Awˬ lawn 41
Teˇ geh zuhꞈ ve awˬ lawn Liꞈ hpu hkʼaw hkʼaˬ hkʼe maˍ laˇ ve le?
Chaw laiˉ gʼaˇ teˇ geh zuhꞈ ve awˬ lawn kʼoˆ htaˇ, yaꞈ taw ve yoˬ. Yaꞈ hkʼaˇ, Liꞈ hpu hkʼaw awˬ lawn chi keunˍ daꞈ leh yawˆ yan ve hkʼaw maˍ laˇ ve yoˬ. Chi lehˬ ngaˬ hui awˬ pon awˬ bon cawˬ ve yoˬ. Yaˬhoˉvaˬ ngaˬ hui htaꞈ hpanˍ laˇ ve pa taw, aˬ htoꞈ ma teˇ ceuˬ ngaˬ hui awˬ pon daꞈ jaˇ ve htaꞈ yawˇ shiˍ ve yoˬ. Yawˇ nyi hkʼaˇ suh tuˬ ngaˬ hui aˬ htoꞈ ma te cawˇ ve leh, co co taiˍ taiˍ ha lehˬ ve a shaꞈ cawˬ tuˬ aˬ htoꞈ ma gʼa te ve htaꞈ, Yaˬhoˉvaˬ kʼoˆ maˍ laˇ ve yoˬ.
1. Hawˉ hkʼaˆ yaˇ miˇ teˇ geh zuhꞈ ve awˬ lawn htaꞈ Yaˬhoˉvaˬ hkʼaˬ hkʼe dawˇ ve le?
Hawˉ hkʼaˆ yaˇ miˇ teˇ geh zuhꞈ gʼa ve lehˬ Yaˬhoˉvaˬ geh laˬ ve laꞈ shawnˍ hpehꞈ ve yoˬ. Yaˬhoˉvaˬ lehˬ heuˆ daꞈ˗oˬ ve chaw htaꞈ ceh tiˉ teˇ geh zuhꞈ tcuh gaˇ ve yoˬ. Hawˉ hkʼaˆ yaˇ miˇ teˇ geh zuhꞈ ve lehˬ yaˇ cawˬ tuˬ awˬ pon ceh tiˉ maˇ heˆ. Yaꞈ hkʼaˇ, yawˇ huiˉ maˬ haꞈ pehnˇ ve hpeuꞈ maw daꞈ tuˬ awˬ hkʼaˇ hpehꞈ ve yoˬ. Liꞈ hpu hkʼaw kʼoˆ laˇ ve, “nawˬ a shaꞈ i sheˍ htaˇ kaꞈ heuˆ taˍ ve nawˬ miˇ ma geh ceh tiˉ ha lehˬ chehˇ˗oˆ.” (Tawˇ naˉ ve 5:18, 19) Yaˬhoˉvaˬ lehˬ heuˆ daꞈ˗oˬ ve Hkriꞈ yaˇ htaꞈ yawˇ ve awˬ ca geh ka tiꞈ yeˬ tcuh gaˇ leh haˉ chawˇ maˇ te tcuh gaˇ ve yoˬ.—Heˍbrehˇ 13:4 gʼaw sheˍ.
2. Pehꞈ ve tzuhˆ ve te ve aˬ htoꞈ ma kʼoˆ gaˇ ve le?
Liꞈ hpu hkʼaw ngaˬ hui htaꞈ kʼoˆ laˇ ve, ‘pehꞈ ve tzuhˆ ve te ve chaw Gʼuiˬ sha ve mvuhˇ miˬ awˬ hkʼaw lo maˇ gʼa loꞈ˗e.’ (1 Kawˇrenˍhtuˆ 6:9, 10) Liꞈ hpu hkʼaw pehꞈ ve tzuhˆ ve kʼoˆ htaˇ, Heˍlaˍsaˆ hkawˇ hkʼaw hpawˬni˗aˬ (por·neiʹa) tehꞈ kʼoˆ ve yoˬ. Chi ve tcuhˉ kuiˬ lehˬ, (1) maˇ heuˆ daꞈ sheˍ ve chaw teˇ geh zuhꞈ ve a, (2) hawˉ hkʼaˆ chawˇ hawˉ hkʼaˆ yaˇ miˇ chawˇ yaˇ miˇ pehꞈ ve tzuhˆ ve te ve, leh (3) to nuˇ to shaˆ geh pehꞈ ve tzuhˆ ve te ve yoˬ. Ngaˬ hui ‘pehꞈ ve tzuhˆ ve htaꞈ jaw kʼai’ ve kʼo, Yaˬhoˉvaˬ nyi hkʼaˇ suh tuˬ te piˇ leh ngaˬ hui kaꞈ awˬ bon gʼa tuˬ yoˬ.—1 Hteˇsaˍlawˇniˆ 4:3.
Henˇ shiˍ maˇ la tuˬ
Nawˬ pehꞈ ve tzuhˆ ve htaꞈ hkʼaˬ hkʼe te jaw kʼai gʼa tuˬ le, leh nawˬ daꞈ kehˬ ve awˬ liˇ awˬ hkʼaˇ htaꞈ gʼaꞈ te ve kʼo, aˬ htoꞈ ma awˬ bon gʼa tuˬ le, teˇ geh henˇ sheˍ.
3. Pehꞈ ve tzuhˆ ve htaꞈ jaw kʼai ve
Yoˇsehꞈ meh ve ka tiꞈ yeˬ ve hawˉ hkʼaˆ teˇ gʼaˇ, yawˇ coˇ caˇ leh daꞈ kehˬ ve awˬ liˇ awˬ hkʼaˇ htaꞈ gʼaꞈ te ve yoˬ. Awˬ hkuiˉ puiˍ liꞈ 39:1-12 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Aˬ htoꞈ ma te Yoˇsehꞈ pehꞈ ve tzuhˆ ve htaꞈ jaw kʼai ve le?—Kaˇ nanˉ ehˉ 9 hkʼaw nyi sheˍ.
-
Nawˬ dawˇ kʼo, Yoˇsehꞈ dawˇ cheˆ ve cawˇ˗aw laˇ? Aˬ htoꞈ ma pa taw le?
Chi beuꞈ teˇ co˗e, chaw haˉ yaˇ miˇ haˉ Yoˇsehꞈ htaꞈ henˇ yuˬ leh pehꞈ ve tzuhˆ ve htaꞈ hkʼaˬ hkʼe te jaw kʼai gʼa ve le? VDO hpaw sheˍ.
Yaˬhoˉvaˬ ngaˬ hui teˇ gʼaˇ le le htaꞈ pehꞈ ve tzuhˆ ve maˇ te tcuh gaˇ. 1 Kawˇrenˍhtuˆ liꞈ 6:18 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Pehꞈ ve tzuhˆ ve te tuˬ aˬ htoꞈ ma teˇ ceuˬ lawˇ nyi laˇ ve le?
-
Pehꞈ ve tzuhˆ ve te ve htaꞈ nawˬ hkʼaˬ hkʼe te jaw kʼai gʼa tuˬ le?
4. Lawˇ nyi laˇ ve htaꞈ nawˬ tawˍ daꞈ gʼa ve
Aˬ htoꞈ ma pa taw pehꞈ ve tzuhˆ ve htaꞈ tawˍ daꞈ tuˬ maˇ sha ve le? VDO hpaw leh na hkawˇ chi htaꞈ tawˇ yaw daꞈ sheˍ:
-
VDO chi hkʼaw, awˬ viˉ awˬ nyi hawˉ hkʼaˆ yawˇ dawˇ ve awˬ ceuˬ leh te ve awˬ ceuˬ awˬ miˇ ma htaꞈ ka tiꞈ maˇ yeˬ ve tehꞈ shiˍ la htaˇ, yawˇ hkʼaˬ hkʼe te ve le?
Ka tiꞈ yeˬ ve Hkriꞈ yaˇ htawˇ, yawˇ hui ve dawˇ hkʼaˇ daꞈ kehˬ tuˬ gʼa coˇ caˇ ve yoˬ. Nawˬ pehꞈ ve tzuhˆ ve dawˇ hkʼaˇ htaꞈ jaw kʼai gʼa tuˬ, aˬ htoꞈ ma ga laˇ gʼa ve le? Hpiˇliˇpiˆ liꞈ 4:8 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Ngaˬ hui aˬ htoꞈ ma awˬ lawn htaꞈ dawˇ nyi cawˇ ve le?
-
Liꞈ hpu gʼaw leh hkʼaˬ htaˆ kaꞈ Yaˬhoˉvaˬ ve kanˉ te chehˇ ve lehˬ, pehꞈ ve tzuhˆ ve te tuˬ lawˇ nyi laˇ ve htaꞈ tawˍ daꞈ gʼaˇ tuˬ hkʼaˬ hkʼe ga laˇ gʼa ve le?
5. Yaˬhoˉvaˬ ve awˬ liˇ awˬ hkʼaˇ ngaˬ hui awˬ pon awˬ bon cawˬ ve
Yaˬhoˉvaˬ lehˬ ngaˬ hui awˬ pon aˬ htoꞈ ma teˇ ceuˬ daꞈ jaˇ ve htaꞈ yawˇ shiˍ ve yoˬ. Ngaˬ hui daꞈ kehˬ ve awˬ liˇ awˬ hkʼaˇ htaꞈ hkʼaˬ hkʼe te haꞈ shaˉ gʼa tuˬ le, leh ngaˬ hui chi hkʼe te htaˇ aˬ htoꞈ ma awˬ bon gʼa tuˬ ve htaꞈ yawˇ kʼoˆ maˍ laˇ ve yoˬ. Tawˇ naˉ ve liꞈ 7:7-27 gʼaw ve maˇ heˆ leh VDO hpaw sheˍ. Peuˬ leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Chaw haˉ paˍ teˇ gʼaˇ lawˇ nyi piˇ ve hkʼaw yawˇ hkʼaˬ hkʼe te loꞈ˗e ve le?—Tawˇ naˉ ve 7:8, 9 hkʼaw nyi sheˍ.
-
Tawˇ naˉ ve liꞈ 7:23, 26 hkʼaw kʼoˆ laˇ ve, pehꞈ ve tzuhˆ ve te ve lehˬ maˇ daꞈ ve laiˉ ceuˬ gʼa hpuˇ tuˬ yoˬ. Yaꞈ hkʼaˇ, ngaˬ hui daꞈ kehˬ ve awˬ liˇ awˬ hkʼaˇ htaꞈ gʼaꞈ te ve kʼo, shoꞈ shaꞈ ve aˬ htoꞈ ma htaꞈ maˇ gʼa hpuˇ ve le?
-
Ngaˬ hui daꞈ kehˬ ve awˬ liˇ awˬ hkʼaˇ htaꞈ gʼaꞈ te ve kʼo, awˬ gʼuˇ suhˍ hpawˇ aˬ htoꞈ ma awˬ bon gʼa tuˬ le?
Chaw teˇ hpaˍ dawˇ ve, hawˉ hkʼaˆ chawˇ hawˉ hkʼaˆ yaˇ miˇ chawˇ yaˇ miˇ pehꞈ ve tzuhˆ ve te ve awˬ lawn Liꞈ hpu hkʼaw kʼoˆ laˇ ve lehˬ awˬ liˇ awˬ hkʼaˇ hehnˇ jaˇ. Yaꞈ hkʼaˇ, haꞈ pehnˇ ve Yaˬhoˉvaˬ Gʼuiˬ sha lehˬ teˇ gʼaˇ le le htaꞈ co co taiˍ taiˍ ha lehˬ ve a shaꞈ cawˬ tcuh gaˇ ve yoˬ. Chi hkʼe ve a shaꞈ cawˬ tuˬ ngaˬ hui yawˇ ve awˬ liˇ awˬ hkʼaˇ htaꞈ gʼa gʼaꞈ te ve yoˬ. 1 Kawˇrenˍhtuˆ liꞈ 6:9-11 gʼaw leh na hkawˇ chi htaꞈ tawˇ yaw daꞈ sheˍ:
-
Gʼuiˬ sha ve dawˇ hkʼaˇ hkʼaw, hawˉ hkʼaˆ chawˇ hawˉ hkʼaˆ yaˇ miˇ chawˇ yaˇ miˇ pehꞈ ve tzuhˆ ve te ve awˬ lawn htaꞈ ceh tiˉ pa cawˇ ve laˇ?
Gʼuiˬ sha nyi hkʼaˇ suh tuˬ ngaˬ hui teˇ gʼaˇ le le lehˬ gʼa pa cawˇ ve awˬ ceuˬ cawˬ ve yoˬ. Chi hkʼe te ve lehˬ awˬ bon cawˬ˗aw laˇ? Chiˇ mvuh ve liꞈ 19:8, 11 gʼaw leh na hkawˇ chi htaꞈ tawˇ yaw daꞈ sheˍ:
-
Nawˬ dawˇ kʼo, Yaˬhoˉvaˬ ve awˬ liˇ awˬ hkʼaˇ lehˬ cawˇ˗aw laˇ? Aˬ htoꞈ ma pa taw le?
Yaˬhoˉvaˬ lehˬ yawˇ ve awˬ liˇ awˬ hkʼaˇ htaꞈ gʼaꞈ te tuˬ chaw laiˉ gʼaˇ htaꞈ ga piˇ ve yoˬ. Leh yawˇ nawˬ htaꞈ kaꞈ ga laˇ gʼa ve
Chaw teˇ hpaˍ kʼoˆ ve: “Chaw nyiˇ gʼaˇ haꞈ daꞈ ve kʼo, yawˇ hui teˇ geh zuhꞈ ve kaꞈ teꞈ chiˉ maˇ heˆ.”
-
Nawˬ hkʼaˬ hkʼe hkʼawꞈ piˇ tuˬ le?
A yeˇ uiˍ ve awˬ lawn
Awˬ hpawˇ awˬ miˇ ma ha lehˬ ve cawˬ tuˬ teˇ geh zuhꞈ gʼa ve lehˬ Yaˬhoˉvaˬ yawˇ hui htaꞈ piˇ taˍ ve laꞈ shawnˍ hpehꞈ ve yoˬ.
Kʼawꞈ gʼaꞈ na ve
-
Pehꞈ ve tzuhˆ ve te ve lehˬ aˬ htoꞈ ma htaꞈ kaꞈ kʼoˆ gaˇ ve le?
-
Pehꞈ ve tzuhˆ ve te ve htaꞈ jaw kʼai gʼa tuˬ, ngaˬ hui htaꞈ aˬ htoꞈ ma ga laˇ gʼa ve le?
-
Ngaˬ hui Yaˬhoˉvaˬ ve awˬ liˇ awˬ hkʼaˇ htaꞈ gʼaꞈ te ve kʼo, aˬ htoꞈ ma awˬ bon gʼa tuˬ le?
Kʼawꞈ caˉ nyi gʼa ve
Aˬ htoꞈ ma pa taw Gʼuiˬ sha lehˬ hawˉ hkʼaˆ leh yaˇ miˇ teˇ geh chehˇ gaˇ ve htaꞈ heuˆ daꞈ tcuh gaˇ ve le, gʼaw nyi sheˍ.
Liꞈ hpu hkʼaw hawˉ hkʼaˆ chawˇ hawˉ hkʼaˆ yaˇ miˇ chawˇ yaˇ miˇ pehꞈ ve tzuhˆ ve te ve lehˬ yaꞈ ve tehꞈ maˍ laˇ ve htawˇ, yawˇ hui htaꞈ nyi bawˬ cawˇ ve tehꞈ aˬ htoꞈ ma pa taw maˇ kʼoˆ laˇ ve le?
Pehꞈ ve tzuhˆ ve htaꞈ caˉ daꞈ ve Gʼuiˬ sha ve awˬ liˇ tawˇ hkawˇ ngaˬ hui htaꞈ hkʼaˬ hkʼe te haꞈ shaˉ laˇ ve le, gʼaw nyi sheˍ.
Hawˉ hkʼaˆ chawˇ hawˉ hkʼaˆ pehꞈ ve tzuhˆ ve te jaw ve teˇ gʼaˇ, a shaꞈ teꞈ hkʼaˇ pa leh Gʼuiˬ sha nyi hkʼaˇ suh tuˬ yawˇ htaꞈ aˬ htoꞈ ma ga piˇ ve le? “Yawˇ hui ngaˬ htaꞈ yawˆ yan laˇ ve” awˬ lawn chi htaꞈ gʼaw nyi sheˍ.
“Liꞈ hpu a shaꞈ htaꞈ pa gʼa ve” (Shaw nyi kuiˬ Taꞈ yehˬ 2011 hkʼawꞈ ha pa 4 maˬ 1 nyi)
a Pehꞈ ve tzuhˆ ve te ve lehˬ, hawˉ hkʼaˆ yaˇ miˇ teˇ geh zuhꞈ ve awˬ hkʼoˆ kaꞈ, mawꞈ kʼaw maˇ heˆ leh hkʼehˇ hkʼaw yehˇ leh pehꞈ ve tzuhˆ ve te ve, leh awˬ nu ve chaw ve hpaˇ kʼaˍ htaꞈ shoˆ ve, chi teˇ hpaˍ htaꞈ kʼoˆ gaˇ ve yoˬ.
You May Also Like
NGAˬ HUI HTAꞈ CAˉ DAꞈ VE AWˬ LAWN
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ ve hk’aˬ hk’e te henˇ ve le?
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ tuˬ nawˬ Liꞈ hpu hk’aˬ ve teˇ maˬ yehˇ ve kaꞈ hpehꞈ ve yoˬ. Awˬ chawˇ maˇ heˆ leh yehˬ k’a hk’aw ve chaw htaꞈ Liꞈ hpu teˇ geh henˇ tuˬ jehˬ piˇ kaꞈ g’a ve yoˬ.
