Awˬ lawn 40
Ngaˬ hui Gʼuiˬ sha mehˆ gʼuˇ suhˍ lo hkʼaˬ hkʼe te daꞈ kehˬ gʼa tuˬ le?
Awˬ e teˇ gʼaˇ yawˇ ve yaˇ paˍ ehˉ htaꞈ liꞈ henˇ yehˬ lo shiˍ kʼai tuˬ awˬ hkiˇ shawˍ piˇ chehˇ ve htaꞈ dawˇ mawˬ sheˍ. Yawˇ ve yaˇ htaꞈ iˉ kaˆ hehˉ piˇ leh kehˬ lehˍ ve aˉ poꞈ feuˉ piˇ ve yoˬ. Chi hkʼe te ve lehˬ yaˇ htaꞈ awˬ to chehˇ sha tuˬ te piˇ leh, awˬ pa awˬ e yaˇ htaꞈ hkʼa dehꞈ nyi haꞈ shaˉ ve tehꞈ shu gʼa mawˬ ve yoˬ. Chi hkʼa shuˍ shuˍ, ngaˬ hui htaꞈ haꞈ ve Awˬ pa Yaˬhoˉvaˬ kaꞈ ngaˬ hui awˬ to, dawˇ hkʼaˇ, tawˇ yaw ve, leh te ve hpawˇ daꞈ kehˬ tcuh gaˇ ve yoˬ. Ngaˬ hui daꞈ kehˬ ve kʼo, ngaˬ hui awˬ to awˬ bon gʼa leh, Yaˬhoˉvaˬ htaꞈ awˬ meꞈ awˬ hponˇ gʼa tuˬ te piˇ ve yoˬ.
1. Ngaˬ hui awˬ to hpawˇ daꞈ kehˬ gʼa tuˬ hkʼaˬ hkʼe te gʼa ve le?
Yaˬhoˉvaˬ ngaˬ hui htaꞈ kʼoˆ laˇ ve, ‘nawˬ hui htawˇ gʼa daꞈ kehˬ ve yoˬ.’ (1 Peˍtruˆ 1:16) Daꞈ kehˬ ve chaw hpehꞈ ve lehˬ awˬ to hpawˇ, leh awˬ liˇ awˬ hkʼaˇ hpawˇ gʼa daꞈ kehˬ piˇ ve yoˬ. Awˬ to hpawˇ daꞈ kehˬ gʼa tuˬ hkʼaˬ htaˆ kaꞈ iˉ kaˆ gʼa hehˉ ve, ngaˬ hui ve veuꞈ kʼaˇ, yehˬ leh kaˇ hkʼaˬ htaˆ kaꞈ daꞈ kehˬ tuˬ gʼa te ve yoˬ. Chi hkʼoˆ kaꞈ, hpawnˬ daꞈ kuiˬ yehˬ lo daꞈ kehˬ tuˬ te ve htaꞈ ngaˬ hui ga piˇ gʼa ve yoˬ. Ngaˬ hui daꞈ kehˬ ve kʼo, Yaˬhoˉvaˬ htaꞈ awˬ meꞈ awˬ hponˇ gʼa tuˬ te piˇ ve yoˬ.—2 Kawˇrenˍhtuˆ 6:3, 4.
2. Ngaˬ hui daꞈ kehˬ ve chaw hpehꞈ tuˬ aˬ htoꞈ ma htaꞈ gʼa jaw kʼai ve le?
Liꞈ hpu hkʼaw ngaˬ hui htaꞈ kʼoˆ laˇ ve, ‘ngaˬ hui ve awˬ to leh nyi ma htaꞈ chaꞈ chiˆ tuˬ te ve teˇ ceuˬ le le htaꞈ tsuhˇ baˬ taˉ˗oˆ.’ (2 Kawˇrenˍhtuˆ 7:1) Chi kʼoˆ gaˇ ve lehˬ, ngaˬ hui awˬ to leh dawˇ hkʼaˇ htaꞈ maˇ daꞈ ve heuˆ la kuiˬ cawˬ ve htaꞈ gʼa jaw kʼai ve yoˬ. Yaˬhoˉvaˬ htaꞈ nyi hkʼaˇ suh tuˬ te piˇ cawˇ ve pa taw, ngaˬ hui maˇ daꞈ ve dawˇ hkʼaˇ htaꞈ gʼa jaw kʼai ve yoˬ. (Chiˇ mvuh ve 104:34) Chi hkʼoˆ kaꞈ, ngaˬ hui chaꞈ chiˆ ve tawˇ htaꞈ kaꞈ maˇ yaw cawˇ ve yoˬ.—Kawˇlawˇsehˇ 3:8 gʼaw sheˍ.
Ngaˬ hui awˬ to leh awˬ liˇ awˬ hkʼaˇ maˇ daꞈ kehˬ tuˬ te laˇ ve, aˬ htoꞈ ma cawˬ sheˍ ve le? Awˬ yeꞈ caˆ puiˉ ve naˆ tsuhˇ teˇ hpaˍ hpaˍ kʼo, ngaˬ hui awˬ to htaꞈ maˇ daꞈ ve heuˆ la kuiˬ cawˬ ve yoˬ Chi htaꞈ pa taw, shuˉ dawˬ ve, maˉ laˇ behˇ ve, awˬ yeꞈ caˆ puiˉ ve naˆ tsuhˇ, leh maˇ cawˇ ve hkʼaw naˆ tsuhˇ yehˇ ve htaꞈ gʼa jaw kʼai ve yoˬ. Chi hkʼe te ve kʼo, ngaˬ hui awˬ to chehˇ sha la leh, Gʼuiˬ sha peꞈ laˇ ve a shaꞈ htaꞈ awˬ hpfuhˇ shiˍ ve tehꞈ hpeuꞈ maw piˇ ve yoˬ. Ngaˬ hui awˬ liˇ awˬ hkʼaˇ hpawˇ daꞈ kehˬ ve chaw hpehꞈ tuˬ, a shu yawˇ awˬ to htaꞈ ga ve, maˇ heˆ leh awˬ kʼu nyi ve awˬ han nyi ve htaꞈ gʼa jaw kʼai ve yoˬ. (Chiˇ mvuh ve 119:37; Eˇfeˇsuꞈ 5:5) Te hkʼaˇ dawˇ hkʼaˇ chi teˇ hpaˍ htaꞈ pa tuˬ maˇ sha ve yoˬ hehˉ. Yaꞈ hkʼaˇ, Yaˬhoˉvaˬ ngaˬ hui htaꞈ ga laˇ gʼa ve yoˬ.—Iˉsaˍyaˆ 41:13 gʼaw sheˍ.
Henˇ shiˍ maˇ la tuˬ
Aˬ htoꞈ ma pa taw awˬ to hpawˇ daꞈ kehˬ ve lehˬ Yaˬhoˉvaˬ awˬ meꞈ awˬ hponˇ gʼa tuˬ te piˇ ve le, leh maˇ daꞈ ve te hkʼaˇ dawˇ hkʼaˇ pa tuˬ ngaˬ hui hkʼaˬ hkʼe te gʼa ve le, teˇ geh henˇ sheˍ.
3. Awˬ to hpawˇ daꞈ kehˬ ve lehˬ Yaˬhoˉvaˬ awˬ meꞈ awˬ hponˇ gʼa tuˬ te piˇ ve
Yaˬhoˉvaˬ Iˉsaˍreˍlaˆ chaw htaꞈ piˇ taˍ ve awˬ liˇ tawˇ hkawˇ hkʼaw ngaˬ hui gʼa gʼaw ve kʼo, Gʼuiˬ sha ve chaw lehˬ daꞈ kehˬ ve chaw hpehꞈ tuˬ hkʼaˬ hkʼe taw a yeˇ uiˍ jaˇ ve tehꞈ, ngaˬ hui gʼa henˇ ve yoˬ. Tawˆ kʼai ve liꞈ 19:10 leh 30:17-19 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Liꞈ hpu awˬ tawn chi teˇ hpaˍ hkʼaw, awˬ to hpawˇ daꞈ kehˬ ve htaꞈ Yaˬhoˉvaˬ hkʼaˬ hkʼe dawˇ ve le?
-
Awˬ to hpawˇ daꞈ kehˬ tuˬ ngaˬ hui aˬ htoꞈ ma gʼa te ve le?
Daꞈ kehˬ ve chaw hpehꞈ tuˬ awˬ yanˇ gʼa yehˇ leh gʼa coˇ caˇ ve yoˬ. Ngaˬ hui hkʼaˬ kaˬ lo chehˇ ve maˇ kʼoˆ, paw sha ve maˇ kʼoˆ, haˍ gʼawˇ ve maˇ kʼoˆ, daꞈ kehˬ ve chaw hpehꞈ gʼa ve yoˬ. VDO hpaw leh na hkawˇ chi htaꞈ tawˇ yaw daꞈ sheˍ:
-
Ngaˬ hui hto toˇ˗e htaˇ, ngaˬ hui yehˇ ve mawˇ teˇ hpaˍ daꞈ kehˬ ve htaꞈ shu mawˬ ve kʼo, yawˇ hui Yaˬhoˉvaˬ htaꞈ chiˇ uiˍ chiˇ mvuh tuˬ laˇ? Aˬ htoꞈ ma pa taw le?
4. Maˇ daꞈ ve awˬ ceuˬ htaꞈ maˇ kʼawꞈ te
Ngaˬ hui maˇ daꞈ ve awˬ ceuˬ te ve htaꞈ jehˇ tuˬ Yaˬhoˉvaˬ ga laˇ gʼa ve
Nawˬ shuˉ dawˬ ve, maˇ heˆ leh awˬ yeꞈ caˆ puiˉ ve naˆ tsuhˇ yehˇ ve kʼo, awˬ ceuˬ chi teˇ hpaˍ jehˇ tuˬ haˍ ve tehꞈ nawˬ shiˍ ve yoˬ. Hkʼe kʼo, nawˬ htaꞈ aˬ htoꞈ ma ga laˇ gʼa ve le? Awˬ ceuˬ chi teˇ hpaˍ maˇ daꞈ ve heuˆ la kuiˬ hkʼaˬ hkʼe cawˬ ve htaꞈ teˇ geh nyi sheˍ. Maꞈhtehˍ liꞈ 22:37-39 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Shuˉ yeꞈ caˆ ve leh naˆ tsuhˇ yeꞈ caˆ ve lehˬ, nawˬ Yaˬhoˉvaˬ geh meuˆ daꞈ ve htaꞈ heuˆ la kuiˬ hkʼaˬ hkʼe cawˬ ve le?
-
Shuˉ yeꞈ caˆ ve leh naˆ tsuhˇ yeꞈ caˆ ve lehˬ, nawˬ ve yehˬ kʼa leh nawˬ awˬ paˇ lo chehˇ ve chaw htaꞈ heuˆ la kuiˬ hkʼaˬ hkʼe cawˬ ve le?
Maˇ daꞈ ve te hkʼaˇ dawˇ hkʼaˇ htaꞈ pa gʼa tuˬ awˬ hkʼaˇ gu teh sheˍ. a VDO hpaw sheˍ.
Hpiˇliˇpiˆ liꞈ 4:13 gʼaw leh na hkawˇ chi htaꞈ tawˇ yaw daꞈ sheˍ:
-
Aˬ htoꞈ ma pa taw hkʼaˬ htaˆ kaꞈ bon lawˬ ve, Liꞈ hpu gʼaw ve, leh hpawnˬ daꞈ˗e ve lehˬ maˇ daꞈ ve awˬ ceuˬ te ve htaꞈ jehˇ tuˬ ga laˇ gʼa ve le?
5. Maˇ daꞈ ve te hkʼaˇ dawˇ hkʼaˇ htaꞈ tawˍ daꞈ sheˍ
Kawˇlawˇsehˇ liꞈ 3:5 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Awˬ kʼu nyi ve awˬ han, sehˆseuꞈtinˇ (sexting) b, leh a shu yawˇ awˬ to htaꞈ ga ve lehˬ, Yaˬhoˉvaˬ mehˆ gʼuˇ suhˍ lo maˇ daꞈ kehˬ ve tehꞈ ngaˬ hui hkʼaˬ hkʼe te shiˍ gʼa ve le?
-
Yaˬhoˉvaˬ ngaˬ hui htaꞈ daꞈ kehˬ ve awˬ liˇ awˬ hkʼaˇ cawˬ tcuh gaˇ ve, nawˬ dawˇ kʼo chi cawˇ˗aw laˇ? Aˬ htoꞈ ma pa taw le?
Ngaˬ hui maˇ daꞈ ve dawˇ hkʼaˇ htaꞈ hkʼaˬ hkʼe te tawˍ daꞈ gʼa tuˬ le? VDO hpaw sheˍ.
Ngaˬ hui daꞈ kehˬ ve awˬ liˇ awˬ hkʼaˇ cawˬ ve chaw hpehꞈ tuˬ te gʼa ve teˇ ceuˬ le le gʼa te ve tehꞈ, Yeˍsuˆ tawˇ pa haˉ teˇ maˬ te maˍ laˇ ve yoˬ. Maꞈhtehˍ liꞈ 5:29, 30 gʼaw leh na hkawˇ chi htaꞈ tawˇ yaw daꞈ sheˍ:
-
Ngaˬ hui a shu yawˇ awˬ to htaꞈ naˬ tuˬ te cawˇ ve tehꞈ, Yeˍsuˆ kʼoˆ gaˇ ve maˇ heˆ. Yaꞈ hkʼaˇ, ngaˬ hui teˇ ceuˬ ceuˬ te cawˇ ve tehꞈ, yawˇ kʼoˆ laˇ ve yoˬ. Ngaˬ hui maˇ daꞈ ve dawˇ hkʼaˇ htaꞈ jaw kʼai gʼa tuˬ aˬ htoꞈ ma gʼa te ve le? c
Nawˬ maˇ daꞈ ve dawˇ hkʼaˇ htaꞈ tawˍ daꞈ chehˇ ve kʼo, nawˬ coˇ caˇ ve htaꞈ Yaˬhoˉvaˬ awˬ hpfuhˇ shiˍ jaˇ ve yoˬ. Chiˇ mvuh ve liꞈ 103:13, 14 gʼaw leh na hkawˇ chi htaꞈ tawˇ yaw daꞈ sheˍ:
-
Nawˬ coˇ caˇ leh maˇ daꞈ ve dawˇ hkʼaˇ htaꞈ tawˍ daꞈ chehˇ ve kʼo, nawˬ caˉ leh kʼawꞈ tawˍ daꞈ tuˬ, Liꞈ hpu chi teˇ tawn nawˬ htaꞈ awˬ gʼaˇ hkʼaˬ hkʼe peꞈ laˇ ve le?
Caˉ leh tawˍ daꞈ chehˇ˗oˆ!
‘Ngaˬ te yaꞈ˗oˬ. Daꞈ ve awˬ ceuˬ kʼawꞈ caˉ te kʼai maˇ gʼa˗o, awˬ gʼaˇ nuˇ jaˇ’ tehꞈ, nawˬ chi hkʼe dawˇ ve yoˬ hehˉ. Yaꞈ hkʼaˇ, awˬ lawn chi htaꞈ dawˇ nyi sheˍ. Gʼuiˇ enˍ daꞈ ve chaw teˇ gʼaˇ paˍ˗e ve, chi lehˬ yawˇ gʼuiˇ enˍ daꞈ ve htaꞈ maˇ gʼaˇ˗o ve tehꞈ kʼoˆ gaˇ ve maˇ heˆ. Leh yawˇ awˬ suhˉ gʼa kʼawꞈ tanˬ gʼuiˇ ve htaꞈ kaꞈ kʼoˆ gaˇ ve maˇ heˆ. Chi hkʼa shuˍ shuˍ, nawˬ maˇ daꞈ ve awˬ ceuˬ htaꞈ kʼawꞈ te ve kʼo, maˇ daꞈ ve awˬ ceuˬ te ve htaꞈ jehˇ maˇ gʼa ve tehꞈ kʼoˆ gaˇ ve maˇ heˆ. Leh te laˬ ve awˬ ceuˬ hkʼa peu˗eˬ awˬ bon maˇ cawˬ ve htaꞈ kaꞈ kʼoˆ gaˇ ve maˇ heˆ. Chi teˇ hkui nawˬ tawˍ daꞈ chehˇ ve htawˇ, teˇ pawˆ pawˆ te yaꞈ sheˍ ve kʼo, caˉ leh tawˍ daꞈ chehˇ˗oˆ! Yaˬhoˉvaˬ nawˬ htaꞈ ga laˇ gʼa ve yoˬ.
Chaw teˇ hpaˍ kʼoˆ ve: “Ngaˬ awˬ yeꞈ caˆ˗oˬ, jehˇ maˇ gʼa˗o.”
-
Yawˇ maˇ daꞈ ve awˬ ceuˬ te ve htaꞈ jehˇ tuˬ, Yaˬhoˉvaˬ ga piˇ gʼa ve tehꞈ, nawˬ Liꞈ hpu hkʼaˬ ve teˇ tawn hpeuꞈ maˍ piˇ tuˬ le?
A yeˇ uiˍ ve awˬ lawn
Ngaˬ hui Yaˬhoˉvaˬ nyi hkʼaˇ suh tuˬ te piˇ gʼa ve lehˬ, ngaˬ hui ve awˬ to, dawˇ hkʼaˇ, leh te hkʼaˇ gʼa daꞈ kehˬ ve yoˬ.
Kʼawꞈ gʼaꞈ na ve
-
Aˬ htoꞈ ma pa taw daꞈ kehˬ ve chaw hpehꞈ ve lehˬ a yeˇ uiˍ jaˇ ve le?
-
Nawˬ awˬ to hpawˇ daꞈ kehˬ ve chaw hpehꞈ tuˬ hkʼaˬ hkʼe te gʼa ve le?
-
Nawˬ daꞈ kehˬ ve te hkʼaˇ dawˇ hkʼaˇ cawˬ tuˬ hkʼaˬ hkʼe te gʼa ve le?
Kʼawꞈ caˉ nyi gʼa ve
Nawˬ hpu maˇ cawˬ maˇ ve htawˇ, daꞈ kehˬ ve chaw hpehꞈ tuˬ aˬ htoꞈ ma te gʼa ve le?
Shuˉ dawˬ ve htaꞈ jehˇ tuˬ nawˬ hkʼaˬ hkʼe te gʼa ve le, gʼaw nyi sheˍ.
“Shuˉ dawˬ ve htaꞈ jehˇ tuˬ awˬ hkʼaˇ” (Tu loˬ! 2010 hkʼawꞈ ha pa 5 maˬ)
Awˬ kʼu nyi ve awˬ han nyi ve lehˬ maˇ daꞈ ve heuˆ la kuiˬ hkʼaˬ hkʼe cawˬ ve le?
Hawˉ hkʼaˆ teˇ gʼaˇ awˬ kʼu nyi ve awˬ han nyi ve jehˇ tuˬ, yawˇ htaꞈ aˬ htoꞈ ma ga piˇ ve le, gʼaw nyi sheˍ.
a Awˬ yeꞈ caˆ puiˉ ve htaꞈ tawˍ daꞈ gʼaˇ tuˬ ga laˇ gʼa ve beˆ maˍ laˇ hkawˇ shiˍ tuˬ, “Shuˉ dawˬ ve htaꞈ jehˇ tuˬ awˬ hkʼaˇ” chi teˇ lawn hkʼaw cawˬ ve Kʼawꞈ caˉ nyi gʼa ve hkʼaw gʼaw nyi sheˍ.
b Sehˆseuꞈtinˇ (sexting) lehˬ, tawˇ yaw tuˬ awˬ hkʼeun leh awˬ nu ve awˬ hkʼeun teˇ hpaˍ hkʼaw, pehꞈ ve tzuhˆ ve htaꞈ caˉ daꞈ ve, maˇ daꞈ ve awˬ han, liꞈ, leh VDO feu ve chi teˇ hpaˍ hpehꞈ ve yoˬ.
c A shu yawˇ awˬ to ga ve htaꞈ jehˇ tuˬ, “Ngaˬ a shu yawˇ awˬ to ga ve htaꞈ hkʼaˬ hkʼe te jehˇ gʼa tuˬ le?” Yaˇ nehˬ na ve na hkawˇ—Hkʼawꞈ laˇ hkawˇ yehˇ gʼa ve, Awˉ lawˉ teˇ kʼoˆ, awˬ lawn 25 hkʼaw gʼaw nyi sheˍ.
You May Also Like
NGAˬ HUI HTAꞈ CAˉ DAꞈ VE AWˬ LAWN
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ ve hk’aˬ hk’e te henˇ ve le?
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ tuˬ nawˬ Liꞈ hpu hk’aˬ ve teˇ maˬ yehˇ ve kaꞈ hpehꞈ ve yoˬ. Awˬ chawˇ maˇ heˆ leh yehˬ k’a hk’aw ve chaw htaꞈ Liꞈ hpu teˇ geh henˇ tuˬ jehˬ piˇ kaꞈ g’a ve yoˬ.
