Awˬ lawn 33
Gʼuiˬ sha ve mvuhˇ miˬ aˬ htoꞈ ma te tuˬ le?
Gʼuiˬ sha ve mvuhˇ miˬ mvuhˇ naw ma hkʼoˆ uˉ peunˍ chehˇ˗oˬ. Maˇ maw kʼo mvuhˇ miˬ chi miˬ guiˬ htaꞈ uˉ peunˍ la leh miˬ guiˬ hkʼoˆ hpehꞈ chehˇ ve awˬ ceuˬ daꞈ la tuˬ te laˇ tuˬ yoˬ. Gʼuiˬ sha ve mvuhˇ miˬ lehˬ miˬ guiˬ hkʼoˆ lo uˉ peunˍ la htaˇ, daꞈ ve awˬ ceuˬ aˬ htoꞈ ma te laˇ tuˬ le, teˇ geh henˇ sheˍ.
1. Miˬ guiˬ hkʼoˆ gawˬ lehˍ ve leh hteˇ ve cawˇ ve cawˬ tuˬ, Gʼuiˬ sha ve mvuhˇ miˬ hkʼaˬ hkʼe te tuˬ le?
Gʼuiˬ sha ve mvuhˇ miˬ hkʼaw Jawˇmawˇ Yeˍsuˆ lehˬ, haiˬ ve chaw leh mvuhˇ miˬ uˉ peunˍ ve awˬ moˍ hkʼa peu˗eˬ htaꞈ Aˍmaˍgeˍdonˍ maꞈ hkʼaw te luˬ piˇ tuˬ yoˬ. (Hpeuꞈ maˍ ve 16:14, 16) Oˇ ve teˇ yanˇ, Liꞈ hpu hkʼaw ka tiꞈ te taˍ ve hkʼe, “haiˬ ve chaw teˇ hpaˍ lehˬ, teˇ hkui tiˉ mehˉ kʼai tuˬ yoˬ” tehꞈ, kʼoˆ taˍ ve awˬ tehˬ hpehꞈ la tuˬ yoˬ. (Chiˇ mvuh ve 37:10) Gʼuiˬ sha ve mvuhˇ miˬ hkʼaw ve Jawˇmawˇ Yeˍsuˆ lehˬ miˬ guiˬ hkʼoˆ dawˇ sha gawˬ lehˍ cawˬ tuˬ leh, hteˇ ve cawˇ ve cawˬ tuˬ te laˇ tuˬ yoˬ.—Iˉsaˍyaˆ 11:4 gʼaw sheˍ.
2. Gʼuiˬ sha ve a loˍ miˬ guiˬ hkʼoˆ biˇ la htaˇ, chaw yaˇ ve a shaꞈ teꞈ hkʼaˇ hkʼaˬ hkʼe hpehꞈ tuˬ le?
Gʼuiˬ sha ve mvuhˇ miˬ lehˬ miˬ guiˬ hkʼoˆ lo uˉ peunˍ la htaˇ, ‘hteˇ ve cawˇ ve chaw hui lehˬ, miˬ guiˬ hkʼoˆ co co taiˍ taiˍ gʼa chehˇ tuˬ yoˬ.’ (Chiˇ mvuh ve 37:29) Miˬ guiˬ hkʼoˆ chehˇ ve chaw yaˇ teˇ gʼaˇ le le hteˇ ve cawˇ ve chaw hpehꞈ ve, Yaˬhoˉvaˬ htaꞈ haꞈ ve, leh teˇ gʼaˇ leh teˇ gʼaˇ haꞈ daꞈ ve htaꞈ dawˇ nyi sheˍ! Teˇ gʼaˇ kaꞈ naˬ tuˬ ve maˇ heˆ. Leh teˇ gʼaˇ le le co co taiˍ taiˍ gʼa teꞈ chehˇ tuˬ yoˬ.
3. Haiˬ ve chaw htaꞈ te luˬ peuˬ hkʼawꞈ nawˉ, Gʼuiˬ sha ve mvuhˇ miˬ aˬ htoꞈ ma te tuˬ le?
Haiˬ ve chaw htaꞈ te luˬ peuˬ hkʼawꞈ nawˉ, Yeˍsuˆ Jawˇmawˇ te leh 1,000 hkʼawꞈ uˉ peunˍ tuˬ yoˬ. Awˬ yanˇ oˇ ve hkʼaw, Yeˍsuˆ leh yawˇ geh uˉ peunˍ ve 144,000 gʼaˇ lehˬ, miˬ guiˬ hkʼoˆ chehˇ ve chaw yaˇ htaꞈ biˇ ve chaw kʼawꞈ hpehꞈ la tuˬ te piˇ tuˬ yoˬ. 1,000 hkʼawꞈ peuˬ hkʼawꞈ nawˉ, miˬ guiˬ hkʼoˆ daꞈ jaˇ nyi sha jaˇ ve Paˍraˍdiˇsuˆ kʼawꞈ hpehꞈ la leh, chaw yaˇ teˇ gʼaˇ le le Yaˬhoˉvaˬ ve awˬ liˇ tawˇ hkawˇ htaꞈ na yuˬ ve pa taw ha lehˬ jaˇ tuˬ yoˬ. Peuˬ hkʼawꞈ nawˉ Yeˍsuˆ lehˬ yawˇ uˉ peunˍ ve mvuhˇ miˬ, Awˬ pa Yaˬhoˉvaˬ htaꞈ kʼawꞈ hkʼawꞈ piˇ tuˬ yoˬ. Awˬ leh meuˇ gaˬ htaˇ, Yaˬhoˉvaˬ ve awˬ meh lehˬ yawˆ yan ve htaꞈ gʼa tuˬ yoˬ. (Maꞈhtehˍ 6:9, 10) Yaˬhoˉvaˬ lehˬ daꞈ jaˇ ve Uˉ peunˍ shehˍ hpaˇ hpehꞈ leh, chaw yaˇ htaꞈ a yeˇ hkʼa dehꞈ te piˇ ve tehꞈ hkʼa tawˍ lehˆ gʼa mawˬ tuˬ yoˬ. Peuˬ hkʼawꞈ nawˉ, Yaˬhoˉvaˬ lehˬ Saˍtanˍ, neˇ teˇ hpaˍ, leh Yaˬhoˉvaˬ htaꞈ hpfuhˆ ve chaw hkʼa peu˗eˬ htaꞈ te luˬ piˇ tuˬ yoˬ. (Hpeuꞈ maˍ ve 20:7-10) Gʼuiˬ sha ve mvuhˇ miˬ te laˇ ve daꞈ jaˇ ve awˬ ceuˬ hkʼa peu˗eˬ co co taiˍ taiˍ yeˬ chehˇ tuˬ yoˬ.
Henˇ shiˍ maˇ la tuˬ
Liꞈ hpu hkʼaw awˬ gʼuˇ suhˍ hpawˇ ngaˬ hui awˬ pon ka tiꞈ te taˍ laˇ ve hkʼa peu˗eˬ htaꞈ, Gʼuiˬ sha lehˬ yawˇ ve mvuhˇ miˬ yehˇ leh te biˇ tuˬ yoˬ tehꞈ, aˬ htoꞈ ma pa taw ngaˬ hui yonˍ gʼa ve le, teˇ geh henˇ sheˍ.
4. Gʼuiˬ sha ve mvuhˇ miˬ lehˬ chaw yaˇ uˉ peunˍ ve htaꞈ te luˬ piˇ tuˬ yoˬ
“Chaw yaˇ teˇ hpaˍ hpaˍ kanˇ paˆ cawˬ leh teˇ hpaˍ hpaˍ yawˇ hui awˬ hawˉ lo gʼa hkanˍ chehˇ taˍ ve yoˬ.” (Cuˇ yiˍ piˇ ve 8:9) Yaˬhoˉvaˬ yawˇ ve mvuhˇ miˬ htaꞈ yehˇ leh maˇ hteˇ maˇ cawˇ ve chi htaꞈ te luˬ piˇ tuˬ yoˬ.
Daˍyeˍlaˆ liꞈ 2:44 leh 2 Hteˇsaˍlawˇniˆ liꞈ 1:6-8 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Yaˬhoˉvaˬ leh yawˇ ve Yaˇ paˍ Yeˍsuˆ lehˬ, chaw yaˇ uˉ peunˍ ve awˬ moˍ hkʼa peu˗eˬ leh yawˇ hui hpawˇ chehˇ ve chaw hkʼa peu˗eˬ htaꞈ hkʼaˬ hkʼe te piˇ tuˬ le?
-
Henˇ kʼai peuˬ ve hkʼe, Yaˬhoˉvaˬ leh Yeˍsuˆ hteˇ ve cawˇ ve hkʼaw te tuˬ ve tehꞈ, aˬ htoꞈ ma pa taw nawˬ chi hkʼe yonˍ ve le?
5. Yeˍsuˆ lehˬ daꞈ jaˇ ve Jawˇmawˇ hpehꞈ ve
Gʼuiˬ sha ve mvuhˇ miˬ hkʼaw ve Jawˇmawˇ Yeˍsuˆ lehˬ, mvuhˇ miˬ yaˇ awˬ pon awˬ bon cawˬ ve laiˉ ceuˬ te piˇ tuˬ yoˬ. Yeˍsuˆ chaw yaˇ htaꞈ ga piˇ gaˇ ve, leh yawˇ chi hkʼe te gʼa tuˬ Gʼuiˬ sha yawˇ htaꞈ kanˇ paˆ piˇ ve tehꞈ Yeˍsuˆ hkʼaˬ hkʼe hpeuꞈ maw laˇ ve le? VDO hpaw sheˍ.
Yeˍsuˆ miˬ guiˬ hkʼoˆ chehˇ htaˇ, yawˇ te ve awˬ ceuˬ lehˬ awˬ gʼuˇ suhˍ hpawˇ kʼo, Gʼuiˬ sha ve mvuhˇ miˬ kaꞈ aˬ htoꞈ ma te tuˬ ve tehꞈ hpeuꞈ maw laˇ ve yoˬ. Awˬ hawˉ lo cawˬ ve Liꞈ hpu awˬ tawn teˇ hpaˍ htaꞈ gʼaw nyi sheˍ. Awˬ gʼuˇ suhˍ hpawˇ hpehꞈ la tuˬ ve hkʼaˬ ve teˇ ceuˬ nawˬ awˬ tehˬ hpehꞈ la tcuh gaˇ jaˇ ve le?
|
Yeˍsuˆ miˬ guiˬ hkʼoˆ chehˇ htaˇ . . . |
Yeˍsuˆ uˉ peunˍ ve awˬ hawˉ lo . . . |
|---|---|
|
|
|
|
|
|
|
|
6. Awˬ gʼuˇ suhˍ hpawˇ Gʼuiˬ sha ve mvuhˇ miˬ daꞈ jaˇ ve awˬ ceuˬ te laˇ tuˬ yoˬ
Yaˬhoˉvaˬ ve mvuhˇ miˬ lehˬ chaw yaˇ awˬ pon yawˇ awˉ lawˉ htaˇ dawˇ teh taˍ ve hkʼe, awˬ tehˬ hpehꞈ la tcuh tuˬ yoˬ. Chaw yaˇ lehˬ daꞈ jaˇ nyi sha jaˇ ve miˬ guiˬ hkʼoˆ lo co co taiˍ taiˍ gʼa teꞈ chehˇ tuˬ yoˬ. Yeˍsuˆ lehˬ Yaˬhoˉvaˬ dawˇ teh taˍ ve awˬ ceuˬ htaꞈ hkʼaˬ hkʼe te biˇ ve htaꞈ nyi tuˬ, VDO hpaw sheˍ.
Chiˇ mvuh ve liꞈ 145:15, 16 gʼaw leh na hkawˇ chi htaꞈ tawˇ yaw daꞈ sheˍ:
-
Yaˬhoˉvaˬ lehˬ ‘a shaꞈ hkʼa teꞈ chehˇ ve awˬ ceuˬ hkʼa peu˗eˬ htaꞈ, yawˇ hui nyi hkʼaˇ suh htaˇ hkʼa gaˬ yawˇ hui loˍ ve awˬ ceuˬ teˇ hpaˍ’ htaꞈ piˇ tuˬ yoˬ tehꞈ, nawˬ shiˍ htaˇ hkʼaˬ hkʼe dawˇ ve le?
Chaw teˇ hpaˍ kʼoˆ ve: “Mvuhˇ miˬ uˉ peunˍ ve awˬ moˍ daꞈ ve kʼo, shoꞈ shaꞈ ve teˇ ceuˬ le le peuˬ kʼai tuˬ yoˬ.”
-
Chaw yaˇ uˉ peunˍ ve awˬ moˍ te maˇ gʼa ve awˬ ceuˬ htaꞈ Gʼuiˬ sha ve mvuhˇ miˬ aˬ htoꞈ ma te tuˬ le?
A yeˇ uiˍ ve awˬ lawn
Gʼuiˬ sha ve mvuhˇ miˬ lehˬ Gʼuiˬ sha dawˇ teh taˍ ve awˬ ceuˬ htaꞈ biˇ la piˇ leh Paˍraˍdiˇsuˆ hpehꞈ la tcuh tuˬ yoˬ. Oˇ kaˬ lo hteˇ ve cawˇ ve chaw ceh tiˉ chehˇ leh Yaˬhoˉvaˬ htaꞈ co co taiˍ taiˍ oˉ kʼoˍ pui tuˬ yoˬ.
Kʼawꞈ gʼaꞈ na ve
-
Yaˬhoˉvaˬ ve awˬ meh hkʼaˬ htaˆ kaꞈ yawˆ yan ve gʼa tuˬ, Gʼuiˬ sha ve mvuhˇ miˬ aˬ htoꞈ ma te tuˬ le?
-
Gʼuiˬ sha ve mvuhˇ miˬ lehˬ Liꞈ hpu hkʼaw ka tiꞈ te taˍ laˇ ve hkʼa peu˗eˬ htaꞈ awˬ tehˬ te biˇ tuˬ yoˬ tehꞈ, aˬ htoꞈ ma pa taw ngaˬ hui yonˍ gʼa ve le?
-
Gʼuiˬ sha ve mvuhˇ miˬ te laˇ tuˬ ve daꞈ jaˇ ve awˬ ceuˬ hkʼa peu˗eˬ, hkʼaˬ ve teˇ maˬ nawˬ awˬ tehˬ hpehꞈ la tcuh gaˇ jaˇ ve le?
Kʼawꞈ caˉ nyi gʼa ve
Aˍmaˍgeˍdonˍ aˬ htoꞈ ma kʼoˆ gaˇ ve le?
“Aˍmaˍgeˍdonˍ maꞈ lehˬ aˬ htoꞈ ma le?” (Vehˆsaiˉ hkʼaw ve awˬ lawn)
Yeˍsuˆ k’oˆ ve “tuꞈ jaˇ hkanˍ jaˇ ve” awˬ yanˇ lehˬ hk’aˬ hk’e hpehꞈ ve le?—Maꞈhtehˍ 24:21
“Tuꞈ jaˇ hkanˍ jaˇ ve awˬ yanˇ lehˬ aˬ htoꞈ ma htaꞈ k’oˆ gaˇ ve le?” (Vehˆsaiˉ hk’aw ve awˬ lawn)
Nawˬ ve yehˬ kʼa hkʼaw ve chaw teˇ gʼaˇ le le lehˬ, miˬ guiˬ hkʼoˆ lo chehˇ htaˇ hkʼaˬ hkʼe hpehꞈ tuˬ ve htaꞈ teˇ geh dawˇ mawˬ gʼa ve yoˬ.
Nawˬ miˬ guiˬ awˬ suhˉ hkʼaw chehˇ taˍ ve htaꞈ dawˇ mawˬ sheˍ (1:50)
Chaw yaˇ shoꞈ shaꞈ ve htaꞈ hkʼaˬ hkʼe te gu gʼa tuˬ tehꞈ hawˉ hkʼaˆ teˇ gʼaˇ shiˍ la ve yoˬ. “Ngaˬ na hkawˇ laiˉ lawn cawˬ ve” hkʼaw gʼaw nyi sheˍ.
“Liꞈ hpu a shaꞈ htaꞈ pa gʼa ve” (Shaw nyi kuiˬ Taꞈ yehˬ 2012 hkʼawꞈ ha pa 1 maˬ 1 nyi)
You May Also Like
NGAˬ HUI HTAꞈ CAˉ DAꞈ VE AWˬ LAWN
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ ve hk’aˬ hk’e te henˇ ve le?
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ tuˬ nawˬ Liꞈ hpu hk’aˬ ve teˇ maˬ yehˇ ve kaꞈ hpehꞈ ve yoˬ. Awˬ chawˇ maˇ heˆ leh yehˬ k’a hk’aw ve chaw htaꞈ Liꞈ hpu teˇ geh henˇ tuˬ jehˬ piˇ kaꞈ g’a ve yoˬ.
