Yeˍsuˆ kʼoˆ ve, yawˇ ve awˬ laꞈ gʼawˇ lehˬ ‘chi miˬ guiˬ htaꞈ maˇ gʼa caˉ daꞈ.’ (Yoˇhanˬ 15:19) Choˬ paˉ oˇ paˉ maˇ chehˇ ve tcuhˉ kuiˬ lehˬ, mvuhˇ miˬ hpawˇ leh maꞈ te ve htaꞈ ngaˬ hui maˇ caˉ daꞈ ve tehꞈ kʼoˆ gaˇ ve yoˬ. Chi hkʼe te ve lehˬ hkʼaˬ htaˆ kaꞈ sha ve maˇ heˆ. Chaw teˇ hpaˍ ngaˬ hui htaꞈ kʼoˆ guiˇ gʼuiˬ guiˇ laˇ tuˬ yoˬ hehˉ. Ngaˬ hui choˬ paˉ oˇ paˉ maˇ chehˇ leh Yaˬhoˉvaˬ Gʼuiˬ sha htaꞈ ka tiꞈ yeˬ gʼa tuˬ hkʼaˬ hkʼe gʼa te ve le?

1. Awˬ tehˬ ve Hkriꞈ yaˇ lehˬ chaw yaˇ uˉ peunˍ ve htaꞈ hkʼaˬ hkʼe dawˇ ve le?

Hkriꞈ yaˇ lehˬ mvuhˇ miˬ uˉ peunˍ ve chaw htaꞈ yawˆ yan ve yoˬ. Yeˍsuˆ kʼoˆ ve, “Jawˇmawˇ Kehˉsaˍ ve mawˇ jawˇ mawˇ Kehˉsaˍ htaꞈ piˇ˗oˆ.” (Maˍkuˆ 12:17) Chi htaꞈ pa taw, ngaˬ hui yawˇ kʼoˆ ve htaꞈ gʼaꞈ te leh mvuhˇ miˬ ve awˬ liˇ tawˇ hkawˇ htaꞈ na yuˬ ve yoˬ. Tawˇ pa haˉ te kʼo, awˬ hkawnˍ keu ve yoˬ. Liꞈ hpu hkʼaw kʼoˆ ve, Yaˬhoˉvaˬ lehˬ mvuhˇ miˬ uˉ peunˍ paˍ teˇ hpaˍ htaꞈ a hkaw˗anˬ piˇ ve pa taw, yawˇ hui uˉ peunˍ gʼa ve yoˬ. (Roˉmaꞈ 13:1) Chi htaꞈ pa taw, chaw yaˇ uˉ peunˍ ve lehˬ Gʼuiˬ sha hkʼe taw kanˇ paˆ maˇ cawˬ ve tehꞈ ngaˬ hui na gʼa ve yoˬ. Chaw yaˇ shoꞈ shaꞈ ve hkʼa peu˗eˬ htaꞈ Gʼuiˬ sha leh yawˇ ve mvuhˇ miˬ ceh tiˉ gu laˇ gʼa ve tehꞈ ngaˬ hui yonˍ ve yoˬ.

2. Ngaˬ hui choˬ paˉ oˇ paˉ maˇ chehˇ ve tehꞈ hkʼaˬ hkʼe te hpeuꞈ maw piˇ gʼa ve le?

Yeˍsuˆ hkʼa shuˍ ngaˬ hui mvuhˇ miˬ uˉ peunˍ ve hpawˇ maˇ caˉ daꞈ. Yeˍsuˆ anˇ tuˬ te ve htaꞈ chaw yaˇ gʼa mawˬ htaˇ, miˬ guiˬ hkʼoˆ lo yawˇ hui ve Jawˇmawˇ te tcuh gaˇ ve yoˬ. Yaꞈ hkʼaˇ, Yeˍsuˆ maˇ te. (Yoˇhanˬ 6:15) Aˬ htoꞈ ma pa taw le? Awˬ lawn kʼo yawˇ kʼoˆ ve, “ngaˬ hkunˉ hawˉ hkanˇ te kuiˬ lehˬ, chi miˬ guiˬ htaꞈ maˇ caˉ daꞈ.” (Yoˇhanˬ 18:36) Ngaˬ hui Yeˍsuˆ ve awˬ laꞈ gʼawˇ hpehꞈ ve pa taw, choˬ paˉ oˇ paˉ maˇ chehˇ ve tehꞈ laiˉ hkʼaˇ hpeuꞈ maw piˇ gʼa ve yoˬ. Tawˇ pa haˉ te kʼo, ngaˬ hui maꞈ yaˇ maˇ te ve yoˬ. (Miˆhkaˍ 4:3 gʼaw sheˍ.) Ngaˬ hui mvuhˇ miˬ ve a lanˍ htaꞈ yawˆ yan ve htawˇ, maˇ taˍ uiˍ ve yoˬ. (1 Yoˇhanˬ 5:21) Mvuhˇ miˬ uˉ peunˍ ve awˬ moˍ hpawˇ ngaˬ hui maˇ chehˇ leh, yawˇ hui uˉ peunˍ ve htaꞈ kaꞈ maˇ tawˍ piˇ. Ngaˬ hui chi hkʼe te htaˇ, Gʼuiˬ sha ve mvuhˇ miˬ htaꞈ ka tiꞈ yeˬ ve tehꞈ hpeuꞈ maw piˇ ve yoˬ.

 Henˇ shiˍ maˇ la tuˬ

3. Awˬ tehˬ ve Hkriꞈ yaˇ lehˬ choˬ paˉ oˇ paˉ maˇ chehˇ

Yeˍsuˆ leh yawˇ ve awˬ laꞈ gʼawˇ hui ngaˬ hui htaꞈ henˇ yuˬ tuˬ te maˍ laˇ ve yoˬ. Roˉmaꞈ liꞈ 13:1, 5-7 leh 1 Peˍtruˆ liꞈ 2:13, 14 gʼaw sheˍ. Peuˬ leh, VDO hpaw leh na hkawˇ chi teˇ hpaˍ htaꞈ tawˇ yaw daꞈ sheˍ:

• Aˬ htoꞈ ma te ngaˬ hui mvuhˇ miˬ uˉ peunˍ ve chaw hui htaꞈ yawˆ yan piˇ cawˇ ve le?

• Yawˇ hui uˉ peunˍ ve awˬ hawˉ lo ngaˬ hui chehˇ ve tehꞈ hkʼaˬ hkʼe te hpeuꞈ maw piˇ gʼa ve le?

Maꞈ bawˆ daꞈ ve cawˬ htaˇ mvuhˇ miˬ teˇ hpaˍ hpaˍ kʼo, choˬ paˉ oˇ paˉ maˇ chehˇ ve tehꞈ kʼoˆ ve htawˇ, nyiˇ hpawˇ hpawˇ bawˆ daꞈ tuˬ yawˇ hui awˬ gʼaˇ piˇ chehˇ ve yoˬ. Awˬ tehˬ kʼo, choˬ paˉ oˇ paˉ maˇ chehˇ ve hkʼaˬ hkʼe kʼoˆ gaˇ ve le? Yoˇhanˬ liꞈ 17:16 gʼaw sheˍ. Peuˬ leh, VDO hpaw leh na hkawˇ chi htaꞈ tawˇ yaw daꞈ sheˍ:

• Choˬ paˉ oˇ paˉ maˇ chehˇ ve aˬ htoꞈ ma kʼoˆ gaˇ ve le?

Mvuhˇ miˬ uˉ peunˍ ve chaw Gʼuiˬ sha ve awˬ liˇ tawˇ hkawˇ maˇ hawˍ daꞈ ve awˬ ceuˬ te tcuh laˇ ve kʼo, ngaˬ hui hkʼaˬ hkʼe te tuˬ le? Tcuh yaˇ liꞈ 5:28, 29 gʼaw sheˍ. Peuˬ leh, VDO hpaw leh na hkawˇ chi teˇ hpaˍ htaꞈ tawˇ yaw daꞈ sheˍ:

• Chaw yaˇ ve awˬ liˇ tawˇ hkawˇ Gʼuiˬ sha ve awˬ liˇ tawˇ hkawˇ htaꞈ maˇ hawˍ daꞈ ve kʼo, ngaˬ hui a shu htaꞈ na yuˬ cawˇ ve le?

• Nawˬ dawˇ kʼo, Hkriꞈ yaˇ lehˬ mvuhˇ miˬ uˉ peunˍ paˍ hkawˇ maˇ gʼa na yuˬ ve hkʼaˬ hkʼe htaˇ le?

 4. Te hkʼaˇ dawˇ hkʼaˇ hkʼaw choˬ paˉ oˇ paˉ maˇ chehˇ

1 Yoˇhanˬ liꞈ 5:21 gʼaw sheˍ. Peuˬ leh, VDO hpaw leh na hkawˇ chi teˇ hpaˍ htaꞈ tawˇ yaw daꞈ sheˍ:

• VDO chi hkʼaw, aˬ htoꞈ ma pa taw Aˍyenˍgeˇ lehˬ mvuhˇ miˬ uˉ peunˍ ve hpawˇ, maˇ heˆ leh a lanˍ htaꞈ oˉ kʼoˍ maˇ pui tuˬ dawˇ cheˆ ve le?

• Nawˬ dawˇ kʼo, yawˇ dawˇ cheˆ ve cawˇ˗aw laˇ?

Ngaˬ hui choˬ paˉ oˇ paˉ maˇ chehˇ ve htaꞈ lawˇ nyi laˇ ve hkʼaˬ hkʼe htaˇ kʼawꞈ cawˬ sheˍ ve le? VDO hpaw leh na hkawˇ chi teˇ hpaˍ htaꞈ tawˇ yaw daꞈ sheˍ:

• Laiˉ mvuhˇ miˬ pawnˇ daꞈ leh enˍ daꞈ ve cawˬ htaˇ, ngaˬ hui choˬ paˉ oˇ paˉ maˇ chehˇ tuˬ hkʼaˬ hkʼe te gʼa ve le?

• Mvuhˇ miˬ ve awˬ liˇ htaꞈ ngaˬ hui awˬ bon gʼa maˇ gʼa ve htawˇ, ngaˬ hui choˬ paˉ oˇ paˉ maˇ chehˇ tuˬ hkʼaˬ hkʼe te gʼa ve le?

• Awˬ lawn sha tanˇ hkʼaw maˇ heˆ leh awˬ paˇ awˬ kui lo ve chaw geh awˬ lawn gʼa kaˇ htaˇ, ngaˬ hui choˬ paˉ oˇ paˉ maˇ chehˇ ve htaꞈ heuˆ la kuiˬ hkʼaˬ hkʼe cawˬ ve le?

 A yeˇ uiˍ ve awˬ lawn

Hkriꞈ yaˇ lehˬ tawˇ yaw ve leh te hkʼaˇ dawˇ hkʼaˇ, choˬ paˉ oˇ paˉ maˇ chehˇ tuˬ coˇ caˇ jaˇ ve yoˬ.

Kʼawꞈ gʼaꞈ na ve

• Mvuhˇ miˬ uˉ peunˍ ve chaw htaꞈ ngaˬ hui hkʼaˬ hkʼe te piˇ cawˇ ve le?

• Aˬ htoꞈ ma te ngaˬ hui mvuhˇ miˬ uˉ peunˍ ve hpawˇ choˬ paˉ oˇ paˉ maˇ chehˇ ve le?

• Ngaˬ hui choˬ paˉ oˇ paˉ maˇ chehˇ ve htaꞈ lawˇ nyi laˇ ve hkʼaˬ hkʼe htaˇ cawˬ ve le?