Yaˬhoˉvaˬ ngaˬ hui htaꞈ hpanˍ htaˇ, ngaˬ hui tawˇ yaw puiˉ tuˬ yawˇ hpanˍ laˇ ve yoˬ. Chi lehˬ daꞈ jaˇ ve laꞈ shawnˍ hpehꞈ ve yoˬ. Yaꞈ hkʼaˇ, laꞈ shawnˍ chi htaꞈ ngaˬ hui hkʼaˬ hkʼe te yehˇ ve yawˇ awˬ pon a yeˇ uiˍ˗aw laˇ? A yeˇ uiˍ ve yoˬ! (Yaˍkoˆ 1:26 gʼaw sheˍ.) Hkʼe kʼo, ngaˬ hui tawˇ yaw ve htaꞈ Yaˬhoˉvaˬ nyi hkʼaˇ suh tuˬ hkʼaˬ hkʼe te piˇ gʼa ve le?

1. Ngaˬ hui tawˇ yaw puiˉ ve chi htaꞈ hkʼaˬ hkʼe te yehˇ cawˇ ve le?

Liꞈ hpu hkʼaw ngaˬ hui htaꞈ kʼoˆ laˇ ve, ‘teˇ gʼaˇ leh teˇ gʼaˇ awˬ gʼaˇ piˇ daꞈ leh, uiˍ la yeˬ la tuˬ te daꞈ˗oꞈ.’ (1 Hteˇsaˍlawˇniˆ 5:11) A shu awˬ gʼaˇ gʼa tuˬ loˍ ve htaꞈ nawˬ dawˇ mawˬ ve le? Yawˇ hui nyi ma sha la tuˬ nawˬ aˬ htoꞈ ma te piˇ gʼa ve le? Yawˇ hui nawˬ awˬ pon a yeˇ uiˍ jaˇ tehꞈ kʼoˆ piˇ gʼa ve yoˬ. Leh yawˇ hui ve te hkʼaˇ dawˇ hkʼaˇ hkʼaˬ ve teˇ ceuˬ htaꞈ nawˬ dawˇ cawˇ ve kʼoˆ piˇ gʼa ve yoˬ. Chi hkʼoˆ kaꞈ, nawˬ shiˍ daꞈ ve chaw awˬ gʼaˇ gʼa tuˬ, nawˬ Liꞈ hpu teˇ tawn tawn htaꞈ tawnˇ gʼa˗aw laˇ? Awˬ gʼaˇ piˇ tuˬ nawˬ leuˆ gʼa ve laiˉ tawn cawˬ ve yoˬ. Nawˬ tawˇ yaw ve awˬ hkʼaˇ shu htaꞈ awˬ gʼaˇ piˇ gʼa ve tehꞈ tawnˇ taˍ sheˍ. Chi htaꞈ pa taw, nawˬ hkʼaˬ htaˆ kaꞈ tawˇ nuˇ lehˍ yaw piˇ leh na sha ve hkʼaw yaw piˇ sheˍ.—Tawˇ naˉ ve 15:1.

2. Hkʼaˬ hkʼe ve tawˇ ngaˬ hui maˇ gʼa yaw ve le?

Liꞈ hpu hkʼaw kʼoˆ ve, “nawˬ hui ve mawꞈ kʼaw awˬ hkʼaw lo chaꞈ chiˆ ve tawˇ hkawˇ teˇ peu˗eˍ kaꞈ taˇ tawˆ la piˇ.” (Eˇfeˇsuꞈ 4:29 gʼaw sheˍ.) Chi kʼoˆ gaˇ ve lehˬ, maˇ daꞈ ve tawˇ leh shu nyi ma naˬ tuˬ ve tawˇ maˇ gʼa yaw ve yoˬ. Chi hkʼoˆ kaꞈ, ngaˬ hui shu htaꞈ maˇ gʼa hkʼaiˉ leh maˇ gʼa she pfuhˍ piˇ ve yoˬ.—Tawˇ naˉ ve 16:28 gʼaw sheˍ.

3. Awˬ nu ve chaw awˬ gʼaˇ gʼa tuˬ, ngaˬ hui hkʼaˬ hkʼe ve tawˇ yaw piˇ gʼa ve le?

Ngaˬ hui tawˇ yaw htaˇ nyi ma hkʼaw hkʼaˬ hkʼe cawˬ ve htaꞈ shu shiˍ gʼa ve yoˬ. (Luˉkaꞈ 6:45) Chi htaꞈ pa taw, cawˇ ve, daꞈ ve kehˬ ve, nyi sha ve, leh chiˇ mvuh keunˍ ve, dawˇ hkʼaˇ chi teˇ hpaˍ cawˬ tuˬ ngaˬ hui gʼa te jawˬ ve yoˬ. (Hpiˇliˇpiˆ 4:8) Chi hkʼe te gʼa tuˬ ngaˬ hui pyawˍ ve awˬ ceuˬ leh awˬ chawˇ leuˆ htaˇ, cuˇ yiˍ cawˬ ve hkʼaw gʼa leuˆ ve yoˬ. (Tawˇ naˉ ve 13:20) Chi hkʼoˆ kaꞈ, ngaˬ hui aˬ htoꞈ ma awˬ lawn yaw tuˬ, hkʼaˬ hkʼe yaw tuˬ, leh shu htaꞈ heuˆ la kuiˬ hkʼaˬ hkʼe cawˬ ve htaꞈ awˉ lawˉ gʼa dawˇ nyi ve yoˬ. Liꞈ hpu hkʼaw kʼoˆ ve, “maˇ dawˇ nyi leh yaw ve tawˇ teˇ hpaˍ lehˬ, aˉ htaw hkʼa shuˍ shu htaꞈ naˬ piˇ lawˬ ve yoˬ. Yaꞈ hkʼaˇ, cuˇ yiˍ htaꞈ yehˇ leh yaw ve tawˇ lehˬ, shu htaꞈ kʼawꞈ na˗e la piˇ gʼa ve yoˬ.”—Tawˇ naˉ ve 12:18.

 Henˇ shiˍ maˇ la tuˬ

4. Nawˬ tawˇ yaw ve htaꞈ shaˍ tiꞈ te sheˍ

Teˇ pawˆ pawˆ kʼo, ngaˬ hui kʼoˆ kʼai peuˬ ve awˬ ceuˬ hkʼawꞈ nawˉ htaˇ nyi ma naˬ tuˬ te laˇ ve yoˬ. (Yaˍkoˆ 3:2) Gaˍlaˍtiˆ liꞈ 5:22, 23 gʼaw leh na hkawˇ chi htaꞈ tawˇ yaw daꞈ sheˍ:

• Nawˬ tawˇ yaw ve htaꞈ shaˍ tiꞈ te gʼa tuˬ, Yaˬhoˉvaˬ geh aˬ htoꞈ ma ve te hkʼaˇ dawˇ hkʼaˇ lawˬ gaˇ ve le? Te hkʼaˇ dawˇ hkʼaˇ chi ve teˇ hpaˍ nawˬ htaꞈ hkʼaˬ hkʼe ga laˇ gʼa ve le?

1 Kawˇrenˍhtuˆ liꞈ 15:33 gʼaw leh na hkawˇ chi htaꞈ tawˇ yaw daꞈ sheˍ:

• Nawˬ ve awˬ chawˇ leh nawˬ leuˆ ve pyawˍ ve awˬ ceuˬ lehˬ, nawˬ tawˇ yaw ve htaꞈ heuˆ la kuiˬ hkʼaˬ hkʼe cawˬ ve le?

Cuˇ yiˍ piˇ ve liꞈ 3:1, 7 gʼaw leh na hkawˇ chi htaꞈ tawˇ yaw daꞈ sheˍ:

• Nawˬ dawˇ kʼo, teˇ ceuˬ ceuˬ htaꞈ kʼoˆ tuˬ hkʼaˬ hkʼe htaˇ taꞈ iˉ gawˬ lehˍ chehˇ tuˬ ve awˬ yanˇ leh tawˇ yaw tuˬ ve awˬ yanˇ hpehꞈ ve le?

 5. Shu htaꞈ daꞈ ve hpawˇ kʼoˆ ve

6. Nawˬ ve yehˬ kʼa hkʼaw ve chaw htaꞈ tawˇ yaw piˇ htaˇ, nuˇ nehˬ ve hkʼaw yaw piˇ sheˍ

 A yeˇ uiˍ ve awˬ lawn

Ngaˬ hui yaw ve tawˇ shu awˬ gʼaˇ gʼa tuˬ, leh nyi ma naˬ tuˬ kaꞈ te piˇ gʼa ve yoˬ. Chi htaꞈ pa taw, ngaˬ hui tawˇ maˇ yaw sheˍ htaˇ, aˬ htoꞈ ma kʼoˆ tuˬ, hkʼaˬ htaˆ kʼoˆ tuˬ, leh hkʼaˬ hkʼe kʼoˆ tuˬ, awˉ lawˉ gʼa dawˇ nyi ve yoˬ.

Kʼawꞈ gʼaꞈ na ve

• Nawˬ shu htaꞈ awˬ gʼaˇ piˇ tuˬ hkʼaˬ hkʼe kʼoˆ piˇ gʼa ve le?

• Hkʼaˬ hkʼe ve tawˇ htaꞈ nawˬ jaw kʼai gaˇ ve le?

• Ngaˬ hui hkʼaˬ htaˆ kaꞈ nuˇ nehˬ ve tawˇ leh awˬ gʼaˇ piˇ ve tawˇ yaw gʼa tuˬ, aˬ htoꞈ ma ga laˇ gʼa ve le?