“Gʼuiˬ sha” “lehˬ, yawˇ hui ve mehˆ gʼuiˬ hkʼa peu˗eˬ htaꞈ shiˆ baˬ piˇ tuˬ yoˬ. Suh ve teˇ ceuˬ maˇ kʼawꞈ cawˬ. Dawˇ haˍ ve, paˆ hawˬ ve, naˬ ve, awˬ ceuˬ chi teˇ hpaˍ htawˇ maˇ kʼawꞈ cawˬ.”​—Hpeuꞈ maˍ ve 21:3, 4.

Ngaˬ hui gʼa hpuˇ chehˇ ve hpehꞈ haˍ ve  awˬ ceuˬ Gʼuiˬ sha geh laˬ ve maˇ heˆ tehꞈ shiˍ tcuh laˇ ve yoˬ.​—Yaˍkoˆ 1:13.

Ngaˬ hui tuꞈ hkanˍ htaˇ, Gʼuiˬ sha ha kʼaˉ laˇ ve yoˬ tehꞈ gʼa shiˍ ve pa taw nyi ma sha ve yoˬ.​—Zaˍhkaˍriˆ 2:8.

Tuꞈ hkanˍ ve peuˬ kʼai tuˬ dawˇ law kuiˬ cawˬ ve yoˬ.​—Chiˇ mvuh ve 37:9-11.

Yonˍ gʼa ve yoˬ. Awˬ lawn kʼo . . .

• Gʼuiˬ sha lehˬ tuꞈ hkanˍ ve leh maˇ hteˇ maˇ cawˇ ve htaꞈ canˇ ve yoˬ. Liꞈ hpu awˬ co˗e awˬ hkʼaw lo Yaˬhoˉvaˬ ve chaw hui lehˬ fawˉ mehˍ ve htaꞈ gʼa hkanˍ htaˇ, yawˇ hkʼaˬ hkʼe dawˇ ve le tehꞈ dawˇ nyi sheˍ. Liꞈ hpu hkʼaw kʼoˆ ve, yawˇ hui “fawˉ ve mehˍ ve leh tuꞈ ve hkanˍ ve htaꞈ gʼa hkanˍ” ve pa taw yawˇ nyi ma naˬ ve yoˬ.​—Suhˉ jehˬ ve 2:18.

  Shu htaꞈ luˬ tuˬ sheˆ tuˬ te piˇ ve chaw lehˬ Gʼuiˬ sha ve nyi ma htaꞈ naˬ tuˬ te piˇ ve yoˬ. Tawˇ pa haˉ te kʼo, Liꞈ hpu hkʼaw kʼoˆ ve, “teꞈ chiˉ venˇ baˆ maˇ cawˬ ve chaw htaꞈ tiˇ pehˍ ve laꞈ sheh” htaꞈ Gʼuiˬ sha canˇ leh nyi maˇ hpehꞈ ve awˬ ceuˬ hpehꞈ ve yoˬ.​—Tawˇ naˉ ve 6:16, 17.

• Gʼuiˬ sha lehˬ ngaˬ hui teˇ gʼaˇ leh teˇ gʼaˇ htaꞈ dawˇ nyi puiˉ ve yoˬ. Chaw yaˇ teˇ gʼaˇ leh teˇ gʼaˇ yawˇ “hkʼaˬ ma dawˇ haˍ chehˇ ve” htaꞈ yawˇ hkʼaˇ yawˇ ceh tiˉ shiˍ ve maˇ heˆ. Yaꞈ hkʼaˇ Yaˬhoˉvaˬ htawˇ shiˍ taˍ ve yoˬ.​—2 Raˍsaˍvanˍ 6:29, 30; Chiˇ mvuh ve 56:8.

  Maˇ maw kʼo, Yaˬhoˉvaˬ yawˇ ve mvuhˇ miˬ htaꞈ cuˇ leh chaw yaˇ gʼa tuꞈ gʼa hkanˍ ve hkʼa peu˗eˬ htaꞈ peuˬ kʼai piˇ tuˬ yoˬ. (Maꞈhtehˍ 6:9, 10) Awˬ yanˇ oˇ ve gaˬ la tuˬ law chehˇ ve awˬ yanˇ awˬ hkʼaw lo, nyi ma awˬ tawˬ hkʼa gaˬ yawˇ htaꞈ gʼaꞈ ca ve chaw awˬ tehˬ awˬ na nyi ma sha tuˬ te piˇ chehˇ ve yoˬ.​—Tcuh yaˇ 17:27; 2 Kawˇrenˍhtuˆ 1:3, 4.