A shu htawˇ ka tiꞈ yeˬ ve awˬ chawˇ cawˬ gaˇ ve yoˬ. Yaˬhoˉvaˬ kaꞈ yawˇ ve awˬ chawˇ htaꞈ ka tiꞈ yeˬ tcuh gaˇ ve yoˬ. Miˬ guiˬ chi hkʼoˆ maˇ˗awˍ ve chaw ka tiꞈ maˇ yeˬ ve pa taw, chi hkʼe ve chaw hpehꞈ tuˬ maˇ sha. Hkʼe kʼo, teˇ lawn le le htaꞈ ka tiꞈ yeˬ ve lehˬ aˬ htoꞈ ma awˬ bon gʼa ve le?

1. Aˬ htoꞈ ma pa taw ka tiꞈ yeˬ ve chaw hpehꞈ ve lehˬ a yeˇ uiˍ jaˇ ve le?

Ngaˬ hui shu htaꞈ ka tiꞈ yeˬ htaˇ, ngaˬ hui Yaˬhoˉvaˬ htaꞈ haꞈ leh yawˆ yan ve tehꞈ hpeuꞈ maw piˇ ve yoˬ. Yaˬhoˉvaˬ lehˬ ngaˬ hui dawˇ leh te ve teˇ ceuˬ le le htaꞈ shiˍ ve yoˬ. (Heˍbrehˇ 4:13) Ngaˬ hui ka tiꞈ yeˬ ve chaw hpehꞈ tuˬ dawˇ cheˆ htaˇ, Yaˬhoˉvaˬ mawˬ leh ha lehˬ jaˇ ve yoˬ. Liꞈ hpu hkʼaw kʼoˆ laˇ ve, “Gʼuiˬ sha lehˬ haiˬ ve kanˉ htaꞈ te ve chaw htaꞈ canˇ leh, hteˇ ve cawˇ ve chaw htaꞈ awˬ chawˇ te piˇ ve yoˬ.”—Tawˇ naˉ ve 3:32.

2. Ngaˬ hui a shaꞈ teꞈ hkʼaˇ awˬ hkʼaw lo aˬ htoꞈ ma awˬ lawn htaꞈ ka tiꞈ yeˬ gʼa ve le?

Yaˬhoˉvaˬ lehˬ ngaˬ hui ‘teˇ gʼaˇ leh teˇ gʼaˇ hteˇ ve cawˇ ve tawˇ htaꞈ ceh tiˉ yaw daꞈ’ tcuh gaˇ ve yoˬ. (Zaˍhkaˍriˆ 8:16, 17) Chi hkʼaˬ hkʼe kʼoˆ gaˇ ve le? Ngaˬ hui ve yehˬ kʼa hkʼaw ve chaw, kanˉ teˇ geh te ve awˬ chawˇ, Hkriꞈ yaˇ awˬ moˍ hkʼaw ve awˬ viˉ awˬ nyi, maˇ heˆ leh mvuhˇ miˬ hpawˇ kanˉ te ve chaw geh tawˇ yaw daꞈ htaˇ yawˇ hui htaꞈ maˇ gʼa heˍ piˇ. Ka tiꞈ yeˬ ve chaw lehˬ shu mawˇ maˇ hkʼawˇ leh shu htaꞈ maˇ heˍ caˇ. (Tawˇ naˉ ve 24:28 leh Eˇfeˇsuꞈ 4:28 gʼaw sheˍ.) Leh yawˇ hui mvuhˇ miˬ hpawˇ awˬ liˇ teh taˍ ve hkʼe awˬ hkawnˍ hkʼa biˇ keu piˇ ve yoˬ. (Roˉmaꞈ 13:5-7) Hkʼaˬ ve teˇ lawn maˇ kʼoˆ, ‘teˇ ceuˬ le le awˬ hkʼaw lo ngaˬ hui ka tiꞈ yeˬ gaˇ ve yoˬ.’—Heˍbrehˇ 13:18.

3. Ka tiꞈ yeˬ ve chaw hpehꞈ ve aˬ htoꞈ ma awˬ bon gʼa ve le?

Ngaˬ hui ka tiꞈ yeˬ ve chaw hpehꞈ ve tehꞈ shu shiˍ ve kʼo, shu ngaˬ hui htaꞈ gʼaˇ va tuˬ yoˬ. Yehˬ kʼa hkʼaw haꞈ daꞈ ve hkʼa shuˍ, Hkriꞈ yaˇ awˬ moˍ hkʼaw teˇ gʼaˇ leh teˇ gʼaˇ gʼaˇ va daꞈ tuˬ ngaˬ hui ga piˇ gʼa ve yoˬ. Ngaˬ hui ka tiꞈ yeˬ ve chaw hpehꞈ ve kʼo, daꞈ kehˬ ve dawˇ shiˍ puiˉ ve nyi ma cawˬ leh, ‘Gʼuiˬ sha maˍ ve tawˇ hkawˇ htaꞈ awˬ hkiˇ shawˍ piˇ’ leh, shu Yaˬhoˉvaˬ htaꞈ shiˍ daꞈ gaˇ tuˬ ngaˬ hui te piˇ ve yoˬ.—Tiˇtuˆ 2:10.

 Henˇ shiˍ maˇ la tuˬ

5. Hkʼaˬ htaˆ kaꞈ ka tiꞈ yeˬ ve chaw hpehꞈ ve

 6. Ngaˬ hui ka tiꞈ yeˬ ve chaw hpehꞈ ve lehˬ awˬ bon gʼa ve

Ngaˬ hui ka tiꞈ yeˬ ve chaw hpehꞈ ve lehˬ teˇ pawˆ pawˆ kʼo, shoꞈ shaꞈ ve awˬ ceuˬ gʼa hpuˇ ve yoˬ. Yaꞈ hkʼaˇ, awˬ leh meuˇ htaˇ ngaˬ hui awˬ bon gʼa tuˬ yoˬ. Chiˇ mvuh ve liꞈ 34:12-16 gʼaw leh na hkawˇ chi htaꞈ tawˇ yaw daꞈ sheˍ:

• Ka tiꞈ yeˬ ve chaw hpehꞈ ve lehˬ nawˬ ve a shaꞈ teꞈ hkʼaˇ daꞈ la tuˬ hkʼaˬ hkʼe te laˇ ve le?

1. Ka tiꞈ yeˬ ve awˬ hpawˇ awˬ miˇ ma lehˬ yawˇ huiˉ maˬ ve awˬ ca htaꞈ yeˬ tuˬ te piˇ ve

2. Ka tiꞈ yeˬ ve kanˉ te ve chaw lehˬ awˬ shehˍ hpaˇ yawˇ htaꞈ gʼaˇ va gʼa ve

3. Ka tiꞈ yeˬ ve mvuhˇ miˬ yaˇ lehˬ mvuhˇ miˬ hpawˇ kanˉ te ve chaw mehˆ gʼuˇ suhˍ lo yawˇ hui daꞈ ve awˬ meh cawˬ ve

 A yeˇ uiˍ ve awˬ lawn

Yaˬhoˉvaˬ lehˬ yawˇ ve awˬ chawˇ htaꞈ tawˇ yaw ve maˇ kʼoˆ, te ve maˇ kʼoˆ, ka tiꞈ yeˬ tcuh gaˇ ve yoˬ.

Kʼawꞈ gʼaꞈ na ve

• Ngaˬ hui aˬ htoꞈ ma awˬ lawn htaꞈ ka tiꞈ yeˬ gʼa ve le?

• Aˬ htoꞈ ma pa taw Yaˬhoˉvaˬ htaꞈ teˇ ceuˬ ceuˬ faˉ taˍ gʼa ve tehꞈ, maˇ dawˇ cawˇ ve le?

• Aˬ htoꞈ ma pa taw nawˬ hkʼaˬ htaˆ kaꞈ ka tiꞈ yeˬ ve chaw hpehꞈ gaˇ ve le?