Yeˍsuˆ lehˬ Hkriꞈ yaˇ awˬ moˍ hkʼaw sheh kʼai shehˍ hpaˇ hpehꞈ ve yoˬ. (Eˇfeˇsuꞈ 5:23) Chi teˇ hkui Yeˍsuˆ mvuhˇ naw ma hkʼoˆ chehˇ taˍ ve htawˇ, miˬ guiˬ hkʼoˆ lo ve Hkriꞈ yaˇ awˬ moˍ htaꞈ sheh kʼai tuˬ, yawˇ “ka tiꞈ yeˬ leh cuˇ yiˍ cawˬ ve awˬ ceˬ” htaꞈ cuˇ ve yoˬ. (Maꞈhtehˍ 24:45 gʼaw sheˍ.) “Ka tiꞈ yeˬ leh cuˇ yiˍ cawˬ ve awˬ ceˬ” teˇ ceuˬ ceuˬ htaꞈ dawˇ cheˆ tuˬ, Yeˍsuˆ yawˇ hui htaꞈ a hkaw˗anˬ piˇ ve htawˇ, yawˇ hui Yeˍsuˆ ve hkawˇ gʼa na leh, Yeˍsuˆ ve awˬ viˉ awˬ nyi htaꞈ gʼa nyi haꞈ shaˉ ve yoˬ. Hkʼe kʼo, ka tiꞈ yeˬ leh cuˇ yiˍ cawˬ ve awˬ ceˬ lehˬ a shu le? Yawˇ hui ngaˬ hui htaꞈ hkʼaˬ hkʼe te nyi haꞈ shaˉ laˇ ve le?

1. “Ka tiꞈ yeˬ leh cuˇ yiˍ cawˬ ve awˬ ceˬ” lehˬ a shu le?

Ponˬ laˬ htaˇ Yaˬhoˉvaˬ hawˉ hkʼaˆ teˇ gʼaˇ, maˇ heˆ leh hawˉ hkʼaˆ teˇ moˍ ehˉ htaꞈ leuˆ yuˬ leh, yawˇ ve chaw htaꞈ sheh kʼai tcuh ve yoˬ. (Maˍlaˍhkiˆ 2:7; Heˍbrehˇ 1:1) Yeˍsuˆ suh peuˬ hkʼawꞈ nawˉ, Yeˍruˆsaˍlehnˍ venˇ hkʼaw ve tcuh yaˇ hui leh, nyi haꞈ shaˉ paˍ hui Gʼuiˬ sha ve chaw htaꞈ sheh kʼai ve yoˬ. (Tcuh yaˇ 15:2) Chi beuꞈ teˇ co˗e htawˇ Yaˬhoˉvaˬ ve Shaˉhkiˆhkanˍ ve chaw hkʼaw ve Uˉ peunˍ ve Kawˍmiˍtiˍ, Gʼuiˬ sha ve chaw htaꞈ co ha hpawˇ ve caˇ tuˬ gu teh piˇ leh, hto toˇ ve kanˉ htaꞈ sheh kʼai chehˇ ve yoˬ. Nyi haꞈ shaˉ paˍ awˬ moˍ ehˉ chi lehˬ, ‘Yeˍsuˆ leuˆ yuˬ taˍ ve ka tiꞈ yeˬ leh cuˇ yiˍ cawˬ ve awˬ ceˬ hpehꞈ ve yoˬ.’ (Maꞈhtehˍ 24:45a) Uˉ peunˍ ve Kawˍmiˍtiˍ hkʼaw ve chaw teˇ gʼaˇ le le lehˬ, daꞈ kehˬ ve awˬ ha hpu leuˆ yuˬ taˍ ve chaw hpehꞈ ve yoˬ. Yawˇ hui miˬ guiˬ hkʼoˆ lo chehˇ tuˬ awˬ yanˇ peuˬ˗e htaˇ, Yeˍsuˆ geh Gʼuiˬ sha ve mvuhˇ miˬ hkʼaw teˇ geh uˉ peunˍ tuˬ yoˬ.

2. Ka tiꞈ yeˬ leh cuˇ yiˍ cawˬ ve awˬ ceˬ co ha hpawˇ ve caˇ tuˬ aˬ htoꞈ ma gu teh taˍ laˇ ve le?

Yeˍsuˆ kʼoˆ ve, ka tiꞈ yeˬ leh cuˇ yiˍ cawˬ ve awˬ ceˬ lehˬ ‘awˬ viˉ awˬ nyi htaꞈ awˬ yanˇ cawˇ lehˍ caˇ tuˬ dawˬ tuˬ pehˬ piˇ tuˬ yoˬ.’ (Maꞈhtehˍ 24:45b) Caˇ tuˬ lehˬ ngaˬ hui awˬ gʼaˇ cawˬ leh chehˇ sha tuˬ te laˇ ve hkʼa shuˍ, Gʼuiˬ sha geh laˬ ve co ha hpawˇ ve caˇ tuˬ lehˬ ngaˬ hui Yaˬhoˉvaˬ htaꞈ ka tiꞈ yeˬ gʼa tuˬ te laˇ leh, Yeˍsuˆ peꞈ laˇ ve kanˉ htaꞈ te gʼa tuˬ awˬ gʼaˇ peꞈ laˇ ve yoˬ. (1 Tiˆmoˉseˍ 4:6) Hkriꞈ yaˇ awˬ moˍ hkʼaw hpawnˬ daꞈ ve, hpawnˬ daꞈ lonˉ 1 nyi, hpawnˬ daꞈ lonˉ 3 nyi, liꞈ kʼoˆ teˇ hpaˍ, leh VDO teˇ hpaˍ hkʼaw Gʼuiˬ sha geh laˬ ve co ha hpawˇ ve caˇ tuˬ htaꞈ gʼa ve yoˬ. Chi teˇ hpaˍ lehˬ ngaˬ hui Yaˬhoˉvaˬ ve a loˍ htaꞈ na gʼa tuˬ leh, yawˇ geh meuˆ daꞈ maˇ la tuˬ ga laˇ ve yoˬ.

 Henˇ shiˍ maˇ la tuˬ

3. Yaˬhoˉvaˬ ve chaw lehˬ hteˇ hteˇ shawˇ shawˇ gʼa hpehꞈ ve

Yaˬhoˉvaˬ ve Shaˉhkiˆhkanˍ ve chaw ve kanˉ hteˇ hteˇ shawˇ shawˇ hpehꞈ tuˬ, Yeˍsuˆ lehˬ Uˉ peunˍ ve Kawˍmiˍtiˍ htaꞈ beˆ maˍ piˇ chehˇ ve yoˬ. Yeˍsuˆ awˉ lawˉ peuˇ ve Hkriꞈ yaˇ htaꞈ kaꞈ chi hkʼe beˆ maˍ piˇ ve yoˬ. VDO hpaw sheˍ.

1 Kawˇrenˍhtuˆ liꞈ 14:33, 40 gʼaw leh na hkawˇ chi htaꞈ tawˇ yaw daꞈ sheˍ:

• Yaˬhoˉvaˬ lehˬ yawˇ ve Shaˉhkiˆhkanˍ ve chaw htaꞈ hteˇ hteˇ shawˇ shawˇ hpehꞈ tcuh gaˇ ve tehꞈ, Liꞈ hpu chi teˇ tawn hkʼaˬ hkʼe hpeuꞈ maw laˇ ve le?

4. Ka tiꞈ yeˬ leh cuˇ yiˍ cawˬ ve awˬ ceˬ lehˬ hto toˇ ve kanˉ htaꞈ hteˇ hteˇ shawˇ shawˇ hpehꞈ tuˬ gu teh ve

Awˉ lawˉ peuˇ ve Hkriꞈ yaˇ te ve a yeˇ uiˍ jaˇ ve kanˉ lehˬ hto toˇ ve kanˉ yoˬ. Tcuh yaˇ liꞈ 8:14, 25 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:

• Awˉ lawˉ peuˇ ve Hkriꞈ yaˇ teˇ co˗e htaˇ, hto toˇ ve kanˉ htaꞈ a shu sheh kʼai ve le?

• Tcuh yaˇ Peˍtruˆ leh Yoˇhanˬ htaꞈ awˬ nu ve tcuh yaˇ hui beˆ maˍ piˇ htaˇ, yawˇ huiˉ maˬ hkʼaˬ hkʼe te ve le?

Uˉ peunˍ ve Kawˍmiˍtiˍ sheh kʼai chehˇ ve a yeˇ uiˍ jaˇ ve kanˉ lehˬ, hto toˇ ve kanˉ hteˇ hteˇ shawˇ shawˇ hpehꞈ tuˬ te ve yoˬ. VDO hpaw sheˍ.

 Yeˍsuˆ kʼoˆ ve, hto toˇ ve kanˉ lehˬ a yeˇ uiˍ jaˇ ve kanˉ hpehꞈ ve yoˬ. Maˍkuˆ liꞈ 13:10 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:

• Aˬ htoꞈ ma te Uˉ peunˍ ve Kawˍmiˍtiˍ awˬ pon hto toˇ ve kanˉ lehˬ a yeˇ uiˍ jaˇ ve le?

• Miˬ guiˬ hkʼoˆ lo hto toˇ ve kanˉ hteˇ hteˇ shawˇ shawˇ hpehꞈ tuˬ, aˬ htoꞈ ma te “ka tiꞈ yeˬ leh cuˇ yiˍ cawˬ ve awˬ ceˬ” htaꞈ sheh kʼai tcuh ve le?

5. Ka tiꞈ yeˬ leh cuˇ yiˍ cawˬ ve awˬ ceˬ beˆ maˍ piˇ chehˇ ve

Uˉ peunˍ ve Kawˍmiˍtiˍ miˬ guiˬ hkʼoˆ lo ve Hkriꞈ yaˇ teˇ kaˬ le le htaꞈ beˆ maˍ piˇ chehˇ ve yoˬ. Yaꞈ hkʼaˇ, yawˇ hui beˆ maˍ piˇ tuˬ hkʼaˬ hkʼe te dawˇ cheˆ ve le? Awˉ lawˉ peuˇ ve Hkriꞈ yaˇ teˇ co˗e htaˇ, uˉ peunˍ ve kawˍmiˍtiˍ hkʼaˬ hkʼe te ve htaꞈ teˇ geh nyi sheˍ. Tcuh yaˇ liꞈ 15:1, 2 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:

• Awˉ lawˉ peuˇ teˇ co˗e ve Hkriꞈ yaˇ hui lehˬ, aˬ htoꞈ ma awˬ lawn gʼawˬ daꞈ ve le?

• Pawˇluꞈ, Baˍnaˍbaˆ, leh awˬ nu ve awˬ viˉ awˬ nyi, a shu geh beˆ maˍ laˇ hkawˇ ca lawˬ˗e ve le?

Tcuh yaˇ liꞈ 15:12-18, 23-29 gʼaw leh na hkawˇ chi htaꞈ tawˇ yaw daꞈ sheˍ:

• Uˉ peunˍ ve kawˍmiˍtiˍ maˇ gʼa dawˇ cheˆ sheˍ htaˇ, Gʼuiˬ sha geh beˆ maˍ laˇ hkawˇ gʼa tuˬ, yawˇ hui hkʼaˬ hkʼe te ve le?—Kaˇ nanˉ ehˉ 12, 15, leh 28 hkʼaw nyi sheˍ.

Tcuh yaˇ liꞈ 15:30, 31 leh 16:4, 5 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:

• Uˉ peunˍ ve kawˍmiˍtiˍ lehˬ awˉ lawˉ peuˇ ve Hkriꞈ yaˇ htaꞈ beˆ maˍ piˇ htaˇ, Hkriꞈ yaˇ hui hkʼaˬ hkʼe dawˇ leh, hkʼaˬ hkʼe te ve le?

• Yawˇ hui na yuˬ leh gʼaꞈ te ve htaꞈ, Yaˬhoˉvaˬ awˬ bon hkʼaˬ hkʼe naꞈ piˇ ve le?

2 Tiˆmoˉseˍ liꞈ 3:16, 17 leh Yaˍkoˆ liꞈ 1:5 gʼaw leh na hkawˇ chi htaꞈ tawˇ yaw daꞈ sheˍ:

• Chi beuꞈ teˇ co˗e Uˉ peunˍ ve Kawˍmiˍtiˍ awˬ lawn teˇ hpaˍ dawˇ cheˆ˗a te htaˇ, yawˇ hui beˆ maˍ laˇ hkawˇ hkʼaˬ kaˬ lo ca gʼa ve le?

 A yeˇ uiˍ ve awˬ lawn

Uˉ peunˍ ve Kawˍmiˍtiˍ lehˬ Yeˍsuˆ leuˆ yuˬ taˍ ve “ka tiꞈ yeˬ leh cuˇ yiˍ cawˬ ve awˬ ceˬ” hpehꞈ ve yoˬ. Yawˇ hui lehˬ teˇ kaˬ le le lo chehˇ ve Hkriꞈ yaˇ htaꞈ beˆ maˍ piˇ leh, co ha hpawˇ ve caˇ tuˬ gu teh piˇ ve yoˬ.

Kʼawꞈ gʼaꞈ na ve

• “Ka tiꞈ yeˬ leh cuˇ yiˍ cawˬ ve awˬ ceˬ” htaꞈ a shu leuˆ yuˬ taˍ ve le?

• Uˉ peunˍ ve Kawˍmiˍtiˍ ngaˬ hui htaꞈ hkʼaˬ hkʼe te nyi haꞈ shaˉ laˇ ve le?

• Uˉ peunˍ ve Kawˍmiˍtiˍ lehˬ “ka tiꞈ yeˬ leh cuˇ yiˍ cawˬ ve awˬ ceˬ” hpehꞈ ve tehꞈ, nawˬ yonˍ˗aw laˇ?