Awˬ lawn 37
Kanˉ te ve leh hpu ve awˬ lawn htaꞈ Liꞈ hpu hkʼaw hkʼaˬ hkʼe kʼoˆ laˇ ve le?
Kanˉ te ve leh hpu ve awˬ lawn htaꞈ nawˬ dawˇ haˍ jaw˗aw laˇ? Ngaˬ hui awˬ to loˍ ve awˬ ceuˬ ca leh, Yaˬhoˉvaˬ htaꞈ oˉ kʼoˍ pui ve teˇ geh te ve lehˬ maˇ sha ve yoˬ. Yaꞈ hkʼaˇ, Liꞈ hpu hkʼaw ngaˬ hui htaꞈ ga laˇ gʼa ve beˆ maˍ laˇ hkawˇ cawˬ ve yoˬ.
1. Kanˉ te ve htaꞈ Liꞈ hpu hkʼaw hkʼaˬ hkʼe kʼoˆ laˇ ve le?
Gʼuiˬ sha lehˬ ngaˬ hui kanˉ te ve htaꞈ ha lehˬ tcuh gaˇ ve yoˬ. Liꞈ hpu hkʼaw kʼoˆ laˇ ve, chaw yaˇ lehˬ “yawˇ te taˍ ve kanˉ awˬ hkʼaw lo ha lehˬ chehˇ cawˇ ve yoˬ.” (Cuˇ yiˍ piˇ ve 3:22) Yaˬhoˉvaˬ lehˬ kanˉ te kaiˬ jaˇ. Leh ngaˬ hui yawˇ htaꞈ henˇ yuˬ leh kanˉ te kaiˬ ve kʼo, ngaˬ hui yawˇ htaꞈ nyi hkʼaˇ suh tuˬ te piˇ leh, ngaˬ hui kaꞈ a shu yawˇ awˬ to htaꞈ nyi hkʼaˇ suh tuˬ yoˬ.
Kanˉ te ve lehˬ a yeˇ uiˍ ve yoˬ. Yaꞈ hkʼaˇ, awˬ lawn chi Yaˬhoˉvaˬ htaꞈ oˉ kʼoˍ pui ve aꞈ kehˉ a yeˇ uiˍ ve tehꞈ, ngaˬ hui maˇ shawˍ cawˇ ve yoˬ. (Yoˇhanˬ 6:27) Ngaˬ hui Yaˬhoˉvaˬ htaꞈ oˉ kʼoˍ pui ve awˉ lawˉ teh ve kʼo, yawˇ ka tiꞈ te taˍ laˇ ve hkʼe ngaˬ hui loˍ ve awˬ ceuˬ htaꞈ peꞈ laˇ tuˬ yoˬ.
2. Hpu htaꞈ caˉ daꞈ ve cawˇ ve dawˇ hkʼaˇ aˬ htoꞈ ma le?
Liꞈ hpu hkʼaw kʼoˆ laˇ ve, “hpu htaꞈ yehˇ ve hkʼaw nawˬ heuˆ gaˇ ve mawˇ htaꞈ gʼa hpehꞈ ve yoˬ.” Yaꞈ hkʼaˇ, ha lehˬ ve cawˬ tuˬ hpu geh ceh tiˉ laˬ ve maˇ heˆ tehꞈ, shaˍ tiꞈ peꞈ laˇ ve yoˬ. (Cuˇ yiˍ piˇ ve 7:12) Hkʼe te leh, Liꞈ hpu hkʼaw ngaˬ hui htaꞈ kʼoˆ laˇ ve, hpu htaꞈ sheˉ lai ve chaw taˇ hpehꞈ piˇ, “cawˬ taˍ ve teˇ hpaˍ htaꞈ nyi hkʼaˇ suh chehˇ˗oˆ.” (Heˍbrehˇ 13:5 gʼaw sheˍ.) Ngaˬ hui cawˬ taˍ ve htaꞈ nyi hkʼaˇ suh chehˇ ve kʼo, mawˇ awˬ suhˉ gʼaˇ hteꞈ heuˆ gaˇ ve nyi ma htaꞈ ponˬ laˇ tuˬ yoˬ. Leh ngaˬ hui loˍ jaˇ ve maˇ heˆ kʼo, shu geh hpu maˇ ca chiˇ. (Tawˇ naˉ ve 22:7) Maꞈ teh˗oˍ te ve, maˇ heˆ leh paw sha ve chaw haˆ haˆ hpehꞈ gʼa tuˬ ve kanˉ hkʼaˇ teˇ hpaˍ htaꞈ ngaˬ hui maˇ ca te.
3. Ngaˬ hui a shu yawˇ ve hpu yehˇ leh shu htaꞈ hkʼaˬ hkʼe ga piˇ gʼa ve le?
Yaˬhoˉvaˬ lehˬ shu htaꞈ pehˬ piˇ puiˉ ve Gʼuiˬ sha hpehꞈ ve yoˬ. Ngaˬ hui ‘shu htaꞈ pehˬ piˇ tanˇ piˇ ve kʼo,’ yawˇ htaꞈ henˇ yuˬ chehˇ ve yoˬ. (1 Tiˆmoˉseˍ 6:18) Ngaˬ hui ve hpu yehˇ leh Hkriꞈ yaˇ awˬ moˍ hkʼaw hpu tanˇ piˇ gʼa ve, shoꞈ shaꞈ ve gʼa hpuˇ ve chaw htaꞈ ga piˇ gʼa ve, leuˉ leh Hkriꞈ yaˇ hpehꞈ ve awˬ viˉ awˬ nyi htaꞈ ga piˇ gʼa ve yoˬ. Yaˬhoˉvaˬ awˬ pon kʼo, ngaˬ hui piˇ gʼa maˇ ve, maˇ heˆ leh a ciˉ ceh tiˉ piˇ gʼa ve lehˬ a yeˇ uiˍ ve maˇ heˆ. Ngaˬ hui nyi ma hkʼaw tawˆ la ve hkʼe piˇ ve kʼo, ngaˬ hui ha lehˬ leh, Yaˬhoˉvaˬ htaꞈ kaꞈ nyi hkʼaˇ suh tuˬ te piˇ ve yoˬ.—Tcuh yaˇ 20:35 gʼaw sheˍ.
Henˇ shiˍ maˇ la tuˬ
Kanˉ te ve hkʼaw cawˇ ve dawˇ hkʼaˇ cawˬ leh, cawˬ taˍ ve awˬ ceuˬ htaꞈ nyi hkʼaˇ suh chehˇ ve kʼo, aˬ htoꞈ ma awˬ bon gʼa tuˬ le, teˇ geh henˇ sheˍ.
4. Nawˬ kanˉ te ve hkʼaw Yaˬhoˉvaˬ htaꞈ chiˇ mvuh piˇ ve
Ngaˬ hui Yaˬhoˉvaˬ geh meuˆ daꞈ ve lehˬ, kanˉ te hpawˇ ve dawˇ hkʼaˇ htaꞈ heuˆ la kuiˬ cawˬ tcuh cawˇ ve yoˬ. VDO hpaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
VDO chi hkʼaw, Ce˗saˉ kanˉ te kuiˬ lo yawˇ ve te hkʼaˇ dawˇ hkʼaˇ htaꞈ nawˬ dawˇ cawˇ ve aˬ htoꞈ ma cawˬ ve le?
-
Yawˇ kanˉ te ve htaꞈ awˬ yanˇ hkʼaˬ hkʼe te shawˍ teh ve le?
Kawˇlawˇsehˇ liꞈ 3:23, 24 gʼaw leh na hkawˇ chi htaꞈ tawˇ yaw daꞈ sheˍ:
-
Aˬ htoꞈ ma te ngaˬ hui kanˉ te kaiˬ ve chaw hpehꞈ ve lehˬ a yeˇ uiˍ ve le?
Kanˉ te ve lehˬ a yeˇ uiˍ jaˇ ve yoˬ. Yaꞈ hkʼaˇ, awˬ lawn chi ve Yaˬhoˉvaˬ htaꞈ oˉ kʼoˍ pui ve aꞈ kehˉ a yeˇ uiˍ jaˇ ve tehꞈ, ngaˬ hui maˇ shawˍ cawˇ
5. Ngaˬ hui cawˬ taˍ ve htaꞈ nyi hkʼaˇ suh ve kʼo, awˬ bon gʼa ve
Chaw laiˉ gʼaˇ hpu maˇ maˇ cawˬ tuˬ coˇ caˇ leh gʼaꞈ ca ve yoˬ. Yaꞈ hkʼaˇ, Liꞈ hpu hkʼaw ngaˬ hui htaꞈ chi hkʼe maˇ beˆ maˍ laˇ. 1 Tiˆmoˉseˍ liꞈ 6:6-8 gʼaw leh na hkawˇ chi htaꞈ tawˇ yaw daꞈ sheˍ:
-
Liꞈ hpu hkʼaw ngaˬ hui aˬ htoꞈ ma te tuˬ beˆ maˍ laˇ ve le?
Hpu a ciˉ ceh tiˉ cawˬ ve htawˇ, ngaˬ hui ha lehˬ gʼa ve yoˬ. VDO hpaw leh na hkawˇ chi htaꞈ tawˇ yaw daꞈ sheˍ:
-
Hpu a ciˉ ceh tiˉ cawˬ ve htawˇ, aˬ htoꞈ ma teˇ ceuˬ yehˬ kʼa chi teˇ hpaˍ htaꞈ ha lehˬ tuˬ te piˇ ve le?
Ngaˬ hui hpu cawˬ ve htawˇ, maˇ maˇ kʼawꞈ cawˬ gaˇ ve kʼo hkʼaˬ hkʼe hpehꞈ tuˬ le? Chi hkʼe ve dawˇ hkʼaˇ cawˬ ve lehˬ kawˆ tuˬ cawˬ ve tehꞈ, Yeˍsuˆ tawˇ pa haˉ te maˍ laˇ ve yoˬ. Luˉkaꞈ liꞈ 12:15-21 gʼaw leh na hkawˇ chi htaꞈ tawˇ yaw daꞈ sheˍ:
-
Yeˍsuˆ ve tawˇ pa haˉ htaꞈ nawˬ aˬ htoꞈ ma gʼa henˇ ve le?—Kaˇ nanˉ ehˉ 15 hkʼaw nyi sheˍ.
Tawˇ naˉ ve liꞈ 10:22 leh 1 Tiˆmoˉseˍ liꞈ 6:10 gʼaw leh tehˆ daꞈ nyi sheˍ. Peuˬ leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Nawˬ dawˇ kʼo, Yaˬhoˉvaˬ geh meuˆ daꞈ ve, maˇ heˆ leh hpu maˇ maˇ cawˬ ve, hkʼaˬ ve teˇ ceuˬ a yeˇ uiˍ jaˇ ve le? Aˬ htoꞈ ma pa taw le?
-
Hpu maˇ maˇ ca ve lehˬ shoꞈ shaꞈ ve aˬ htoꞈ ma gʼa hpuˇ tuˬ le?
6. Yaˬhoˉvaˬ ngaˬ hui loˍ ve awˬ ceuˬ htaꞈ peꞈ laˇ tuˬ yoˬ
Kanˉ te ve htaꞈ shoꞈ shaꞈ ve awˬ lawn gʼa hpuˇ ve, maˇ heˆ leh hpu maˇ cawˬ htaˇ, ngaˬ hui Yaˬhoˉvaˬ htaꞈ awˬ tehˬ gʼaˇ va ve laˇ tehꞈ, shiˍ tuˬ ga laˇ ve yoˬ. Ngaˬ hui shoꞈ shaꞈ ve chi teˇ hpaˍ gʼa hpuˇ htaˇ, hkʼaˬ hkʼe te gʼa ve shiˍ tuˬ, VDO hpaw sheˍ. Peuˬ leh na hkawˇ chi teˇ hpaˍ htaꞈ tawˇ yaw daꞈ sheˍ:
-
VDO chi hkʼaw, awˬ viˉ awˬ nyi hawˉ hkʼaˆ teˇ gʼaˇ shoꞈ shaꞈ ve aˬ htoꞈ ma gʼa hpuˇ ve le?
-
Yawˇ shoꞈ shaꞈ ve htaꞈ gu gʼa tuˬ aˬ htoꞈ ma te ve le?
Maꞈhtehˍ liꞈ 6:25-34 gʼaw leh na hkawˇ chi htaꞈ tawˇ yaw daꞈ sheˍ:
-
Yaˬhoˉvaˬ htaꞈ oˉ kʼoˍ pui ve awˉ lawˉ teh ve chaw htaꞈ, yawˇ aˬ htoꞈ ma piˇ tuˬ ka tiꞈ te taˍ ve le?
Chaw teˇ hpaˍ kʼoˆ ve: “Ngaˬ yehˬ kʼa awˬ pon kanˉ gʼa te ve yoˬ. Ngaˬ teˇ shinˉ le le Hkriꞈ yaˇ awˬ moˍ geh hpawnˬ daꞈ˗e maˇ gʼa taˬ.”
-
Nawˬ Yaˬhoˉvaˬ htaꞈ oˉ kʼoˍ pui ve awˉ lawˉ teh ve lehˬ daꞈ jaˇ ve teˇ ceuˬ hpehꞈ ve tehꞈ, nawˬ yonˍ gʼa tuˬ Liꞈ hpu hkʼaˬ ve teˇ tawn ga laˇ ve le?
A yeˇ uiˍ ve awˬ lawn
Kanˉ te ve leh hpu ve awˬ lawn lehˬ a yeˇ uiˍ ve yoˬ. Yaꞈ hkʼaˇ, chi teˇ hpaˍ Yaˬhoˉvaˬ ve kanˉ te ve aꞈ kehˉ a yeˇ uiˍ ve tehꞈ, ngaˬ hui maˇ shawˍ cawˇ ve yoˬ.
Kʼawꞈ gʼaꞈ na ve
-
Kanˉ te ve hpawˇ nawˬ cawˇ ve dawˇ hkʼaˇ cawˬ tuˬ, aˬ htoꞈ ma ga laˇ ve le?
-
Nawˬ cawˬ taˍ ve htaꞈ nyi hkʼaˇ suh chehˇ ve kʼo, aˬ htoꞈ ma awˬ bon gʼa tuˬ le?
-
Yaˬhoˉvaˬ yawˇ ve chaw htaꞈ nyi haꞈ shaˉ tuˬ, ka tiꞈ te taˍ ve htaꞈ nawˬ gʼaˇ va ve tehꞈ, hkʼaˬ hkʼe hpeuꞈ maw piˇ tuˬ le?
Kʼawꞈ caˉ nyi gʼa ve
Hpu lehˬ maˇ daꞈ ve awˬ ceuˬ hpehꞈ ve tehꞈ Liꞈ hpu hkʼaw maˍ laˇ˗aw laˇ, gʼaw nyi sheˍ.
“Hpu lehˬ haiˬ ve hkʼa peu˗eˬ ve awˬ hkuiˉ puiˍ hpehꞈ ve laˇ?” (Vehˆsaiˉ hkʼaw ve awˬ lawn)
Piˇ ve hkʼaˬ hkʼe ve teˇ ceuˬ htaꞈ Gʼuiˬ sha nyi hkʼaˇ suh ve le, gʼaw nyi sheˍ.
“Piˇ ve htaꞈ Liꞈ hpu hkʼaw hkʼaˬ hkʼe kʼoˆ laˇ ve le?” (Vehˆsaiˉ hkʼaw ve awˬ lawn)
Maꞈ teh˗oˍ te ve lehˬ kawˆ tuˬ maˇ cawˬ ve laˇ?
“Maꞈ teh˗oˍ te ve htaꞈ Liꞈ hpu hkʼaw hkʼaˬ hkʼe maˍ laˇ ve le?” (Tu loˬ! 2015 hkʼawꞈ ha pa 3 maˬ)
Hawˉ hkʼaˆ teˇ gʼaˇ maꞈ teh˗oˍ maˇ kʼawꞈ te leh, shu mawˇ maˇ kʼawꞈ hkʼawˇ tuˬ aˬ htoꞈ ma ga piˇ ve le, gʼaw nyi sheˍ.
You May Also Like
NGAˬ HUI HTAꞈ CAˉ DAꞈ VE AWˬ LAWN
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ ve hk’aˬ hk’e te henˇ ve le?
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ tuˬ nawˬ Liꞈ hpu hk’aˬ ve teˇ maˬ yehˇ ve kaꞈ hpehꞈ ve yoˬ. Awˬ chawˇ maˇ heˆ leh yehˬ k’a hk’aw ve chaw htaꞈ Liꞈ hpu teˇ geh henˇ tuˬ jehˬ piˇ kaꞈ g’a ve yoˬ.
