Awˬ lawn 34
Ngaˬ hui Yaˬhoˉvaˬ htaꞈ haꞈ ve tehꞈ hkʼaˬ hkʼe hpeuꞈ maw piˇ gʼa ve le?
Nawˬ Liꞈ hpu henˇ shiˍ maˇ la htaˇ, Yaˬhoˉvaˬ htaꞈ meuˆ daꞈ maˇ la˗aw laˇ? Nawˬ chi aꞈ kehˉ kʼawꞈ meuˆ daꞈ gaˇ˗aw laˇ? Yaˬhoˉvaˬ nawˬ yawˇ htaꞈ haꞈ maˇ la ve yawˇ mawˬ htaˇ, yawˇ kaꞈ nawˬ htaꞈ haꞈ maˇ la leh nawˬ awˬ pon dawˇ nyi laˇ tuˬ yoˬ tehꞈ, nawˬ tawnˇ taˍ sheˍ. Nawˬ yawˇ htaꞈ haꞈ ve tehꞈ hkʼaˬ hkʼe hpeuꞈ maw piˇ gʼa ve le?
1. Ngaˬ hui Yaˬhoˉvaˬ htaꞈ haꞈ ve tehꞈ hkʼaˬ hkʼe hpeuꞈ maw piˇ gʼa ve le?
Ngaˬ hui Yaˬhoˉvaˬ htaꞈ haꞈ ve tehꞈ hpeuꞈ maw piˇ gʼa ve lehˬ, yawˇ ve hkawˇ na yuˬ ve yoˬ. (1 Yoˇhanˬ 5:3 gʼaw sheˍ.) Yawˇ ve hkawˇ na yuˬ tuˬ yawˇ lehˬ chaw teˇ gʼaˇ htaꞈ kaꞈ maˇ nyiˉ piˇ. Yaꞈ hkʼaˇ, chaw teˇ gʼaˇ le le yawˇ ve hkawˇ na yuˬ tuˬ, maˇ na yuˬ tuˬ, leuˆ yuˬ tcuh laˇ ve yoˬ. Aˬ htoꞈ ma pa taw le? Awˬ lawn kʼo, Yaˬhoˉvaˬ ngaˬ hui htaꞈ yawˇ ve tawˇ hkawˇ “nyi ma awˬ tawˬ hkʼa gaˬ na yuˬ” tcuh gaˇ ve yoˬ. (Roˉmaꞈ 6:17) Chi kʼoˆ gaˇ ve lehˬ, nawˬ yawˇ htaꞈ haꞈ ve pa taw, yawˇ ve hkawˇ na yuˬ tcuh gaˇ ve yoˬ. Yawˇ nyiˉ te laˇ ve pa taw na yuˬ ve maˇ heˆ. Liꞈ chi teˇ kʼoˆ hkʼaw Awˬ tawn 3 leh 4 lehˬ, nawˬ Yaˬhoˉvaˬ htaꞈ haꞈ ve tehꞈ hpeuꞈ maw piˇ gʼa tuˬ ga laˇ ve yoˬ. Chi hkʼe te gʼa tuˬ nawˬ yawˇ dawˇ cawˇ ve awˬ ceuˬ htaꞈ gʼa te leh, yawˇ maˇ dawˇ cawˇ ve awˬ ceuˬ htaꞈ gʼa jaw kʼai ve yoˬ.
2. Aˬ htoꞈ ma pa taw ngaˬ hui Yaˬhoˉvaˬ htaꞈ haꞈ ve tehꞈ hpeuꞈ maw piˇ tuˬ maˇ sha ve le?
“Daꞈ ve chaw lehˬ dawˇ haˍ tuˬ laiˉ ceuˬ htaꞈ gʼa hpuˇ ve yoˬ.” (Chiˇ mvuh ve 34:19) Ngaˬ hui teˇ gʼaˇ le le maˇ biˇ ve chaw hpehꞈ ve yoˬ. Chi hkʼoˆ kaꞈ, ca caˇ gʼaꞈ caˇ hpawˇ shoꞈ shaꞈ ve, maˇ hteˇ maˇ cawˇ ve, leh awˬ nu ve shoꞈ shaꞈ ve laiˉ ceuˬ ngaˬ hui gʼa hpuˇ ve yoˬ hehˉ. Ngaˬ hui shoꞈ shaꞈ ve laiˉ ceuˬ gʼa hpuˇ htaˇ, Yaˬhoˉvaˬ ve hkawˇ na yuˬ tuˬ maˇ sha tehꞈ dawˇ ve yoˬ hehˉ. Yaꞈ hkʼaˇ, Yaˬhoˉvaˬ kʼoˆ laˇ ve htaꞈ nawˬ coˇ caˇ leh gʼaꞈ te ve kʼo, teˇ ceuˬ le le aꞈ kehˉ nawˬ yawˇ htaꞈ haꞈ leh yawˇ htaꞈ ka tiꞈ yeˬ ve tehꞈ hpeuꞈ maw piˇ ve yoˬ. Chi hkʼa shuˍ shuˍ, yawˇ kaꞈ nawˬ htaꞈ ka tiꞈ yeˬ leh nawˬ htaꞈ baˬ taˉ tuˬ ve maˇ heˆ.—Chiˇ mvuh ve 4:3 gʼaw sheˍ.
Henˇ shiˍ maˇ la tuˬ
Aˬ htoꞈ ma pa taw ngaˬ hui Yaˬhoˉvaˬ ve hkawˇ na yuˬ ve kʼo yawˇ ha lehˬ ve le, leh ngaˬ hui yawˇ htaꞈ hkʼaˬ htaˆ kaꞈ ka tiꞈ yeˬ tuˬ aˬ htoꞈ ma ga laˇ gʼa ve le, teˇ geh henˇ sheˍ.
3. Saˍtanˍ nawˬ htaꞈ venˇ baˆ taˍ ve
Yawˇbaˆ liꞈ hkʼaw ngaˬ hui gʼa mawˬ ve, Saˍtanˍ lehˬ Yawˇbaˆ leh Yaˬhoˉvaˬ ve kanˉ te gaˇ ve chaw teˇ gʼaˇ le le htaꞈ venˇ baˆ taˍ ve yoˬ. Yawˇbaˆ liꞈ 1:1, 6–2:10 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Saˍtanˍ kʼoˆ ve, aˬ htoꞈ ma pa taw Yawˇbaˆ Yaˬhoˉvaˬ ve hkawˇ na yuˬ ve le?—Yawˇbaˆ 1:9-11 hkʼaw nyi sheˍ.
-
Saˍtanˍ nawˬ leh chaw teˇ gʼaˇ le le htaꞈ venˇ baˆ hkʼaˬ hkʼe taˍ ve le?—Yawˇbaˆ 2:4 hkʼaw nyi sheˍ.
Yawˇbaˆ liꞈ 23:11, 12 gʼaw leh na hkawˇ chi htaꞈ tawˇ yaw daꞈ sheˍ:
-
Yawˇbaˆ Yaˬhoˉvaˬ htaꞈ awˬ tehˬ haꞈ ve tehꞈ hkʼaˬ hkʼe te hpeuꞈ maw piˇ ve le?
Yawˇbaˆ Yaˬhoˉvaˬ htaꞈ haꞈ ve tehꞈ hpeuꞈ maw piˇ tuˬ, yawˇ hkʼaˬ htaˆ kaꞈ ka tiꞈ yeˬ ve
Ngaˬ hui Yaˬhoˉvaˬ htaꞈ haꞈ ve tehꞈ hpeuꞈ maw piˇ tuˬ, ngaˬ hui hkʼaˬ htaˆ kaꞈ ka tiꞈ yeˬ ve
4. Yaˬhoˉvaˬ htaꞈ ha lehˬ tuˬ te piˇ ve
Tawˇ naˉ ve liꞈ 27:11 gʼaw leh na hkawˇ chi htaꞈ tawˇ yaw daꞈ sheˍ:
-
Nawˬ cuˇ yiˍ cawˬ leh Yaˬhoˉvaˬ ve hkawˇ na yuˬ ve kʼo, yawˇ hkʼaˬ hkʼe dawˇ tuˬ le? Aˬ htoꞈ ma pa taw le?
5. Nawˬ Yaˬhoˉvaˬ htaꞈ ka tiꞈ yeˬ gʼa ve
Ngaˬ hui Yaˬhoˉvaˬ htaꞈ haꞈ ve kʼo, yawˇ htaꞈ caˉ daꞈ ve awˬ lawn shu htaꞈ kʼoˆ maˍ piˇ ve yoˬ. Ngaˬ hui yawˇ htaꞈ ka tiꞈ yeˬ ve kʼo, chi hkʼe te ve maˇ sha ve htawˇ te tuˬ yoˬ. VDO hpaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Teˇ pawˆ pawˆ kʼo, Yaˬhoˉvaˬ ve awˬ Glawn nawˬ shu htaꞈ hto piˇ tuˬ haˍ˗aw laˇ?
-
VDO hkʼaw ve, Kehˉsaˬ kawˆ ve htaꞈ gʼaˇ tuˬ aˬ htoꞈ ma ga piˇ ve le?
Yaˬhoˉvaˬ haꞈ ve awˬ ceuˬ htaꞈ ngaˬ hui haꞈ leh, yawˇ canˇ ve awˬ ceuˬ htaꞈ ngaˬ hui canˇ ve kʼo, ngaˬ hui yawˇ htaꞈ ka tiꞈ yeˬ tuˬ ga laˇ ve yoˬ. Chiˇ mvuh ve liꞈ 97:10 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Nawˬ gʼa henˇ kʼai peuˬ ve hkʼaw, Yaˬhoˉvaˬ haꞈ ve awˬ ceuˬ aˬ htoꞈ ma cawˬ ve le? Leh yawˇ canˇ ve awˬ ceuˬ aˬ htoꞈ ma cawˬ ve le?
-
Nawˬ daꞈ ve awˬ ceuˬ htaꞈ haꞈ leh haiˬ ve awˬ ceuˬ htaꞈ canˇ tuˬ, aˬ htoꞈ ma ga laˇ gʼa ve le?
6. Ngaˬ hui Yaˬhoˉvaˬ ve hkawˇ na yuˬ ve kʼo awˬ bon gʼa ve
Yaˬhoˉvaˬ ve hkawˇ na yuˬ ve lehˬ daꞈ jaˇ ve yoˬ. Iˉsaˍyaˆ liꞈ 48:17, 18 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Yaˬhoˉvaˬ ngaˬ hui awˬ pon aˬ htoꞈ ma teˇ ceuˬ daꞈ ve htaꞈ shiˍ ve tehꞈ nawˬ yonˍ gʼa˗aw laˇ? Aˬ htoꞈ ma pa taw le?
-
Nawˬ Liꞈ hpu henˇ leh Yaˬhoˉvaˬ ve awˬ lawn henˇ shiˍ maˇ la htaˇ aˬ htoꞈ ma awˬ bon gʼa ve le?
Chaw teˇ hpaˍ na nyi laˇ ve: “Ngaˬ te ve awˬ ceuˬ Gʼuiˬ sha ha lehˬ tuˬ te piˇ gʼa˗aw laˇ?”
-
Ngaˬ hui Yaˬhoˉvaˬ ha lehˬ tuˬ te piˇ gʼa ve tehꞈ, nawˬ Liꞈ hpu hkʼaˬ ve teˇ tawn hpeuꞈ maˍ piˇ tuˬ le?
A yeˇ uiˍ ve awˬ lawn
Yaˬhoˉvaˬ ve hkawˇ na yuˬ tuˬ maˇ sha ve htawˇ, yawˇ kʼoˆ laˇ ve htaꞈ gʼaꞈ te leh ka tiꞈ yeˬ ve kʼo, ngaˬ hui Yaˬhoˉvaˬ htaꞈ haꞈ ve tehꞈ hpeuꞈ maw piˇ ve yoˬ.
Kʼawꞈ gʼaꞈ na ve
-
Yawˇbaˆ ve awˬ lawn htaꞈ nawˬ aˬ htoꞈ ma henˇ gʼa ve le?
-
Nawˬ Yaˬhoˉvaˬ htaꞈ haꞈ ve tehꞈ hkʼaˬ hkʼe hpeuꞈ maw piˇ gʼa ve le?
-
Nawˬ Yaˬhoˉvaˬ htaꞈ hkʼaˬ htaˆ kaꞈ ka tiꞈ yeˬ gʼa tuˬ aˬ htoꞈ ma ga laˇ gʼa ve le?
Kʼawꞈ caˉ nyi gʼa ve
Nawˬ lehˬ Yaˬhoˉvaˬ leh Hkriꞈ yaˇ awˬ moˍ htaꞈ hkʼaˬ hkʼe te ka tiꞈ yeˬ gʼa tuˬ le, nyi sheˍ.
“Gʼuiˬ sha˗oˬ, nawˬ lehˬ ka tiꞈ yeˬ ve chaw teˇ hpaˍ htaꞈ ka tiꞈ yeˬ ve” (16:49)
Saˍtanˍ chaw yaˇ htaꞈ venˇ baˆ hkʼaˬ hkʼe taˍ ve le, gʼaw nyi sheˍ.
“Yawˇbaˆ ka tiꞈ yeˬ ve” (Liꞈ hpu hkʼaw aˬ htoꞈ ma awˬ lawn cawˬ ve le? awˬ tawn 6)
Yaˇ ehˉ kaꞈ Yaˬhoˉvaˬ htaꞈ haꞈ ve tehꞈ hkʼaˬ hkʼe hpeuꞈ maw piˇ gʼa ve htaꞈ, nyi sheˍ.
Yaˇ nehˬ teˇ hpaˍ awˬ chawˇ nyiˉ laˇ htaˇ, Gʼuiˬ sha htaꞈ hkʼaˬ hkʼe te ka tiꞈ yeˬ gʼa tuˬ le?
You May Also Like
NGAˬ HUI HTAꞈ CAˉ DAꞈ VE AWˬ LAWN
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ ve hk’aˬ hk’e te henˇ ve le?
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ tuˬ nawˬ Liꞈ hpu hk’aˬ ve teˇ maˬ yehˇ ve kaꞈ hpehꞈ ve yoˬ. Awˬ chawˇ maˇ heˆ leh yehˬ k’a hk’aw ve chaw htaꞈ Liꞈ hpu teˇ geh henˇ tuˬ jehˬ piˇ kaꞈ g’a ve yoˬ.
