Awˬ lawn 48
Cuˇ yiˍ cawˬ ve hkʼaw awˬ chawˇ leuˆ ve
Ngaˬ hui meuˆ daꞈ jaˇ ve awˬ chawˇ lehˬ ha lehˬ htaˇ teˇ geh ha lehˬ leh, ngaˬ hui dawˇ haˍ htaˇ awˬ gʼaˇ peꞈ laˇ ve yoˬ. Yaꞈ hkʼaˇ, teˇ gʼaˇ le le daꞈ ve awˬ chawˇ hpehꞈ ve maˇ heˆ tehꞈ, Liꞈ hpu hkʼaw shaˍ tiꞈ peꞈ laˇ ve yoˬ. Hkʼe kʼo, nawˬ hkʼaˬ hkʼe te daꞈ ve awˬ chawˇ htaꞈ leuˆ gʼa tuˬ le? Awˬ hawˉ lo ve na hkawˇ htaꞈ henˇ sheˍ.
1. Nawˬ leuˆ ve awˬ chawˇ nawˬ htaꞈ heuˆ la kuiˬ hkʼaˬ hkʼe cawˬ ve le?
Ngaˬ hui mawˬ daꞈ gʼa ve chaw maˇ heˆ leh in˗teu˗neꞈ hkʼaw ve chaw htaꞈ awˬ chawˇ te ve kʼo, ngaˬ hui kaꞈ yawˇ hui hkʼe leˇ dawˇ leh te tuˬ yoˬ. Liꞈ hpu hkʼaw kʼoˆ laˇ ve, “cuˇ yiˍ cawˬ ve chaw htaꞈ awˬ chawˇ te˗o. Nawˬ htawˇ cuˇ yiˍ cawˬ la tuˬ yoˬ. Cuˇ yiˍ maˇ cawˬ ve chaw [Yaˬhoˉvaˬ htaꞈ maˇ haꞈ ve chaw] htaꞈ awˬ chawˇ te ve kʼo, nawˬ htawˇ gʼa luˬ gʼa sheˆ tuˬ yoˬ.” (Tawˇ naˉ ve 13:20) Yaˬhoˉvaˬ htaꞈ haꞈ leh oˉ kʼoˍ pui ve awˬ chawˇ lehˬ, nawˬ Yaˬhoˉvaˬ geh meuˆ daꞈ leh, cawˇ ve hkʼaw dawˇ cheˆ gʼa tuˬ ga laˇ gʼa ve yoˬ. Yaꞈ hkʼaˇ, Yaˬhoˉvaˬ htaꞈ maˇ haꞈ ve chaw geh nawˬ meuˆ daꞈ ve kʼo, nawˬ Yaˬhoˉvaˬ geh maˇ meuˆ daꞈ tuˬ yawˇ te laˇ gʼa ve yoˬ. Chi htaꞈ pa taw, ngaˬ hui cuˇ yiˍ cawˬ ve hkʼaw awˬ chawˇ leuˆ tuˬ Liꞈ hpu hkʼaw kʼoˆ maˍ laˇ ve yoˬ. Ngaˬ hui ve awˬ chawˇ Yaˬhoˉvaˬ htaꞈ haꞈ ve kʼo, ngaˬ hui leh yawˇ hui kaꞈ awˬ bon gʼa tuˬ yoˬ. Awˬ lawn kʼo, ngaˬ hui ‘teˇ gʼaˇ leh teˇ gʼaˇ awˬ gʼaˇ piˇ daꞈ gʼa leh, uiˍ la yeˬ la tuˬ te daꞈ gʼa ve yoˬ.’—1 Hteˇsaˍlawˇniˆ 5:11.
2. Nawˬ awˬ chawˇ leuˆ ve htaꞈ Yaˬhoˉvaˬ hkʼaˬ hkʼe dawˇ ve le?
Yaˬhoˉvaˬ lehˬ a shu geh awˬ chawˇ te tuˬ yawˇ hkʼa dehꞈ leuˆ ve yoˬ. ‘Yawˇ lehˬ hteˇ ve cawˇ ve chaw htaꞈ awˬ chawˇ te ve yoˬ.’ (Tawˇ naˉ ve 3:32) Ngaˬ hui Yaˬhoˉvaˬ htaꞈ maˇ haꞈ ve chaw geh awˬ chawˇ te ve kʼo, yawˇ hkʼaˬ hkʼe dawˇ tuˬ le? Yawˇ nyi ma luˬ jaˇ tuˬ yoˬ! (Yaˍkoˆ 4:4 gʼaw sheˍ.) Yaꞈ hkʼaˇ, maˇ daꞈ ve chaw geh ngaˬ hui awˬ chawˇ maˇ te ve, Yaˬhoˉvaˬ leh yawˇ htaꞈ haꞈ ve chaw geh meuˆ daꞈ ve kʼo, Yaˬhoˉvaˬ ha lehˬ leh ngaˬ hui htaꞈ awˬ chawˇ te laˇ tuˬ yoˬ.—Chiˇ mvuh ve 15:1-4.
Henˇ shiˍ maˇ la tuˬ
Aˬ htoꞈ ma te awˬ chawˇ leuˆ ve lehˬ a yeˇ uiˍ jaˇ ve le, leh ngaˬ hui daꞈ ve awˬ chawˇ cawˬ tuˬ hkʼaˬ hkʼe gʼa te ve le, teˇ geh henˇ sheˍ.
3. Awˬ chawˇ leuˆ htaˇ shaˍ tiꞈ te sheˍ
Gʼuiˬ sha htaꞈ maˇ haꞈ leh yawˇ ve awˬ liˇ awˬ hkʼaˇ htaꞈ maˇ gʼaꞈ te ve chaw lehˬ maˇ daꞈ ve awˬ chawˇ hpehꞈ ve yoˬ. VDO hpaw leh na hkawˇ chi htaꞈ tawˇ yaw daꞈ sheˍ:
-
Ngaˬ hui shaˍ tiꞈ maˇ te ve hkʼaw maˇ daꞈ ve chaw geh awˬ chawˇ hkʼaˬ hkʼe te la ve le?
1 Kawˇrenˍhtuˆ liꞈ 15:33 gʼaw leh na hkawˇ chi htaꞈ tawˇ yaw daꞈ sheˍ:
-
Nawˬ awˬ pon kʼo, maˇ daꞈ ve awˬ chawˇ hkʼaˬ hkʼe hpehꞈ ve le? Aˬ htoꞈ ma pa taw le?
Chiˇ mvuh ve liꞈ 119:63 gʼaw leh na hkawˇ chi htaꞈ tawˇ yaw daꞈ sheˍ:
-
Nawˬ hkʼaˬ hkʼe ve chaw htaꞈ awˬ chawˇ leuˆ te cawˇ ve le?
Iˉ shiˍ teˇ shiˍ tiˉ kuiˇ ve kaꞈ awˬ nu ve teˇ shiˍ kuiˇ˗e tuˬ te piˇ gʼa ve hkʼa shuˍ, maˇ daꞈ ve chaw htaꞈ awˬ chawˇ te ve lehˬ nawˬ htaꞈ heuˆ la kuiˬ hkʼaˬ hkʼe cawˬ ve le?
4. Ngaˬ hui htaꞈ peun daꞈ ve chaw htawˇ daꞈ ve awˬ chawˇ hpehꞈ gʼa ve
Liꞈ hpu hkʼaw Iˉsaˍreˍlaˆ chaw nyiˇ gʼaˇ, Daˍviˆ leh Yawˇnaˆtanˍ ve awˬ lawn kʼoˆ taˍ ve yoˬ. Yawˇnaˆtanˍ lehˬ Daˍviˆ aꞈ kehˉ a shaꞈ maˇ jaˇ leh jawˇ mawˇ ve yaˇ paˍ kaꞈ hpehꞈ ve yoˬ. Yaꞈ hkʼaˇ, yawˇ hui meuˆ daꞈ jaˇ ve awˬ chawˇ hpehꞈ ve yoˬ. 1 Saˍmo˗eˍlaˆ liꞈ 18:1 gʼaw leh na hkawˇ chi htaꞈ tawˇ yaw daꞈ sheˍ:
-
Ngaˬ hui geh awˬ chawˇ te la ve chaw lehˬ a shaꞈ hkʼa shuˍ˗ehˬ leh teˇ ceuˬ le le shuˍ daꞈ tuˬ loˍ˗aw laˇ? Aˬ htoꞈ ma pa taw le?
Roˉmaꞈ liꞈ 1:11, 12 gʼaw leh na hkawˇ chi htaꞈ tawˇ yaw daꞈ sheˍ:
-
Yaˬhoˉvaˬ htaꞈ haꞈ ve awˬ chawˇ lehˬ teˇ gʼaˇ leh teˇ gʼaˇ hkʼaˬ hkʼe te awˬ gʼaˇ piˇ daꞈ gʼa ve le?
VDO chi hkʼaw, yaˇ nehˬ teˇ gʼaˇ maˇ dawˇ maˇ gaˇ ve hkʼaw awˬ chawˇ hkʼaˬ hkʼe gʼa ve htaꞈ nyi sheˍ. VDO hpaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
VDO chi hkʼaw, Maˍhtiˆ liꞈ henˇ yehˬ hkʼaw lo awˬ chawˇ te ve htaꞈ aˬ htoꞈ ma te awˬ pa awˬ e dawˇ haˍ ve le?
-
Awˉ lawˉ htaˇ liꞈ henˇ yehˬ lo ve awˬ chawˇ htaꞈ aˬ htoꞈ ma te yawˇ awˬ chawˇ te gaˇ ve le?
-
Hkʼaˬ hkʼe te leh yawˇ daꞈ ve awˬ chawˇ ca gʼa ve le?
5. Hkʼaˬ htaˆ kaꞈ awˬ chawˇ te daꞈ gʼa tuˬ hkʼaˬ hkʼe gʼa te ve le?
Nawˬ awˬ tehˬ ve awˬ chawˇ hkʼaˬ hkʼe te ca gʼa tuˬ le, leh nawˬ awˬ tehˬ ve awˬ chawˇ hkʼaˬ hkʼe te hpehꞈ gʼa tuˬ le, henˇ sheˍ. VDO hpaw sheˍ.
Tawˇ naˉ ve liꞈ 18:24 leh 27:17 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Awˬ tehˬ ve awˬ chawˇ lehˬ hkʼaˬ hkʼe te ga daꞈ ve le?
-
Nawˬ chi hkʼe ve awˬ chawˇ cawˬ˗aw laˇ? Nawˬ awˬ tehˬ ve awˬ chawˇ maˇ cawˬ sheˍ ve kʼo, hkʼaˬ hkʼe te ca gʼa tuˬ le?
Hpiˇliˇpiˆ liꞈ 2:4 gʼaw leh na hkawˇ chi htaꞈ tawˇ yaw daꞈ sheˍ:
-
Daꞈ ve awˬ chawˇ cawˬ tuˬ, nawˬ daꞈ ve awˬ chawˇ awˉ lawˉ gʼa hpehꞈ ve yoˬ. Nawˬ hkʼaˬ hkʼe te gʼa ve le?
Daꞈ ve awˬ chawˇ cawˬ tuˬ, nawˬ daꞈ ve awˬ chawˇ awˉ lawˉ gʼa hpehꞈ ve
Chaw teˇ hpaˍ kʼoˆ ve: “Hkʼaˬ hkʼe ve chaw htaꞈ awˬ chawˇ te kaꞈ hpehꞈ ve, awˬ chawˇ maˇ cawˬ ve aꞈ kehˉ daꞈ ve yoˬ.”
-
Nawˬ hkʼaˬ hkʼe hkʼawꞈ piˇ tuˬ le?
A yeˇ uiˍ ve awˬ lawn
Ngaˬ hui cuˇ yiˍ cawˬ ve hkʼaw awˬ chawˇ leuˆ ve kʼo, Yaˬhoˉvaˬ ha lehˬ tuˬ te piˇ leh, ngaˬ hui kaꞈ awˬ bon gʼa tuˬ yoˬ.
Kʼawꞈ gʼaꞈ na ve
-
Aˬ htoꞈ ma pa taw ngaˬ hui awˬ chawˇ leuˆ ve lehˬ Yaˬhoˉvaˬ awˬ pon a yeˇ uiˍ jaˇ ve le?
-
Hkʼaˬ hkʼe ve chaw htaꞈ ngaˬ hui awˬ chawˇ maˇ te cawˇ ve le?
-
Yaˬhoˉvaˬ htaꞈ haꞈ ve chaw geh nawˬ hkʼaˬ hkʼe te gʼaˇ hteꞈ meuˆ daꞈ gʼa tuˬ le?
Kʼawꞈ caˉ nyi gʼa ve
Awˬ tehˬ ve awˬ chawˇ lehˬ ngaˬ hui tuꞈ hkanˍ htaˇ hkʼaˬ hkʼe ga laˇ gʼa ve le, gʼaw nyi sheˍ.
Daꞈ ve awˬ chawˇ ca gʼa tuˬ nawˬ aˬ htoꞈ ma gʼa te ve le, gʼaw nyi sheˍ.
Nawˬ awn˗laiˉ hkʼaw awˬ chawˇ ca ve kʼo, aˬ htoꞈ ma htaꞈ shiˍ cawˇ ve le?
In˗teu˗neꞈ hkʼaw cuˇ yiˍ cawˬ ve hkʼaw awˬ chawˇ ca ve (4:12)
Daꞈ ve chaw htaꞈ awˬ chawˇ leuˆ te ve lehˬ hawˉ hkʼaˆ teˇ gʼaˇ ve a shaꞈ htaꞈ hkʼaˬ hkʼe pa piˇ ve shiˍ tuˬ, “Ngaˬ awˬ pa cawˬ gaˇ jaˇ” awˬ lawn chi htaꞈ gʼaw nyi sheˍ.
“Liꞈ hpu a shaꞈ htaꞈ pa gʼa ve” (Shaw nyi kuiˬ Taꞈ yehˬ 2012 hkʼawꞈ ha pa 4 maˬ 1 nyi)
You May Also Like
NGAˬ HUI HTAꞈ CAˉ DAꞈ VE AWˬ LAWN
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ ve hk’aˬ hk’e te henˇ ve le?
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ tuˬ nawˬ Liꞈ hpu hk’aˬ ve teˇ maˬ yehˇ ve kaꞈ hpehꞈ ve yoˬ. Awˬ chawˇ maˇ heˆ leh yehˬ k’a hk’aw ve chaw htaꞈ Liꞈ hpu teˇ geh henˇ tuˬ jehˬ piˇ kaꞈ g’a ve yoˬ.
