Awˬ lawn 44
Pawehˇ teˇ ceuˬ le le htaꞈ Gʼuiˬ sha nyi hkʼaˇ suh˗aw laˇ?
Yaˬhoˉvaˬ lehˬ ngaˬ hui htaꞈ teˇ geh pyawˍ leh ha lehˬ tcuh gaˇ ve yoˬ. Yaꞈ hkʼaˇ, pawehˇ teˇ ceuˬ le le htaꞈ yawˇ nyi hkʼaˇ suh˗aw laˇ? Pawehˇ htaꞈ caˉ daꞈ ve gʼa dawˇ cheˆ htaˇ, ngaˬ hui Yaˬhoˉvaˬ htaꞈ haꞈ ve tehꞈ hkʼaˬ hkʼe te hpeuꞈ maw piˇ gʼa ve le?
1. Aˬ htoꞈ ma pa taw Yaˬhoˉvaˬ lehˬ pawehˇ laiˉ ceuˬ htaꞈ nyi hkʼaˇ maˇ suh ve le?
Pawehˇ laiˉ ceuˬ lehˬ Liꞈ hpu hkʼaw maˇ hawˍ daꞈ ve, maˇ heˆ leh maˇ heˆ heˆ ve bon liˇ geh laˬ ve tehꞈ nawˬ shiˍ htaˇ, anˇ tuˬ yoˬ hehˉ. Pawehˇ chi teˇ hpaˍ lehˬ neˇ htaꞈ caˉ daꞈ ve, maˇ heˆ leh chaw suh˗oˬ ve awˬ ha ku htaꞈ caˉ daꞈ ve yoˬ hehˉ. Leh pawehˇ teˇ ceuˬ ceuˬ kʼo, awˬ bon daꞈ maˇ daꞈ ve yonˍ hkʼaˇ htaꞈ caˉ daꞈ ve yoˬ hehˉ. Yaˬhoˉvaˬ lehˬ yawˇ htaꞈ oˉ kʼoˍ pui ve chaw htaꞈ shaˍ tiꞈ piˇ ve, “chaꞈ chiˆ ve teˇ ceuˬ htaꞈ taˇ htawˇ.”—2 Kawˇrenˍhtuˆ 6:17. a
2. Chaw yaˇ htaꞈ taˍ uiˍ ve pawehˇ htaꞈ Yaˬhoˉvaˬ hkʼaˬ hkʼe dawˇ ve le?
Yaˬhoˉvaˬ lehˬ ngaˬ hui ‘chaw yaˇ htaꞈ gʼaˇ maˇ va tcuh gaˇ.’ (Yeˍraˍmiˆ 17:5 gʼaw sheˍ.) Jehˇ ve awˬ nyi teˇ hpaˍ hpaˍ kʼo, mvuhˇ miˬ uˉ peunˍ paˍ maˇ heˆ leh maꞈ yaˇ htaꞈ taˍ uiˍ piˇ ve yoˬ. Leh pawehˇ teˇ ceuˬ ceuˬ kʼo, shu mvuhˇ miˬ uˉ peunˍ ve awˬ hawˉ lo maˇ gʼa chehˇ˗o ve awˬ nyi htaꞈ taˍ uiˍ ve, maˇ heˆ leh a lanˍ htaꞈ taˍ uiˍ ve yoˬ. (1 Yoˇhanˬ 5:21) Chi hkʼoˆ kaꞈ, jehˇ ve awˬ nyi teˇ hpaˍ hpaˍ kʼo mvuhˇ miˬ hpawˇ a yeˇ uiˍ ve kanˉ hkʼaˇ teˇ hpaˍ htaꞈ taˍ uiˍ piˇ ve yoˬ. Chaw yaˇ, maˇ heˆ leh kanˉ hkʼaˇ teˇ hpaˍ hpaˍ Yaˬhoˉvaˬ ve a loˍ htaꞈ maˇ hawˍ daꞈ ve awˬ ceuˬ htaꞈ te ve htawˇ, ngaˬ hui yawˇ hui htaꞈ taˍ uiˍ jaˇ ve kʼo, Yaˬhoˉvaˬ hkʼaˬ hkʼe dawˇ tuˬ le?
3. Pawehˇ cawˬ kuiˬ lo te ve awˬ ceuˬ teˇ hpaˍ Gʼuiˬ sha nyi hkʼaˇ maˇ suh ve aˬ htoꞈ ma cawˬ ve le?
Liꞈ hpu hkʼaw kʼoˆ ve, ‘tzuhˬ dawˬ bvuhˆ ve, ha lehˬ tuˬ te ponˬ te leuˉ ve,’ leh tzuhˬ dawˬ enˍ daꞈ ve lehˬ yaꞈ ve yoˬ. (1 Peˍtruˆ 4:3) Pawehˇ teˇ hpaˍ hpaˍ hkʼaw a shu yawˇ awˬ to htaꞈ maˇ yuˬ tiˍ gʼaˇ leh, pehꞈ ve tzuhˆ ve kaꞈ te la ve yoˬ. Chi htaꞈ pa taw, Yaˬhoˉvaˬ geh hkʼaˬ htaˆ kaꞈ meuˆ daꞈ tuˬ, maˇ daꞈ kehˬ ve awˬ liˇ awˬ hkʼaˇ chi teˇ hpaˍ htaꞈ gʼa jaw kʼai ve yoˬ.
Henˇ shiˍ maˇ la tuˬ
Yaˬhoˉvaˬ nyi hkʼaˇ suh tuˬ, pawehˇ htaꞈ caˉ daꞈ ve nawˬ cuˇ yiˍ cawˬ ve hkʼaw hkʼaˬ hkʼe te dawˇ cheˆ gʼa tuˬ le, teˇ geh henˇ sheˍ.
4. Yaˬhoˉvaˬ ve awˬ meꞈ awˬ hponˇ te luˬ piˇ ve pawehˇ htaꞈ ngaˬ hui maˇ caˉ daꞈ
Roˉmaꞈ liꞈ 12:2 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Pawehˇ teˇ ceuˬ ceuˬ ngaˬ hui te˗a tehꞈ dawˇ ve kʼo, aˬ htoꞈ ma gʼa shiˍ leh gʼa fuiˍ daꞈ cawˇ ve le?
-
Nawˬ chehˇ ve mvuhˇ miˬ aˬ htoꞈ ma ve pawehˇ teˇ hpaˍ cawˬ ve le?
-
Nawˬ dawˇ kʼo, Yaˬhoˉvaˬ Gʼuiˬ sha lehˬ pawehˇ chi teˇ hpaˍ htaꞈ nyi hkʼaˇ suh˗aw hehˉ laˇ?
Tawˇ pa haˉ te kʼo, paw ve awˬ nyi te ve htaꞈ Yaˬhoˉvaˬ hkʼaˬ hkʼe dawˇ ve teˇ geh nyi sheˍ. Liꞈ hpu hkʼaw Yaˬhoˉvaˬ htaꞈ oˉ kʼoˍ pui ve chaw paw ve awˬ nyi te ve maˇ cawˬ. Yaꞈ hkʼaˇ, Yaˬhoˉvaˬ htaꞈ oˉ kʼoˍ maˇ pui ve chaw nyiˇ gʼaˇ paw ve awˬ nyi te ve awˬ lawn cawˬ ve yoˬ. Awˬ hkuiˉ puiˍ liꞈ 40:20-22 leh Maꞈhtehˍ liꞈ 14:6-10 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Chaw chi nyiˇ gʼaˇ paw ve awˬ nyi te htaˇ maˇ daꞈ ve awˬ lawn aˬ htoꞈ ma cawˬ ve le?
-
Liꞈ hpu hkʼaw chi ve nyiˇ lawn htaꞈ gʼa mawˬ htaˇ, nawˬ dawˇ kʼo paw ve awˬ nyi te ve htaꞈ Yaˬhoˉvaˬ hkʼaˬ hkʼe dawˇ ve le?
‘Paw ve awˬ nyi maˇ heˆ leh Liꞈ hpu htaꞈ maˇ hawˍ daꞈ ve pawehˇ hkʼaw ngaˬ kʼai ve maˇ kʼai ve htaꞈ Yaˬhoˉvaˬ a yeˇ yuˬ˗aw laˇ’ tehꞈ, nawˬ chi hkʼe htawˇ dawˇ nawˬ dawˇ cawˬ ve yoˬ hehˉ. Tawˆ kʼai ve liꞈ 32:1-8 gʼaw sheˍ. Peuˬ leh VDO hpaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Aˬ htoꞈ ma pa taw Yaˬhoˉvaˬ haꞈ yuˬ ve awˬ ceuˬ htaꞈ ngaˬ hui gʼa shiˍ cawˇ ve le?
-
Ngaˬ hui hkʼaˬ hkʼe te shiˍ gʼa ve le?
Hkʼaˬ hkʼe ve pawehˇ htaꞈ Gʼuiˬ sha nyi hkʼaˇ maˇ suh ve le?
-
Pawehˇ chi ve Liꞈ hpu hkʼaw maˍ ve htaꞈ hawˍ daꞈ˗aw laˇ? Pawehˇ chi ve hkʼaˬ hkʼe te tanˬ cawˬ la ve htaꞈ ngaˬ hui chaˬ nyi ve kʼo, shiˍ gʼa tuˬ yoˬ.
-
Pawehˇ chi ve lehˬ chaw yaˇ, kanˉ hkʼaˇ, maˇ heˆ leh a lanˍ htaꞈ taˍ uiˍ piˇ˗aw laˇ? Ngaˬ hui Yaˬhoˉvaˬ htaꞈ ceh tiˉ chiˇ uiˍ chiˇ mvuh leh, miˬ guiˬ hkʼoˆ lo shoꞈ shaꞈ ve awˬ ceuˬ hkʼa peu˗eˬ htaꞈ yawˇ teˇ gʼaˇ ceh tiˉ gu laˇ gʼa ve tehꞈ, ngaˬ hui yonˍ ve yoˬ.
-
Pawehˇ chi ve hkʼaw chaw yaˇ te ve awˬ ceuˬ Liꞈ hpu hkʼaw hawˍ daꞈ˗aw laˇ? Ngaˬ hui hkʼaˬ htaˆ kaꞈ daꞈ kehˬ ve awˬ liˇ awˬ hkʼaˇ gʼa cawˬ ve yoˬ.
5. Nawˬ yonˍ ve awˬ ceuˬ shu na gʼa tuˬ ga piˇ sheˍ
Yaˬhoˉvaˬ nyi hkʼaˇ maˇ suh ve pawehˇ nawˬ te tuˬ shu nyiˉ laˇ htaˇ, maˇ te tehꞈ kʼoˆ piˇ ve lehˬ sha ve maˇ heˆ. Nawˬ dawˇ cheˆ ve awˬ ceuˬ yeunˇ hkanˍ ve hkʼaw kʼoˆ maˍ piˇ sheˍ. Chi hkʼaˬ hkʼe te gʼa ve htaꞈ shiˍ tuˬ, VDO hpaw sheˍ.
Maꞈhtehˍ liꞈ 7:12 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Liꞈ hpu chi teˇ tawn hkʼaw gʼa mawˬ ve, nawˬ ve yehˬ kʼa hkʼaw ve chaw Yaˬhoˉvaˬ htaꞈ oˉ kʼoˍ maˇ pui ve kʼo, pawehˇ teˇ hpaˍ htaꞈ taˇ te tehꞈ nawˬ kʼoˆ piˇ cawˇ˗aw laˇ?
-
Pawehˇ teˇ ceuˬ ceuˬ kʼo nawˬ ve yehˬ kʼa hkʼaw ve chaw geh nawˬ maˇ te ve htawˇ, nawˬ yawˇ hui htaꞈ haꞈ leh a yeˇ yuˬ piˇ ve tehꞈ yawˇ hui yonˍ gʼa tuˬ hkʼaˬ hkʼe te gʼa ve le?
6. Yaˬhoˉvaˬ ngaˬ hui htaꞈ ha lehˬ tcuh gaˇ ve
Yaˬhoˉvaˬ lehˬ ngaˬ hui htaꞈ yehˬ kʼa hkʼaw ve chaw leh awˬ chawˇ geh teˇ geh ha lehˬ tcuh gaˇ ve yoˬ. Cuˇ yiˍ piˇ ve liꞈ 8:15 gʼaw leh na hkawˇ chi htaꞈ tawˇ yaw daꞈ sheˍ:
-
Liꞈ hpu chi teˇ tawn hkʼaw, Yaˬhoˉvaˬ lehˬ ngaˬ hui htaꞈ ha lehˬ tcuh gaˇ ve tehꞈ hkʼaˬ hkʼe te shiˍ gʼa ve le?
Yaˬhoˉvaˬ lehˬ yawˇ ve chaw htaꞈ teˇ geh pyawˍ leh ha lehˬ tcuh gaˇ ve yoˬ. Laiˉ mvuhˇ miˬ lo laˬ ve hpawnˬ daꞈ lonˉ hkʼaw chi awˬ tehˬ hkʼaˬ hkʼe hpehꞈ ve htaꞈ shiˍ tuˬ, VDO hpaw sheˍ.
Gaˍlaˍtiˆ liꞈ 6:10 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Ngaˬ hui shu htaꞈ “daꞈ ve” te piˇ tuˬ yawˇ hui geh teˇ geh pawehˇ leh jehˇ ve awˬ nyi te tuˬ loˍ˗aw laˇ?
-
Pawehˇ cawˬ ve awˬ yanˇ htaˇ ceh tiˉ ngaˬ hui shu htaꞈ laꞈ shawnˍ piˇ ve, maˇ heˆ leh piˇ gaˇ htaˇ piˇ ve, hkʼaˬ ve teˇ ceuˬ ngaˬ hui ha lehˬ tuˬ te laˇ ve le?
-
Teˇ pawˆ pawˆ Shaˉhkiˆhkanˍ ve chaw laiˉ gʼaˇ kaꞈ yawˇ hui ve yaˇ htaꞈ laꞈ shawnˍ piˇ ve yoˬ. Nawˬ yaˇ cawˬ ve kʼo, yaˇ htaꞈ daꞈ jaˇ ve awˬ ceuˬ aˬ htoꞈ ma te piˇ gʼa ve le?
Chaw teˇ hpaˍ kʼoˆ ve: “Pawehˇ chi hkʼaˬ hkʼe te tanˬ cawˬ laˬ ve htaꞈ nawˬ a yeˇ taˇ te. Yehˬ kʼa leh awˬ chawˇ geh teˇ geh gʼa chehˇ ve a yeˇ uiˍ jaˇ.”
-
Nawˬ hkʼaˬ hkʼe hkʼawꞈ piˇ tuˬ le?
A yeˇ uiˍ ve awˬ lawn
Yaˬhoˉvaˬ lehˬ ngaˬ hui htaꞈ yehˬ kʼa hkʼaw ve chaw leh awˬ chawˇ geh ha lehˬ ha kʼa chehˇ tcuh gaˇ ve yoˬ. Yaꞈ hkʼaˇ, yawˇ nyi hkʼaˇ maˇ suh ve pawehˇ ngaˬ hui htaꞈ jaw kʼai tcuh gaˇ ve yoˬ.
Kʼawꞈ gʼaꞈ na ve
-
Hkʼaˬ hkʼe ve Pawehˇ htaꞈ Yaˬhoˉvaˬ nyi hkʼaˇ maˇ suh ve tehꞈ shiˍ tuˬ, ngaˬ hui aˬ htoꞈ ma ve na hkawˇ htaꞈ dawˇ nyi gʼa ve le?
-
Pawehˇ leh jehˇ ve awˬ nyi htaꞈ ngaˬ hui maˇ te ve tehꞈ, yehˬ kʼa hkʼaw ve chaw leh awˬ chawˇ na gʼa tuˬ hkʼaˬ hkʼe kʼoˆ maˍ piˇ gʼa ve le?
-
Yaˬhoˉvaˬ ngaˬ hui htaꞈ pyawˍ leh ha lehˬ tcuh gaˇ ve tehꞈ nawˬ hkʼaˬ hkʼe te shiˍ gʼa ve le?
Kʼawꞈ caˉ nyi gʼa ve
Hkriꞈ yaˇ maˇ te ve pawehˇ aˬ htoꞈ ma cawˬ ve htaꞈ, gʼaw nyi sheˍ.
Aˬ htoꞈ ma te paw ve awˬ nyi te ve htaꞈ Gʼuiˬ sha nyi hkʼaˇ maˇ suh ve tehꞈ ngaˬ hui shiˍ ve le, kʼoˆ maˍ laˇ ve 4 ceuˬ htaꞈ nyi sheˍ.
Pawehˇ cawˬ ve awˬ yanˇ htaˇ, Yaˬhoˉvaˬ htaꞈ haꞈ ve yaˇ yawˇ nyi hkʼaˇ suh tuˬ hkʼaˬ hkʼe te piˇ gʼa tuˬ le? VDO chi nyi sheˍ.
Nawˬ Yaˬhoˉvaˬ awˬ pon awˬ hpfuhˇ hkʼaˆ ve (11:35)
Hkriꞈ yaˇ laiˉ lanˬ gʼaˇ Hkriˆsuhˍmaˆ maˇ te ve yoˬ. Yawˇ hui chi hkʼe dawˇ cheˆ ve htaꞈ hkʼaˬ hkʼe dawˇ ve le?
a Pawehˇ cawˬ ve awˬ yanˇ htaˇ ngaˬ hui hkʼaˬ hkʼe gʼa te cawˇ ve shiˍ tuˬ, Kʼoˆ maˍ ve awˬ lawn 5 hkʼaw nyi sheˍ.
You May Also Like
NGAˬ HUI HTAꞈ CAˉ DAꞈ VE AWˬ LAWN
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ ve hk’aˬ hk’e te henˇ ve le?
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ tuˬ nawˬ Liꞈ hpu hk’aˬ ve teˇ maˬ yehˇ ve kaꞈ hpehꞈ ve yoˬ. Awˬ chawˇ maˇ heˆ leh yehˬ k’a hk’aw ve chaw htaꞈ Liꞈ hpu teˇ geh henˇ tuˬ jehˬ piˇ kaꞈ g’a ve yoˬ.
