Awˬ lawn 31
Gʼuiˬ sha ve mvuhˇ miˬ lehˬ aˬ htoꞈ ma le?
Liꞈ hpu hkʼaw a yeˇ uiˍ jaˇ ve teˇ lawn lehˬ Gʼuiˬ sha ve mvuhˇ miˬ yoˬ. Yaˬhoˉvaˬ lehˬ mvuhˇ miˬ chi htaꞈ yehˇ leh yawˇ awˉ lawˉ htaˇ dawˇ teh taˍ ve hkʼe, miˬ guiˬ htaꞈ daꞈ jaˇ nyi sha jaˇ ve Paˍraˍdiˇsuˆ hpehꞈ tcuh tuˬ yoˬ. Gʼuiˬ sha ve mvuhˇ miˬ lehˬ aˬ htoꞈ ma le? Chi teˇ hkui Gʼuiˬ sha ve mvuhˇ miˬ uˉ peunˍ chehˇ ve tehꞈ, ngaˬ hui hkʼaˬ hkʼe te shiˍ gʼa ve le? Mvuhˇ miˬ chi aˬ htoꞈ ma te˗oˬ ve le? Leh awˬ gʼuˇ suhˍ hpawˇ aˬ htoꞈ ma te tuˬ ve le? Na hkawˇ chi teˇ hpaˍ htaꞈ chi teˇ lawn hkʼaw leh awˬ gʼuˇ suhˍ nyiˇ lawn hkʼaw hkʼawꞈ laˇ tuˬ yoˬ.
1. Gʼuiˬ sha ve mvuhˇ miˬ lehˬ aˬ htoꞈ ma le, leh mvuhˇ miˬ chi hkʼaw a shu Jawˇmawˇ te ve le?
Gʼuiˬ sha ve mvuhˇ miˬ lehˬ Yaˬhoˉvaˬ Gʼuiˬ sha teh taˍ ve uˉ peunˍ ve awˬ moˍ hpehꞈ ve yoˬ. Yeˍsuˆ lehˬ mvuhˇ naw ma hkʼoˆ chehˇ leh Gʼuiˬ sha ve mvuhˇ miˬ hkʼaw Jawˇmawˇ te leh uˉ peunˍ chehˇ ve yoˬ. (Maꞈhtehˍ 4:17; Yoˇhanˬ 18:36) Liꞈ hpu hkʼaw kʼoˆ taˍ ve, ‘yawˇ lehˬ co co taiˍ taiˍ uˉ peunˍ tuˬ yoˬ.’ (Luˉkaꞈ 1:32, 33) Gʼuiˬ sha ve mvuhˇ miˬ hkʼaw Yeˍsuˆ Jawˇmawˇ te leh, yawˇ miˬ guiˬ yaˇ hkʼa peu˗eˬ htaꞈ uˉ peunˍ tuˬ yoˬ.
2. Yeˍsuˆ geh a shu uˉ peunˍ tuˬ le?
Yeˍsuˆ teˇ gʼaˇ ceh tiˉ uˉ peunˍ ve maˇ heˆ. Yawˇ geh uˉ peunˍ ve chaw hui lehˬ, ‘awˬ ceuˬ awˬ hkʼaˇ teˇ ceuˬ le le, tawˇ hkawˇ teˇ ceuˬ le le chaw teˇ ceuˬ le le, mvuhˇ miˬ teˇ peˆ le le awˬ hkʼaw lo laˬ ve chaw hpehꞈ ve yoˬ. Yawˇ hui lehˬ miˬ guiˬ htaꞈ gʼa uˉ peunˍ tuˬ yoˬ.’ (Hpeuꞈ maˍ ve 5:9, 10) Yeˍsuˆ geh uˉ peunˍ ve chaw hkʼaˬ nyiˇ gʼaˇ cawˬ ve le? Yeˍsuˆ ve awˬ laꞈ gʼawˇ laiˉ lanˬ gʼaˇ cawˬ ve htawˇ, 144,000 gʼaˇ ceh tiˉ mvuhˇ naw ma hkʼoˆ taˆ˗e leh Yeˍsuˆ geh gʼa uˉ peunˍ ve yoˬ. (Hpeuꞈ maˍ ve 14:1-4 gʼaw sheˍ.) Awˬ nu ve Hkriꞈ yaˇ lehˬ miˬ guiˬ hkʼoˆ chehˇ leh Gʼuiˬ sha ve mvuhˇ miˬ yaˇ hpehꞈ tuˬ yoˬ.—Chiˇ mvuh ve 37:29.
3. Aˬ htoꞈ ma pa taw Gʼuiˬ sha ve mvuhˇ miˬ lehˬ chaw yaˇ uˉ peunˍ ve aꞈ kehˉ daꞈ ve le?
Chaw yaˇ uˉ peunˍ paˍ coˇ caˇ leh daꞈ ve laiˉ ceuˬ te ve htawˇ, yawˇ hui dawˇ teh taˍ ve hkʼe teˇ ceuˬ le le te tuˬ kanˇ paˆ maˇ cawˬ. Chi hkʼoˆ kaꞈ, yawˇ hui awˬ tan uˉ peunˍ la ve chaw teˇ hpaˍ lehˬ a shu yawˇ awˬ to pon tiˉ dawˇ nyi leh mvuhˇ miˬ yaˇ htaꞈ maˇ ga piˇ. Yaꞈ hkʼaˇ, Gʼuiˬ sha ve mvuhˇ miˬ hkʼaw uˉ peunˍ paˍ oˇ hkʼe maˇ hpehꞈ. Yeˍsuˆ awˬ tan teˇ gʼaˇ kaꞈ uˉ peunˍ gʼa tuˬ ve maˇ heˆ. Liꞈ hpu hkʼaw kʼoˆ laˇ ve, “Gʼuiˬ sha lehˬ, mvuhˇ miˬ lonˉ teˇ peˆ kʼawꞈ cawˬ la piˇ tuˬ yoˬ.” Leh mvuhˇ miˬ chi htaꞈ te luˬ piˇ maˇ gʼa. (Daˍyeˍlaˆ 2:44) Yeˍsuˆ miˬ guiˬ hkʼa peu˗eˬ htaꞈ uˉ peunˍ leh mvuhˇ miˬ yaˇ teˇ gʼaˇ le le htaꞈ hkʼa shuˍ te piˇ tuˬ yoˬ. Yawˇ lehˬ haꞈ pehnˇ ve, ha kʼaˉ puiˉ ve, leh hteˇ ve cawˇ ve cawˬ ve yoˬ. Chi htaꞈ pa taw, yawˇ mvuhˇ miˬ yaˇ htaꞈ haꞈ daꞈ ve, ga daꞈ ve, leh hteˇ ve cawˇ ve chaw hpehꞈ tuˬ kaꞈ maˍ piˇ tuˬ yoˬ.—Iˉsaˍyaˆ 11:9 gʼaw sheˍ.
Henˇ shiˍ maˇ la tuˬ
Aˬ htoꞈ ma pa taw Gʼuiˬ sha ve mvuhˇ miˬ lehˬ chaw yaˇ uˉ peunˍ ve aꞈ kehˉ daꞈ ve le, teˇ geh henˇ sheˍ.
4. Gʼuiˬ sha ve mvuhˇ miˬ lehˬ miˬ guiˬ hkʼa peu˗eˬ htaꞈ uˉ peunˍ tuˬ kanˇ paˆ cawˬ ve
Yeˍsuˆ lehˬ uˉ peunˍ jaw ve chaw yaˇ teˇ gʼaˇ le le aꞈ kehˉ kanˇ paˆ cawˬ ve yoˬ. Maꞈhtehˍ liꞈ 28:18 gʼaw leh na hkawˇ chi htaꞈ tawˇ yaw daꞈ sheˍ:
-
Aˬ htoꞈ ma pa taw Yeˍsuˆ lehˬ uˉ peunˍ jaw ve chaw yaˇ teˇ gʼaˇ le le aꞈ kehˉ kanˇ paˆ cawˬ ve le?
Chaw yaˇ uˉ peunˍ ve lehˬ awˬ moˍ pa hkʼeh jaˇ, leh a shu yawˇ ve mvuhˇ miˬ hkʼaw ceh tiˉ uˉ peunˍ gʼa ve yoˬ. Gʼuiˬ sha ve mvuhˇ miˬ kʼo˗ehꞈ? Daˍyeˍlaˆ liꞈ 7:14 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Aˬ htoꞈ ma pa taw Gʼuiˬ sha ve mvuhˇ miˬ “co co taiˍ taiˍ yeˬ chehˇ tuˬ ve” lehˬ daꞈ ve le?
-
Aˬ htoꞈ ma pa taw Gʼuiˬ sha ve mvuhˇ miˬ, miˬ guiˬ hkʼa peu˗eˬ htaꞈ uˉ peunˍ ve lehˬ daꞈ ve le?
5. Chaw yaˇ uˉ peunˍ ve awˬ tan Gʼuiˬ sha ve mvuhˇ miˬ uˉ peunˍ la ve
Aˬ htoꞈ ma pa taw chaw yaˇ uˉ peunˍ ve awˬ tan Gʼuiˬ sha ve mvuhˇ miˬ gʼa uˉ peunˍ la ve le? VDO hpaw leh na hkawˇ chi htaꞈ tawˇ yaw daꞈ sheˍ:
-
Chaw yaˇ uˉ peunˍ ve pa taw hkʼaˬ hkʼe hpehꞈ ve le?
Cuˇ yiˍ piˇ ve liꞈ 8:9 gʼaw leh na hkawˇ chi htaꞈ tawˇ yaw daꞈ sheˍ:
-
Nawˬ dawˇ kʼo, chaw yaˇ uˉ peunˍ ve awˬ tan Gʼuiˬ sha ve mvuhˇ miˬ uˉ peunˍ la ve lehˬ daꞈ˗aˬ laˇ? Aˬ htoꞈ ma pa taw le?
6. Gʼuiˬ sha ve mvuhˇ miˬ hkʼaw uˉ peunˍ paˍ teˇ hpaˍ ngaˬ hui htaꞈ ha kʼaˉ laˇ ve
Ngaˬ hui ve Jawˇmawˇ Yeˍsuˆ chaw yaˇ hpehꞈ jaw ve pa taw, ngaˬ hui ‘awˬ gʼaˇ nuˇ ve teˇ yanˇ, yawˇ maˇ ha kʼaˉ laˇ ve maˇ heˆ.’ (Heˍbrehˇ 4:15) Yaˬhoˉvaˬ lehˬ ka tiꞈ yeˬ ve hawˉ hkʼaˆ yaˇ miˇ 144,000 gʼaˇ htaꞈ leuˆ yuˬ leh Yeˍsuˆ geh uˉ peunˍ tcuh ve yoˬ. Yawˇ hui ‘awˬ ceuˬ awˬ hkʼaˇ teˇ ceuˬ le le, tawˇ hkawˇ teˇ ceuˬ le le, chaw teˇ ceuˬ le le, leh mvuhˇ miˬ teˇ peˆ le le’ awˬ hkʼaw lo laˬ ve yoˬ.—Hpeuꞈ maˍ ve 5:9.
-
Nawˬ dawˇ kʼo, Yeˍsuˆ leh yawˇ geh uˉ peunˍ ve chaw teˇ gʼaˇ le le, chaw yaˇ hpehꞈ jaw ve daꞈ˗aˬ laˇ? Aˬ htoꞈ ma pa taw le?
Yaˬhoˉvaˬ lehˬ chaw ceuˬ maˇ shuˍ daꞈ ve hawˉ hkʼaˆ yaˇ miˇ htaꞈ leuˆ yuˬ leh Yeˍsuˆ geh uˉ peunˍ tcuh
7. Gʼuiˬ sha ve awˬ liˇ tawˇ hkawˇ lehˬ chaw yaˇ ve awˬ liˇ tawˇ hkawˇ aꞈ kehˉ daꞈ ve
Chaw yaˇ uˉ peunˍ ve lehˬ, mvuhˇ miˬ yaˇ htaꞈ haꞈ shaˉ tuˬ awˬ liˇ tawˇ hkawˇ cawˬ ve yoˬ. Gʼuiˬ sha ve mvuhˇ miˬ kaꞈ awˬ liˇ tawˇ hkawˇ cawˬ leh mvuhˇ miˬ yaˇ gʼa gʼaꞈ te ve yoˬ. 1 Kawˇrenˍhtuˆ liꞈ 6:9-11 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Nawˬ dawˇ kʼo, chaw yaˇ teˇ gʼaˇ le le Gʼuiˬ sha ve awˬ liˇ tawˇ hkawˇ htaꞈ gʼaꞈ te htaˇ, miˬ guiˬ chi hkʼaˬ hkʼe hpehꞈ tuˬ le? a
-
Nawˬ dawˇ kʼo, Yaˬhoˉvaˬ lehˬ yawˇ uˉ peunˍ ve awˬ hawˉ lo chehˇ ve chaw htaꞈ, yawˇ ve awˬ liˇ tawˇ hkawˇ gʼaꞈ te˗o tehꞈ kʼoˆ piˇ tuˬ a hkaw˗anˬ cawˬ˗aw laˇ? Aˬ htoꞈ ma pa taw le?
-
Chaw yaˇ a shu yawˇ awˬ to htaꞈ pa leh Gʼuiˬ sha ve awˬ liˇ tawˇ hkawˇ htaꞈ gʼaꞈ te gʼa ve tehꞈ, ngaˬ hui hkʼaˬ hkʼe te shiˍ gʼa ve le?—Kaˇ nanˉ ehˉ 11 hkʼaw nyi sheˍ.
Chaw yaˇ uˉ peunˍ ve lehˬ mvuhˇ miˬ yaˇ htaꞈ haꞈ shaˉ tuˬ awˬ liˇ tawˇ hkawˇ cawˬ ve yoˬ. Gʼuiˬ sha ve mvuhˇ miˬ kaꞈ mvuhˇ miˬ yaˇ htaꞈ haꞈ shaˉ tuˬ awˬ liˇ tawˇ hkawˇ cawˬ ve yoˬ. Yaꞈ hkʼaˇ, Gʼuiˬ sha ve awˬ liˇ tawˇ hkawˇ lehˬ chaw yaˇ ve awˬ liˇ tawˇ hkawˇ aꞈ kehˉ daꞈ ve
Chaw teˇ hpaˍ na nyi laˇ ve: “Gʼuiˬ sha ve mvuhˇ miˬ lehˬ aˬ htoꞈ ma le?”
-
Nawˬ hkʼaˬ hkʼe hkʼawꞈ piˇ tuˬ le?
A yeˇ uiˍ ve awˬ lawn
Gʼuiˬ sha ve mvuhˇ miˬ lehˬ mvuhˇ naw ma hkʼoˆ uˉ peunˍ ve awˬ moˍ hpehꞈ leh miˬ guiˬ hkʼa peu˗eˬ htaꞈ uˉ peunˍ tuˬ yoˬ.
Kʼawꞈ gʼaꞈ na ve
-
Gʼuiˬ sha ve mvuhˇ miˬ hkʼaw a shu gʼa uˉ peunˍ ve le?
-
Aˬ htoꞈ ma pa taw Gʼuiˬ sha ve mvuhˇ miˬ lehˬ chaw yaˇ uˉ peunˍ ve aꞈ kehˉ daꞈ ve le?
-
Yaˬhoˉvaˬ yawˇ ve mvuhˇ miˬ yaˇ htaꞈ aˬ htoꞈ ma te tcuh gaˇ ve le?
Kʼawꞈ caˉ nyi gʼa ve
Gʼuiˬ sha ve mvuhˇ miˬ hkʼaˬ kaˬ lo cawˬ ve le, Yeˍsuˆ maˍ laˇ ve htaꞈ gʼaw nyi sheˍ.
“Gʼuiˬ sha ve mvuhˇ miˬ lehˬ chaw yaˇ ve nyi ma hkʼaw cawˬ ve laˇ?” (Vehˆsaiˉ hkʼaw ve awˬ lawn)
Aˬ htoꞈ ma pa taw Yaˬhoˉvaˬ ve Shaˉhkiˆhkanˍ ve chaw lehˬ chaw yaˇ uˉ peunˍ ve aꞈ kehˉ Gʼuiˬ sha ve mvuhˇ miˬ htaꞈ ka tiꞈ yeˬ ve le?
Yaˬhoˉvaˬ lehˬ Yeˍsuˆ geh uˉ peunˍ tcuh ve chaw 144,000 gʼaˇ htaꞈ caˉ daꞈ ve, Liꞈ hpu hkʼaw hkʼaˬ hkʼe kʼoˆ laˇ ve le?
“A shu mvuhˇ naw ma hkʼoˆ gʼa taˆ˗e ve le?” (Vehˆsaiˉ hkʼaw ve awˬ lawn)
Gʼuiˬ sha ceh tiˉ miˬ guiˬ chi htaꞈ hteˇ ve cawˇ ve cawˬ tuˬ te laˇ gʼa ve tehꞈ, htawnˍ hkʼaw chehˇ ve yaˇ miˇ teˇ gʼaˇ hkʼa dehꞈ yonˍ gʼa tuˬ aˬ htoꞈ ma te piˇ ve le?
“Maˇ hteˇ maˇ cawˇ ve htaꞈ hkʼaˬ hkʼe te gu tuˬ ngaˬ na gʼa˗oˬ” (Tu loˬ! 2011 hkʼawꞈ ha pa 11 maˬ)
a Gʼuiˬ sha ve awˬ liˇ tawˇ hkawˇ teˇ hpaˍ hpaˍ htaꞈ caˉ daꞈ ve Awˬ tawn 3 hkʼaw gʼa henˇ tuˬ yoˬ.
You May Also Like
NGAˬ HUI HTAꞈ CAˉ DAꞈ VE AWˬ LAWN
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ ve hk’aˬ hk’e te henˇ ve le?
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ tuˬ nawˬ Liꞈ hpu hk’aˬ ve teˇ maˬ yehˇ ve kaꞈ hpehꞈ ve yoˬ. Awˬ chawˇ maˇ heˆ leh yehˬ k’a hk’aw ve chaw htaꞈ Liꞈ hpu teˇ geh henˇ tuˬ jehˬ piˇ kaꞈ g’a ve yoˬ.
