Yaˬhoˉvaˬ lehˬ “ha lehˬ ve Gʼuiˬ sha” hpehꞈ ve yoˬ. (1 Tiˆmoˉseˍ 1:11, Miˬ guiˬ awˬ suhˉ yuˬ tawˆ ve Liꞈ hpu) Yawˇ ngaˬ hui htaꞈ ha lehˬ ve a shaꞈ cawˬ tcuh gaˇ ve yoˬ. Ngaˬ hui kanˉ te ve awˬ yanˇ shawˍ teh leh gʼaˇ jehˇ ve htaꞈ Yaˬhoˉvaˬ mawˬ htaˇ ha lehˬ ve yoˬ. Ngaˬ hui gʼaˇ jehˇ htaˇ ha lehˬ leh, Yaˬhoˉvaˬ nyi hkʼaˇ suh tuˬ hkʼaˬ hkʼe te piˇ gʼa ve, chi ve teˇ lawn hkʼaw teˇ geh henˇ tuˬ yoˬ.

1. Ngaˬ hui pyawˍ ve awˬ ceuˬ leuˆ htaˇ aˬ htoꞈ ma htaꞈ tawnˇ taˍ cawˇ ve le?

Nawˬ gʼaˇ jehˇ htaˇ aˬ htoꞈ ma te ve le? Chaw teˇ gʼaˇ gʼaˇ kʼo, aˉ hkʼaw lo chehˇ leh liꞈ gʼaw ve, awˬ han nyi ve, liꞈ hkawˇ na ve, leh in˗teu˗neꞈ leˍ guiˇ ve yoˬ. Leh chaw teˇ hpaˍ hpaˍ kʼo, awˬ chawˇ geh ca guiˇ˗e ve, iˉ kaˆ hehˉ guiˇ˗e ve, maˇ heˆ leh kenˍ (game) leˍ guiˇ˗e ve yoˬ. Ngaˬ hui pyawˍ ve awˬ ceuˬ hkʼaˬ hkʼe ve dawˇ cawˇ ve maˇ kʼoˆ, ngaˬ hui leuˆ te ve lehˬ ‘Jawˇmawˇ nyi ma cawˇ ve awˬ ceuˬ’ gʼa hpehꞈ piˇ ve yoˬ. (Eˇfeˇsuꞈ 5:10) Chi ve lehˬ a yeˇ uiˍ jaˇ. Awˬ lawn kʼo, Yaˬhoˉvaˬ maˇ dawˇ cawˇ ve pyawˍ ve awˬ ceuˬ laiˉ ceuˬ cawˬ ve yoˬ. Tawˇ pa haˉ te kʼo, hehnˇ ve, pehꞈ ve tzuhˆ ve, leh neˇ teˇ hpaˍ htaꞈ caˉ daꞈ ve awˬ ceuˬ hpehꞈ ve yoˬ. (Chiˇ mvuh ve 11:5 gʼaw sheˍ.) Ngaˬ hui pyawˍ ve awˬ ceuˬ leuˆ htaˇ, cuˇ yiˍ cawˬ ve hkʼaw leuˆ tuˬ aˬ htoꞈ ma ga laˇ gʼa ve le?

Yaˬhoˉvaˬ htaꞈ haꞈ ve chaw geh ngaˬ hui awˬ chawˇ te ve kʼo, cuˇ yiˍ cawˬ ve hkʼaw pyawˍ ve awˬ ceuˬ leuˆ gʼa tuˬ yawˇ hui ga laˇ gʼa ve yoˬ. Awˬ lawn 48 hkʼaw ngaˬ hui gʼa henˇ˗oˬ ve, ‘cuˇ yiˍ cawˬ ve chaw htaꞈ awˬ chawˇ te ve chaw lehˬ cuˇ yiˍ cawˬ tuˬ yoˬ.’ Yaꞈ hkʼaˇ, Gʼuiˬ sha ve awˬ liˇ awˬ hkʼaˇ htaꞈ maˇ gʼaꞈ te ve chaw geh ngaˬ hui awˬ chawˇ te ve kʼo, ngaˬ hui htawˇ “gʼa luˬ gʼa sheˆ tuˬ yoˬ.”—Tawˇ naˉ ve 13:20.

2. Aˬ htoꞈ ma pa taw ngaˬ hui pyawˍ ve awˬ ceuˬ te ve awˬ yanˇ hkʼaˬ maw maw yehˇ tuˬ shawˍ teh taˍ cawˇ ve le?

Ngaˬ hui leuˆ ve pyawˍ ve awˬ ceuˬ Yaˬhoˉvaˬ geh meuˆ daꞈ ve htaꞈ maˇ te luˬ laˇ ve htawˇ, awˬ yanˇ chi maw maw maˇ gʼa yehˇ tuˬ shaˍ tiꞈ gʼa te cawˇ ve yoˬ. Ngaˬ hui shaˍ tiꞈ maˇ te ve kʼo, awˬ nu ve a yeˇ uiˍ ve awˬ ceuˬ te tuˬ awˬ yanˇ maˇ cawˬ la ve yoˬ. Liꞈ hpu hkʼaw ngaˬ hui htaꞈ kʼoˆ laˇ ve, “awˬ yanˇ htaꞈ vuiˬ hkʼawꞈ leh hkʼa dehꞈ yehˇ˗oˆ.”—Eˇfeˇsuꞈ 5:15, 16 gʼaw sheˍ.

 4. Cuˇ yiˍ cawˬ ve hkʼaw awˬ yanˇ yehˇ sheˍ

5. Nawˬ awˬ pon awˬ bon cawˬ ve pyawˍ ve awˬ ceuˬ htaꞈ leuˆ sheˍ

Yaˬhoˉvaˬ maˇ dawˇ cawˇ ve pyawˍ ve awˬ ceuˬ teˇ hpaˍ hpaˍ cawˬ ve htawˇ, yawˇ dawˇ cawˇ ve laiˉ ceuˬ kaꞈ cawˬ ve yoˬ. Cuˇ yiˍ piˇ ve liꞈ 8:15 leh Hpiˇliˇpiˆ liꞈ 4:8 gʼaw leh na hkawˇ chi htaꞈ tawˇ yaw daꞈ sheˍ:

• Nawˬ dawˇ cawˇ ve awˬ bon cawˬ tuˬ pyawˍ ve awˬ ceuˬ aˬ htoꞈ ma cawˬ ve le?

 A yeˇ uiˍ ve awˬ lawn

Yaˬhoˉvaˬ ngaˬ hui htaꞈ awˬ bon cawˬ ve pyawˍ ve awˬ ceuˬ leuˆ leh ha lehˬ tcuh gaˇ ve yoˬ.

Kʼawꞈ gʼaꞈ na ve

• Hkriꞈ yaˇ lehˬ hkʼaˬ hkʼe ve pyawˍ ve awˬ ceuˬ htaꞈ jaw kʼai cawˇ ve le?

• Pyawˍ ve awˬ ceuˬ te ve htaꞈ ngaˬ hui awˬ yanˇ chi maw maw maˇ gʼa yehˇ tuˬ, aˬ htoꞈ ma te shaˍ tiꞈ te cawˇ ve le?

• Yaˬhoˉvaˬ nyi hkʼaˇ suh ve pyawˍ ve awˬ ceuˬ htaꞈ aˬ htoꞈ ma te nawˬ leuˆ gaˇ ve le?