Awˬ lawn 55
Nawˬ ve Hkriꞈ yaˇ awˬ moˍ htaꞈ ga piˇ sheˍ
Miˬ guiˬ chi hkʼoˆ lo Yaˬhoˉvaˬ ve Shaˉhkiˆhkanˍ ve chaw laiˉ lanˬ gʼaˇ, yawˇ hui ve Hkriꞈ yaˇ awˬ moˍ hkʼaw Yaˬhoˉvaˬ htaꞈ oˉ kʼoˍ gʼa pui ve ha lehˬ jaˇ. Hkriꞈ yaˇ awˬ moˍ hkʼaw maˍ laˇ ve, leh beˆ maˍ laˇ ve htaꞈ gʼa ve yawˇ hui awˬ bon uiˍ jaˇ ve yoˬ. Leh yawˇ hui Hkriꞈ yaˇ awˬ moˍ hkʼaw ve kanˉ laiˉ ceuˬ, ha lehˬ ha kʼa te leh ga piˇ ve yoˬ. Nawˬ kaꞈ nawˬ ve Hkriꞈ yaˇ awˬ moˍ htaꞈ chi hkʼe dawˇ˗aw laˇ?
1. Nawˬ ve awˬ yanˇ leh awˬ gʼaˇ yehˇ leh Hkriꞈ yaˇ awˬ moˍ htaꞈ hkʼaˬ hkʼe ga piˇ gʼa ve le?
Ngaˬ hui teˇ gʼaˇ le le Hkriꞈ yaˇ awˬ moˍ htaꞈ ga piˇ gʼa ve yoˬ. Tawˇ pa haˉ te kʼo, nawˬ ve Hkriꞈ yaˇ awˬ moˍ hkʼaw chaw mawˇ leh, maˇ chehˇ sha puiˉ ve chaw cawˬ˗aw laˇ? Yawˇ hui hpawnˬ daꞈ kuiˬ lo laˬ tuˬ nawˬ ca gʼawˬ˗e piˇ gʼa˗aw laˇ? Chi hkʼoˆ kaꞈ, yawˇ hui awˬ pon mawˇ vuiˬ piˇ ve, maˇ heˆ leh yawˇ hui ve aˉ hkʼaw lo daꞈ kehˬ tuˬ te piˇ gʼa˗aw laˇ? (Yaˍkoˆ 1:27 gʼaw sheˍ.) Ngaˬ hui lehˬ hpawnˬ daꞈ kuiˬ yehˬ htaꞈ kaꞈ nyi haꞈ shaˉ gʼa leh daꞈ kehˬ tuˬ te htaˇ ga piˇ gʼa ve yoˬ. Chi hkʼe te tuˬ ngaˬ hui htaꞈ chaw teˇ gʼaˇ kaꞈ maˇ nyiˉ laˇ. Ngaˬ hui Yaˬhoˉvaˬ leh awˬ viˉ awˬ nyi htaꞈ haꞈ ve pa taw, ngaˬ hui chi hkʼe kʼoˆ gʼa ve, “ngaˬ kʼai tuˬ yoˬ. Ngaˬ htaꞈ kʼai peu laˇ˗oˆ.”—Iˉsaˍyaˆ 6:8.
Baˆtiˆsaˬ haꞈ yuˬ˗oˬ ve chaw lehˬ Hkriꞈ yaˇ awˬ moˍ htaꞈ laiˉ hkʼaˇ hpawˇ ga piˇ gʼa ve yoˬ. Awˬ viˉ awˬ nyi hawˉ hkʼaˆ lehˬ Liꞈ hpu hkʼaw kʼoˆ taˍ ve hkʼe te biˇ gʼa ve kʼo, ga piˇ shehˍ hpaˇ, maˇ heˆ leh nyi haꞈ shaˉ paˍ hpehꞈ gʼa ve yoˬ. Awˬ viˉ awˬ nyi hawˉ hkʼaˆ leh yaˇ miˇ hto toˇ ve kanˉ maˇ maˇ te gaˇ ve kʼo, gʼuˇ suhˍ peuˍ ve chaw te gʼa ve yoˬ. Leh awˬ viˉ awˬ nyi teˇ hpaˍ hpaˍ kʼo, hpawnˬ daꞈ kuiˬ yehˬ te ve kanˉ ga piˇ gʼa ve, maˇ heˆ leh Hkriꞈ yaˇ awˬ moˍ hto toˇ ve chaw loˍ jaˇ kuiˬ lo jiˆ kʼai gʼa ve yoˬ.
2. Ngaˬ hui ve hpu yehˇ leh Hkriꞈ yaˇ awˬ moˍ htaꞈ hkʼaˬ hkʼe ga piˇ gʼa ve le?
‘Ngaˬ hui Gʼuiˬ sha htaꞈ taˍ uiˍ taˍ mvuh ve awˬ hkʼaw lo, ngaˬ hui gʼa taˍ ve daꞈ jaˇ ve yawˇ htaꞈ tanˇ piˇ gʼa ve yoˬ.’ (Tawˇ naˉ ve 3:9) Ngaˬ hui ve Hkriꞈ yaˇ awˬ moˍ leh, miˬ guiˬ hkʼoˆ lo hto toˇ ve kanˉ htaꞈ ga piˇ tuˬ, ngaˬ hui hpu tanˇ piˇ gʼa ve ha lehˬ jaˇ. (2 Kawˇrenˍhtuˆ 9:7 gʼaw sheˍ.) Chi hkʼoˆ kaꞈ, ngaˬ hui tanˇ piˇ ve hpu lehˬ tuꞈ ve hkanˍ ve gʼa hpuˇ ve chaw htaꞈ ga piˇ tuˬ yehˇ ve yoˬ. Laiˉ gʼaˇ kʼo, hkʼaˬ htaˆ kaꞈ hpu tanˇ piˇ tuˬ, hpu “yuˬ tawˆ leh haꞈ shaˉ” taˍ ve yoˬ. (1 Kawˇrenˍhtuˆ 16:2 gʼaw sheˍ.) Ngaˬ hui hpawnˬ daꞈ kuiˬ yehˬ lo hpu tanˇ keu kuiˬ ta kʼoˍ hkʼaw tanˇ piˇ gʼa ve, maˇ heˆ leh awn˗laiˉ donate.pr418.com hkʼaw kaꞈ tanˇ piˇ gʼa ve yoˬ. Hkriꞈ yaˇ awˬ moˍ htaꞈ ga piˇ tuˬ hpu tanˇ piˇ htaˇ, ngaˬ hui Yaˬhoˉvaˬ htaꞈ haꞈ ve tehꞈ hpeuꞈ maw piˇ gʼa ve yoˬ.
Henˇ shiˍ maˇ la tuˬ
Nawˬ ve Hkriꞈ yaˇ awˬ moˍ htaꞈ ga piˇ tuˬ aˬ htoˬ ma te gʼa ve le, teˇ geh henˇ sheˍ.
3. Ngaˬ hui hpu tanˇ piˇ gʼa ve
Yaˬhoˉvaˬ leh Yeˍsuˆ lehˬ piˇ gaˇ ve nyi ma cawˬ ve chaw htaꞈ haꞈ ve yoˬ. Tawˇ pa haˉ te kʼo, mehˇ chawˇ ma teˇ gʼaˇ hpu maˇ cawˬ maˇ ve htawˇ, Yaˬhoˉvaˬ htaꞈ tanˇ piˇ ve Yeˍsuˆ chiˇ mvuh piˇ ve yoˬ. Luˉkaꞈ liꞈ 21:1-4 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Yaˬhoˉvaˬ nyi hkʼaˇ suh tuˬ ngaˬ hui hpu chi ma ma tanˇ piˇ tuˬ loˍ˗aw laˇ?
-
Ngaˬ hui ha lehˬ ve hkʼaw hpu tanˇ piˇ htaˇ, Yaˬhoˉvaˬ leh Yeˍsuˆ hkʼaˬ hkʼe dawˇ ve le?
Ngaˬ hui tanˇ piˇ taˍ ve hpu hkʼaˬ hkʼe hpawˇ yehˇ ve shiˍ tuˬ, VDO hpaw sheˍ. Peuˬ leh na hkawˇ chi htaꞈ tawˇ yaw daꞈ sheˍ:
-
Miˬ guiˬ hkʼoˆ lo ve Hkriꞈ yaˇ awˬ moˍ awˬ bon gʼa tuˬ, ngaˬ hui tanˇ piˇ taˍ ve hpu hkʼaˬ hkʼe te yehˇ ve le?
4. Hpawnˬ daꞈ kuiˬ yehˬ nyi haꞈ shaˉ tuˬ ngaˬ hui ga piˇ gʼa ve
Liꞈ hpu awˬ co˗e htaˇ, Yaˬhoˉvaˬ htaꞈ oˉ kʼoˍ pui ve chaw lehˬ bon yehˬ htaꞈ nyi haꞈ shaˉ tuˬ nyi ma pfuhˇ jaˇ ve yoˬ. Chi lehˬ hpu tanˇ piˇ ve htaꞈ ceh tiˉ kʼoˆ gaˇ ve maˇ heˆ. 2 Raˍsaˍvanˍ liꞈ 34:9-11 gʼaw leh na hkawˇ chi htaꞈ tawˇ yaw daꞈ sheˍ:
-
Yaˬhoˉvaˬ ve bon yehˬ htaꞈ nyi haꞈ shaˉ tuˬ Iˉsaˍreˍlaˆ chaw teˇ gʼaˇ le le hkʼaˬ hkʼe ga piˇ ve le?
Yaˬhoˉvaˬ ve Shaˉhkiˆhkanˍ ve chaw Liꞈ hpu hkʼaw kʼoˆ taˍ ve htaꞈ hkʼaˬ hkʼe gʼaꞈ te ve shiˍ tuˬ, VDO hpaw sheˍ. Peuˬ leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Aˬ htoꞈ ma pa taw hpawnˬ daꞈ kuiˬ yehˬ htaꞈ hkʼaˬ htaˆ kaꞈ daꞈ kehˬ tuˬ te leh gu ve lehˬ a yeˇ uiˍ jaˇ ve le?
-
Nawˬ hkʼaˬ hkʼe ga piˇ gʼa ve le?
5. Awˬ viˉ awˬ nyi hawˉ hkʼaˆ lehˬ Hkriꞈ yaˇ awˬ moˍ hkʼaw ve kanˉ hkʼa dehꞈ ga piˇ gʼa ve
Hkriꞈ yaˇ awˬ moˍ hkʼaw ve kanˉ te gʼa ve hkʼaw hkʼa dehꞈ ga piˇ tuˬ, Liꞈ hpu hkʼaw awˬ viˉ awˬ nyi hawˉ hkʼaˆ htaꞈ awˬ gʼaˇ piˇ ve yoˬ. Teˇ gʼaˇ ve awˬ lawn htaꞈ nyi tuˬ, VDO hpaw sheˍ. Peuˬ leh na hkawˇ chi htaꞈ tawˇ yaw daꞈ sheˍ:
-
VDO chi hkʼaw, hawˉ hkʼaˆ teˇ gʼaˇ Hkriꞈ yaˇ awˬ moˍ hkʼaw ve kanˉ hkʼa dehꞈ ga piˇ gʼa tuˬ aˬ htoꞈ ma te ve le?
Awˬ viˉ awˬ nyi hawˉ hkʼaˆ ga piˇ shehˍ hpaˇ, maˇ heˆ leh nyi haꞈ shaˉ paˍ gʼa te tuˬ daꞈ ve te hkʼaˇ dawˇ hkʼaˇ aˬ htoꞈ ma gʼa cawˬ ve htaꞈ Liꞈ hpu hkʼaw kʼoˆ maˍ laˇ ve yoˬ. 1 Tiˆmoˉseˍ liꞈ 3:1-13 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Awˬ viˉ awˬ nyi hawˉ hkʼaˆ lehˬ ga piˇ shehˍ hpaˇ leh nyi haꞈ shaˉ paˍ te gaˇ ve kʼo, daꞈ ve te hkʼaˇ dawˇ hkʼaˇ aˬ htoꞈ ma gʼa cawˬ ve le?
-
Yawˇ hui ve yehˬ kʼa hkʼaw ve chaw hkʼaˬ hkʼe ve chaw gʼa hpehꞈ ve le?—Kaˇ nanˉ ehˉ 4 leh 11 hkʼaw nyi sheˍ.
-
Awˬ viˉ awˬ nyi hawˉ hkʼaˆ coˇ caˇ leh daꞈ ve te hkʼaˇ dawˇ hkʼaˇ chi teˇ hpaˍ cawˬ ve kʼo, Hkriꞈ yaˇ awˬ moˍ hkʼaw ve chaw teˇ gʼaˇ le le aˬ htoꞈ ma awˬ bon gʼa tuˬ le?
Chaw teˇ hpaˍ na nyi laˇ ve: “Yaˬhoˉvaˬ ve Shaˉhkiˆhkanˍ ve chaw yawˇ hui ve kanˉ hkʼa dehꞈ te gʼa tuˬ, hpu hkʼaˬ kaˬ lo gʼa ve le?”
-
Nawˬ hkʼaˬ hkʼe hkʼawꞈ piˇ tuˬ le?
A yeˇ uiˍ ve awˬ lawn
Ngaˬ hui ve awˬ yanˇ, awˬ gʼaˇ, leh hpu yehˇ leh Hkriꞈ yaˇ awˬ moˍ htaꞈ ga piˇ htaˇ, Yaˬhoˉvaˬ awˬ pon awˬ hpfuhˇ hkʼaˆ jaˇ ve yoˬ.
Kʼawꞈ gʼaꞈ na ve
-
Hkriꞈ yaˇ awˬ moˍ htaꞈ ga piˇ tuˬ, ngaˬ hui ve awˬ yanˇ leh awˬ gʼaˇ hkʼaˬ hkʼe te yehˇ gʼa ve le?
-
Hkriꞈ yaˇ awˬ moˍ htaꞈ ga piˇ tuˬ, ngaˬ hui ve hpu hkʼaˬ hkʼe te yehˇ gʼa ve le?
-
Hkriꞈ yaˇ awˬ moˍ htaꞈ ga piˇ tuˬ, nawˬ aˬ htoꞈ ma te gaˇ ve le?
Kʼawꞈ caˉ nyi gʼa ve
Aˬ htoꞈ ma pa taw Gʼuiˬ sha yawˇ ve chaw htaꞈ 10 pun 1 pun maˇ tanˇ laˇ tcuh gaˇ˗o ve le, gʼaw nyi sheˍ.
“Liꞈ hpu hkʼaw 10 pun 1 pun htaꞈ hkʼaˬ hkʼe kʼoˆ taˍ ve le?” (Vehˆsaiˉ hkʼaw ve awˬ lawn)
Liꞈ hpu hk’aw Baˆtiˆsaˬ haꞈ yuˬ-oˬ ve hawˉ hk’aˆ awˬ vuiˬ teˇ ceuˬ ceuˬ g’a te ve htaꞈ k’oˆ taˍ ve yoˬ. Yaꞈ hk’aˇ, Baˆtiˆsaˬ haꞈ yuˬ-oˬ ve yaˇ miˇ awˬ vuiˬ chi teˇ hpaˍ htaꞈ g’a te ve k’o-ehꞈ?
Yaˬhoˉvaˬ ve Shaˉhkiˆhkanˍ ve chaw awˬ yanˇ yuˬ tanˇ leh liꞈ kʼoˆ ca yuˬ piˇ ve haꞈ hanˉ ve htaꞈ nyi sheˍ.
Ngaˬ hui ve kanˉ hkʼaˇ hkʼaw gʼa taˍ ve hpu tanˇ lehˬ, awˬ nu ve bon liˇ htaꞈ hkʼaˬ hkʼe te peun daꞈ ve le, gʼaw nyi sheˍ.
You May Also Like
NGAˬ HUI HTAꞈ CAˉ DAꞈ VE AWˬ LAWN
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ ve hk’aˬ hk’e te henˇ ve le?
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ tuˬ nawˬ Liꞈ hpu hk’aˬ ve teˇ maˬ yehˇ ve kaꞈ hpehꞈ ve yoˬ. Awˬ chawˇ maˇ heˆ leh yehˬ k’a hk’aw ve chaw htaꞈ Liꞈ hpu teˇ geh henˇ tuˬ jehˬ piˇ kaꞈ g’a ve yoˬ.
