Awˬ lawn 30
Nawˬ haꞈ ve chaw kʼawꞈ teꞈ tu la gʼa ve!
Suh ve lehˬ ngaˬ hui nyi ma luˬ jaˇ tuˬ te laˇ ve yoˬ. Chi htaꞈ pa taw, Liꞈ hpu hkʼaw suh ve htaꞈ canˇ paˍ hpehꞈ ve tehꞈ kʼoˆ ve yoˬ. (1 Kawˇrenˍhtuˆ 15:26) Yaˬhoˉvaˬ suh ve htaꞈ te luˬ tuˬ yoˬ tehꞈ, Awˬ lawn 27 hkʼaw ngaˬ hui gʼa henˇ peu˗oˬ ve yoˬ. Yaꞈ hkʼaˇ, suh peuˬ ve chaw htaꞈ aˬ htoꞈ ma hpehꞈ la tuˬ le? Yaˬhoˉvaˬ suh peuˬ ve chaw laiˉ lanˬ gʼaˇ htaꞈ kʼawꞈ teꞈ tu la piˇ leh, yawˇ hui co co taiˍ taiˍ ha lehˬ ha kʼa gʼa teꞈ chehˇ tuˬ yoˬ tehꞈ, Yaˬhoˉvaˬ ka tiꞈ te taˍ laˇ ve htaꞈ chi teˇ lawn hkʼaw nawˬ gʼa shiˍ tuˬ yoˬ. Yaꞈ hkʼaˇ, daꞈ jaˇ ve awˬ lawn chi awˬ tehˬ hpehꞈ tuˬ laˇ? Yawˇ hui kʼawꞈ teꞈ tu la htaˇ hkʼaˬ kaˬ lo chehˇ tuˬ le? Mvuhˇ naw ma hkʼoˆ maˇ heˆ leh miˬ guiˬ hkʼoˆ lo laˇ?
1. Ngaˬ hui haꞈ ve chaw suh kʼai peuˬ ve htaꞈ Yaˬhoˉvaˬ aˬ htoꞈ ma te piˇ gaˇ ve le?
Yaˬhoˉvaˬ suh peuˬ ve chaw htaꞈ kʼawꞈ teꞈ tu la piˇ gaˇ ve yoˬ. Yawˇbaˆ meh ve hawˉ hkʼaˆ teˇ gʼaˇ, yawˇ suh˗e ve kʼo Gʼuiˬ sha yawˇ htaꞈ maˇ leunˇ tehꞈ hkʼa dehꞈ yonˍ ve yoˬ. Yawˇ Gʼuiˬ sha htaꞈ kʼoˆ piˇ ve, “nawˬ kuˬ leh ngaˬ kʼawꞈ yaw hkʼawꞈ tuˬ yoˬ.”—Yawˇbaˆ 14:13-15 gʼaw sheˍ.
2. Suh peuˬ ve chaw kʼawꞈ teꞈ tu la gʼa ve tehꞈ ngaˬ hui hkʼaˬ hkʼe te shiˍ gʼa ve le?
Yeˍsuˆ miˬ guiˬ hkʼoˆ chehˇ htaˇ Gʼuiˬ sha yawˇ htaꞈ kanˇ paˆ piˇ leh yawˇ suh peuˬ ve chaw htaꞈ kʼawꞈ teꞈ tu la piˇ gʼa ve yoˬ. Yeˍsuˆ yaˇ miˇ ehˉ a shaꞈ 12 hkʼawꞈ leh mehˇ chawˇ ma ve yaˇ paˍ teˇ gʼaˇ htaꞈ kʼawꞈ teꞈ tu la piˇ ve yoˬ. (Maˍkuˆ 5:41, 42; Luˉkaꞈ 7:12-15) Oˇ ve hkʼawꞈ nawˉ, Yeˍsuˆ ve awˬ chawˇ Laˍzaˍruˆ suh peuˬ ve 4 nyi gaˬ˗oˬ ve htawˇ, Yeˍsuˆ yawˇ htaꞈ kʼawꞈ teꞈ tu la piˇ ve yoˬ. Yeˍsuˆ Gʼuiˬ sha geh bon lawˬ peuˬ hkʼawꞈ nawˉ kʼoˆ ve, “Laˍzaˍruˆ˗oˬ, tawˆ la˗o!” Hkʼe te leh, “suh peuˬ ve chaw oˇ ve lehˬ, tuˍ hpfuh awˬ hkʼaw lo tawˆ la ve yoˬ.” Leh Laˍzaˍruˆ teˇ pawˆ kʼawꞈ teꞈ la ve yoˬ! (Yoˇhanˬ 11:43, 44) Yawˇ ve yehˬ kʼa leh yawˇ ve awˬ chawˇ hkʼaˬ hkʼe taw taw ha lehˬ ve htaꞈ dawˇ nyi sheˍ!
3. Nawˬ haꞈ ve chaw suh˗oˬ ve kʼo aˬ htoꞈ ma dawˇ law kuiˬ cawˬ ve le?
Liꞈ hpu hkʼaw ka tiꞈ te taˍ laˇ ve, suh peuˬ ve chaw “kʼawꞈ teꞈ tu la tuˬ yoˬ.” (Tcuh yaˇ 24:15) Yeˍsuˆ miˬ guiˬ hkʼoˆ chehˇ htaˇ yawˇ kʼawꞈ teꞈ tu la piˇ ve chaw, mvuhˇ naw ma hkʼoˆ maˇ taˆ˗e. (Yoˇhanˬ 3:13) Yawˇ hui miˬ guiˬ hkʼoˆ gʼa kʼawꞈ teꞈ tu la ve pa taw ha lehˬ jaˇ ve yoˬ. Chi hkʼa shuˍ shuˍ, maˇ maw kʼo Yeˍsuˆ lehˬ chaw laiˉ hinˉ lanˬ gʼaˇ htaꞈ kʼawꞈ teꞈ tu la piˇ leh, yawˇ hui co co taiˍ taiˍ daꞈ jaˇ nyi sha jaˇ ve miˬ guiˬ hkʼoˆ lo gʼa teꞈ chehˇ tuˬ yoˬ. Yeˍsuˆ kʼoˆ ve, “tuˍ hpfuh awˬ hkʼaw chehˇ ve chaw hkʼa peu˗eˬ” yawˇ hui suh maw jaˇ˗oˬ ve htawˇ, Gʼuiˬ sha yawˇ hui htaꞈ tawnˇ taˍ leh, kʼawꞈ teꞈ tu la piˇ tuˬ yoˬ.—Yoˇhanˬ 5:28, 29.
Henˇ shiˍ maˇ la tuˬ
Yeˍsuˆ kanˇ paˆ cawˬ leh suh peuˬ ve chaw htaꞈ kʼawꞈ teꞈ tu la piˇ gʼa ve tehꞈ aˬ htoꞈ ma pa taw ngaˬ hui hkʼa dehꞈ yonˍ gʼa ve le, leh aˬ htoꞈ ma pa taw kʼawꞈ teꞈ tu la ve awˬ lawn nawˬ htaꞈ awˬ gʼaˇ leh dawˇ law kuiˬ peꞈ laˇ gʼa ve le, teˇ geh henˇ sheˍ.
4. Yeˍsuˆ suh peuˬ ve chaw htaꞈ kʼawꞈ teꞈ tu la piˇ gʼa ve
Yeˍsuˆ yawˇ ve awˬ chawˇ Laˍzaˍruˆ htaꞈ aˬ htoꞈ ma te piˇ ve teˇ geh nyi sheˍ. Yoˇhanˬ liꞈ 11:14, 38-44 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Laˍzaˍruˆ awˬ tehˬ tehˬ suh˗oˬ ve tehꞈ ngaˬ hui hkʼaˬ hkʼe te shiˍ ve le?—Kaˇ nanˉ ehˉ 39 hkʼaw nyi sheˍ.
-
Nawˇ dawˇ kʼo, Laˍzaˍruˆ suh peuˬ leh mvuhˇ naw ma hkʼoˆ taˆ˗e ve kʼo, Yeˍsuˆ yawˇ htaꞈ kuˬ yaꞈ leh miˬ guiˬ hkʼoˆ lo a shaꞈ kʼawꞈ teꞈ tcuh gaˇ˗aw laˇ?
5. Chaw laiˉ gʼaˇ kʼawꞈ teꞈ tu la tuˬ yoˬ!
Chiˇ mvuh ve liꞈ 37:29 leh Maꞈhtehˍ liꞈ 5:5 gʼaw leh na hkawˇ chi htaꞈ tawˇ yaw daꞈ sheˍ:
-
Chaw yaˇ laiˉ hinˉ lanˬ gʼaˇ kʼawꞈ teꞈ tu la htaˇ hkʼaˬ kaˬ lo chehˇ tuˬ le?
Yaˬhoˉvaˬ htaꞈ oˉ kʼoˍ pui ve chaw ceh tiˉ Yeˍsuˆ kʼawꞈ teꞈ tu la piˇ ve maˇ heˆ, awˬ nu ve chaw laiˉ gʼaˇ htaꞈ kaꞈ kʼawꞈ teꞈ tu la piˇ tuˬ yoˬ. Tcuh yaˇ liꞈ 24:15 gʼaw leh na hkawˇ chi htaꞈ tawˇ yaw daꞈ sheˍ:
-
Nawˬ a shu htaꞈ kʼawꞈ teꞈ tu la tcuh gaˇ ve le?
Awˬ pa yaˇ htaꞈ nawˍ tu piˇ gʼa ve hkʼe, Yeˍsuˆ kaꞈ suh peuˬ ve chaw htaꞈ hkʼa sha sha˗ehˬ kʼawꞈ teꞈ tu la piˇ gʼa ve
6. Gʼa kʼawꞈ teꞈ tu la ve awˬ lawn nawˬ htaꞈ awˬ gʼaˇ leh dawˇ law kuiˬ peꞈ laˇ gʼa ve
Chaw laiˉ gʼaˇ Liꞈ hpu hkʼaw Yaˍiˉruˆ ve yaˇ miˇ ve awˬ lawn gʼaw htaˇ, awˬ gʼaˇ gʼa ve yoˬ. Awˬ tehˬ ve awˬ lawn chi Luˉkaꞈ liꞈ 8:40-42, 49-56 hkʼaw gʼaw sheˍ.
Yeˍsuˆ Yaˍiˉruˆ ve yaˇ miˇ htaꞈ maˇ kʼawꞈ teꞈ tu la piˇ sheˍ htaˇ, yawˇ Yaˍiˉruˆ htaꞈ kʼoˆ piˇ ve, “taˇ kawˆ. Yonˍ ve tiˉ te˗o.” (Kaˇ nanˉ ehˉ 50 hkʼaw nyi sheˍ.) Na hkawˇ chi teˇ hpaˍ htaꞈ tawˇ yaw daꞈ sheˍ:
-
Nawˬ haꞈ ve chaw suh kʼai htaˇ, kʼawꞈ teꞈ tu la ve dawˇ law kuiˬ chi nawˬ htaꞈ hkʼaˬ hkʼe ga laˇ gʼa ve le?
-
Nawˬ ve a shaꞈ teꞈ hkʼaˇ hkʼaw kawˆ tuˬ cawˬ htaˇ, kʼawꞈ teꞈ tu la ve dawˇ law kuiˬ chi nawˬ htaꞈ hkʼaˬ hkʼe ga laˇ gʼa ve le?
VDO hpaw leh na hkawˇ chi htaꞈ tawˇ yaw daꞈ sheˍ:
-
Kʼawꞈ teꞈ tu la ve dawˇ law kuiˬ lehˬ Fe˗le˗se˗tiˆ ve awˬ pa awˬ e htaꞈ hkʼaˬ hkʼe te awˬ gʼaˇ piˇ ve le?
Chaw teˇ hpaˍ kʼoˆ ve: “Suh peuˬ ve chaw kʼawꞈ teꞈ tu la maˇ gʼa taˬ.”
-
Nawˬ hkʼaˬ hkʼe dawˇ ve le?
-
Kʼawꞈ teꞈ tu la ve awˬ lawn awˬ tehˬ hpehꞈ gʼa ve tehꞈ, nawˬ Liꞈ hpu hkʼaˬ ve teˇ tawn hpeuꞈ maˍ piˇ tuˬ le?
A yeˇ uiˍ ve awˬ lawn
Chaw laiˉ hinˉ lanˬ gʼaˇ gʼa kʼawꞈ teꞈ tu la tuˬ yoˬ tehꞈ, Liꞈ hpu hkʼaw ka tiꞈ te taˍ laˇ ve yoˬ. Yaˬhoˉvaˬ yawˇ hui htaꞈ kʼawꞈ teꞈ tuˬ la piˇ gaˇ leh, chi hkʼe te tuˬ yawˇ Yeˍsuˆ htaꞈ kanˇ paˆ piˇ ve yoˬ.
Kʼawꞈ gʼaꞈ na ve
-
Suh peuˬ ve chaw htaꞈ kʼawꞈ teꞈ tu la piˇ ve awˬ lawn htaꞈ Yaˬhoˉvaˬ leh Yeˍsuˆ hkʼaˬ hkʼe dawˇ ve le?
-
Chaw laiˉ hinˉ lanˬ gʼaˇ kʼawꞈ teꞈ tu la htaˇ hkʼaˬ kaˬ lo chehˇ tuˬ le, mvuhˇ naw ma hkʼoˆ maˇ heˆ leh miˬ guiˬ hkʼoˆ lo laˇ? Aˬ htoꞈ ma pa taw nawˬ chi hkʼe kʼoˆ ve le?
-
Nawˬ haꞈ ve chaw kʼawꞈ teꞈ tu la gʼa ve tehꞈ, aˬ htoꞈ ma pa taw nawˬ chi hkʼe yonˍ ve le?
Kʼawꞈ caˉ nyi gʼa ve
Nawˬ nyi ma luˬ htaˇ aˬ htoꞈ ma te gʼa ve le?
Liꞈ hpu hkʼaw ve awˬ liˇ awˬ hkʼaˇ nyi ma luˬ chehˇ ve chaw htaꞈ awˬ tehˬ ga piˇ gʼa˗aw laˇ?
Haꞈ ve chaw suh kʼai htaˇ, yaˇ ehˉ htaꞈ aˬ htoꞈ ma ga piˇ gʼa ve le?
Teˇ gʼaˇ le le kʼawꞈ teꞈ tu la leh mvuhˇ naw ma hkʼoˆ chehˇ tuˬ laˇ? Leh a shu maˇ gʼa kʼawꞈ teꞈ tu la ve le?
“Kʼawꞈ teꞈ tu la ve lehˬ aˬ htoꞈ ma kʼoˆ gaˇ ve le?” (Vehˆsaiˉ hkʼaw ve awˬ lawn)
You May Also Like
NGAˬ HUI HTAꞈ CAˉ DAꞈ VE AWˬ LAWN
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ ve hk’aˬ hk’e te henˇ ve le?
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ tuˬ nawˬ Liꞈ hpu hk’aˬ ve teˇ maˬ yehˇ ve kaꞈ hpehꞈ ve yoˬ. Awˬ chawˇ maˇ heˆ leh yehˬ k’a hk’aw ve chaw htaꞈ Liꞈ hpu teˇ geh henˇ tuˬ jehˬ piˇ kaꞈ g’a ve yoˬ.
