Nawˬ Liꞈ hpu henˇ laˬ ve chi teˇ hkui hkʼa gaˬ Yaˬhoˉvaˬ htaꞈ caˉ daꞈ ve laiˉ ceuˬ gʼa henˇ˗oˬ ve yoˬ. Nawˬ gʼa henˇ ve awˬ ceuˬ Yaˬhoˉvaˬ htaꞈ haꞈ jaˇ tuˬ te laˇ ve pa taw, yawˇ htaꞈ awˬ to chiˇ aꞈ piˇ leh Baˆtiˆsaˬ haꞈ yuˬ˗oˬ ve yoˬ hehˉ. Nawˬ chi hkʼe maˇ te sheˍ ve htawˇ, maˇ maw kʼo te tuˬ dawˇ chehˇ ve yoˬ hehˉ. Yaꞈ hkʼaˇ, nawˬ Baˆtiˆsaˬ haꞈ yuˬ peuˬ hkʼawꞈ nawˉ caˉ leh Yaˬhoˉvaˬ geh meuˆ daꞈ maˇ la tuˬ gʼa kʼawꞈ te kʼai sheˍ ve yoˬ. Nawˬ Yaˬhoˉvaˬ geh co co taiˍ taiˍ meuˆ daꞈ tuˬ te gʼa ve yoˬ. Chi hkʼaˬ hkʼe te gʼa ve le?

1. Aˬ htoꞈ ma te nawˬ caˉ leh Yaˬhoˉvaˬ geh meuˆ daꞈ cawˇ ve le?

Ngaˬ hui caˉ leh Yaˬhoˉvaˬ geh gʼaˇ hteꞈ meuˆ daꞈ cawˇ ve yoˬ. Aˬ htoꞈ ma pa taw le? Ngaˬ hui yawˇ geh “maˇ gʼa jiˆ tawˆ˗e tuˬ” caˉ leh gʼa meuˆ daꞈ ve yoˬ. (Heˍbrehˇ 2:1) Ngaˬ hui caˉ leh Yaˬhoˉvaˬ ve kanˉ ka tiꞈ yeˬ ve hkʼaw te gʼa tuˬ, aˬ htoꞈ ma ga laˇ gʼa ve le? Ngaˬ hui htaꞈ ga laˇ gʼa ve lehˬ, hkʼaˬ htaˆ kaꞈ hto toˇ ve kanˉ te chehˇ leh, Gʼuiˬ sha ve kanˉ maˇ maˇ te gʼa tuˬ awˬ nu ve awˬ hkʼaˇ dawˇ nyi gʼa ve yoˬ. (Hpiˇliˇpiˆ 3:16 gʼaw sheˍ.) Yaˬhoˉvaˬ ve kanˉ te ve lehˬ, daꞈ jaˇ ve a shaꞈ teꞈ hkʼaˇ hpehꞈ ve yoˬ!—Chiˇ mvuh ve 84:10.

2. Nawˬ caˉ leh kʼawꞈ te cawˇ ve aˬ htoꞈ ma cawˬ sheˍ ve le?

Nawˬ awˬ leh meuˇ teˇ lawn hkʼaw henˇ gaˬ˗oˬ ve htawˇ, nawˬ caˉ leh Hkriꞈ yaˇ ve a shaꞈ teꞈ hkʼaˇ cawˬ tuˬ gʼa kʼawꞈ te kʼai sheˍ ve yoˬ. Liꞈ hpu hkʼaw kʼoˆ ve, ngaˬ hui ‘nyi ma awˬ suhˉ gʼa veuꞈ deh ve yoˬ.’ (Eˇfeˇsuꞈ 4:23, 24) Nawˬ caˉ leh Liꞈ hpu henˇ leh hkʼaˬ htaˆ kaꞈ hpawnˬ daꞈ˗e ve kʼo, Yaˬhoˉvaˬ htaꞈ caˉ daꞈ ve awˬ lawn leh yawˇ ve te hkʼaˇ dawˇ hkʼaˇ awˬ suhˉ awˬ suhˉ gʼa henˇ tuˬ yoˬ. Nawˬ ve a shaꞈ teꞈ hkʼaˇ hkʼaw yawˇ ve te hkʼaˇ dawˇ hkʼaˇ hkʼaˬ hkʼe henˇ yuˬ gʼa ve htaꞈ dawˇ nyi sheˍ. Yaˬhoˉvaˬ ha lehˬ tuˬ nawˬ pa keunˍ pa cawˇ ve cawˬ ve kʼo, caˉ leh pa sheˍ.

3. Yaˬhoˉvaˬ nawˬ htaꞈ hkʼaˬ hkʼe ga laˇ tuˬ le?

Liꞈ hpu hkʼaw kʼoˆ ve, ‘nawˬ hui teˇ hkui teˇ yanˇ gʼa tuꞈ gʼa hkanˍ peuˬ hkʼawꞈ nawˉ, Gʼuiˬ sha lehˬ, nawˬ hui htaꞈ biˇ la piˇ, yeˬ la piˇ, leh awˬ gʼaˇ cawˬ la piˇ tuˬ yoˬ.’ (1 Peˍtruˆ 5:10) Ngaˬ hui teˇ gʼaˇ le le lawˇ nyi laˇ ve htaꞈ gʼa hpuˇ tuˬ yoˬ. Yaꞈ hkʼaˇ, ngaˬ hui ka tiꞈ yeˬ tuˬ Yaˬhoˉvaˬ lehˬ ngaˬ hui loˍ ve awˬ ceuˬ peꞈ laˇ tuˬ yoˬ. (Chiˇ mvuh ve 139:23, 24) Nawˬ yawˇ ve kanˉ ka tiꞈ yeˬ ve hkʼaw te gʼa tuˬ, nawˬ te gaˇ ve nyi ma cawˬ leh te gʼa tuˬ, yawˇ nawˬ htaꞈ awˬ gʼaˇ peꞈ laˇ tuˬ ka tiꞈ te taˍ ve yoˬ.—Hpiˇliˇpiˆ 2:13 gʼaw sheˍ.

 Henˇ shiˍ maˇ la tuˬ

4. Nawˬ daꞈ jaˇ ve awˬ chawˇ geh hkʼaˬ htaˆ kaꞈ tawˇ yaw daꞈ leh yawˇ hkawˇ na sheˍ

Nawˬ bon lawˬ leh Liꞈ hpu henˇ ve pa taw, Yaˬhoˉvaˬ ve awˬ chawˇ hpehꞈ la ve yoˬ. Yaꞈ hkʼaˇ, chi hkʼe caˉ leh kʼawꞈ te ve lehˬ yawˇ geh meuˆ daꞈ maˇ la tuˬ hkʼaˬ hkʼe ga laˇ gʼa ve le?

Chiˇ mvuh ve liꞈ 62:8 gʼaw leh na hkawˇ chi htaꞈ tawˇ yaw daꞈ sheˍ:

• Nawˬ Yaˬhoˉvaˬ geh gʼaˇ hteꞈ meuˆ daꞈ maˇ la tuˬ, bon hkʼaˬ hkʼe te lawˬ gʼa ve le?

Chiˇ mvuh ve liꞈ 119:97 gʼaw leh na hkawˇ chi htaꞈ tawˇ yaw daꞈ sheˍ:

• Nawˬ Yaˬhoˉvaˬ geh gʼaˇ hteꞈ meuˆ daꞈ maˇ la tuˬ, Liꞈ hpu gʼaw htaˇ aˬ htoꞈ ma te cawˇ ve le?

Nawˬ hkʼaˇ nawˬ Liꞈ hpu henˇ ve htaꞈ awˬ bon maˇ maˇ gʼa tuˬ hkʼaˬ hkʼe kʼawꞈ te gʼa sheˍ ve htaꞈ shiˍ tuˬ, VDO hpaw sheˍ. Peuˬ leh na hkawˇ chi teˇ hpaˍ htaꞈ tawˇ yaw daꞈ sheˍ:

• VDO chi hkʼaw nawˬ yuˬ yehˇ gʼa ve aˬ htoꞈ ma cawˬ ve le?

• Nawˬ aˬ htoꞈ ma awˬ lawn henˇ gaˇ ve le?

 A yeˇ uiˍ ve awˬ lawn

Nawˬ caˉ leh Yaˬhoˉvaˬ geh meuˆ daꞈ maˇ la tuˬ te leh, yawˇ ve kanˉ maˇ maˇ te tuˬ dawˇ teh taˍ sheˍ. Chi hkʼe te ve kʼo, nawˬ ve a shaꞈ co co taiˍ taiˍ ha lehˬ gʼa ve yoˬ!

Kʼawꞈ gʼaꞈ na ve

• Nawˬ Yaˬhoˉvaˬ ve kanˉ ka tiꞈ yeˬ ve hkʼaw te gʼa tuˬ, yawˇ ga laˇ tuˬ yoˬ tehꞈ aˬ htoꞈ ma te yonˍ gʼa ve le?

• Nawˬ Yaˬhoˉvaˬ geh gʼaˇ hteꞈ meuˆ daꞈ tuˬ hkʼaˬ hkʼe te gʼa ve le?

• Nawˬ Yaˬhoˉvaˬ ve kanˉ maˇ maˇ te tuˬ dawˇ teh taˍ ve lehˬ, aˬ htoꞈ ma te yawˇ geh meuˆ daꞈ maˇ la tuˬ ga laˇ gʼa ve le?