Awˬ lawn 43
Tzuhˬ dawˬ ve htaꞈ caˉ daꞈ ve Liꞈ hpu hkʼaw hkʼaˬ hkʼe kʼoˆ laˇ ve le?
Miˬ guiˬ hkʼoˆ chaw yaˇ tzuhˬ a dawˬ ve htaꞈ kʼoˆ htaˇ, teˇ gʼaˇ leh teˇ gʼaˇ ve dawˇ hkʼaˇ maˇ shuˍ daꞈ. Chaw teˇ hpaˍ kʼo, teˇ pawˆ teˇ yanˇ awˬ chawˇ geh dawˬ ve, teˇ hpaˍ kʼo a ciˉ kaꞈ maˇ dawˬ. Leh teˇ hpaˍ kʼo, tzuhˬ dawˬ bvuhˆ ve yoˬ. Tzuhˬ dawˬ ve htaꞈ caˉ daꞈ ve Liꞈ hpu hkʼaw hkʼaˬ hkʼe kʼoˆ laˇ ve le?
1. Tzuhˬ dawˬ ve lehˬ yaꞈ˗aw laˇ?
Tzuhˬ dawˬ ve htaꞈ yaꞈ ve tehꞈ Liꞈ hpu hkʼaw maˇ kʼoˆ laˇ. Awˬ lawn kʼo, Gʼuiˬ sha geh laˬ ve daꞈ ve awˬ ceuˬ htaꞈ kʼoˆ htaˇ, Liꞈ hpu hkʼaw kʼoˆ ve, Gʼuiˬ sha lehˬ ‘chaw yaˇ htaꞈ ha lehˬ piˇ tuˬ a pehˉ meuˇ gʼuiˬ’ piˇ ve yoˬ. (Chiˇ mvuh ve 104:14, 15) Liꞈ hpu hkʼaw ka tiꞈ yeˬ ve hawˉ hkʼaˆ leh yaˇ miˇ teˇ hpaˍ hpaˍ kaꞈ tzuhˬ dawˬ ve yoˬ.—1 Tiˆmoˉseˍ 5:23.
2. Tzuhˬ dawˬ ve chaw htaꞈ Liꞈ hpu hkʼaw hkʼaˬ hkʼe beˆ maˍ piˇ ve le?
Yaˬhoˉvaˬ lehˬ tzuhˬ dawˬ ponˬ dawˬ leuˉ ve leh tzuhˬ dawˬ bvuhˆ ve htaꞈ venˇ baˆ taˍ ve yoˬ. (Gaˍlaˍtiˆ 5:21) Liꞈ hpu hkʼaw kʼoˆ ve, ‘a pehˉ meuˇ gʼuiˬ dawˬ ponˬ dawˬ leuˉ ve chaw htaꞈ awˬ chawˇ taˇ te.’ (Tawˇ naˉ ve 23:20) Chi htaꞈ pa taw, teˇ gʼaˇ tiˉ dawˬ htaˇ maˇ kʼoˆ, awˬ chawˇ geh dawˬ htaˇ maˇ kʼoˆ, ngaˬ hui a shu yawˇ ve awˬ to, dawˇ hkʼaˇ, tawˇ yaw ve, leh te hkʼaˇ htaꞈ yuˬ tiˍ gʼaˇ tuˬ ngaˬ hui chi ma ma maˇ dawˬ cawˇ ve yoˬ. Leh ngaˬ hui awˬ to chehˇ sha tuˬ tzuhˬ maˇ gʼa dawˬ maˇ ve yoˬ. Ngaˬ hui a shu yawˇ awˬ to htaꞈ yuˬ tiˍ maˇ gʼaˇ ve kʼo, tzuhˬ a ciˉ kaꞈ maˇ dawˬ cawˇ ve yoˬ.
3. Shu dawˇ cheˆ ve htaꞈ ngaˬ hui yawˆ yan piˇ ve tehꞈ hkʼaˬ hkʼe te hpeuꞈ maw piˇ gʼa ve le?
Teˇ gʼaˇ le le tzuhˬ dawˬ tuˬ laˇ, maˇ dawˬ tuˬ laˇ, a shu yawˇ hkʼaˇ yawˇ gʼa dawˇ cheˆ ve yoˬ. Ngaˬ hui tzuhˬ maˇ dawˬ ve kʼo, tzuhˬ dawˬ ve chaw htaꞈ venˇ baˆ maˇ taˍ cawˇ ve yoˬ. Maˇ heˆ leh ngaˬ hui tzuhˬ dawˬ ve kʼo, shu kaꞈ tzuhˬ dawˬ tuˬ maˇ nyiˉ piˇ cawˇ ve yoˬ. (Roˉmaꞈ 14:10) Leh ngaˬ hui tzuhˬ dawˬ ve htaꞈ awˬ nu ve chaw nyi ma maˇ sha ve kʼo, ngaˬ hui kaꞈ tzuhˬ maˇ dawˬ ve yoˬ. (Roˉmaꞈ 14:21 gʼaw sheˍ.) Ngaˬ hui ‘a shu yawˇ awˬ to awˬ pon awˬ bon gʼa tuˬ maˇ ca. Yaꞈ hkʼaˇ, shu awˬ pon awˬ bon gʼa tuˬ gʼa ca ve yoˬ.’—1 Kawˇrenˍhtuˆ 10:23, 24 gʼaw sheˍ.
Henˇ shiˍ maˇ la tuˬ
Nawˬ tzuhˬ dawˬ tuˬ laˇ, maˇ dawˬ tuˬ laˇ, leh hkʼaˬ hkʼe taw dawˬ cawˇ ve le, awˬ lawn chi dawˇ cheˆ tuˬ Liꞈ hpu hkʼaw ve awˬ liˇ awˬ hkʼaˇ nawˬ htaꞈ ga laˇ gʼa ve yoˬ. Leh nawˬ tzuhˬ yeꞈ caˆ ve kʼo hkʼaˬ hkʼe te gʼa ve le, teˇ geh henˇ sheˍ.
4. Dawˬ maˇ dawˬ tuˬ dawˇ cheˆ sheˍ
Tzuhˬ dawˬ ve htaꞈ Yeˍsuˆ hkʼaˬ hkʼe dawˇ ve le? Na hkawˇ chi htaꞈ hkʼawꞈ laˇ hkawˇ shiˍ tuˬ Yeˍsuˆ anˇ tuˬ te ve awˉ lawˉ teˇ ceuˬ htaꞈ nyi sheˍ. Yoˇhanˬ liꞈ 2:1-11 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Yeˍsuˆ anˇ tuˬ te ve chi hkʼaw tzuhˬ dawˬ ve leh, tzuhˬ dawˬ ve chaw htaꞈ Yeˍsuˆ hkʼaˬ hkʼe dawˇ ve le?
-
Yeˍsuˆ lehˬ tzuhˬ dawˬ ve htaꞈ venˇ baˆ maˇ taˍ ve pa taw, Hkriꞈ yaˇ lehˬ tzuhˬ dawˬ ve chaw htaꞈ hkʼaˬ hkʼe dawˇ nyi cawˇ ve le?
Hkriꞈ yaˇ lehˬ tzuhˬ dawˬ ve maˇ yaꞈ ve htawˇ, maˇ dawˬ cawˇ ve awˬ yanˇ kaꞈ cawˬ ve yoˬ. Tawˇ naˉ ve liꞈ 22:3 gʼaw leh nawˬ tzuhˬ maˇ dawˬ cawˇ ve awˬ yanˇ htaꞈ tawˇ yaw daꞈ sheˍ:
-
Nawˬ kaˇ gʼaꞈ˗a te htaˇ maˇ heˆ leh kanˉ te leh caꞈ hkʼeun yehˇ˗a te htaˇ.
-
Nawˬ yaˇ hu chehˇ htaˇ.
-
Nawˬ tzuhˬ maˇ dawˬ cawˇ ve tehꞈ saˍ laꞈ gʼonˍ kʼoˆ laˇ htaˇ.
-
Nawˬ tzuhˬ dawˬ leh maˇ jehˇ gʼa ve chaw hpehꞈ htaˇ.
-
Mvuhˇ miˬ ve awˬ liˇ tawˇ hkawˇ tzuhˬ dawˬ tuˬ a hkaw˗anˬ maˇ peꞈ laˇ htaˇ.
-
Tzuhˬ yeꞈ caˆ jaw ve chaw geh chehˇ htaˇ.
Heuˆ daꞈ ve pawehˇ hkʼaw maˇ heˆ leh hti caˇ hti dawˬ ve hkʼaw hkehˉ chaw htaꞈ nawˬ tzuhˬ taw piˇ cawˇ˗aw laˇ? Nawˬ dawˇ cheˆ ve htaꞈ ga laˇ gʼa ve beˆ maˍ laˇ hkawˇ shiˍ tuˬ, VDO hpaw sheˍ.
Roˉmaꞈ liꞈ 13:13 leh 1 Kawˇrenˍhtuˆ liꞈ 10:31, 32 gʼaw sheˍ. Liꞈ hpu awˬ tawn teˇ tawn peuˬ teˇ tawn gʼaw peuˬ hkʼawꞈ nawˉ, na hkawˇ chi htaꞈ tawˇ yaw daꞈ sheˍ:
-
Yaˬhoˉvaˬ nyi hkʼaˇ suh ve hkʼaw nawˬ dawˇ cheˆ gʼa tuˬ, Liꞈ hpu hkʼaw ve awˬ liˇ awˬ hkʼaˇ chi htaꞈ hkʼaˬ hkʼe te yuˬ yehˇ gʼa ve le?
EaHkriꞈ yaˇ teˇ gʼaˇ le le lehˬ tzuhˬ dawˬ tuˬ laˇ, maˇ dawˬ tuˬ laˇ, a shu yawˇ hkʼaˇ yawˇ gʼa dawˇ cheˆ ve yoˬ. Nawˬ tzuhˬ dawˬ gʼa ve tehꞈ dawˇ ve htawˇ, teˇ pawˆ pawˆ maˇ dawˬ ve awˬ yanˇ kaꞈ cawˬ ve
5. Hkʼaˬ hkʼe taw dawˬ tuˬ dawˇ cheˆ sheˍ
Nawˬ tzuhˬ dawˬ ve kʼo, chi htaꞈ tawnˇ taˍ sheˍ. Yaˬhoˉvaˬ lehˬ tzuhˬ dawˬ ve htaꞈ venˇ baˆ maˇ taˍ ve htawˇ, dawˬ ponˬ dawˬ leuˉ ve htaꞈ venˇ baˆ taˍ ve yoˬ. Aˬ htoꞈ ma pa taw le? Hawˇseˍ liꞈ 4:11, 18 gʼaw leh na hkawˇ chi htaꞈ tawˇ yaw daꞈ sheˍ:
-
Chaw teˇ gʼaˇ dawˬ ponˬ dawˬ leuˉ ve kʼo, aˬ htoꞈ ma hpehꞈ la tuˬ le?
Ngaˬ hui tzuhˬ dawˬ ponˬ dawˬ leuˉ ve htaꞈ hkʼaˬ hkʼe te jaw kʼai gʼa ve le? Ngaˬ hui a shu yawˇ awˬ to hkʼaˬ ma dawˬ gʼa ve htaꞈ gʼa shiˍ ve yoˬ. Tawˇ naˉ ve liꞈ 11:2 gʼaw leh na hkawˇ chi htaꞈ tawˇ yaw daꞈ sheˍ:
-
Aˬ htoꞈ ma pa taw tzuhˬ hkʼaˬ ma dawˬ tuˬ awˉ lawˉ dawˇ teh taˍ cawˇ ve le?
6. Chaw teˇ hpaˍ tzuhˬ maˇ gʼa dawˬ maˇ tuˬ aˬ htoꞈ ma ga piˇ ve le?
Hawˉ hkʼaˆ teˇ gʼaˇ tzuhˬ yeꞈ tawˍ tuˬ aˬ htoꞈ ma ga piˇ ve le? VDO hpaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
VDO chi hkʼaw De˗mi˗hteˇ tzuhˬ dawˬ bvuhˆ htaˇ hkʼaˬ hkʼe ve chaw hpehꞈ ve le?
-
Yawˇ laꞈ tcuh laꞈ haˉ tzuhˬ yeꞈ tawˍ gʼa˗aw laˇ?
-
Awˬ leh meuˇ htaˇ yawˇ tzuhˬ yeꞈ hkʼaˬ hkʼe te tawˍ gʼa ve le?
1 Kawˇrenˍhtuˆ liꞈ 6:10, 11 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Tzuhˬ bvuhˆ ve htaꞈ Liꞈ hpu hkʼaw hkʼaˬ hkʼe kʼoˆ laˇ ve le?
-
Liꞈ hpu chi teˇ tawn hkʼaw gʼa mawˬ ve, tzuhˬ yeꞈ caˆ ve chaw lehˬ pa gʼa ve tehꞈ hkʼaˬ hkʼe te hpeuꞈ maw laˇ ve le?
Maꞈhtehˍ liꞈ 5:30 gʼaw leh na hkawˇ chi htaꞈ tawˇ yaw daꞈ sheˍ:
-
Yeˍsuˆ ve tawˇ pa haˉ hkʼaw laꞈ sheh tawˆ cheˆ ve htaꞈ kʼoˆ htaˇ, laꞈ sheh gʼa tawˆ cheˆ ve tehꞈ kʼoˆ gaˇ ve maˇ heˆ. Yaꞈ hkʼaˇ, Yaˬhoˉvaˬ nyi hkʼaˇ suh tuˬ nawˬ teˇ ceuˬ ceuˬ gʼa te ve tehꞈ kʼoˆ gaˇ ve yoˬ. Chi htaꞈ pa taw, nawˬ tzuhˬ yeꞈ tawˍ gaˇ ve kʼo aˬ htoꞈ ma te cawˇ ve le? b
1 Kawˇrenˍhtuˆ liꞈ 15:33 gʼaw leh na hkawˇ chi htaꞈ tawˇ yaw daꞈ sheˍ:
-
Nawˬ tzuhˬ dawˬ jaˇ ve chaw geh awˬ chawˇ te ve kʼo, nawˬ kaꞈ hkʼaˬ hkʼe ve chaw hpehꞈ tuˬ le?
Chaw teˇ hpaˍ na nyi laˇ ve: “Tzuhˬ dawˬ ve htaꞈ Liꞈ hpu hkʼaw yaꞈ ve tehꞈ kʼoˆ laˇ ve laˇ?”
-
Nawˬ hkʼaˬ hkʼe hkʼawꞈ piˇ tuˬ le?
A yeˇ uiˍ ve awˬ lawn
Ngaˬ hui ha lehˬ ve cawˬ tuˬ Yaˬhoˉvaˬ lehˬ tzuhˬ dawˬ tuˬ a hkaw˗anˬ peꞈ laˇ ve yoˬ. Yaꞈ hkʼaˇ, tzuhˬ dawˬ ponˬ dawˬ leuˉ ve leh tzuhˬ bvuhˆ ve htaꞈ yawˇ venˇ baˆ taˍ ve yoˬ.
Kʼawꞈ gʼaꞈ na ve
-
Tzuhˬ dawˬ ve htaꞈ Liꞈ hpu hkʼaw hkʼaˬ hkʼe kʼoˆ laˇ ve le?
-
Tzuhˬ dawˬ ponˬ dawˬ leuˉ ve kʼo, heuˆ la kuiˬ hkʼaˬ hkʼe cawˬ ve le?
-
Tzuhˬ dawˬ ve htaꞈ caˉ daꞈ ve shu dawˇ cheˆ ve htaꞈ ngaˬ hui hkʼaˬ hkʼe te yawˆ yan piˇ gʼa ve le?
Kʼawꞈ caˉ nyi gʼa ve
Yaˇ nehˬ, cuˇ yiˍ cawˬ ve hkʼaw tzuhˬ dawˬ ve htaꞈ hkʼaˬ hkʼe te dawˇ cheˆ gʼa ve le?
Nawˬ tzuhˬ yeꞈ caˆ ve kʼo, tzuhˬ yeꞈ tawˍ gʼa tuˬ aˬ htoꞈ ma ga laˇ gʼa ve htaꞈ, gʼaw nyi sheˍ.
Hkriꞈ yaˇ lehˬ awˬ bon naꞈ piˇ tuˬ tzuhˬ dawˬ ve htaꞈ te cawˇ˗aw laˇ?
“Gʼaw ve chaw na nyi hkawˇ” (Shaw nyi kuiˬ Taꞈ yehˬ 2007 hkʼawꞈ ha pa 2 maˬ 15 nyi)
Hawˉ hkʼaˆ teˇ gʼaˇ tzuhˬ yeꞈ caˆ ve htaꞈ hkʼaˬ hkʼe te tawˍ gʼa ve shiˍ tuˬ, “Ngaˬ tzuhˬ ponˬ lonˉ hpehꞈ ve” awˬ lawn htaꞈ gʼaw nyi sheˍ.
“Liꞈ hpu a shaꞈ htaꞈ pa gʼa ve” (Shaw nyi kuiˬ Taꞈ yehˬ 2012 hkʼawꞈ ha pa 5 maˬ 1 nyi)
You May Also Like
NGAˬ HUI HTAꞈ CAˉ DAꞈ VE AWˬ LAWN
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ ve hk’aˬ hk’e te henˇ ve le?
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ tuˬ nawˬ Liꞈ hpu hk’aˬ ve teˇ maˬ yehˇ ve kaꞈ hpehꞈ ve yoˬ. Awˬ chawˇ maˇ heˆ leh yehˬ k’a hk’aw ve chaw htaꞈ Liꞈ hpu teˇ geh henˇ tuˬ jehˬ piˇ kaꞈ g’a ve yoˬ.
