Awˬ lawn 52
Aˬ htoꞈ ma te veuꞈ kʼaˇ leuˆ veuꞈ ve leh awˬ hkiˇ shawˍ ve lehˬ a yeˇ uiˍ jaˇ ve le?
Ngaˬ hui teˇ gʼaˇ le le dawˇ cawˇ ve veuꞈ kʼaˇ leuˆ veuꞈ gaˇ leh awˬ hkiˇ shawˍ gaˇ ve yoˬ. Yaꞈ hkʼaˇ, ngaˬ hui Liꞈ hpu hkʼaw ve awˬ liˇ awˬ hkʼaˇ htaꞈ gʼaꞈ te ve kʼo, ngaˬ hui dawˇ cawˇ ve veuꞈ kʼaˇ leuˆ veuꞈ gʼa leh, Yaˬhoˉvaˬ nyi hkʼaˇ suh tuˬ kaꞈ te piˇ gʼa ve yoˬ. Awˬ liˇ awˬ hkʼaˇ chi teˇ hpaˍ htaꞈ dawˇ nyi sheˍ.
1. Ngaˬ hui veuꞈ kʼaˇ leuˆ veuꞈ ve htaꞈ ga laˇ gʼa ve Liꞈ hpu hkʼaw ve awˬ liˇ awˬ hkʼaˇ aˬ htoꞈ ma cawˬ ve le?
Ngaˬ hui “Gʼuiˬ sha htaꞈ yawˆ yan chehˇ ve” tehꞈ shu mawˬ tuˬ, “nyi ma nuˇ nehˬ ve leh nyi ma taˍ puiˉ ve awˬ hkʼaw lo, keunˍ daꞈ cawˇ daꞈ ve veuꞈ kʼaˇ teˇ hpaˍ” htaꞈ gʼa leuˆ veuꞈ leh gʼa daꞈ kehˬ piˇ ve yoˬ. (1 Tiˆmoˉseˍ 2:9, 10) Liꞈ hpu hkʼaw ve awˬ liˇ awˬ hkʼaˇ 4 hkʼaˇ htaꞈ teˇ geh nyi sheˍ. (1) Ngaˬ hui “keunˍ daꞈ cawˇ daꞈ ve” veuꞈ kʼaˇ gʼa veuꞈ ve yoˬ. Yaˬhoˉvaˬ ve Shaˉhkiˆhkanˍ ve chaw hpawnˬ daꞈ˗e htaˇ, veuꞈ kʼaˇ laiˉ ceuˬ veuꞈ ve htaꞈ nawˬ gʼa mawˬ ve yoˬ. Yaꞈ hkʼaˇ, yawˇ hui veuꞈ ve veuꞈ kʼaˇ leh oˉ kʼoˍ mvuh shawˍ ve kaꞈ Yaˬhoˉvaˬ htaꞈ yawˆ yan tuˬ te piˇ ve yoˬ. (2) “Nyi ma nuˇ nehˬ ve” lehˬ ngaˬ hui awˬ to htaꞈ shu pehꞈ ve tzuhˆ ve hpawˇ maˇ gʼa dawˇ tuˬ, nyi sha ve veuꞈ kʼaˇ veuꞈ cawˇ ve yoˬ. (3) “Nyi ma taˍ puiˉ ve” lehˬ aˉ poꞈ veuꞈ kʼaˇ awˬ suhˉ awˬ suhˉ tawˆ la ve htaꞈ ngaˬ hui a yeˇ hkʼe taw taw maˇ gʼa te tuˬ, shaˍ tiꞈ gʼa te cawˇ ve yoˬ. (4) Ngaˬ hui leuˆ veuꞈ ve veuꞈ kʼaˇ lehˬ “Gʼuiˬ sha htaꞈ yawˆ yan chehˇ” ve tehꞈ shu mawˬ tuˬ, hkʼaˬ htaˆ kaꞈ gʼa te ve yoˬ.—1 Kawˇrenˍhtuˆ 10:31.
2. Ngaˬ hui veuꞈ ve veuꞈ kʼaˇ lehˬ awˬ viˉ awˬ nyi htaꞈ heuˆ la kuiˬ hkʼaˬ hkʼe cawˬ ve le?
Ngaˬ hui aˉ poꞈ veuꞈ kʼaˇ hkʼaˬ hkʼe veuꞈ tuˬ dawˇ cheˆ gʼa ve htawˇ, ngaˬ hui veuꞈ ve veuꞈ kʼaˇ shu hkʼaˬ hkʼe dawˇ la tuˬ ve htaꞈ kaꞈ ngaˬ hui gʼa dawˇ nyi piˇ ve yoˬ. Ngaˬ hui shu nyi ma maˇ sha tuˬ maˇ te piˇ gaˇ. Yaꞈ hkʼaˇ, ‘ngaˬ hui awˬ paˇ awˬ kui lo chehˇ ve chaw htaꞈ daꞈ la uiˍ la tuˬ yawˇ hui nyi ma cawˇ tuˬ te piˇ gaˇ ve yoˬ.’—Roˉmaꞈ 15:1, 2 gʼaw sheˍ.
3. Ngaˬ hui veuꞈ ve veuꞈ kʼaˇ lehˬ shu Yaˬhoˉvaˬ htaꞈ shiˍ gaˇ tuˬ hkʼaˬ hkʼe te piˇ gʼa ve le?
Ngaˬ hui hkʼaˬ htaˆ kaꞈ keunˍ daꞈ ve veuꞈ kʼaˇ veuꞈ tuˬ coˇ caˇ ve yoˬ. Leuˉ leh hpawnˬ daꞈ˗e htaˇ, leh hto toˇ˗e htaˇ kaꞈ yoˬ. Ngaˬ hui daꞈ ve awˬ lawn sha tanˇ hto toˇ ve aꞈ kehˉ, ngaˬ hui veuꞈ taˍ ve veuꞈ kʼaˇ htaꞈ shu a yeˇ maˇ te tcuh gaˇ. Chi htaꞈ pa taw, ngaˬ hui keunˍ daꞈ cawˇ daꞈ ve veuꞈ kʼaˇ veuꞈ ve kʼo, shu Yaˬhoˉvaˬ htaꞈ shiˍ daꞈ gaˇ tuˬ te piˇ leh, “Gʼuiˬ sha ve maˍ piˇ ve tawˇ hkawˇ htaꞈ awˬ hkiˇ shawˍ” piˇ chehˇ ve yoˬ.—Tiˇtuˆ 2:10.
Henˇ shiˍ maˇ la tuˬ
Ngaˬ hui Hkriꞈ yaˇ hpehꞈ ve tehꞈ shu mawˬ tuˬ, hkʼaˬ hkʼe ve veuꞈ kʼaˇ veuꞈ cawˇ ve le, teˇ geh henˇ sheˍ.
Ngaˬ hui veuꞈ ve veuꞈ kʼaˇ aˉ yaˇ cawˬ ve chaw htaꞈ yawˆ yan piˇ ve tehꞈ hpeuꞈ maw piˇ gʼa ve yoˬ. Yaˬhoˉvaˬ lehˬ ngaˬ hui nyi ma hkʼaw cawˬ ve awˬ ceuˬ htaꞈ mawˬ gʼa ve htawˇ, ngaˬ hui veuꞈ ve veuꞈ kʼaˇ kaꞈ yawˇ htaꞈ yawˆ yan piˇ cawˇ ve
4. Ngaˬ hui keunˍ daꞈ cawˇ daꞈ ve veuꞈ kʼaˇ veuꞈ ve kʼo, Yaˬhoˉvaˬ htaꞈ yawˆ yan piˇ ve
Ngaˬ hui leuˆ veuꞈ ve veuꞈ kʼaˇ lehˬ aˬ htoꞈ ma te a yeˇ uiˍ jaˇ ve le? Hpeuꞈ maˍ ve liꞈ 4:11 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Ngaˬ hui leuˆ veuꞈ ve veuꞈ kʼaˇ lehˬ Yaˬhoˉvaˬ ve awˬ meh htaꞈ heuˆ la kuiˬ cawˬ ve pa taw, ngaˬ hui veuꞈ kʼaˇ leuˆ htaˇ hkʼaˬ hkʼe ve htaꞈ leuˆ veuꞈ cawˇ ve le?
-
Nawˬ dawˇ kʼo, ngaˬ hui hpawnˬ daꞈ˗e leh hto toˇ˗e htaˇ, veuꞈ kʼaˇ leuˆ veuꞈ ve htaꞈ a yeˇ te cawˇ˗aw laˇ? Aˬ htoꞈ ma pa taw le?
5. Ngaˬ hui veuꞈ kʼaˇ leuˆ veuꞈ tuˬ dawˇ cheˆ htaˇ aˬ htoꞈ ma ga laˇ gʼa ve le?
Ngaˬ hui veuꞈ ve veuꞈ kʼaˇ lehˬ awˬ hpfuhˇ hkʼaˆ ve maˇ hkʼaˆ ve htawˇ, hkʼaˬ htaˆ kaꞈ gʼa daꞈ kehˬ leh gʼa keunˍ daꞈ piˇ lawˬ ve yoˬ. 1 Kawˇrenˍhtuˆ liꞈ 10:24 leh 1 Tiˆmoˉseˍ liꞈ 2:9, 10 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Aˬ htoꞈ ma te ngaˬ hui maˇ daꞈ kehˬ leh maˇ nyi sha ve veuꞈ kʼaˇ maˇ veuꞈ cawˇ ve le?
-
Aˬ htoꞈ ma te ngaˬ hui kiˇ˗ehˍ ve veuꞈ kʼaˇ, leh shu pehꞈ ve tzuhˆ ve hpawˇ dawˇ la tuˬ ve veuꞈ kʼaˇ maˇ veuꞈ cawˇ ve le?
Hkriꞈ yaˇ lehˬ Moˉseˍ ve awˬ liˇ tawˇ hkawˇ htaꞈ gʼaꞈ te tuˬ maˇ loˍ ve htawˇ, awˬ liˇ tawˇ hkawˇ chi Yaˬhoˉvaˬ ve dawˇ hkʼaˇ htaꞈ ngaˬ hui na gʼa tuˬ ga laˇ ve yoˬ. Bon maˍ ve liꞈ 22:5 gʼaw leh na hkawˇ chi htaꞈ tawˇ yaw daꞈ sheˍ:
-
Aˬ htoꞈ ma te yaˇ miˇ lehˬ hawˉ hkʼaˆ ve veuꞈ kʼaˇ htaꞈ maˇ gʼa veuꞈ deh leh, hawˉ hkʼaˆ htawˇ yaˇ miˇ ve veuꞈ kʼaˇ htaꞈ maˇ gʼa veuꞈ deh ve le?
1 Kawˇrenˍhtuˆ liꞈ 10:32, 33 leh 1 Yoˇhanˬ liꞈ 2:15, 16 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Aˬ htoꞈ ma te ngaˬ hui veuꞈ ve veuꞈ kʼaˇ lehˬ Hkriꞈ yaˇ awˬ moˍ hkʼaw ve chaw leh awˬ paˇ awˬ kui chehˇ ve chaw htaꞈ nyi ma maˇ sha tuˬ maˇ te piˇ cawˇ ve le?
-
Nawˬ chehˇ kuiˬ awˬ paˇ lo ve chaw hkʼaˬ hkʼe ve veuꞈ kʼaˇ veuꞈ ve le?
-
Nawˬ dawˇ kʼo, Hkriꞈ yaˇ lehˬ oˇ hkʼe ve veuꞈ kʼaˇ veuꞈ cawˇ˗aw laˇ? Aˬ htoꞈ ma pa taw le?
Ngaˬ hui veuꞈ kʼaˇ laiˉ ceuˬ leuˆ veuꞈ gʼa ve, leh Yaˬhoˉvaˬ htaꞈ kaꞈ nyi hkʼaˇ suh tuˬ te piˇ gʼa ve
Chaw teˇ hpaˍ kʼoˆ ve: “Ngaˬ hkʼaˬ hkʼe ve veuꞈ kʼaˇ veuꞈ gaˇ ve kaꞈ veuꞈ gʼa ve yoˬ.”
-
Nawˬ hkʼaˬ hkʼe dawˇ ve le? Aˬ htoꞈ ma pa taw le?
A yeˇ uiˍ ve awˬ lawn
Ngaˬ hui keunˍ daꞈ cawˇ daꞈ ve veuꞈ kʼaˇ veuꞈ ve kʼo, Yaˬhoˉvaˬ leh awˬ nu ve chaw htaꞈ yawˆ yan piˇ ve yoˬ.
Kʼawꞈ gʼaꞈ na ve
-
Aˬ htoꞈ ma te ngaˬ hui veuꞈ ve veuꞈ kʼaˇ lehˬ Yaˬhoˉvaˬ awˬ pon a yeˇ uiˍ jaˇ ve le?
-
Ngaˬ hui veuꞈ kʼaˇ leuˆ veuꞈ ve htaꞈ ga laˇ gʼa ve Liꞈ hpu hkʼaw ve awˬ liˇ awˬ hkʼaˇ aˬ htoꞈ ma cawˬ ve le?
-
Ngaˬ hui veuꞈ ve veuꞈ kʼaˇ lehˬ shu Yaˬhoˉvaˬ htaꞈ shiˍ gaˇ tuˬ hkʼaˬ hkʼe te piˇ gʼa ve le?
Kʼawꞈ caˉ nyi gʼa ve
Nawˬ veuꞈ ve veuꞈ kʼaˇ shu gʼa mawˬ htaˇ hkʼaˬ hkʼe dawˇ tuˬ te piˇ gʼa ve htaꞈ, gʼaw nyi sheˍ.
“Ngaˬ veuꞈ ve veuꞈ kʼaˇ hkʼaˬ hkʼe kʼai ve le?” (Vehˆsaiˉ hkʼaw ve awˬ lawn)
Aˬ htoꞈ ma te nawˬ awˬ to htaꞈ naˬ meuꞈ maˇ htawˆ sheˍ htaˇ awˉ lawˉ dawˇ nyi cawˇ ve le, gʼaw nyi sheˍ.
“Naˬ meuꞈ htawˆ ve htaꞈ Liꞈ hpu hkʼaw hkʼaˬ hkʼe kʼoˆ ve le?” (Vehˆsaiˉ hkʼaw ve awˬ lawn)
Ngaˬ hui veuꞈ kʼaˇ leuˆ veuꞈ tuˬ, ga laˇ gʼa ve aˬ htoꞈ ma ve awˬ liˇ awˬ hkʼaˇ kʼawꞈ cawˬ sheˍ ve le, gʼaw nyi sheˍ.
You May Also Like
NGAˬ HUI HTAꞈ CAˉ DAꞈ VE AWˬ LAWN
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ ve hk’aˬ hk’e te henˇ ve le?
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ tuˬ nawˬ Liꞈ hpu hk’aˬ ve teˇ maˬ yehˇ ve kaꞈ hpehꞈ ve yoˬ. Awˬ chawˇ maˇ heˆ leh yehˬ k’a hk’aw ve chaw htaꞈ Liꞈ hpu teˇ geh henˇ tuˬ jehˬ piˇ kaꞈ g’a ve yoˬ.
