Kawˆ tuˬ dawˇ haˍ tuˬ gʼa hpuˇ htaˇ, dawˇ haˍ gaˇ haˍ ve awˬ viˉ awˬ nyi htaꞈ ca ga piˇ tuˬ, Yaˬhoˉvaˬ ve Shaˉhkiˆhkanˍ ve chaw laꞈ haˉ gu hehnˇ ve yoˬ. Chi hkʼe te htaˇ, ngaˬ hui awˬ tehˬ haꞈ daꞈ ve tehꞈ hpeuꞈ maw piˇ ve yoˬ. (Yoˇhanˬ 13:34, 35; 1 Yoˇhanˬ 3:17, 18) Ngaˬ hui hkʼaˬ hkʼe ga piˇ ve le?

Hpu tanˇ piˇ ve yoˬ. Yuˇdaꞈ mvuhˇ miˬ lo meuꞈ lonˉ kaˆ lonˉ gʼa hpuˇ htaˇ, oˇ kaˬ lo chehˇ taˍ ve awˬ viˉ awˬ nyi htaꞈ ga piˇ tuˬ Anˍtiˆawˍ venˇ lo chehˇ ve Hkriꞈ yaˇ hpu tanˇ piˇ ve yoˬ. (Tcuh yaˇ 11:27-30) Chi hkʼa shuˍ shuˍ, awˬ nu ve chehˇ kuiˬ lo ve awˬ viˉ awˬ nyi dawˇ haˍ gaˇ haˍ chehˇ ve htaꞈ ngaˬ hui shiˍ ve teˇ yanˇ, ngaˬ hui ve Hkriꞈ yaˇ awˬ moˍ htaꞈ cuˇ leh hpu shi mawˇ jeˬ tanˇ piˇ ve yoˬ.—2 Kawˇrenˍhtuˆ 8:13-15.

Awˬ suhˍ awˬ shaˍ hpawˇ loˍ ve ga piˇ ve yoˬ. Kawˆ tuˬ dawˇ haˍ tuˬ gʼa hpuˇ htaˇ, nyi haꞈ shaˉ paˍ yawˇ ve Hkriꞈ yaˇ awˬ moˍ hkʼaw ve awˬ viˉ awˬ nyi teˇ gʼaˇ le le hkʼaˬ hkʼe kʼai ve htaꞈ shiˍ tuˬ ca nyi ve yoˬ. Ga piˇ ve kawˍmiˍtiˍ lehˬ caˇ tuˬ, iˉ kaˆ, aˉ poꞈ veuꞈ kʼaˇ, leh naˆ tsuhˇ teˇ hpaˍ gu piˇ ve yoˬ. Gʼuiˬ sha ve mvuhˇ miˬ Hpawnˬ daꞈ kuiˬ yehˬ leh awˬ viˉ awˬ nyi ve yehˬ htaꞈ kʼawꞈ gu te tuˬ, laꞈ meuˇ puiˉ ve Shaˉhkiˆhkanˍ ve chaw laiˉ gʼaˇ a shu yawˇ hkʼaˇ yawˇ ve hpu tawˆ leh ca ga piˇ ve yoˬ. Ngaˬ hui ve kanˉ hkʼaˇ teˇ moˍ tiˉ hpehꞈ leh kanˉ chi hkʼe ve laiˉ pawˆ te˗oˬ ve pa taw, kawˆ tuˬ dawˇ haˍ tuˬ gʼa hpuˇ htaˇ ngaˬ hui laꞈ haˉ ga piˇ gʼa ve yoˬ. Ngaˬ hui ve “yehˬ yaˇ kʼa yaˇ tehꞈ kʼoˆ ve yonˍ ve chaw teˇ hpaˍ” htaꞈ ga piˇ ve htawˇ, aˬ htoꞈ ma ve bon liˇ htawˇ maˇ kʼoˆ, awˬ nu ve chaw htaꞈ kaꞈ ngaˬ hui te gʼa ve kʼo ga piˇ ve yoˬ.—Gaˍlaˍtiˆ 6:10.

Co ha hpawˇ leh nyi ma hpawˇ ga piˇ ve yoˬ. Kawˆ tuˬ dawˇ haˍ tuˬ gʼa hpuˇ ve chaw awˬ gʼaˇ gʼa tuˬ loˍ jaˇ ve yoˬ. Awˬ yanˇ oˇ ve hkʼaw “dawˇ sha gaˇ sha tuˬ hkʼa peu˗eˬ piˇ shehˍ hpaˇ Gʼuiˬ sha” Yaˬhoˉvaˬ geh ngaˬ hui awˬ gʼaˇ gʼa ve yoˬ. (2 Kawˇrenˍhtuˆ 1:3, 4) Dawˇ haˍ gaˇ haˍ chehˇ ve chaw hui htaꞈ Liꞈ hpu hkʼaw ka tiꞈ te taˍ laˇ ve ngaˬ hui kʼoˆ maˍ piˇ gaˇ ve yoˬ. Maˇ maw kʼo, tuꞈ ve hkanˍ ve leh naˬ tuˬ te piˇ ve awˬ ceuˬ hkʼa peu˗eˬ Gʼuiˬ sha ve mvuhˇ miˬ te luˬ tuˬ yoˬ tehꞈ, ngaˬ hui yawˇ hui htaꞈ shiˍ tcuh gaˇ ve yoˬ.—Hpeuꞈ maˍ ve 21:4.

• Kawˆ tuˬ dawˇ haˍ tuˬ gʼa hpuˇ htaˇ, aˬ htoꞈ ma pa taw Shaˉhkiˆhkanˍ ve chaw laꞈ haˉ ga piˇ gʼa ve le?

• Kawˆ tuˬ dawˇ haˍ tuˬ gʼa hpuˇ ve chaw hui htaꞈ awˬ gʼaˇ piˇ tuˬ, co ha hpawˇ ve awˬ lawn aˬ htoꞈ ma kʼoˆ maˍ piˇ gʼa ve le?