Awˬ lawn 42
Awˬ hpawˇ awˬ miˇ ma heuˆ ve leh maˇ heuˆ ve awˬ lawn Liꞈ hpu hkʼaw hkʼaˬ hkʼe maˍ laˇ ve le?
Chaw teˇ hpaˍ kʼoˆ ve, awˬ hpawˇ awˬ miˇ ma maˇ heuˆ ve kʼo ha lehˬ tuˬ maˇ cawˬ. Yaꞈ hkʼaˇ, awˬ tehˬ kʼo heuˆ daꞈ˗oˬ ve chaw teˇ gʼaˇ le le kaꞈ ha lehˬ tuˬ cawˬ ve maˇ heˆ. Leh maˇ heuˆ ve chaw teˇ gʼaˇ le le maˇ ha lehˬ ve kaꞈ maˇ heˆ. Liꞈ hpu hkʼaw kʼoˆ ve, awˬ hpawˇ awˬ miˇ ma maˇ heuˆ ve kaꞈ, heuˆ ve kaꞈ Yaˬhoˉvaˬ geh laˬ ve laꞈ shawnˍ hpehꞈ ve yoˬ.
1. Awˬ hpawˇ awˬ miˇ ma maˇ heuˆ ve lehˬ aˬ htoꞈ ma awˬ bon cawˬ ve le?
Liꞈ hpu hkʼaw kʼoˆ ve, ‘awˬ hpawˇ awˬ miˇ ma maˇ heuˆ sheˍ ve chaw leh mehˇ chawˇ ma teˇ hpaˍ lehˬ daꞈ ve yoˬ.’ (1 Kawˇrenˍhtuˆ 7:8, 32, 33 gʼaw sheˍ.) Awˬ ca maˇ cawˬ ve chaw lehˬ hkʼaˬ hkʼe te leh daꞈ ve le? Awˬ hpawˇ awˬ miˇ ma maˇ heuˆ ve chaw lehˬ a shu yawˇ ve awˬ ca htaꞈ nyi haꞈ shaˉ tuˬ maˇ loˍ. Leh awˬ ca cawˬ˗oˬ ve chaw aꞈ kehˉ yawˇ hui awˬ yanˇ cawˬ leh laiˉ ceuˬ te gʼa ve yoˬ. Tawˇ pa haˉ te kʼo, hto toˇ ve chaw loˍ jaˇ kuiˬ lo jiˆ kʼai gʼa ve yoˬ. Chi hkʼoˆ kaꞈ, awˬ ca cawˬ˗oˬ ve chaw aꞈ kehˉ yawˇ hui Yaˬhoˉvaˬ geh meuˆ daꞈ tuˬ awˬ yanˇ cawˬ maˇ ve yoˬ.
2. Mvuhˇ miˬ hpawˇ awˬ liˇ awˬ hkʼaˇ teh taˍ ve hkʼaw heuˆ daꞈ ve lehˬ aˬ htoꞈ ma awˬ bon cawˬ ve le?
Heuˆ ve kaꞈ maˇ heuˆ ve kaꞈ awˬ bon laiˉ ceuˬ cawˬ ve yoˬ. Liꞈ hpu hkʼaw kʼoˆ ve, ‘chaw nyiˇ gʼaˇ teˇ geh chehˇ ve lehˬ teˇ gʼaˇ tiˉ aꞈ kehˉ daꞈ ve yoˬ.’ (Cuˇ yiˍ piˇ ve 4:9) Chi lehˬ a shu yawˇ ve awˬ ca geh Liꞈ hpu hkʼaw ve awˬ liˇ awˬ hkʼaˇ htaꞈ yuˬ yehˇ ve chaw lehˬ awˬ tehˬ hpehꞈ ve tehꞈ yonˍ gʼa ve yoˬ. Mvuhˇ miˬ hpawˇ awˬ liˇ awˬ hkʼaˇ teh taˍ ve hkʼaw heuˆ daꞈ ve lehˬ, a shu yawˇ ve awˬ ca htaꞈ haꞈ tuˬ, yawˆ yan tuˬ, leh dawˇ nyi piˇ tuˬ, ka tiꞈ te daꞈ ve hkʼe hpehꞈ ve yoˬ. Chi hkʼe te ve lehˬ mvuhˇ miˬ ve awˬ liˇ aw hkʼaˇ htaꞈ maˇ gʼaꞈ te ve awˬ ca aꞈ kehˉ yawˇ hui ve yehˬ kʼa yeˬ jaˇ tuˬ te piˇ ve yoˬ. Leh yawˇ hui ve yaˇ kaꞈ yehˬ kʼa yeˬ ve tehꞈ dawˇ tuˬ yoˬ.
3. Heuˆ daꞈ ve htaꞈ Yaˬhoˉvaˬ hkʼaˬ hkʼe dawˇ ve le?
Yaˬhoˉvaˬ lehˬ heuˆ daꞈ ve awˉ lawˉ teˇ pawˆ gu teh piˇ htaˇ yawˇ kʼoˆ ve, “hawˉ hkʼaˆ lehˬ yawˇ ve awˬ pa awˬ e htaꞈ hpaˆ daꞈ taˉ leh, yawˇ ve awˬ miˇ ma htaꞈ caˉ daꞈ” ve yoˬ. (Awˬ hkuiˉ puiˍ 2:24) Yaˬhoˉvaˬ lehˬ awˬ hpawˇ awˬ miˇ ma htaꞈ haꞈ daꞈ tcuh gaˇ leh yawˇ hui a shaꞈ teꞈ chehˇ ve teˇ co˗e teˇ geh chehˇ tcuh gaˇ ve yoˬ. Yaˬhoˉvaˬ awˬ pon kʼo, baˬ daꞈ gʼa ve teˇ hkʼaˇ ceh tiˉ cawˬ ve, chi lehˬ haˉ chawˇ te ve yoˬ. Chi hkʼe hpehꞈ ve kʼo, yawˇ ve awˬ ca geh teˇ pawˆ kʼawꞈ chehˇ tuˬ laˇ, maˇ heˆ leh baˬ daꞈ tuˬ laˇ tehꞈ, Yaˬhoˉvaˬ lehˬ maˇ te yaꞈ ve chaw htaꞈ a hkaw˗anˬ piˇ ve yoˬ. a (Maꞈhtehˍ 19:9) Yaˬhoˉvaˬ lehˬ Hkriꞈ yaˇ hpehꞈ ve chaw htaꞈ awˬ hpawˇ maˇ heˆ leh awˬ miˇ ma laiˉ gʼaˇ heuˆ tuˬ a hkaw˗anˬ maˇ piˇ.—1 Tiˆmoˉseˍ 3:2.
Henˇ shiˍ maˇ la tuˬ
Nawˬ awˬ hpawˇ awˬ miˇ ma heuˆ ve kaꞈ, maˇ heuˆ ve kaꞈ hkʼaˬ hkʼe te leh nawˬ ha lehˬ leh Yaˬhoˉvaˬ htaꞈ kaꞈ ha lehˬ tuˬ te piˇ gʼa ve le, teˇ geh henˇ sheˍ.
4. Awˬ hpawˇ awˬ miˇ ma maˇ heuˆ ve htaꞈ awˬ bon cawˬ ve hkʼaw yehˇ sheˍ
Yeˍsuˆ lehˬ awˬ hpawˇ awˬ miˇ ma maˇ heuˆ ve htaꞈ laꞈ shawnˍ hpehꞈ ve tehꞈ shawˍ ve yoˬ. (Maꞈhtehˍ 19:11, 12) Maꞈhtehˍ liꞈ 4:23 gʼaw leh na hkawˇ chi htaꞈ tawˇ yaw daꞈ sheˍ:
-
Yeˍsuˆ lehˬ awˬ miˇ ma maˇ heuˆ ve laꞈ shawnˍ chi htaꞈ yehˇ leh yawˇ ve Awˬ pa ve kanˉ te piˇ leh awˬ nu ve chaw htaꞈ hkʼaˬ hkʼe ga piˇ ve le?
Awˬ hpawˇ awˬ miˇ ma maˇ heuˆ ve Hkriꞈ yaˇ lehˬ Yeˍsuˆ hkʼa shuˍ ha lehˬ ve a shaꞈ cawˬ gʼa ve yoˬ. VDO hpaw leh na hkawˇ chi htaꞈ tawˇ yaw daꞈ sheˍ:
-
Awˬ hpawˇ awˬ miˇ ma maˇ heuˆ ve Hkriꞈ yaˇ lehˬ ha lehˬ ve hkʼaw yawˇ hui ve a shaꞈ hkʼaˬ hkʼe te yehˇ gʼa ve le?
Nawˬ shiˍ˗aˬ laˇ?
Liꞈ hpu hkʼaw a shaꞈ hkʼaˬ ma gaˬ htaˇ˗ehꞈ awˬ hpawˇ awˬ miˇ ma heuˆ gʼa ve tehꞈ maˇ gʼa kʼoˆ maˍ laˇ. Yaꞈ hkʼaˇ, “chaw haˉ yaˇ miˇ haˉ te ve awˬ yanˇ ponˬ” kʼai htaˇ˗ehꞈ heuˆ daꞈ tuˬ beˆ maˍ laˇ ve yoˬ. Awˬ lawn kʼo, chaw haˉ yaˇ miˇ haˉ te ve awˬ yanˇ htaˇ lehˬ teˇ geh zuhꞈ gaˇ ve nyi ma cawˬ jaˇ ve yoˬ. Leh awˬ yanˇ chi ponˬ kʼai peuˬ hkʼawꞈ nawˉ yawˇ hui cuˇ yiˍ cawˬ ve hkʼaw hkʼa dehꞈ dawˇ cheˆ gʼa ve yoˬ.—1 Kawˇrenˍhtuˆ 7:36, Miˬ guiˬ awˬ suhˉ yuˬ tawˆ ve Liꞈ hpu.
5. Cuˇ yiˍ cawˬ ve hkʼaw nawˬ ve awˬ ca htaꞈ leuˆ sheˍ
A shu htaꞈ heuˆ tuˬ dawˇ cheˆ ve lehˬ a yeˇ uiˍ jaˇ ve yoˬ. Maꞈhtehˍ liꞈ 19:4-6, 9 gʼaw leh na hkawˇ chi htaꞈ tawˇ yaw daꞈ sheˍ:
-
Aˬ htoꞈ ma pa taw Hkriꞈ yaˇ lehˬ awˬ hpawˇ awˬ miˇ ma maˇ heuˆ sheˍ htaˇ hkʼa dehꞈ dawˇ nyi cawˇ ve le?
Nawˬ hkʼaˬ hkʼe ve chaw htaꞈ heuˆ cawˇ ve tehꞈ Liꞈ hpu hkʼaw maˍ laˇ ve yoˬ. A yeˇ uiˍ jaˇ ve lehˬ nawˬ heuˆ ve chaw Yaˬhoˉvaˬ htaꞈ gʼa haꞈ ve yoˬ. b 1 Kawˇrenˍhtuˆ liꞈ 7:39 leh 2 Kawˇrenˍhtuˆ liꞈ 6:14 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Aˬ htoꞈ ma te ngaˬ hui lehˬ Hkriꞈ yaˇ hpehꞈ ve chaw htaꞈ ceh tiˉ heuˆ cawˇ ve le?
-
Nawˬ dawˇ kʼo, ngaˬ hui Yaˬhoˉvaˬ htaꞈ maˇ haꞈ ve chaw geh heuˆ daꞈ ve kʼo, Yaˬhoˉvaˬ hkʼaˬ hkʼe dawˇ tuˬ le?
Maˇ shuˍ daꞈ ve to nuˇ to shaˆ htaꞈ ehˉ kʼawehꞈ teˇ maˬ tiˉ pfuhˍ piˇ ve kʼo, nyiˇ hkeh hkeh kaꞈ naˬ tuˬ yoˬ. Chi hkʼa shuˍ shuˍ Hkriꞈ yaˇ lehˬ maˇ yonˍ ve chaw htaꞈ heuˆ daꞈ ve kʼo, shoꞈ shaꞈ ve laiˉ ceuˬ gʼa hpuˇ tuˬ yoˬ
6. Heuˆ daꞈ ve htaꞈ caˉ daꞈ ve Yaˬhoˉvaˬ dawˇ ve hkʼe dawˇ sheˍ
Iˉsaˍreˍlaˆ chaw teˇ co˗e htaˇ, hawˉ hkʼaˆ teˇ hpaˍ hpaˍ a shu yawˇ awˬ pon ceh tiˉ dawˇ nyi leh awˬ miˇ ma htaꞈ baˬ piˇ ve yoˬ. Maˍlaˍhkiˆ liꞈ 2:13, 14, 16 gʼaw leh na hkawˇ chi htaꞈ tawˇ yaw daꞈ sheˍ:
-
Haˉ chawˇ maˇ te leh baˬ daꞈ ve htaꞈ aˬ htoꞈ ma te Yaˬhoˉvaˬ canˇ ve le?
Haˉ chawˇ te leh baˬ daꞈ ve lehˬ, maˇ te yaꞈ ve chaw leh yawˇ hui ve yaˇ htaꞈ nyi ma naˬ tuˬ te piˇ ve
VDO hpaw leh na hkawˇ chi htaꞈ tawˇ yaw daꞈ sheˍ:
-
Nawˬ ve awˬ ca Yaˬhoˉvaˬ htaꞈ maˇ haꞈ ve kʼo, nawˬ ve yehˬ kʼa ha lehˬ tuˬ aˬ htoꞈ ma te gʼa ve le?
7. Heuˆ daꞈ ve htaꞈ caˉ daꞈ ve Yaˬhoˉvaˬ ve awˬ liˇ awˬ hkʼaˇ htaꞈ yuˬ yehˇ sheˍ
Heuˆ daꞈ ve htaꞈ caˉ daꞈ ve Yaˬhoˉvaˬ ve awˬ liˇ awˬ hkʼaˇ htaꞈ gʼaꞈ te tuˬ maˇ sha ve yoˬ hehˉ. c Yaꞈ hkʼaˇ, ngaˬ hui gʼaꞈ te ve kʼo, Yaˬhoˉvaˬ awˬ bon naꞈ laˇ tuˬ yoˬ. VDO hpaw sheˍ.
Heˍbrehˇ liꞈ 13:4 gʼaw leh na hkawˇ chi htaꞈ tawˇ yaw daꞈ sheˍ:
-
Nawˬ dawˇ kʼo, heuˆ daꞈ ve htaꞈ caˉ daꞈ ve Yaˬhoˉvaˬ ve awˬ liˇ awˬ hkʼaˇ htaꞈ gʼaꞈ te gʼa˗aw laˇ? Aˬ htoꞈ ma pa taw le?
Yaˬhoˉvaˬ lehˬ Hkriꞈ yaˇ htaꞈ heuˆ daꞈ ve liꞈ maˇ heˆ leh baˬ daꞈ ve liꞈ te tcuh gaˇ ve yoˬ. Tiˇtuˆ liꞈ 3:1 gʼaw leh na hkawˇ chi htaꞈ tawˇ yaw daꞈ sheˍ:
-
Nawˬ awˬ hpawˇ awˬ miˇ ma heuˆ˗oˬ ve kʼo, mvuhˇ miˬ awˬ liˇ cawˇ ve hkʼaw heuˆ daꞈ ve liꞈ te˗oˬ laˇ?
Chaw teˇ hpaˍ na nyi laˇ ve: “Aˬ htoꞈ ma te heuˆ daꞈ ve liꞈ gʼa te ve le? Hkʼe leˇ teˇ geh chehˇ maˇ hpehꞈ laˇ?”
-
Nawˬ hkʼaˬ hkʼe hkʼawꞈ piˇ tuˬ le?
A yeˇ uiˍ ve awˬ lawn
Awˬ hpawˇ awˬ miˇ ma maˇ heuˆ ve kaꞈ heuˆ ve kaꞈ Yaˬhoˉvaˬ geh gʼa ve laꞈ shawnˍ hpehꞈ ve yoˬ. Leh yawˇ ve a loˍ htaꞈ gʼaꞈ te ve kʼo, ha lehˬ ve a shaꞈ cawˬ gʼa ve yoˬ.
Kʼawꞈ gʼaꞈ na ve
-
Awˬ hpawˇ awˬ miˇ ma maˇ heuˆ ve chaw lehˬ ha lehˬ ve hkʼaw yawˇ ve a shaꞈ hkʼaˬ hkʼe te yehˇ gʼa ve le?
-
Aˬ htoꞈ ma pa taw Hkriꞈ yaˇ hpehꞈ ve chaw htaꞈ ceh tiˉ gʼa heuˆ daꞈ ve tehꞈ Liꞈ hpu hkʼaw maˍ laˇ ve le?
-
Liꞈ hpu hkʼaw baˬ daꞈ gʼa ve teˇ hkʼaˇ ceh tiˉ cawˬ ve aˬ htoꞈ ma le?
Kʼawꞈ caˉ nyi gʼa ve
‘Jawˇmawˇ htaꞈ cuˇ ve awˬ hkʼaw lo ceh tiˉ’ heuˆ hpehꞈ ve lehˬ, aˬ htoꞈ ma kʼoˆ gaˇ ve le?
“Gʼaw ve chaw na nyi hkawˇ” (Shaw nyi kuiˬ Taꞈ yehˬ 2004 hkʼawꞈ ha pa 7 maˬ 1 nyi)
Chaw haˉ yaˇ miˇ haˉ cawˬ ve maˇ heˆ leh heuˆ daꞈ ve htaꞈ nawˬ dawˇ cheˆ tuˬ ga laˇ gʼa ve, VDO 2 lawn cawˬ ve htaꞈ nyi sheˍ.
Aˬ htoꞈ ma pa taw awˬ viˉ awˬ nyi hawˉ hkʼaˆ teˇ gʼaˇ yawˇ baˬ taˉ ve awˬ ceuˬ aꞈ kehˉ Yaˬhoˉvaˬ yawˇ htaꞈ piˇ ve awˬ ceuˬ awˬ hpfuhˇ hkʼaˆ jaˇ tehꞈ shawˍ ve le, nyi sheˍ.
Maˇ baˬ daꞈ sheˍ htaˇ, maˇ heˆ leh teˇ gʼaˇ teˇ kaˬ chehˇ tuˬ maˇ gʼa dawˇ cheˆ sheˍ htaˇ, aˬ htoꞈ ma dawˇ nyi cawˇ ve le?
“Gʼuiˬ sha caˉ daꞈ piˇ taˍ ve htaꞈ yawˆ yan˗o” (Shaw nyi kuiˬ Taꞈ yehˬ 2018 hkʼawꞈ ha pa 12 maˬ)
a Haˉ chawˇ maˇ te ve htawˇ teˇ gʼaˇ teˇ kaˬ chehˇ ve htaꞈ caˉ daꞈ ve, Kʼoˆ maˍ ve awˬ lawn 4 hkʼaw nyi sheˍ.
b Chaw liˇ vaˇ liˇ teˇ hpaˍ hpaˍ kʼo, awˬ pa awˬ e lehˬ a shu yawˇ ve yaˇ htaꞈ awˬ hpawˇ awˬ miˇ ma ca piˇ ve yoˬ. Chi hkʼe hpehꞈ ve kʼo, haꞈ pehnˇ uiˍ ve awˬ pa awˬ e lehˬ paw sha ve chaw, maˇ heˆ leh awˬ meꞈ awˬ hponˇ cawˬ ve chaw htaꞈ ceh tiˉ maˇ ca piˇ. Yaꞈ hkʼaˇ, Yaˬhoˉvaˬ htaꞈ haꞈ ve chaw htaꞈ ca piˇ ve yoˬ.
c Nawˬ maˇ heuˆ daꞈ sheˍ ve chaw geh teˇ geh chehˇ ve kʼo, nawˬ yawˇ htaꞈ hpaˆ daꞈ tuˬ laˇ, maˇ heˆ leh yawˇ htaꞈ heuˆ daꞈ tuˬ laˇ, nawˬ gʼa dawˇ cheˆ ve yoˬ.
You May Also Like
NGAˬ HUI HTAꞈ CAˉ DAꞈ VE AWˬ LAWN
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ ve hk’aˬ hk’e te henˇ ve le?
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ tuˬ nawˬ Liꞈ hpu hk’aˬ ve teˇ maˬ yehˇ ve kaꞈ hpehꞈ ve yoˬ. Awˬ chawˇ maˇ heˆ leh yehˬ k’a hk’aw ve chaw htaꞈ Liꞈ hpu teˇ geh henˇ tuˬ jehˬ piˇ kaꞈ g’a ve yoˬ.
