Awˬ meh oˇ hkʼe kʼoˆ taˍ laˇ ve hkʼe, hpawnˬ daꞈ kuiˬ lo Liꞈ hpu maˍ ve lehˬ Gʼuiˬ sha ve mvuhˇ miˬ awˬ lawn htaꞈ a yeˇ yuˬ ve yoˬ. Awˬ lawn chi Yeˍsuˆ bon maˍ ve awˬ hkuiˉ puiˍ hpehꞈ ve yoˬ.—Luˉkaꞈ 8:1.

Awˬ ti chi lehˬ awˬ tehˬ ve oˉ kʼoˍ pui kuiˬ hpehꞈ ve yoˬ. Awˬ paˇ awˬ kui chehˇ ve chaw htaꞈ Gʼuiˬ sha ve mvuhˇ miˬ daꞈ ve awˬ lawn sha tanˇ hto maˍ piˇ tuˬ, Yaˬhoˉvaˬ ve Shaˉhkiˆhkanˍ ve chaw hpawnˬ daꞈ kuiˬ yehˬ chi hkʼaw yehˇ ve yoˬ. (Maꞈhtehˍ 24:14) Hpawnˬ daꞈ kuiˬ yehˬ teˇ hpaˍ uiˍ ve i ve cawˬ leh awˬ hoꞈ awˬ han maˇ shuˍ daꞈ ve htawˇ, teˇ kaˬ le le lo awˬ hpfuhˇ hkʼaˆ ve awˬ ceuˬ maˇ nehˉ taˍ. Hpawnˬ daꞈ kuiˬ yehˬ laiˉ kaˬ kʼo, Hkriꞈ yaˇ awˬ moˍ laiˉ moˍ teˇ geh yehˇ ve yoˬ. Maˇ maw ve awˬ yanˇ awˬ hkʼaw lo, Hkriꞈ yaˇ awˬ moˍ laiˉ moˍ kʼawꞈ cawˬ la ve pa taw, ngaˬ hui Gʼuiˬ sha ve mvuhˇ miˬ Hpawnˬ daꞈ kuiˬ yehˬ laiˉ meunˍ yehˬ te˗oˬ ve yoˬ. (Teˇ nyi ve hkʼaw aˬ laˬ hkʼe 5 yehˬ te ve yoˬ.) Ngaˬ hui hkʼaˬ hkʼe te gʼa ve le?—Maꞈhtehˍ 19:26.

Laiˉ kaˬ lo laˬ ve hpu tanˇ laˇ ve teˇ kaˬ tiˉ shaw hpoˆ leh te ve yoˬ. Hpu chi ve teˇ hpaˍ Awˬ tcuhˆ puiˍ lo feu piˇ ve yoˬ. Hkriꞈ yaˇ awˬ moˍ hkʼaˬ kaˬ lo cawˬ ve htawˇ maˇ kʼo, Gʼuiˬ sha ve mvuhˇ miˬ Hpawnˬ daꞈ kuiˬ yehˬ htaꞈ gʼa gu ve maˇ heˆ leh awˬ suhˉ gʼa te ve kʼo, hpu chi yuˬ yehˇ hpehꞈ ve yoˬ.

Laiˉ chaw ceuˬ lo laˬ ve chaw awˬ hpfuhˇ maˇ heuˆ leh ha lehˬ ve hkʼaw te ve yoˬ. Laiˉ mvuhˇ miˬ hkʼaw Gʼuiˬ sha ve mvuhˇ miˬ Hpawnˬ daꞈ kuiˬ yehˬ te ve awˬ moˍ cawˬ ve yoˬ. Awˬ moˍ chi ve hkʼaw kanˉ te ve chaw leh teˇ tcuhˉ teˇ yanˇ ga la ve chaw laiˉ kaˬ lo kʼai leh awˬ viˉ awˬ nyi htaꞈ Gʼuiˬ sha ve mvuhˇ miˬ Hpawnˬ daꞈ kuiˬ yehˬ te piˇ ve yoˬ. Vuiˇ jaˇ kuiˬ lo kaꞈ kʼai ve yoˬ. Awˬ nu ve mvuhˇ miˬ lo Gʼuiˬ sha ve mvuhˇ miˬ Hpawnˬ daꞈ kuiˬ yehˬ te ve leh kʼawꞈ gu ve htaꞈ nyi haꞈ shaˉ tuˬ, awˬ vuiˬ gʼa keunˍ ve Shaˉhkiˆhkanˍ ve chaw teˇ hpaˍ hpaˍ htaꞈ leuˆ yuˬ ve yoˬ. Hpawnˬ daꞈ kuiˬ yehˬ te htaˇ, kanˉ te puiˉ ve chaw laiˉ gʼaˇ cawˬ ve htawˇ, kanˉ maˇ˗awˍ ve peuˬ gʼa ve lehˬ Hkriꞈ yaˇ awˬ moˍ oˇ kaˬ lo chehˇ ve chaw ga la ve pa taw yoˬ. Yaˬhoˉvaˬ ve awˬ ha hpu leh yawˇ ve chaw gʼaˇ hteꞈ coˇ caˇ ve pa taw, chi hkʼa peu˗eˬ htaꞈ te gʼa ve yoˬ.—Chiˇ mvuh ve 127:1; Kawˇlawˇsehˇ 3:23.

• Aˬ htoꞈ ma pa taw ngaˬ hui oˉ kʼoˍ pui kuiˬ htaꞈ Gʼuiˬ sha ve mvuhˇ miˬ Hpawnˬ daꞈ kuiˬ yehˬ tehꞈ kuˬ ve le?

• Miˬ guiˬ hkʼa peu˗eˬ hkʼoˆ ngaˬ hui Gʼuiˬ sha ve mvuhˇ miˬ Hpawnˬ daꞈ kuiˬ yehˬ htaꞈ hkʼaˬ hkʼe te gʼa tuˬ le?