Awˬ lawn 56
Hkriꞈ yaˇ awˬ moˍ caˉ leh teˇ moˍ tiˉ hpehꞈ tuˬ ngaˬ hui hkʼaˬ hkʼe ga piˇ gʼa ve le?
Ngaˬ hui kaꞈ jawˇ mawˇ Daˍviˆ hkʼa shuˍ dawˇ ve yoˬ. Yawˇ kʼoˆ ve, “awˬ viˉ awˬ nyi hkʼa shuˍ teˇ geh hpoˆ chehˇ taˍ ve Gʼuiˬ sha ve chaw teˇ hpaˍ lehˬ, hkʼaˬ ma daꞈ jaˇ leh hkʼaˬ ma nyi sha jaˇ ve le?” (Chiˇ mvuh ve 133:1) Ngaˬ hui teˇ moˍ tiˉ hpehꞈ ve lehˬ yawˇ hkʼaˇ yawˇ hpehꞈ gʼa ve maˇ heˆ. Yaꞈ hkʼaˇ, ngaˬ hui teˇ gʼaˇ le le ga daꞈ ve pa taw, hpehꞈ gʼa ve yoˬ.
1. Gʼuiˬ sha ve chaw lehˬ hkʼaˬ hkʼe daꞈ jaˇ ve le?
Awˬ baˬ mvuhˇ miˬ lo Hkriꞈ yaˇ awˬ moˍ teˇ kaˬ hkʼaw nawˬ ca hpawnˬ daꞈ˗e ve kʼo, nawˬ yawˇ hui ve tawˇ hkawˇ maˇ na gʼa ve htawˇ, yawˇ hui ha lehˬ ha kʼa haꞈ yuˬ laˇ ve htaꞈ nawˬ nyi ma sha jaˇ tehꞈ dawˇ tuˬ yoˬ hehˉ. Aˬ htoꞈ ma pa taw le? Awˬ lawn kʼo, ngaˬ hui hkʼaˬ kaˬ lo chehˇ ve maˇ kʼoˆ, Liꞈ hpu henˇ leh liꞈ kʼoˆ hkʼaw ve awˬ lawn awˬ tanˇ kaꞈ hkʼa shuˍ henˇ ve yoˬ. Ngaˬ hui coˇ caˇ leh teˇ gʼaˇ leh teˇ gʼaˇ haꞈ daꞈ ve tehꞈ hpeuꞈ maw daꞈ ve yoˬ. Ngaˬ hui ‘Yaˬhoˉvaˬ htaꞈ ceh tiˉ oˉ kʼoˍ pui leh, ngaˬ hui hkʼa peu˗eˬ yawˇ ve tawˇ htaꞈ na yuˬ tuˬ yoˬ.’—Zeˍhpaˍniˆ 3:9.
2. Teˇ moˍ tiˉ hpehꞈ tuˬ ngaˬ hui hkʼaˬ hkʼe ga gʼa ve le?
“Nyi ma awˬ tawˬ hkʼa gaˬ teˇ gʼaˇ leh teˇ gʼaˇ haꞈ daꞈ˗oꞈ.” (1 Peˍtruˆ 1:22) Beˆ maˍ laˇ ve chi htaꞈ ngaˬ hui hkʼaˬ hkʼe gʼaꞈ te gʼa tuˬ le? Shu ve yaꞈ kuiˬ htaꞈ nyi ve aꞈ kehˉ yawˇ hui ve daꞈ ve te hkʼaˇ dawˇ hkʼaˇ htaꞈ nyi cawˇ ve yoˬ. Hkʼa shuˍ dawˇ cawˇ ve chaw htaꞈ ceh tiˉ awˬ chawˇ te ve aꞈ kehˉ, ngaˬ hui htaꞈ maˇ shuˍ daꞈ ve awˬ viˉ awˬ nyi geh awˬ chawˇ te tuˬ coˇ caˇ cawˇ ve yoˬ. Chi hkʼoˆ kaꞈ, ngaˬ hui chaw mehˆ hpfuhˇ htaꞈ nyi ve maˇ heˆ leh shu htaꞈ nyi bawˬ ve dawˇ hkʼaˇ cawˬ la htaˇ, chi hkʼe ve dawˇ hkʼaˇ htaꞈ yuˬ baˬ tuˬ coˇ caˇ sheˍ.—1 Peˍtruˆ 2:17 gʼaw sheˍ. a
3. Ngaˬ hui awˬ viˉ awˬ nyi geh maˇ cawˇ maˇ hawˍ daꞈ htaˇ, hkʼaˬ hkʼe te cawˇ ve le?
Ngaˬ hui teˇ moˍ tiˉ hpehꞈ ve htawˇ, maˇ biˇ ve chaw hpehꞈ ve yoˬ. Teˇ pawˆ pawˆ kʼo, shu dawˇ taˍ ve hkʼe te piˇ maˇ gʼa leh nyi ma naˬ tuˬ kaꞈ te piˇ ve yoˬ. Chi htaꞈ pa taw, Liꞈ hpu hkʼaw ngaˬ hui htaꞈ kʼoˆ laˇ ve, “teˇ gʼaˇ leh teˇ gʼaˇ . . . venˇ baˆ hpehˇ daꞈ˗oꞈ. Jawˇmawˇ Gʼuiˬ sha nawˬ hui ve venˇ baˆ htaꞈ hpehˇ hkʼa peuˬ ve hkʼe, nawˬ hui htawˇ venˇ baˆ hpehˇ daꞈ˗oꞈ.” (Kawˇlawˇsehˇ 3:13 gʼaw sheˍ.) Ngaˬ hui Yaˬhoˉvaˬ htaꞈ nyi ma luˬ tuˬ laiˉ pawˆ te piˇ ve htawˇ, yawˇ ngaˬ hui htaꞈ venˇ baˆ hpehˇ laˇ sheˍ ve yoˬ. Chi htaꞈ pa taw, Gʼuiˬ sha lehˬ ngaˬ hui awˬ viˉ awˬ nyi htaꞈ kaꞈ venˇ baˆ hpehˇ piˇ tcuh gaˇ ve yoˬ. Leh ngaˬ hui shu nyi ma naˬ tuˬ te piˇ ve htaꞈ shiˍ ve kʼo, ngaˬ hui awˉ lawˉ ca lawˬ hkawˉ piˇ leh cawˇ daꞈ hawˍ daꞈ tuˬ te cawˇ ve yoˬ.—Maꞈhtehˍ 5:23, 24 gʼaw sheˍ. b
Henˇ shiˍ maˇ la tuˬ
Hkriꞈ yaˇ awˬ moˍ hkʼaw teˇ moˍ tiˉ hpehꞈ leh dawˇ sha gawˬ lehˍ ve cawˬ tuˬ, nawˬ hkʼaˬ hkʼe ga piˇ gʼa ve le, teˇ geh henˇ sheˍ.
Nawˬ shu geh cawˇ daꞈ hawˍ daꞈ tuˬ hkʼaˬ hkʼe te gʼa ve le?
4. Maˇ nyi bawˬ daꞈ ve
Ngaˬ hui awˬ viˉ awˬ nyi teˇ gʼaˇ le le htaꞈ haꞈ gaˇ ve yoˬ. Yaꞈ hkʼaˇ, chaw teˇ gʼaˇ gʼaˇ ngaˬ hui htaꞈ maˇ shuˍ daꞈ ve kʼo, haꞈ yuˬ gʼa tuˬ haˍ jaˇ. Hkʼe kʼo, ngaˬ hui htaꞈ ga laˇ gʼa ve aˬ htoꞈ ma cawˬ ve le? Tcuh yaˇ liꞈ 10:34, 35 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Yaˬhoˉvaˬ lehˬ yawˇ ve Shaˉhkiˆhkanˍ ve chaw teˇ chaw ceuˬ le le htaꞈ haꞈ yuˬ ve yoˬ. Nawˬ chi hkʼe shiˍ htaˇ, yawˇ htaꞈ hkʼaˬ hkʼe te henˇ yuˬ gʼa tuˬ le?
-
Nawˬ chehˇ kuiˬ awˬ paˇ lo maˇ˗awˍ ve chaw aˬ htoꞈ ma htaꞈ nyi bawˬ ve le? Leh nawˬ jaw kʼai gaˇ˗aw laˇ?
2 Kawˇrenˍhtuˆ liꞈ 6:11-13 gʼaw leh na hkawˇ chi htaꞈ tawˇ yaw daꞈ sheˍ:
-
Awˬ viˉ awˬ nyi nawˬ htaꞈ maˇ shuˍ daꞈ ve htawˇ, yawˇ hui htaꞈ meuˆ daꞈ maˇ la tuˬ nawˬ hkʼaˬ hkʼe te gʼa ve le?
5. Venˇ baˆ hpehˇ piˇ leh cawˇ daꞈ hawˍ daꞈ tuˬ te sheˍ
Ngaˬ hui Yaˬhoˉvaˬ htaꞈ venˇ baˆ hpehˇ piˇ tuˬ yawˇ maˇ loˍ ve htawˇ, yawˇ ngaˬ hui htaꞈ hkʼaˬ htaˆ kaꞈ venˇ baˆ hpehˇ laˇ ve yoˬ. Chiˇ mvuh ve liꞈ 86:5 gʼaw leh na hkawˇ chi teˇ hpaˍ htaꞈ tawˇ yaw daꞈ sheˍ:
-
Yaˬhoˉvaˬ venˇ baˆ hpehˇ piˇ ve htaꞈ caˉ daꞈ ve Liꞈ hpu chi teˇ tawn hkʼaw, ngaˬ hui aˬ htoꞈ ma henˇ gʼa ve le?
-
Yaˬhoˉvaˬ venˇ baˆ hpehˇ laˇ ve htaꞈ aˬ htoꞈ ma te nawˬ awˬ bon uiˍ jaˇ ve le?
-
Ngaˬ hui shu geh maˇ cawˇ maˇ hawˍ daꞈ tuˬ te laˇ ve aˬ htoꞈ ma cawˬ ve le?
Ngaˬ hui Yaˬhoˉvaˬ htaꞈ henˇ yuˬ leh awˬ viˉ awˬ nyi geh teˇ moˍ tiˉ hpehꞈ tuˬ hkʼaˬ hkʼe te gʼa ve le? Tawˇ naˉ ve liꞈ 19:11 gʼaw leh na hkawˇ chi htaꞈ tawˇ yaw daꞈ sheˍ:
-
Chaw teˇ gʼaˇ gʼaˇ nawˬ htaꞈ nyi ma maˇ sha tuˬ te laˇ ve kʼo, cawˇ daꞈ hawˍ daꞈ tuˬ nawˬ aˬ htoꞈ ma te gʼa ve le?
Teˇ pawˆ pawˆ ngaˬ hui shu htaꞈ nyi ma maˇ sha tuˬ te piˇ ve yoˬ. Chi hkʼe hpehꞈ htaˇ, ngaˬ hui hkʼaˬ hkʼe te cawˇ ve le? VDO hpaw leh na hkawˇ chi htaꞈ tawˇ yaw daꞈ sheˍ:
-
VDO chi hkʼaw, awˬ viˉ awˬ nyi yaˇ miˇ teˇ gʼaˇ cawˇ daꞈ hawˍ daꞈ tuˬ aˬ htoꞈ ma te ve le?
6. Awˬ viˉ awˬ nyi htaꞈ daꞈ ve hpawˇ nyi ve
Ngaˬ hui awˬ viˉ awˬ nyi geh meuˆ daꞈ maˇ la htaˇ yawˇ hui ve daꞈ ve leh maˇ daꞈ ve awˬ lawn kaꞈ shiˍ la ve yoˬ. Awˬ viˉ awˬ nyi htaꞈ daꞈ ve hpawˇ ceh tiˉ nyi tuˬ ngaˬ hui hkʼaˬ hkʼe te gʼa ve le? VDO hpaw leh na hkawˇ chi htaꞈ tawˇ yaw daꞈ sheˍ:
-
Nawˬ awˬ viˉ awˬ nyi ve daꞈ ve te hkʼaˇ dawˇ hkʼaˇ htaꞈ nyi gʼa tuˬ, nawˬ htaꞈ aˬ htoꞈ ma ga laˇ gʼa ve le?
Yaˬhoˉvaˬ lehˬ ngaˬ hui ve daꞈ ve te hkʼaˇ dawˇ hkʼaˇ htaꞈ nyi laˇ ve yoˬ. 2 Raˍsaˍvanˍ liꞈ 16:9a gʼaw leh na hkawˇ chi htaꞈ tawˇ yaw daꞈ sheˍ:
-
Yaˬhoˉvaˬ lehˬ nawˬ ve daꞈ ve te hkʼaˇ dawˇ hkʼaˇ htaꞈ nyi laˇ ve tehꞈ nawˬ shiˍ htaˇ, nawˬ hkʼaˬ hkʼe dawˇ ve le?
Shehnˉ shiˍ awˬ kuiˉ a ciˉ cawˬ ve htawˇ, awˬ hpfuhˇ hkʼaˆ jaˇ sheˍ ve yoˬ. Chi ve hkʼa shuˍ shuˍ ngaˬ hui ve awˬ viˉ awˬ nyi hkʼa peu˗eˬ maˇ biˇ ve chaw hpehꞈ ve htawˇ, Yaˬhoˉvaˬ awˬ pon kʼo awˬ hpfuhˇ hkʼaˆ jaˇ
Chaw teˇ hpaˍ kʼoˆ ve: “Ngaˬ yawˇ htaꞈ venˇ baˆ maˇ hpehˇ piˇ sheˍ htaˇ, yawˇ ngaˬ htaꞈ awˉ lawˉ gʼa lawˬ hkawˉ la ve yoˬ.”
-
Aˬ htoꞈ ma te ngaˬ hui ha lehˬ ve hkʼaw shu htaꞈ venˇ baˆ hpehˇ piˇ cawˇ ve le?
A yeˇ uiˍ ve awˬ lawn
Hkriꞈ yaˇ awˬ moˍ teˇ moˍ tiˉ hpehꞈ tuˬ nawˬ ga piˇ gʼa ve lehˬ, awˬ viˉ awˬ nyi teˇ gʼaˇ le le htaꞈ venˇ baˆ hpehˇ piˇ leh haꞈ ve tehꞈ hpeuꞈ maw piˇ gʼa ve yoˬ.
Kʼawꞈ gʼaꞈ na ve
-
Nawˬ shu htaꞈ maˇ nyi bawˬ tuˬ hkʼaˬ hkʼe te gʼa ve le?
-
Nawˬ awˬ viˉ awˬ nyi geh awˬ lawn cawˬ daꞈ ve kʼo, hkʼaˬ hkʼe te tuˬ le?
-
Shu htaꞈ venˇ baˆ hpehˇ piˇ ve awˬ lawn aˬ htoꞈ ma te nawˬ Yaˬhoˉvaˬ htaꞈ henˇ yuˬ gaˇ ve le?
Kʼawꞈ caˉ nyi gʼa ve
Yeˍsuˆ tawˇ pa haˉ tehˆ maˍ laˇ ve teˇ maˬ hkʼaw ngaˬ hui shu htaꞈ maˇ gʼa dawˇ cheˆ tuˬ, hkʼaˬ hkʼe ga laˇ gʼa ve htaꞈ nyi sheˍ.
Nawˬ ve mehˆ shiˍ hkʼaw lo cawˬ taˍ ve toˉ laꞈ lonˉ htaꞈ awˉ lawˉ yuˬ tawˆ sheˍ (6:56)
Ngaˬ hui teꞈ chiˉ maˇ gʼa te yaꞈ ve tehꞈ dawˇ ve htawˇ, lawˬ hkawˉ piˇ tuˬ loˍ˗aw laˇ?
Chaw teˇ hpaˍ hpaˍ chaw mehˆ hpfuhˇ htaꞈ maˇ nyi leh awˬ nu ve chaw htaꞈ hk’aˬ hk’e te hk’a shuˍ te piˇ g’a tuˬ le?
Nawˬ Hkriꞈ yaˇ awˬ moˍ hkʼaw ve chaw teˇ gʼaˇ htaꞈ maˇ cawˇ maˇ hawˍ daꞈ ve kʼo, teˇ gʼaˇ le le htaꞈ heuˆ la kuiˬ maˇ cawˬ sheˍ htaˇ, nawˬ hkʼaˬ hkʼe te cawˇ ve le, gʼaw nyi sheˍ.
a Awˬ viˉ awˬ nyi teˇ gʼaˇ yawˇ a naˍ pehˉ puiˉ ve cawˬ ve htaꞈ shiˍ htaˇ, yawˇ shu htaꞈ haꞈ ve tehꞈ hkʼaˬ hkʼe hpeuꞈ maw piˇ gʼa tuˬ le, Kʼoˆ maˍ ve awˬ lawn 6 htaꞈ nyi sheˍ.
b Ca caˇ gʼaꞈ caˇ hpawˇ leh awˬ liˇ tawˇ hkawˇ hpawˇ maˇ hawˍ daꞈ ve awˬ lawn htaꞈ hkʼaˬ hkʼe gu gʼa tuˬ le, Kʼoˆ maˍ ve awˬ lawn 7 htaꞈ nyi sheˍ
You May Also Like
NGAˬ HUI HTAꞈ CAˉ DAꞈ VE AWˬ LAWN
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ ve hk’aˬ hk’e te henˇ ve le?
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ tuˬ nawˬ Liꞈ hpu hk’aˬ ve teˇ maˬ yehˇ ve kaꞈ hpehꞈ ve yoˬ. Awˬ chawˇ maˇ heˆ leh yehˬ k’a hk’aw ve chaw htaꞈ Liꞈ hpu teˇ geh henˇ tuˬ jehˬ piˇ kaꞈ g’a ve yoˬ.
