Awˬ lawn 46
Aˬ htoꞈ ma pa taw awˬ to chiˇ aꞈ leh Baˆtiˆsaˬ ha yuˬ cawˇ ve le?
Nawˬ Baˆtiˆsaˬ maˇ haꞈ yuˬ sheˍ htaˇ, nawˬ bon lawˬ ve hkʼaw Yaˬhoˉvaˬ htaꞈ awˬ to chiˇ aꞈ piˇ ve yoˬ. Awˬ to chiˇ aꞈ ve lehˬ nawˬ Yaˬhoˉvaˬ htaꞈ ceh tiˉ oˉ kʼoˍ pui tuˬ, a shaꞈ teꞈ kuiˬ hkʼaw yawˇ ve a loˍ htaꞈ awˉ lawˉ te tuˬ yoˬ tehꞈ, ka tiꞈ te piˇ ve yoˬ. (Chiˇ mvuh ve 40:8) Nawˬ Baˆtiˆsaˬ haꞈ yuˬ htaˇ, nawˬ Yaˬhoˉvaˬ htaꞈ awˬ to chiˇ aꞈ piˇ˗oˬ ve tehꞈ awˬ nu ve chaw htaꞈ hpeuꞈ maw piˇ ve yoˬ. Nawˬ dawˇ cheˆ leh Yaˬhoˉvaˬ htaꞈ awˬ to chiˇ aꞈ piˇ ve lehˬ a yeˇ uiˍ jaˇ ve teˇ ceuˬ hpehꞈ ve yoˬ. Yaꞈ hkʼaˇ, nawˬ Yaˬhoˉvaˬ htaꞈ awˬ to chiˇ aꞈ piˇ gaˇ tuˬ te laˇ ve aˬ htoꞈ ma teˇ ceuˬ le?
1. Aˬ htoꞈ ma pa taw ngaˬ hui Yaˬhoˉvaˬ htaꞈ awˬ to chiˇ aꞈ piˇ gaˇ ve le?
Ngaˬ hui Yaˬhoˉvaˬ htaꞈ haꞈ ve pa taw, yawˇ htaꞈ awˬ to chiˇ aꞈ piˇ gaˇ ve yoˬ. (1 Yoˇhanˬ 4:10, 19) Liꞈ hpu hkʼaw ngaˬ hui htaꞈ kʼoˆ laˇ ve, “nawˬ ve nyi ma hkʼa peu˗eˬ, nawˬ ve co ha hkʼa peu˗eˬ, nawˬ ve dawˇ hkʼaˇ hkʼa peu˗eˬ leh nawˬ ve awˬ gʼaˇ awˬ shaˉ hkʼa peu˗eˬ nawˬ ve Jawˇmawˇ Gʼuiˬ sha htaꞈ gʼa haꞈ ve yoˬ.” (Maˍkuˆ 12:30) Ngaˬ hui Yaˬhoˉvaˬ htaꞈ haꞈ ve tehꞈ hpeuꞈ maw piˇ ve lehˬ, ngaˬ hui kʼoˆ ve ceh maˇ heˆ. Yaꞈ hkʼaˇ, ngaˬ hui gʼa te tawˆ la ve yoˬ. Hawˉ hkʼaˆ leh yaˇ miˇ haꞈ daꞈ jaˇ leh heuˆ daꞈ ve hkʼa shuˍ, ngaˬ hui Yaˬhoˉvaˬ htaꞈ haꞈ jaˇ ve pa taw yawˇ htaꞈ awˬ to chiˇ aꞈ piˇ leh Baˆtiˆsaˬ haꞈ yuˬ tuˬ te laˇ ve yoˬ.
2. Baˆtiˆsaˬ haꞈ yuˬ ve chaw htaꞈ Yaˬhoˉvaˬ aˬ htoꞈ ma awˬ bon naꞈ piˇ tuˬ le?
Nawˬ Baˆtiˆsaˬ haꞈ yuˬ htaˇ, Yaˬhoˉvaˬ ve yehˬ kʼa ha lehˬ ha kʼa ve hkʼaw nawˬ kaꞈ chehˇ la ve yoˬ. Yaˬhoˉvaˬ nawˬ htaꞈ laiˉ hpawˇ haꞈ ve tehꞈ nawˬ shiˍ tuˬ yoˬ. Leh Baˆtiˆsaˬ maˇ haꞈ yuˬ sheˍ htaˇ aꞈ kehˉ nawˬ yawˇ htaꞈ meuˆ daꞈ maˇ la tuˬ yoˬ. (Maˍlaˍhkiˆ 3:16-18 gʼaw sheˍ.) Yaˬhoˉvaˬ lehˬ nawˬ ve Awˬ pa hpehꞈ ve awˬ hkʼoˆ kaꞈ, miˬ guiˬ hkʼoˆ lo awˬ viˉ awˬ nyi Yaˬhoˉvaˬ htaꞈ haꞈ leh nawˬ htaꞈ kaꞈ haꞈ ve yoˬ. (Maˍkuˆ 10:29, 30 gʼaw sheˍ.) Nawˬ Baˆtiˆsaˬ maˇ haꞈ yuˬ sheˍ htaˇ, teˇ ceuˬ ceuˬ gʼa te ve yoˬ. Nawˬ Yaˬhoˉvaˬ ve awˬ lawn gʼa henˇ ve, yawˇ htaꞈ gʼa haꞈ ve, leh yawˇ ve Yaˇ hpu htaꞈ gʼa yonˍ ve yoˬ. Leh awˬ leh meuˇ htaˇ, nawˬ Yaˬhoˉvaˬ htaꞈ awˬ to gʼa chiˇ aꞈ piˇ ve yoˬ. Nawˬ chi ve hkʼa peu˗eˬ te leh Baˆtiˆsaˬ haꞈ yuˬ ve kʼo, nawˬ ve a shaꞈ co co taiˍ taiˍ ha lehˬ gʼa ve yoˬ. Liꞈ hpu hkʼaw kʼoˆ ve, “Baˆtiˆsaˬ lehˬ, nawˬ hui htaꞈ ponˬ laˇ ve yoˬ.”—1 Peˍtruˆ 3:21.
Henˇ shiˍ maˇ la tuˬ
Aˬ htoꞈ ma te nawˬ Yaˬhoˉvaˬ htaꞈ awˬ to chiˇ aꞈ piˇ leh, Baˆtiˆsaˬ haꞈ yuˬ ve lehˬ a yeˇ uiˍ jaˇ ve le, teˇ geh henˇ sheˍ.
3. Ngaˬ hui teˇ gʼaˇ le le a shu htaꞈ oˉ kʼoˍ pui tuˬ gʼa dawˇ cheˆ ve
Iˉsaˍreˍlaˆ chaw awˬ co˗e htaˇ chaw teˇ hpaˍ lehˬ, Yaˬhoˉvaˬ leh maˇ heˆ heˆ ve gʼuiˬ sha Baˍlaˆ htaꞈ oˉ kʼoˍ teˇ geh pui gʼa ve tehꞈ dawˇ ve yoˬ. Yaꞈ hkʼaˇ, Yaˬhoˉvaˬ tcuh kaˍ paˍ Eˇliˇyaꞈ htaꞈ tcuh peu leh yawˇ hui dawˇ ve maˇ cawˇ tehꞈ kʼoˆ piˇ tcuh ve yoˬ. 1 Jawˇmawˇ liꞈ 18:21 gʼaw leh na hkawˇ chi htaꞈ tawˇ yaw daꞈ sheˍ:
-
Iˉsaˍreˍlaˆ chaw aˬ htoꞈ ma ve awˬ lawn htaꞈ gʼa dawˇ cheˆ ve le?
Iˉsaˍreˍlaˆ chaw hkʼa shuˍ ngaˬ hui kaꞈ a shu htaꞈ oˉ kʼoˍ pui tuˬ gʼa dawˇ cheˆ ve yoˬ. Luˉkaꞈ liꞈ 16:13 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Aˬ htoꞈ ma te ngaˬ hui Yaˬhoˉvaˬ leh awˬ nu ve awˬ ceuˬ htaꞈ oˉ kʼoˍ teˇ geh pui maˇ gʼa ve le?
-
Ngaˬ hui Yaˬhoˉvaˬ htaꞈ oˉ kʼoˍ pui ve tehꞈ yawˇ htaꞈ hkʼaˬ hkʼe te hpeuꞈ maw piˇ gʼa ve le?
4. Yaˬhoˉvaˬ nawˬ htaꞈ hkʼaˬ hkʼe taw haꞈ ve hkʼa dehꞈ dawˇ nyi sheˍ
Yaˬhoˉvaˬ ngaˬ hui htaꞈ awˬ hpfuhˇ hkʼaˆ jaˇ ve laꞈ shawnˍ laiˉ ceuˬ peꞈ laˇ ve yoˬ. Hkʼe kʼo, ngaˬ hui yawˇ htaꞈ aˬ htoꞈ ma piˇ gʼa ve le? VDO hpaw sheˍ.
Yaˬhoˉvaˬ nawˬ htaꞈ haꞈ ve tehꞈ hkʼaˬ hkʼe te hpeuꞈ maw laˇ ve le? Chiˇ mvuh ve liꞈ 104:14, 15 leh 1 Yoˇhanˬ liꞈ 4:9, 10 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Yaˬhoˉvaˬ geh laˬ ve laꞈ shawnˍ nawˬ dawˇ cawˇ jaˇ ve aˬ htoꞈ ma cawˬ ve le?
-
Laꞈ shawnˍ chi teˇ hpaˍ nawˬ Yaˬhoˉvaˬ htaꞈ hkʼaˬ hkʼe dawˇ tuˬ te laˇ ve le?
Ngaˬ hui dawˇ cawˇ jaˇ ve laꞈ shawnˍ gʼa ve kʼo, laꞈ shawnˍ peꞈ laˇ ve chaw htaꞈ awˬ hpfuhˇ shiˍ jaˇ ve tehꞈ hpeuꞈ maw piˇ gaˇ ve yoˬ. Bon maˍ ve liꞈ 16:17 gʼaw leh na hkawˇ chi htaꞈ tawˇ yaw daꞈ sheˍ:
-
Yaˬhoˉvaˬ nawˬ awˬ pon laiˉ ceuˬ te laˇ ve htaꞈ shiˍ htaˇ, nawˬ yawˇ htaꞈ aˬ htoꞈ ma piˇ gaˇ ve le?
5. Nawˬ Yaˬhoˉvaˬ htaꞈ awˬ to chiˇ aꞈ piˇ ve kʼo, yawˇ geh laˬ ve awˬ bon maˇ maˇ gʼa tuˬ yoˬ
Laiˉ gʼaˇ dawˇ ve, awˬ meh bvuhˬ ve, daꞈ ve kanˉ cawˬ ve, maˇ heˆ leh hpu shi maˇ maˇ cawˬ ve kʼo, ha lehˬ tuˬ yoˬ. Chi lehˬ awˬ tehˬ laˇ? VDO hpaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
VDO chi hkʼaw, hawˉ hkʼaˆ chi teˇ gʼaˇ aˬ htoꞈ ma te bawˉ shiˍ hteˆ ve kanˉ maˇ kʼawꞈ te˗o ve le?
-
Yawˇ Yaˬhoˉvaˬ htaꞈ awˬ to chiˇ aꞈ piˇ ve, bawˉ shiˍ htaꞈ maˇ heˆ. Nawˬ dawˇ kʼo, yawˇ dawˇ cheˆ ve cawˇ˗aw laˇ? Aˬ htoꞈ ma pa taw le?
Tcuh yaˇ Pawˇluꞈ Hkriꞈ yaˇ maˇ hpehꞈ la sheˍ htaˇ, yawˇ lehˬ awˬ meh bvuhˬ ve chaw teˇ gʼaˇ hpehꞈ ve yoˬ. Yawˇ lehˬ awˬ meh bvuhˬ ve saˍ laꞈ geh Yuˇdaꞈ chaw ve awˬ liˇ tawˇ hkawˇ henˇ jaw ve yoˬ. Yaꞈ hkʼaˇ, yawˇ Hkriꞈ yaˇ hpehꞈ la tuˬ awˬ ceuˬ chi teˇ hpaˍ htaꞈ baˬ taˉ ve yoˬ. Yawˇ baˬ taˉ ve htaꞈ sheˉ lai˗aw laˇ? Hpiˇliˇpiˆ liꞈ 3:8 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Pawˇluꞈ lehˬ Hkriꞈ yaˇ maˇ hpehꞈ la sheˍ htaˇ te ve awˬ ceuˬ teˇ hpaˍ htaꞈ aˬ htoꞈ ma pa taw “shonˇ ve awˬ ceuˬ” maˇ heˆ leh, awˬ hpfuhˇ maˇ cawˬ ve mawˇ tehꞈ shawˍ ve le?
-
Pawˇluꞈ lehˬ awˬ ceuˬ chi teˇ hpaˍ htaꞈ baˬ taˉ htaˇ, yawˇ aˬ htoꞈ ma gʼa ve le?
-
Nawˬ dawˇ kʼo, Yaˬhoˉvaˬ htaꞈ oˉ kʼoˍ pui tuˬ dawˇ cheˆ htaˇ nawˬ ve a shaꞈ teꞈ kuiˬ hkʼaw ha lehˬ ve cawˬ maˇ la tuˬ laˇ? Aˬ htoꞈ ma pa taw le?
Pawˇluꞈ Hkriꞈ yaˇ hpehꞈ la htaˇ, yawˇ baˬ taˉ ve awˬ ceuˬ aꞈ kehˉ kʼawꞈ gʼa maˇ jaˇ
Chaw teˇ hpaˍ kʼoˆ ve: “Ngaˬ henˇ chehˇ ve chi awˬ tehˬ ve hpehꞈ ve tehꞈ ngaˬ shiˍ ve yoˬ. Yaꞈ hkʼaˇ, ngaˬ Baˆtiˆsaˬ haꞈ yuˬ maˇ gʼa sheˍ.”
-
Nawˬ dawˇ kʼo, ngaˬ hui Yaˬhoˉvaˬ htaꞈ awˬ to chiˇ aꞈ piˇ cawˇ˗aw laˇ? Aˬ htoꞈ ma pa taw le?
A yeˇ uiˍ ve awˬ lawn
Ngaˬ hui Yaˬhoˉvaˬ htaꞈ haꞈ ve pa taw, yawˇ htaꞈ awˬ to chiˇ aꞈ piˇ gaˇ leh Baˆtiˆsaˬ haꞈ yuˬ gaˇ ve yoˬ.
Kʼawꞈ gʼaꞈ na ve
-
Aˬ htoꞈ ma te ngaˬ hui Yaˬhoˉvaˬ htaꞈ nyi ma awˬ tawˬ hkʼa gaˬ haꞈ leh yawˇ htaꞈ oˉ kʼoˍ pui cawˇ ve le?
-
Baˆtiˆsaˬ haꞈ yuˬ ve chaw htaꞈ Yaˬhoˉvaˬ aˬ htoꞈ ma laꞈ shawnˍ piˇ ve le?
-
Nawˬ Yaˬhoˉvaˬ htaꞈ awˬ to chiˇ aꞈ piˇ gaˇ˗aw laˇ?
Kʼawꞈ caˉ nyi gʼa ve
Liꞈ hkawˇ kʼa paˍ teˇ gʼaˇ leh bawˉ shiˍ hteˆ paˍ teˇ gʼaˇ aˬ htoꞈ ma te Yaˬhoˉvaˬ htaꞈ awˬ to chiˇ aꞈ piˇ tuˬ dawˇ cheˆ ve le, nyi sheˍ.
Ngaˬ hui Yaˬhoˉvaˬ htaꞈ awˬ to chiˇ aꞈ piˇ gaˇ tuˬ te laˇ ve aˬ htoꞈ ma cawˬ sheˍ ve le, gʼaw nyi sheˍ.
Liꞈ hkawˇ VDO chi hkʼaw, Yaˬhoˉvaˬ htaꞈ awˬ to chiˇ aꞈ piˇ ve chaw hkʼaˬ hkʼe taw ha lehˬ ve htaꞈ nyi sheˍ.
Aˬ htoꞈ ma te yaˇ miˇ teˇ gʼaˇ yawˇ ve a shaꞈ teꞈ kuiˬ hkʼaw Yaˬhoˉvaˬ htaꞈ oˉ kʼoˍ pui ve a yeˇ uiˍ jaˇ tehꞈ shawˍ ve le? “‘Ngaˬ hui aˬ htoꞈ ma te paw la ve le’ tehꞈ ngaˬ hkʼaˬ htaˆ kaꞈ htawˇ dawˇ nawˬ dawˇ cawˬ ve” awˬ lawn chi htaꞈ gʼaw nyi sheˍ.
“Liꞈ hpu a shaꞈ htaꞈ pa gʼa ve” (Shaw nyi kuiˬ Taꞈ yehˬ 2012 hkʼawꞈ ha pa 11 maˬ 1 nyi)
You May Also Like
NGAˬ HUI HTAꞈ CAˉ DAꞈ VE AWˬ LAWN
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ ve hk’aˬ hk’e te henˇ ve le?
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ tuˬ nawˬ Liꞈ hpu hk’aˬ ve teˇ maˬ yehˇ ve kaꞈ hpehꞈ ve yoˬ. Awˬ chawˇ maˇ heˆ leh yehˬ k’a hk’aw ve chaw htaꞈ Liꞈ hpu teˇ geh henˇ tuˬ jehˬ piˇ kaꞈ g’a ve yoˬ.
