Awˬ lawn 35
Ngaˬ hui daꞈ ve hkʼaw dawˇ cheˆ gʼa tuˬ hkʼaˬ hkʼe gʼa te ve le?
Ngaˬ hui teˇ gʼaˇ le le gʼa dawˇ cheˆ tuˬ awˬ lawn cawˬ ve yoˬ. Dawˇ cheˆ cawˇ ve laiˉ lawn lehˬ ngaˬ hui leh Yaˬhoˉvaˬ geh meuˆ daꞈ ve htaꞈ heuˆ la kuiˬ cawˬ ve yoˬ. Tawˇ pa haˉ te kʼo, hkʼaˬ kaˬ lo chehˇ tuˬ le, aˬ htoꞈ ma kanˉ te tuˬ le, awˬ hpawˇ awˬ miˇ ma heuˆ tuˬ laˇ, maˇ heuˆ tuˬ laˇ tehꞈ, ngaˬ hui gʼa dawˇ cheˆ ve yoˬ hehˉ. Ngaˬ hui daꞈ ve hkʼaw dawˇ cheˆ ve kʼo, ngaˬ hui ve a shaꞈ ha lehˬ leh, Yaˬhoˉvaˬ htaꞈ kaꞈ nyi hkʼaˇ suh tuˬ te piˇ gʼa ve yoˬ.
1. Nawˬ daꞈ ve hkʼaw dawˇ cheˆ gʼa tuˬ Liꞈ hpu hkʼaˬ hkʼe ga laˇ gʼa ve le?
Nawˬ maˇ dawˇ cheˆ sheˍ htaˇ, Yaˬhoˉvaˬ ga laˇ tuˬ bon lawˬ leh, awˬ lawn chi htaꞈ yawˇ hkʼaˬ hkʼe dawˇ ve shiˍ tuˬ Liꞈ hpu hkʼaw hpfuhˆ nyi sheˍ. (Tawˇ naˉ ve 2:3-6 gʼaw sheˍ.) Teˇ lawn lawn kʼo, aˬ htoꞈ ma gʼa te tuˬ Yaˬhoˉvaˬ hteˇ lehˍ kʼoˆ laˇ ve yoˬ. Hkʼe te leh, nawˬ daꞈ jaˇ ve hkʼaw dawˇ cheˆ gʼa tuˬ yawˇ ve hkawˇ na yuˬ leh gʼaꞈ te ve yoˬ.
Nawˬ aˬ htoꞈ ma te cawˇ ve Liꞈ hpu hkʼaw hteˇ lehˍ maˇ kʼoˆ laˇ ve kʼo, hkʼaˬ hkʼe te tuˬ le? Yaˬhoˉvaˬ lehˬ nawˬ “kʼai cawˇ ve yaꞈ kʼaw htaꞈ beˆ maˍ laˇ” sheˍ ve yoˬ. (Iˉsaˍyaˆ 48:17) Yawˇ nawˬ htaꞈ ga laˇ tuˬ Liꞈ hpu hkʼaw ve awˬ liˇ awˬ hkʼaˇ laiˉ lawn cawˬ tcuh taˍ ve yoˬ. Awˬ liˇ awˬ hkʼaˇ lehˬ Liꞈ hpu hkʼaw maˍ laˇ ve awˬ lawn hpehꞈ leh, Gʼuiˬ sha hkʼaˬ hkʼe dawˇ ve ngaˬ hui shiˍ tuˬ ga laˇ ve yoˬ. Laiˉ pawˆ kʼo, ngaˬ hui Liꞈ hpu gʼaw htaˇ Yaˬhoˉvaˬ ve dawˇ hkʼaˇ htaꞈ shiˍ gʼa ve yoˬ. Yaˬhoˉvaˬ hkʼaˬ hkʼe dawˇ ve ngaˬ hui shiˍ ve kʼo, yawˇ a loˍ cawˇ ve hkʼaw ngaˬ hui dawˇ cheˆ gʼa ve yoˬ.
2. Ngaˬ hui maˇ dawˇ cheˆ sheˍ htaˇ aˬ htoꞈ ma awˉ lawˉ dawˇ nyi cawˇ ve le?
Liꞈ hpu hkʼaw kʼoˆ ve, “shaˍ tiꞈ cawˬ ve chaw lehˬ a shu yawˇ ve hkui piˍ htaꞈ nyi taˍ puiˉ ve yoˬ.” (Tawˇ naˉ ve 14:15) Chi kʼoˆ gaˇ ve lehˬ, ngaˬ hui maˇ dawˇ cheˆ sheˍ htaˇ, aˬ htoꞈ ma te gʼa leh maˇ te gʼa ve htaꞈ awˬ yanˇ yehˇ leh awˉ lawˉ dawˇ nyi cawˇ ve yoˬ. Nawˬ dawˇ nyi htaˇ, nawˬ awˬ to htaꞈ chi hkʼe na nyi sheˍ. ‘Awˬ lawn chi htaꞈ caˉ daꞈ ve Liꞈ hpu hkʼaw ve awˬ liˇ awˬ hkʼaˇ aˬ htoꞈ ma cawˬ ve le? Ngaˬ chi hkʼe te ve kʼo nyi ma sha tuˬ laˇ? Ngaˬ te ve awˬ ceuˬ shu htaꞈ heuˆ la kuiˬ hkʼaˬ hkʼe cawˬ ve le? A yeˇ uiˍ jaˇ ve teˇ ceuˬ lehˬ, Yaˬhoˉvaˬ Gʼuiˬ sha htaꞈ ha lehˬ tuˬ te piˇ˗aw laˇ?’—Bon maˍ ve 32:29.
Aˬ htoꞈ ma cawˇ ve, maˇ cawˇ ve, Yaˬhoˉvaˬ ngaˬ hui htaꞈ kʼoˆ laˇ tuˬ a hkaw˗anˬ cawˬ ve yoˬ. Ngaˬ hui yawˇ ve awˬ liˇ tawˇ hkawˇ leh awˬ liˇ awˬ hkʼaˇ htaꞈ hkʼa dehꞈ shiˍ leh gʼaꞈ te ve kʼo, dawˇ shiˍ puiˉ ve nyi ma htaꞈ te jawˬ chehˇ ve yoˬ. Dawˇ shiˍ puiˉ ve nyi ma lehˬ cawˇ maˇ cawˇ ve htaꞈ fuiˍ daꞈ gʼa tuˬ ga laˇ ve yoˬ. (Roˉmaꞈ 2:14, 15) Hkʼa dehꞈ te jawˬ taˍ ve dawˇ shiˍ puiˉ ve nyi ma lehˬ, ngaˬ hui daꞈ ve hkʼaw dawˇ cheˆ tuˬ ga laˇ ve yoˬ.
Henˇ shiˍ maˇ la tuˬ
Liꞈ hpu hkʼaw ve awˬ liˇ awˬ hkʼaˇ leh, ngaˬ hui ve dawˇ shiˍ puiˉ ve nyi ma lehˬ, ngaˬ hui dawˇ cheˆ htaˇ hkʼaˬ hkʼe ga laˇ gʼa ve le, teˇ geh henˇ sheˍ.
3. Nawˬ awˬ to htaꞈ Liꞈ hpu beˆ maˍ laˇ tcuh sheˍ
Ngaˬ hui dawˇ cheˆ htaˇ Liꞈ hpu hkʼaw ve awˬ liˇ awˬ hkʼaˇ hkʼaˬ hkʼe ga laˇ gʼa ve le? VDO hpaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Yaˬhoˉvaˬ ngaˬ hui htaꞈ peꞈ laˇ ve awˬ hpfuhˇ hkʼaˆ jaˇ ve laꞈ shawnˍ lehˬ aˬ htoꞈ ma le?
-
Aˬ htoꞈ ma pa taw Yaˬhoˉvaˬ ngaˬ hui hkʼaˇ ngaˬ hui awˬ lawn teˇ hpaˍ htaꞈ dawˇ cheˆ tcuh laˇ ve le?
-
Ngaˬ hui daꞈ ve hkʼaw dawˇ cheˆ gʼa tuˬ Yaˬhoˉvaˬ ngaˬ hui htaꞈ aˬ htoꞈ ma peꞈ laˇ ve le?
Liꞈ hpu hkʼaw ve awˬ liˇ awˬ hkʼaˇ teˇ maˬ htaꞈ nyi tuˬ, Eˇfeˇsuꞈ liꞈ 5:15, 16 gʼaw sheˍ. Peuˬ leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Nawˬ ‘awˬ yanˇ hkʼa dehꞈ yehˇ’ leh, hkʼaˬ htaˆ kaꞈ Liꞈ hpu gʼaw gʼa tuˬ hkʼaˬ hkʼe te gʼa ve le?
-
Nawˬ ‘awˬ yanˇ hkʼa dehꞈ yehˇ’ leh, daꞈ ve awˬ hpawˇ awˬ miˇ ma, awˬ pa awˬ e, leh daꞈ ve yaˇ hpehꞈ tuˬ hkʼaˬ hkʼe te gʼa ve le?
-
Nawˬ ‘awˬ yanˇ hkʼa dehꞈ yehˇ’ leh, hkʼaˬ htaˆ kaꞈ hpawnˬ daꞈ˗e tuˬ hkʼaˬ hkʼe te gʼa ve le?
4. Daꞈ ve hkʼaw dawˇ cheˆ gʼa tuˬ, nawˬ ve dawˇ shiˍ puiˉ ve nyi ma htaꞈ te jawˬ sheˍ
Ngaˬ hui gʼa dawˇ cheˆ ve awˬ lawn htaꞈ caˉ daꞈ ve Liꞈ hpu hkʼaw hteˇ lehˍ kʼoˆ laˇ ve kʼo, ngaˬ hui cawˇ ve hkʼaw dawˇ cheˆ tuˬ maˇ haˍ. Yaꞈ hkʼaˇ, Liꞈ hpu hkʼaw hteˇ lehˍ maˇ kʼoˆ laˇ ve kʼo, hkʼaˬ hkʼe te tuˬ le? VDO hpaw leh na hkawˇ chi htaꞈ tawˇ yaw daꞈ sheˍ:
-
VDO chi hkʼaw, awˬ viˉ awˬ nyi yaˇ miˇ teˇ gʼaˇ yawˇ dawˇ shiˍ puiˉ ve nyi ma htaꞈ te jawˬ tuˬ, leh Yaˬhoˉvaˬ nyi hkʼaˇ suh ve hkʼaw dawˇ cheˆ gʼa tuˬ, yawˇ hkʼaˬ hkʼe te ve le?
Aˬ htoꞈ ma pa taw shu ngaˬ hui awˬ pon maˇ dawˇ cheˆ tcuh cawˇ ve le? Heˍbrehˇ liꞈ 5:14 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Shu ngaˬ hui awˬ pon dawˇ cheˆ tcuh ve lehˬ sha ve htawˇ, aˬ htoꞈ ma te ngaˬ hui hkʼaˇ ngaˬ hui dawˇ cheˆ cawˇ ve le?
-
Ngaˬ hui ve dawˇ shiˍ puiˉ ve nyi ma htaꞈ te jawˬ tuˬ, leh daꞈ ve hkʼaw dawˇ cheˆ gʼa tuˬ, aˬ htoꞈ ma ga laˇ gʼa ve le?
Miˬ guiˬ awˬ han liꞈ hkʼa shuˍ, dawˇ shiˍ puiˉ ve nyi ma kaꞈ ngaˬ hui ve a shaꞈ hkʼaˬ hpawˇ lo kʼai cawˇ ve htaꞈ beˆ maˍ laˇ ve
5. Shu ve dawˇ shiˍ puiˉ ve nyi ma htaꞈ yawˆ yan piˇ ve
Teˇ gʼaˇ leh teˇ gʼaˇ dawˇ cheˆ ve maˇ shuˍ daꞈ ve yoˬ. Hkʼe kʼo, shu ve dawˇ shiˍ puiˉ ve nyi ma htaꞈ ngaˬ hui yawˆ yan piˇ ve tehꞈ, hkʼaˬ hkʼe te hpeuꞈ maw piˇ gʼa ve le? Tawˇ pa haˉ 2 lawn htaꞈ teˇ geh nyi sheˍ:
Awˬ lawn 1: Awˬ hkiˇ shawˍ puiˉ ve awˬ viˉ awˬ nyi yaˇ miˇ teˇ gʼaˇ, Hkriꞈ yaˇ awˬ moˍ teˇ kaˬ lo jiˆ kʼai ve yoˬ. Oˇ kaˬ lo chehˇ ve awˬ viˉ awˬ nyi yaˇ miˇ hui lehˬ awˬ hkiˇ hkʼa dehꞈ maˇ shawˍ. Hkʼe te leh, awˬ hkiˇ shawˍ ve chaw htaꞈ mawˬ ve kʼo nyi ma maˇ sha ve yoˬ.
Roˉmaꞈ liꞈ 15:1 leh 1 Kawˇrenˍhtuˆ liꞈ 10:23, 24 gʼaw leh na hkawˇ chi htaꞈ tawˇ yaw daꞈ sheˍ:
-
Gʼaw kʼai peuˬ ve Liꞈ hpu hkʼaw kʼoˆ ve htaꞈ nyi kʼo, awˬ hkiˇ shawˍ puiˉ ve awˬ viˉ awˬ nyi yaˇ miˇ hkʼaˬ hkʼe dawˇ cheˆ tuˬ le? Nawˬ ve dawˇ shiˍ puiˉ ve nyi ma teˇ ceuˬ ceuˬ te gʼa ve tehꞈ dawˇ ve htawˇ, chaw teˇ gʼaˇ ve dawˇ shiˍ puiˉ ve nyi ma te maˇ gʼa tehꞈ dawˇ leh nawˬ yawˇ geh chehˇ ve kʼo, nawˬ hkʼaˬ hkʼe te tuˬ le?
Awˬ lawn 2: Awˬ viˉ awˬ nyi hawˉ hkʼaˆ teˇ gʼaˇ Liꞈ hpu hkʼaw tzuhˬ taˇ dawˬ tehꞈ maˇ kʼoˆ laˇ ve htaꞈ shiˍ ve yoˬ. Yaꞈ hkʼaˇ, yawˇ tzuhˬ maˇ dawˬ tehꞈ dawˇ cheˆ ve yoˬ. Teˇ nyi htaˇ yawˇ htaꞈ chaw teˇ gʼaˇ ve yehˬ lo awˍ caˇ la tuˬ jehˬ piˇ htaˇ, yawˇ oˇ kaˬ lo kʼai leh awˬ viˉ awˬ nyi teˇ hpaˍ tzuhˬ dawˬ ve htaꞈ gʼa mawˬ ve yoˬ.
Cuˇ yiˍ piˇ ve liꞈ 7:16 leh Roˉmaꞈ liꞈ 14:1, 10 gʼaw leh na hkawˇ chi htaꞈ tawˇ yaw daꞈ sheˍ:
-
Gʼaw kʼai peuˬ ve Liꞈ hpu hkʼaw kʼoˆ ve htaꞈ nyi kʼo, awˬ viˉ awˬ nyi chi teˇ gʼaˇ tzuhˬ maˇ dawˬ ve htawˇ, yawˇ aˬ htoꞈ ma maˇ te cawˇ ve le? Nawˬ ve dawˇ shiˍ puiˉ ve nyi ma maˇ te tcuh laˇ ve htaꞈ chaw teˇ hpaˍ hpaˍ te ve nawˬ gʼa mawˬ htaˇ, nawˬ hkʼaˬ hkʼe te tuˬ le?
Ngaˬ hui daꞈ ve hkʼaw dawˇ cheˆ gʼa tuˬ hkʼaˬ hkʼe gʼa te ve le?
1. Nawˬ hkʼaˬ hkʼe dawˇ cheˆ gʼa tuˬ Yaˬhoˉvaˬ ga laˇ tuˬ bon lawˬ sheˍ.—Yaˍkoˆ 1:5.
2. Awˬ lawn chi htaꞈ caˉ daꞈ ve Liꞈ hpu hkʼaw ve awˬ liˇ awˬ hkʼaˇ hkʼaˬ hkʼe kʼoˆ laˇ ve htaꞈ shiˍ tuˬ, Liꞈ hpu leh Gʼuiˬ sha ve kanˉ hkʼaˇ hkʼaw ve liꞈ teˇ hpaˍ htaꞈ hpfuhˆ nyi sheˍ. Leh Gʼuiˬ sha ve kanˉ te laˬ maw˗oˬ ve chaw geh tawˇ yaw daꞈ sheˍ.
3. Nawˬ dawˇ cheˆ ve awˬ ceuˬ lehˬ, nawˬ ve dawˇ shiˍ puiˉ ve nyi ma leh, awˬ nu ve chaw htaꞈ hkʼaˬ hkʼe heuˆ la kuiˬ cawˬ ve dawˇ nyi sheˍ.
Chaw teˇ hpaˍ kʼoˆ ve: “Nawˬ hkʼaˬ hkʼe te gaˇ ve kaꞈ te loˬ. Shu ve dawˇ hkʼaˇ a yeˇ maˇ uiˍ.”
-
Nawˬ dawˇ kʼo, aˬ htoꞈ ma te ngaˬ hui Gʼuiˬ sha ve dawˇ hkʼaˇ leh shu ve dawˇ hkʼaˇ htaꞈ kaꞈ gʼa dawˇ nyi piˇ ve le?
A yeˇ uiˍ ve awˬ lawn
Awˬ lawn teˇ hpaˍ htaꞈ caˉ daꞈ ve Yaˬhoˉvaˬ hkʼaˬ hkʼe dawˇ ve ngaˬ hui shiˍ leh, ngaˬ hui te ve awˬ ceuˬ shu htaꞈ heuˆ la kuiˬ hkʼaˬ hkʼe cawˬ ve dawˇ nyi piˇ ve kʼo, ngaˬ hui daꞈ ve hkʼaw dawˇ cheˆ gʼa ve yoˬ.
Kʼawꞈ gʼaꞈ na ve
-
Nawˬ dawˇ cheˆ ve htaꞈ Yaˬhoˉvaˬ nyi hkʼaˇ suh tuˬ hkʼaˬ hkʼe gʼa te ve le?
-
Nawˬ nawˬ ve dawˇ shiˍ puiˉ ve nyi ma htaꞈ hkʼaˬ hkʼe te jawˬ gʼa ve le?
-
Shu ve dawˇ shiˍ puiˉ ve nyi ma htaꞈ nawˬ yawˆ yan piˇ ve tehꞈ, hkʼaˬ hkʼe hpeuꞈ maw piˇ gʼa ve le?
Kʼawꞈ caˉ nyi gʼa ve
Nawˬ Gʼuiˬ sha geh meuˆ daꞈ maˇ la tuˬ, hkʼaˬ hkʼe dawˇ cheˆ gʼa ve le?
Yaˬhoˉvaˬ ngaˬ hui htaꞈ hkʼaˬ hkʼe te beˆ maˍ laˇ ve htaꞈ kʼawꞈ shiˍ maˇ la tuˬ, VDO nyi sheˍ.
Hawˉ hkʼaˆ teˇ gʼaˇ haˍ ve awˬ lawn gʼa dawˇ cheˆ htaˇ, yawˇ daꞈ ve hkʼaw dawˇ cheˆ gʼa tuˬ aˬ htoꞈ ma ga piˇ ve le, nyi sheˍ.
Yaˬhoˉvaˬ ngaˬ hui htaꞈ daꞈ ve awˬ ceuˬ peꞈ laˇ tuˬ ka tiꞈ te ve (5:46)
Ngaˬ hui aˬ htoꞈ ma te cawˇ ve Yaˬhoˉvaˬ hteˇ lehˍ maˇ kʼoˆ laˇ ve kʼo, yawˇ nyi hkʼaˇ suh tuˬ ngaˬ hui hkʼaˬ hkʼe te piˇ gʼa ve le, gʼaw nyi sheˍ.
You May Also Like
NGAˬ HUI HTAꞈ CAˉ DAꞈ VE AWˬ LAWN
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ ve hk’aˬ hk’e te henˇ ve le?
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ tuˬ nawˬ Liꞈ hpu hk’aˬ ve teˇ maˬ yehˇ ve kaꞈ hpehꞈ ve yoˬ. Awˬ chawˇ maˇ heˆ leh yehˬ k’a hk’aw ve chaw htaꞈ Liꞈ hpu teˇ geh henˇ tuˬ jehˬ piˇ kaꞈ g’a ve yoˬ.
