Awˬ lawn 59
Nawˬ fawˉ mehˍ ve gʼa hpuˇ htaˇ ka tiꞈ yeˬ gʼa ve
Awˬ gʼuˇ suhˍ hpawˇ Hkriꞈ yaˇ teˇ gʼaˇ le le lehˬ fawˉ mehˍ ve htaꞈ gʼa hpuˇ tuˬ yoˬ. Yaꞈ hkʼaˇ, ngaˬ hui kawˆ tuˬ loˍ˗aw laˇ?
1. Aˬ htoꞈ ma te ngaˬ hui fawˉ mehˍ ve htaꞈ gʼa hkanˍ tuˬ shiˍ ve le?
Liꞈ hpu hkʼaw hkʼa tawˍ lehˆ kʼoˆ laˇ ve, “Yeˍsuˆ Hkriꞈ awˬ hkʼaw lo Gʼuiˬ sha htaꞈ yawˆ yan gaˇ ve chaw hkʼa peu˗eˬ lehˬ, fawˉ ve mehˍ ve htaꞈ gʼa hkanˍ tuˬ yoˬ.” (2 Tiˆmoˉseˍ 3:12) Saˍtanˍ uˉ peunˍ ve miˬ guiˬ htaꞈ Yeˍsuˆ maˇ caˉ daꞈ ve pa taw, fawˉ mehˍ ve gʼa hkanˍ ve yoˬ. Ngaˬ hui kaꞈ miˬ guiˬ chi htaꞈ maˇ caˉ daꞈ ve pa taw, miˬ guiˬ hkʼoˆ lo ve mvuhˇ miˬ uˉ peunˍ paˍ leh bon liˇ teˇ hpaˍ ngaˬ hui htaꞈ fawˉ mehˍ laˇ ve chi anˇ tuˬ maˇ loˍ.—Yoˇhanˬ 15:18, 19.
2. Fawˉ mehˍ ve htaꞈ tawˍ daꞈ gʼaˇ tuˬ, ngaˬ hui hkʼaˬ hkʼe te gu hehnˇ taˍ gʼa ve le?
Chi teˇ hkui ngaˬ hui Yaˬhoˉvaˬ htaꞈ hkʼa dehꞈ gʼaˇ va cawˇ ve yoˬ. Teˇ nyi le le yawˇ geh bon lawˬ tuˬ, leh Liꞈ hpu gʼaw tuˬ, awˬ yanˇ hkʼa dehꞈ shawˍ teh sheˍ. Hkʼaˬ htaˆ kaꞈ Hkriꞈ yaˇ awˬ moˍ hkʼaw hpawnˬ daꞈ˗e sheˍ. Chi hkʼe te ve lehˬ fawˉ mehˍ ve hkʼaˬ hkʼe ve teˇ ceuˬ maˇ kʼoˆ, yehˬ kʼa hkʼaw ve chaw tawˍ laˇ ve maˇ kʼoˆ, nawˬ haꞈ hanˉ ve hkʼaw tawˍ daꞈ gʼaˇ tuˬ ga laˇ gʼa ve yoˬ. Fawˉ mehˍ ve laiˉ pawˆ gʼa hpuˇ jaw ve tcuh yaˇ Pawˇluꞈ kʼoˆ ve, ‘Yaˬhoˉvaˬ lehˬ, ngaˬ htaꞈ ga laˇ shehˍ hpaˇ hpehꞈ leh, ngaˬ teꞈ chiˉ kawˆ tuˬ maˇ cawˬ.’—Heˍbrehˇ 13:6.
Chi hkʼoˆ kaꞈ, ngaˬ hui hkʼaˬ htaˆ kaꞈ hto toˇ ve kʼo, haꞈ hanˉ ve nyi ma cawˬ maˇ la tuˬ ga laˇ ve yoˬ. Hto toˇ ve lehˬ ngaˬ hui shu htaꞈ maˇ kawˆ leh Yaˬhoˉvaˬ htaꞈ gʼaˇ va tuˬ ga laˇ ve yoˬ. (Tawˇ naˉ ve 29:25) Chi teˇ hkui tanˬ leh nawˬ haꞈ hanˉ ve nyi ma cawˬ tuˬ te ve kʼo, mvuhˇ miˬ uˉ peunˍ paˍ awˬ moˍ nawˬ maˇ gʼa hto toˇ tuˬ tawˍ laˇ ve htawˇ, nawˬ caˉ leh hto toˇ tuˬ gu hennˇ˗oˬ ve yoˬ.—1 Hteˇsaˍlawˇniˆ 2:2.
3. Ngaˬ hui fawˉ mehˍ ve htaꞈ yeunˇ hkanˍ ve kʼo aˬ htoꞈ ma awˬ bon gʼa tuˬ le?
Ngaˬ hui fawˉ mehˍ ve maˇ hpuˇ gaˇ. Yaꞈ hkʼaˇ, yeunˇ hkanˍ gʼaˇ ve kʼo, ngaˬ hui ve yonˍ hkʼaˇ kaꞈ awˬ gʼaˇ hehnˇ la tuˬ yoˬ. Ngaˬ hui yeunˇ hkanˍ maˇ gʼaˇ tehꞈ dawˇ htaˇ, Yaˬhoˉvaˬ ga laˇ ve htaꞈ gʼa mawˬ ve kʼo, yawˇ htaꞈ meuˆ daꞈ maˇ la tuˬ yoˬ. (Yaˍkoˆ 1:2-4 gʼaw sheˍ.) Ngaˬ hui fawˉ mehˍ ve gʼa hpuˇ htaˇ, Yaˬhoˉvaˬ nyi ma naˬ ve yoˬ. Yaꞈ hkʼaˇ, ngaˬ hui yeunˇ hkanˍ ve htaꞈ yawˇ gʼa mawˬ htaˇ, ha lehˬ jaˇ ve yoˬ. Liꞈ hpu hkʼaw kʼoˆ ve, “daꞈ ve htaꞈ te ve pa taw, tuꞈ ve hkanˍ ve htaꞈ gʼa hkanˍ ve teˇ yanˇ yeunˇ hkanˍ ve kʼo, Gʼuiˬ sha nyi hkʼaˇ suh tuˬ yoˬ.” (1 Peˍtruˆ 2:20) Ka tiꞈ yeˬ ve chaw htaꞈ Yaˬhoˉvaˬ laꞈ shawnˍ piˇ tuˬ ve chi lehˬ, awˬ tehˬ ve oˉ kʼoˍ pui ve htaꞈ tawˍ ve tsuhˇ ve maˇ cawˬ ve miˬ guiˬ hkʼoˆ lo co co taiˍ taiˍ gʼa teꞈ chehˇ tuˬ yoˬ.—Maꞈhtehˍ 24:13.
Henˇ shiˍ maˇ la tuˬ
Shu ngaˬ hui htaꞈ fawˉ mehˍ laˇ ve htawˇ, Yaˬhoˉvaˬ htaꞈ ka tiꞈ yeˬ gʼa ve tehꞈ hkʼaˬ hkʼe te yonˍ gʼa ve le, leh yawˇ ngaˬ hui htaꞈ laꞈ shawnˍ hkʼaˬ hkʼe te peꞈ laˇ tuˬ le, teˇ geh henˇ sheˍ.
4. Yehˬ kʼa hkʼaw ve chaw tawˍ laˇ ve htaꞈ nawˬ yeunˇ hkanˍ gʼa ve
Yehˬ kʼa hkʼaw ve chaw teˇ gʼaˇ gʼaˇ ngaˬ hui Yaˬhoˉvaˬ htaꞈ oˉ kʼoˍ maˇ pui tcuh gaˇ ve tehꞈ, Yeˍsuˆ hkʼa dehꞈ shiˍ ve yoˬ. Maꞈhtehˍ liꞈ 10:34-36 gʼaw leh na hkawˇ chi htaꞈ tawˇ yaw daꞈ sheˍ:
-
Chaw teˇ gʼaˇ Yaˬhoˉvaˬ ve kanˉ te tuˬ dawˇ cheˆ ve kʼo, yehˬ kʼa hkʼaw ve chaw aˬ htoꞈ ma kʼoˆ laˇ leh te laˇ tuˬ hehˉ le?
Tawˇ pa haˉ teˇ maˬ htaꞈ nyi tuˬ, VDO hpaw sheˍ. Peuˬ leh na hkawˇ chi htaꞈ tawˇ yaw daꞈ sheˍ:
-
Nawˬ Yaˬhoˉvaˬ ve kanˉ te ve htaꞈ yehˬ kʼa hkʼaw ve chaw maˇ heˆ leh awˬ chawˇ tawˍ laˇ htaˇ, nawˬ hkʼaˬ hkʼe te tuˬ le?
Chiˇ mvuh ve liꞈ 27:10 leh Maˍkuˆ liꞈ 10:29, 30 gʼaw sheˍ. Liꞈ hpu awˬ tawn teˇ tawn peuˬ teˇ tawn gʼaw peuˬ hkʼawꞈ nawˉ, na hkawˇ chi htaꞈ tawˇ yaw daꞈ sheˍ:
-
Nawˬ Yaˬhoˉvaˬ ve kanˉ te ve htaꞈ yehˬ kʼa hkʼaw ve chaw maˇ heˆ leh awˬ chawˇ tawˍ laˇ ve kʼo, ka tiꞈ chi nawˬ htaꞈ hkʼaˬ hkʼe ga laˇ gʼa ve le?
5. Fawˉ mehˍ ve gʼa hpuˇ ve htawˇ caˉ leh Yaˬhoˉvaˬ htaꞈ oˉ kʼoˍ pui sheˍ
Ngaˬ hui Yaˬhoˉvaˬ htaꞈ oˉ kʼoˍ pui ve awˬ nu ve chaw tawˍ laˇ htaˇ, ngaˬ hui nyi ma haꞈ hanˉ ve gʼa cawˬ ve yoˬ. VDO hpaw leh na hkawˇ chi htaꞈ tawˇ yaw daꞈ sheˍ:
-
VDO chi hkʼaw ve chaw teˇ hpaˍ nawˬ haꞈ hanˉ ve nyi ma cawˬ tuˬ hkʼaˬ hkʼe ga laˇ ve le?
Tcuh yaˇ liꞈ 5:27-29 leh Heˍbrehˇ liꞈ 10:24, 25 gʼaw sheˍ. Liꞈ hpu awˬ tawn teˇ tawn peuˬ teˇ tawn gʼaw peuˬ hkʼawꞈ nawˉ, na hkawˇ chi htaꞈ tawˇ yaw daꞈ sheˍ:
-
Mvuhˇ miˬ uˉ peunˍ ve awˬ moˍ hto toˇ ve kanˉ leh hpawnˬ daꞈ ve htaꞈ tawˍ laˇ ve kʼo, aˬ htoꞈ ma pa taw ngaˬ hui caˉ leh Yaˬhoˉvaˬ htaꞈ oˉ kʼoˍ pui ve lehˬ a yeˇ uiˍ jaˇ ve le?
6. Nawˬ yeunˇ hkanˍ gʼaˇ tuˬ Yaˬhoˉvaˬ ga laˇ tuˬ yoˬ
Miˬ guiˬ hkʼoˆ lo, Yaˬhoˉvaˬ ve Shaˉhkiˆhkanˍ ve chaw, chaw mawˇ leh yaˇ nehˬ fawˉ mehˍ ve gʼa hpuˇ ve htawˇ, caˉ leh ka tiꞈ yeˬ ve hkʼaw Yaˬhoˉvaˬ ve kanˉ te ve yoˬ. Yawˇ hui htaꞈ aˬ htoꞈ ma ga piˇ ve shiˍ tuˬ, VDO hpaw sheˍ. Peuˬ leh na hkawˇ chi htaꞈ tawˇ yaw daꞈ sheˍ:
-
VDO chi hkʼaw ve Shaˉhkiˆhkaˍ ve chaw yeunˇ hkanˍ gʼaˇ tuˬ aˬ htoꞈ ma ga piˇ ve le?
Roˉmaꞈ liꞈ 8:35, 37-39 leh Hpiˇliˇpiˆ liꞈ 4:13 gʼaw sheˍ. Liꞈ hpu awˬ tawn teˇ tawn peuˬ teˇ tawn gʼaw peuˬ hkʼawꞈ nawˉ, na hkawˇ chi htaꞈ tawˇ yaw daꞈ sheˍ:
-
Fawˉ mehˍ ve teˇ ceuˬ le le htaꞈ nawˬ yeunˇ hkanˍ gʼaˇ ve tehꞈ yonˍ gʼa tuˬ, Liꞈ hpu chi teˇ tawn nawˬ htaꞈ hkʼaˬ hkʼe ga laˇ ve le?
Maꞈhtehˍ liꞈ 5:10-12 gʼaw leh na hkawˇ chi htaꞈ tawˇ yaw daꞈ sheˍ:
-
Aˬ htoꞈ ma pa taw nawˬ fawˉ mehˍ ve gʼa hpuˇ ve htawˇ ha lehˬ gʼa ve le?
Yaˬhoˉvaˬ ve Shaˉhkiˆhkanˍ ve chaw laiˉ lanˬ gʼaˇ tawˍ ve tsuhˇ ve htaꞈ yeunˇ hkanˍ gʼaˇ ve yoˬ. Nawˬ kaꞈ yeunˇ hkanˍ gʼaˇ tuˬ yoˬ!
Chaw teˇ hpaˍ kʼoˆ ve: “Ngaˬ fawˉ mehˍ ve gʼa hpuˇ ve kʼo, yeunˇ hkanˍ maˇ gʼaˇ taˬ.”
-
Chaw teˇ hpaˍ chi hkʼe kʼoˆ laˇ ve kʼo, nawˬ yawˇ htaꞈ awˬ gʼaˇ piˇ tuˬ, Liꞈ hpu hkʼaˬ ve teˇ tawn hpeuꞈ maˍ piˇ tuˬ le?
A yeˇ uiˍ ve awˬ lawn
Ngaˬ hui fawˉ mehˍ ve htaꞈ gʼa hpuˇ ve htawˇ coˇ caˇ leh Yaˬhoˉvaˬ ve kanˉ te ve htaꞈ yawˇ gʼa mawˬ htaˇ awˬ hpfuhˇ shiˍ jaˇ ve yoˬ. Leh ngaˬ hui yeunˇ hkanˍ gʼaˇ tuˬ yawˇ ga laˇ tuˬ yoˬ!
Kʼawꞈ gʼaꞈ na ve
-
Aˬ htoꞈ ma pa taw Hkriꞈ yaˇ lehˬ fawˉ mehˍ ve gʼa hpuˇ tuˬ yoˬ tehꞈ, shiˍ gʼa ve le?
-
Fawˉ mehˍ ve maˇ gʼa hpuˇ sheˍ htaˇ, chi teˇ hkui nawˬ hkʼaˬ hkʼe te gu hehnˇ taˍ gʼa ve le?
-
Fawˉ mehˍ ve hkʼaˬ hkʼe ve gʼa hpuˇ ve htawˇ, nawˬ Yaˬhoˉvaˬ ve kanˉ caˉ leh te kʼai gʼa ve tehꞈ yonˍ gʼa tuˬ aˬ htoꞈ ma ga laˇ ve le?
Kʼawꞈ caˉ nyi gʼa ve
Awˬ viˉ awˬ nyi yaˇ nehˬ teˇ gʼaˇ choˬ paˉ oˇ paˉ maˇ chehˇ ve pa taw, htawnˍ hkʼaw gʼa chehˇ htaˇ, yawˇ yeunˇ hkanˍ gʼaˇ tuˬ Yaˬhoˉvaˬ hkʼaˬ hkʼe ga piˇ ve kʼoˆ maˍ laˇ ve htaꞈ, nyi sheˍ.
Fawˉ mehˍ ve gʼa hpuˇ ve htawˇ caˉ leh yeunˇ hkanˍ sheˍ (2:34)
Awˬ hpawˇ awˬ miˇ ma teˇ ca tawˍ ve tsuhˇ ve laiˉ hkʼawꞈ gʼa hpuˇ ve htawˇ, Yaˬhoˉvaˬ htaꞈ ka tiꞈ yeˬ tuˬ aˬ htoꞈ ma ga piˇ ve le, nyi sheˍ.
Pa ve awˬ yanˇ htaˇ Yaˬhoˉvaˬ ve kanˉ caˉ leh te sheˍ (7:11)
Nawˬ fawˉ mehˍ ve gʼa hpuˇ htaˇ hkʼaˬ hkʼe te haꞈ hanˉ gʼa ve htaꞈ, gʼaw nyi sheˍ.
Yehˬ kʼa hkʼaw tawˍ laˇ ve chaw htaꞈ hkʼaˬ hkʼe dawˇ nyi piˇ cawˇ ve le? Leh ngaˬ hui cawˇ daꞈ hawˍ daꞈ tuˬ te leh Yaˬhoˉvaˬ htaꞈ ka tiꞈ yeˬ tuˬ hkʼaˬ hkʼe te gʼa ve le?
“Awˬ tehˬ ve ‘aˉ htaw htaꞈ yuˬ laˬ ve, cawˇ daꞈ hui daꞈ ve maˇ heˆ’” (Shaw nyi kuiˬ Taꞈ yehˬ 2017 hkʼawꞈ ha pa 10 maˬ)
You May Also Like
NGAˬ HUI HTAꞈ CAˉ DAꞈ VE AWˬ LAWN
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ ve hk’aˬ hk’e te henˇ ve le?
Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ tuˬ nawˬ Liꞈ hpu hk’aˬ ve teˇ maˬ yehˇ ve kaꞈ hpehꞈ ve yoˬ. Awˬ chawˇ maˇ heˆ leh yehˬ k’a hk’aw ve chaw htaꞈ Liꞈ hpu teˇ geh henˇ tuˬ jehˬ piˇ kaꞈ g’a ve yoˬ.
