʼa hpuˇ ve tehꞈ, ngaˬ hui shiˍ ve pa taw nyi ma sha kuiˬ cawˬ ve yoˬ. Roˉmaꞈ liꞈ 6:7 gʼaw leh na hkawˇ chi htaꞈ tawˇ yaw daꞈ sheˍ:

• Liꞈ hpu hkʼaw kʼoˆ laˇ ve suh peuˬ ve chaw lehˬ yawˇ hui ve venˇ baˆ htaꞈ ponˬ peuˬ. Oˇ hkʼe hpehꞈ ve kʼo, suh peuˬ ve chaw tuꞈ hkanˍ ve maˇ heˆ leh ciˍ yanˍ ve htaꞈ gʼa kʼawꞈ hpuˇ tuˬ laˇ?

Yaˬhoˉvaˬ htaꞈ ngaˬ hui shaˬ shiˍ maˇ la ve kʼo, yawˇ suh peuˬ ve chaw htaꞈ maˇ ciˍ yanˍ piˇ ve tehꞈ ngaˬ hui hkʼa dehꞈ yonˍ gʼa ve yoˬ. Bon maˍ ve liꞈ 32:4 leh 1 Yoˇhanˬ liꞈ 4:8 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:

• Nawˬ dawˇ kʼo, Liꞈ hpu awˬ tawn chi teˇ hpaˍ hkʼaw Gʼuiˬ sha ve te hkʼaˇ dawˇ hkʼaˇ chi hkʼe cawˬ ve pa taw, suh peuˬ ve chaw htaꞈ ciˍ yanˍ piˇ˗aw laˇ?

• Nawˬ suh peuˬ ve awˬ lawn htaꞈ awˬ tehˬ shiˍ htaˇ nyi ma sha la˗aw laˇ? Aˬ htoꞈ ma pa taw le?

 A yeˇ uiˍ ve awˬ lawn

Suh peuˬ ve chaw teꞈ chiˉ maˇ shiˍ, yawˇ hui ciˍ yanˍ ve htaꞈ maˇ gʼa hkanˍ, leh yawˇ hui ngaˬ hui htaꞈ kawˆ tuˬ te laˇ maˇ gʼa ve yoˬ.

Kʼawꞈ gʼaꞈ na ve

• Chaw yaˇ suh peuˬ kʼo hkʼaˬ hkʼe hpehꞈ ve le?

• Suh ve awˬ lawn htaꞈ ngaˬ hui awˬ tehˬ shiˍ htaˇ, aˬ htoꞈ ma awˬ bon gʼa ve le?

• Aˬ htoꞈ ma pa taw suh ve awˬ lawn htaꞈ ngaˬ hui awˬ tehˬ shiˍ ve lehˬ nyi ma sha tuˬ te laˇ gʼa ve le?