Liꞈ hpu hkʼaw kʼoˆ ve, Hkriꞈ yaˇ awˬ moˍ hkʼaw awˬ vuiˬ te tuˬ hawˉ hkʼaˆ 2 moˍ cawˬ ve yoˬ. Chaw chi nyiˇ moˍ lehˬ “nyi haꞈ shaˉ shehˍ hpaˇ teˇ hpaˍ leh ga piˇ shehˍ hpaˇ teˇ hpaˍ” yoˬ. (Hpiˇliˇpiˆ 1:1) Hkriꞈ yaˇ awˬ moˍ maˇ˗awˍ ve hkʼaw nyi haꞈ shaˉ paˍ leh ga piˇ shehˍ hpaˇ laiˉ gʼaˇ cawˬ ve yoˬ. Ga piˇ shehˍ hpaˇ ve kanˉ ngaˬ hui htaꞈ hkʼaˬ hkʼe ga laˇ ve le?

Nyi haꞈ shaˉ paˍ awˬ moˍ htaꞈ kanˉ ga piˇ ve yoˬ. Ga piˇ shehˍ hpaˇ teˇ hpaˍ lehˬ chaw mawˇ maˇ kʼoˆ, yaˇ nehˬ maˇ kʼoˆ, teˇ gʼaˇ le le Yaˬhoˉvaˬ geh meuˆ daꞈ jaˇ. Yawˇ hui daꞈ ve dawˇ shiˍ puiˉ ve nyi ma cawˬ leh shu yawˇ hui htaꞈ yonˍ gʼa ve yoˬ. Yawˇ hui Hkriꞈ yaˇ awˬ moˍ hkʼaw a yeˇ uiˍ ve leh awˬ bon cawˬ ve kanˉ teˇ hpaˍ te ve yoˬ. Ga piˇ shehˍ hpaˇ chi hkʼe te ve pa taw, nyi haꞈ shaˉ paˍ teˇ hpaˍ Hkriꞈ yaˇ awˬ moˍ hkʼaw ve chaw hui htaꞈ hkʼa dehꞈ maˍ piˇ leh awˬ gʼaˇ piˇ gʼa ve yoˬ.

Hkriꞈ yaˇ awˬ moˍ awˬ pon awˬ bon cawˬ ve kanˉ te ve yoˬ. Ga piˇ shehˍ hpaˇ teˇ hpaˍ hpaˍ hpawnˬ daꞈ la ve chaw htaꞈ haꞈ yuˬ piˇ tuˬ ve awˬ vuiˬ gʼa ve yoˬ. Teˇ hpaˍ hpaˍ kʼo, awˬ hkawˇ tawˆ kuiˬ awˬ hkʼeun nyi haꞈ shaˉ ve, liꞈ kʼoˆ pehˬ piˇ ve, caˇ lanˇ te ve, leh awˬ viˉ awˬ nyi htaꞈ hto toˇ kuiˬ awˬ ti aꞈ piˇ ve yoˬ. Yawˇ hui Gʼuiˬ sha ve mvuhˇ miˬ Hpawnˬ daꞈ kuiˬ yehˬ kaꞈ haꞈ shaˉ ve yoˬ. Teˇ pawˆ pawˆ kʼo, nyi haꞈ shaˉ paˍ yawˇ hui chaw mawˇ htaꞈ ga tcuh ve yoˬ. Aꞈ piˇ ve kanˉ teˇ ceuˬ le le yawˇ hui ha lehˬ ha kʼa ve hkʼaw te ve pa taw, Hkriꞈ yaˇ awˬ moˍ hkʼaw chehˇ ve chaw hui yawˇ hui htaꞈ yawˆ yan ve yoˬ.—1 Tiˆmoˉseˍ 3:13.

Awˬ nu ve Hkriꞈ yaˇ hawˉ hkʼaˆ awˬ pon daꞈ ve henˇ yuˬ tuˬ te ve yoˬ. Yawˇ hui co ha hpawˇ te hkʼaˇ dawˇ hkʼaˇ daꞈ ve pa taw, ga piˇ shehˍ hpaˇ te tuˬ keunˍ ve yoˬ. Hpawnˬ daꞈ ve hkʼaw yawˇ hui awˬ vuiˬ te htaˇ, ngaˬ hui yonˍ hkʼaˇ uiˍ la mvuh la tuˬ ga laˇ ve yoˬ. Hto toˇ kuiˬ sheh kʼai laˇ htaˇ kaꞈ, ngaˬ hui nyi ma pfuhˇ tuˬ te laˇ ve yoˬ. Yawˇ hui nyi haꞈ shaˉ paˍ geh kanˉ hkʼa dehꞈ te ve pa taw, ha lehˬ tuˬ leh cawˇ daꞈ hawˍ daꞈ tuˬ cawˬ la ve yoˬ. (Eˇfeˇsuꞈ 4:16) Awˬ gʼuˇ suhˍ hpawˇ yawˇ hui htawˇ, nyi haꞈ shaˉ paˍ gʼa te tuˬ yoˬ.

• Ga piˇ shehˍ hpaˇ hkʼaˬ hkʼe ve chaw hpehꞈ ve le?

• Hkriꞈ yaˇ awˬ moˍ hkʼaw ve kanˉ hteˇ hteˇ shawˇ shawˇ te gʼa tuˬ, ga piˇ shehˍ hpaˇ teˇ hpaˍ hkʼaˬ hkʼe ga piˇ ve le?