Yaˬhoˉvaˬ ve Shaˉhkiˆhkanˍ ve chaw lehˬ bon liˇ awˬ suhˉ hpehꞈ ve tehꞈ laiˉ gʼaˇ dawˇ ve yoˬ. Yaꞈ hkʼaˇ, ponˬ taˉ ve 2,700 hkʼawꞈ hpaˆ htaˇ, awˬ tehˬ ve Gʼuiˬ sha lehˬ yawˇ ve kanˉ te ve chaw teˇ hpaˍ htaꞈ ‘shaˉ hkiˆ hkanˍ ve chaw’ tehꞈ kuˬ ve yoˬ. (Iˉsaˍyaˆ 43:10-12) 1931 hkʼawꞈ htaˇ hkʼa gaˬ ngaˬ hui ve awˬ moˍ Liꞈ hpu Henˇ yaˇ meh ve yoˬ. Aˬ htoꞈ ma pa taw ngaˬ hui ve awˬ moˍ awˬ meh pa leh Yaˬhoˉvaˬ ve Shaˉhkiˆhkanˍ ve chaw tehꞈ kuˬ ve le?

Ngaˬ hui ve Gʼuiˬ sha a shu le tehꞈ awˬ meh chi shiˍ tcuh ve yoˬ. Gʼuiˬ sha lehˬ Yaˬhoˉvaˬ meh ve yoˬ. Aˬ sho˗eˬ htaˇ ve Liꞈ hpu hkʼaw awˬ meh chi laiˉ hinˉ pawˆ cawˬ ve yoˬ. Chi beuꞈ Liꞈ hpu laiˉ kʼoˆ hkʼaw awˬ meh chi shiˆ baˬ leh, yawˇ ve aˉ yaˇ Gʼuiˬ sha maˇ heˆ kʼo Jawˇmawˇ Gʼuiˬ sha yuˬ keu ve yoˬ. Yaꞈ hkʼaˇ, awˬ tehˬ ve Gʼuiˬ sha yawˇ ve awˬ lawn Moˉseˍ htaꞈ shiˍ tcuh piˇ htaˇ, yawˇ lehˬ Yaˬhoˉvaˬ meh ve tehꞈ kʼoˆ piˇ ve yoˬ. Yawˇ kʼawꞈ kʼoˆ ve, “chi lehˬ co co taiˍ taiˍ ngaˬ ve awˬ meh hpehꞈ” ve yoˬ. (Tawˆ kʼai ve 3:15) Chi htaꞈ pa taw, yawˇ maˇ heˆ heˆ ve gʼuiˬ sha teˇ hpaˍ htaꞈ peun daꞈ jaˇ. Gʼuiˬ sha ve daꞈ kehˬ ve awˬ meh chi ngaˬ hui gʼa yehˇ ve ha lehˬ jaˇ.

Ngaˬ hui ve kanˉ hkʼaˬ hkʼe hpehꞈ ve le tehꞈ awˬ meh chi shiˍ tcuh ve yoˬ. Aˬ sho˗eˬ htaˇ ve chaw laiˉ gʼaˇ Yaˬhoˉvaˬ htaꞈ yonˍ leh yawˇ ve shaˉ hkiˆ hkanˍ ve chaw hpehꞈ ve yoˬ. Aˍbeˍlaˆ lehˬ hteˇ ve cawˇ ve awˉ lawˉ teˇ gʼaˇ hpehꞈ ve yoˬ. Laiˉ ha hkʼawꞈ ve awˬ yanˇ htaˇ, Noˉaꞈ, Aˍbraˍhanˍ, Saˍraˇ, Moˉseˍ, Daˍviˆ, leh awˬ nu ve chaw kaꞈ “shaˉ hkiˆ hkanˍ shehˍ hpaˇ” awˬ moˍ lonˉ hkʼaw chehˇ la ve yoˬ. (Heˍbrehˇ 11:4–12:1) Shaˉ nanˉ hkʼaw chaw teˇ gʼaˇ lehˬ yaꞈ kuiˬ maˇ cawˬ ve chaw awˬ pon shaˉ hkiˆ hkanˍ ve hkʼa shuˍ, Gʼuiˬ sha htaꞈ caˉ daꞈ ve awˬ tehˬ ve chaw yaˇ shiˍ tuˬ, ngaˬ hui coˇ caˇ leh hto maˍ piˇ ve yoˬ.

Ngaˬ hui Yeˍsuˆ htaꞈ henˇ yuˬ chehˇ ve yoˬ. Liꞈ hpu hkʼaw Yeˍsuˆ htaꞈ “ka tiꞈ yeˬ leh hteˇ lehˍ cawˇ lehˍ shaˉ hkiˆ hkanˍ shehˍ hpaˇ” tehꞈ kuˬ ve yoˬ. (Hpeuꞈ maˍ ve 3:14) Yeˍsuˆ yawˇ hkʼaˇ yawˇ kʼoˆ ve, yawˇ Gʼuiˬ sha ve awˬ meh shu htaꞈ shiˍ tcuh leh Gʼuiˬ sha htaꞈ caˉ daꞈ ve “hteˇ ve cawˇ ve teˇ ceuˬ awˬ lawn shaˉ hkiˆ hkanˍ” ve yoˬ. (Yoˇhanˬ 17:26; 18:37) Yeˍsuˆ awˬ hkʼaˇ suh awˬ tehˬ awˬ na gʼaꞈ yuˬ ve chaw Yaˬhoˉvaˬ ve awˬ meh gʼa yehˇ leh awˬ meh chi shu htaꞈ gʼa shiˍ tcuh cawˇ ve yoˬ. Yaˬhoˉvaˬ ve Shaˉhkiˆhkanˍ ve chaw chi hkʼe te chehˇ ve yoˬ.

• Aˬ htoꞈ ma pa taw Liꞈ hpu Henˇ yaˇ awˬ meh pa leh Yaˬhoˉvaˬ ve Shaˉhkiˆhkanˍ ve chaw tehꞈ kuˬ ve le?

• Yaˬhoˉvaˬ yawˇ ve shaˉ hkiˆ hkanˍ ve chaw miˬ guiˬ chi hkʼoˆ lo hkʼaˬ htaˆ tanˬ cawˬ la ve le?

• Yaˬhoˉvaˬ htaꞈ caˉ daꞈ ve daꞈ jaˇ ve shaˉ hkiˆ hkanˍ paˍ a shu le?