Gʼuiˬ sha ngaˬ hui htaꞈ miˬ guiˬ hkʼoˆ Paˍraˍdiˇsuˆ hko hkʼaw co co taiˍ taiˍ dawˇ sha gawˬ lehˍ chehˇ tcuh gaˇ ve yoˬ!

‘Oˇ ve hkʼaˬ hkʼe te hpehꞈ kʼai gʼa tuˬ le’ tehꞈ, nawˬ dawˇ ve yoˬ hehˉ. Liꞈ hpu hkʼaw kʼoˆ taˍ ve, Gʼuiˬ sha ve mvuhˇ miˬ te piˇ tuˬ yoˬ. Gʼuiˬ sha lehˬ teˇ gʼaˇ le le htaꞈ yawˇ ve mvuhˇ miˬ leh yawˇ ve a loˍ shiˍ tcuh gaˇ ve yoˬ.—Chiˇ mvuh ve 37: 11, 29; Iˉsaˍyaˆ 9:7.

Gʼuiˬ sha ngaˬ hui htaꞈ awˬ bon gʼa tcuh gaˇ ve yoˬ.

Daꞈ ve awˬ pa yawˇ ve yaˇ daꞈ ve awˬ ceuˬ htaꞈ gʼa tcuh gaˇ ve hkʼa shuˍ, mvuhˇ naw ma hkʼoˆ chehˇ ve ngaˬ hui ve Awˬ pa kaꞈ ngaˬ hui htaꞈ co co taiˍ taiˍ ha lehˬ tcuh gaˇ ve yoˬ. (Iˉsaˍyaˆ 48:17, 18) Yawˇ ka tiꞈ te taˍ ve, “Gʼuiˬ sha ve a loˍ htaꞈ te ve chaw teˇ gʼaˇ lehˬ co co taiˍ taiˍ teꞈ chehˇ tuˬ yoˬ.”—1 Yoˇhanˬ 2: 17.

Gʼuiˬ sha ngaˬ hui htaꞈ yawˇ ve yaꞈ kʼaw hkʼoˆ toˇ kʼai tcuh gaˇ ve yoˬ.

Liꞈ hpu hkʼaw kʼoˆ ve Te hpanˍ shehˍ hpaˇ lehˬ ngaˬ hui yawˇ ve “yaꞈ kʼaw htaꞈ toˇ kʼai” gʼa tuˬ, “ngaˬ hui htaꞈ te tcuh laˇ gaˇ ve awˬ ceuˬ” maˍ laˇ ve yoˬ. (Iˉsaˍyaˆ 2:2, 3) Yawˇ ve a loˍ teˇ gʼaˇ le le htaꞈ shiˍ tcuh tuˬ, “yawˇ ve awˬ meh htaꞈ pfuhˇ tuˬ ve” chaw teˇ moˍ htaꞈ yawˇ shaw hpoˆ ve yoˬ. —Tcuh yaˇ 15:14.

Gʼuiˬ sha htaꞈ oˉ kʼoˍ pui ve awˬ hkʼaw lo yawˇ ngaˬ hui htaꞈ cawˇ daꞈ hawˍ daꞈ tcuh gaˇ ve yoˬ.

Yaˬhoˉvaˬ htaꞈ oˉ kʼoˍ pui ve lehˬ awˬ moˍ shawˍ daꞈ pehˬ daꞈ ve maˇ te tcuh, haꞈ pehnˇ ve hkʼaw cawˇ daꞈ hawˍ daꞈ tcuh ve yoˬ. (Yoˇhanˬ 13:35) Chi beuꞈ teˇ co˗e, chaw yaˇ teˇ moˍ tiˉ hpehꞈ ve hkʼaw Gʼuiˬ sha ve kanˉ te tuˬ, miˬ guiˬ chi hkʼa peu˗eˬ hkʼoˆ a shu yawˇ hui htaꞈ maˍ piˇ chehˇ ve le? Awˬ lawn chi htaꞈ shiˍ tuˬ liꞈ chi teˇ kʼoˆ gʼaw nyi sheˍ.