Hkriꞈ yaˇ awˬ moˍ hpawnˬ daꞈ˗e ve teˇ yanˇ, Yaˬhoˉvaˬ ve Shaˉhkiˆhkanˍ ve chaw awˬ hkiˇ shawˍ ve htaꞈ liꞈ chi teˇ kʼoˆ awˬ hkʼaw lo awˬ han htaꞈ nawˬ mawˬ˗aw laˇ? Aˬ htoꞈ ma pa taw ngaˬ hui veuꞈ kʼaˇ veuꞈ ve htaꞈ a yeˇ te ve le?

Ngaˬ hui ve Gʼuiˬ sha htaꞈ yawˆ yan piˇ tuˬ awˬ pon yoˬ. Gʼuiˬ sha lehˬ ngaˬ hui ve awˬ hkiˇ awˬ naˬ awˬ htaꞈ hpawˇ ceh tiˉ nyi ve maˇ heˆ. (1 Saˍmo˗eˍlaˆ 16:7) Yaꞈ hkʼaˇ, yawˇ htaꞈ oˉ kʼoˍ pui tuˬ ngaˬ hui hpawnˬ daꞈ la ve teˇ yanˇ, Gʼuiˬ sha leh yawˇ htaꞈ oˉ kʼoˍ pui ve chaw htaꞈ ngaˬ hui yawˆ yan gaˇ ve yoˬ. Shaˉ nanˉ hkʼaw suhˉ jehˬ paˍ mehˆ gʼuˇ suhˍ ngaˬ hui huˉ taˍ htaˇ, ngaˬ hui awˬ hkiˇ daꞈ daꞈ shawˍ ve kʼo, yawˇ ve aˉ yaˇ htaꞈ yawˆ yan piˇ gʼa ve yoˬ. Chi hkʼa shuˍ shuˍ, hpawnˬ daꞈ la ve teˇ yanˇ, ngaˬ hui awˬ hkiˇ daꞈ daꞈ shawˍ ve kʼo, “miˬ guiˬ hkʼoˆ ve suhˉ jehˬ shehˍ hpaˇ” Yaˬhoˉvaˬ Gʼuiˬ sha leh yawˇ htaꞈ oˉ kʼoˍ pui kuiˬ htaꞈ ngaˬ hui yawˆ yan piˇ gʼa ve yoˬ.—Awˬ hkuiˉ puiˍ 18:25.

Ngaˬ hui a shaꞈ teꞈ kuiˬ hkʼaw yuˬ yehˇ ve awˬ liˇ awˬ hkʼaˇ hpeuꞈ maw piˇ tuˬ awˬ pon yoˬ. “Nyi ma nuˇ nehˬ ve leh nyi ma taˍ puiˉ ve” awˬ hkʼaw lo veuꞈ deh tuˬ, Liꞈ hpu hkʼaw Hkriꞈ yaˇ hui htaꞈ beˆ maˍ piˇ ve yoˬ. (1 Tiˆmoˉseˍ 2:9, 10) “Nyi ma nuˇ nehˬ ve” awˬ hkʼaw lo veuꞈ deh ve lehˬ sheꞈ liꞈ uiˍ ve veuꞈ kʼaˇ leh laꞈ tzuhˆ tuˬ te ve veuꞈ kʼaˇ maˇ gʼa veuꞈ tehꞈ kʼoˆ gaˇ ve yoˬ. Chi hkʼoˆ kaꞈ, “nyi ma taˍ puiˉ” ve kʼo, ngaˬ hui daꞈ ve veuꞈ kʼaˇ leuˆ yuˬ leh awˬ ponˬ awˬ leuˉ ve veuꞈ kʼaˇ htaꞈ jaw kʼai gʼa ve yoˬ. Awˬ liˇ awˬ hkʼaˇ chi teˇ hpaˍ yuˬ yehˇ ve htawˇ, ngaˬ hui veuꞈ kʼaˇ leh awˬ hkiˇ shawˍ ve laiˉ ceuˬ leuˆ gʼa sheˍ. Ngaˬ hui teꞈ chiˉ maˇ kʼoˆ ve htawˇ, daꞈ ve awˬ hkiˇ shawˍ ve kʼo, ngaˬ hui htaꞈ ponˬ laˇ shehˍ hpaˇ “Gʼuiˬ sha ve maˍ piˇ ve tawˇ hkawˇ htaꞈ awˬ hkiˇ shawˍ ve” leh “Gʼuiˬ sha htaꞈ chiˇ uiˍ chiˇ mvuh” piˇ gʼa ve yoˬ. (Tiˇtuˆ 2:10; 1 Peˍtruˆ 2:12) Ngaˬ hui awˬ hkiˇ shawˍ leh hpawnˬ daꞈ˗e htaˇ, Yaˬhoˉvaˬ htaꞈ oˉ kʼoˍ pui ve lehˬ daꞈ jaˇ ve tehꞈ shu gʼa mawˬ ve yoˬ.

Nawˬ hkʼaˬ hkʼe ve veuꞈ kʼaˇ veuꞈ ve htawˇ maˇ kʼoˆ, Gʼuiˬ sha ve mvuhˇ miˬ Hpawnˬ daꞈ kuiˬ yehˬ lo laˬ gʼa ve, ngaˬ hui ha lehˬ ha kʼa haꞈ yuˬ laˇ ve yoˬ. Keunˍ ve, kehˬ ve, leh nyi sha ve veuꞈ kʼaˇ lehˬ awˬ hpfuhˇ hkʼaˆ tuˬ maˇ loˍ.

• Gʼuiˬ sha htaꞈ oˉ kʼoˍ pui la htaˇ, ngaˬ hui awˬ hkiˇ shawˍ ve awˬ hkʼaˇ a yeˇ hkʼaˬ hkʼe taw uiˍ ve le?

• Veuꞈ kʼaˇ leh awˬ hkiˇ shawˍ ve htaꞈ ngaˬ hui leuˆ yuˬ tuˬ, aˬ htoꞈ ma awˬ liˇ awˬ hkʼaˇ ga laˇ ve le?