Yeˍsuˆ maˇ suh sheˍ 3 nyi htaˇ yawˇ kʼoˆ ve, “chaw ceuˬ hkʼa peu˗eˬ awˬ pon shaˉ hkiˆ hpehꞈ tuˬ, Gʼuiˬ sha ve mvuhˇ miˬ htaꞈ caˉ daꞈ ve ha lehˬ ve bon hkawˇ [“daꞈ ve awˬ lawn sha tanˇ,” MGS] chi miˬ guiˬ hkʼoˆ teˇ kaˬ le le lo ca maˍ piˇ tuˬ yoˬ. Oˇ ve hkʼawꞈ nawˉ, awˬ leh meuˇ gaˬ la tuˬ yoˬ.” (Maꞈhtehˍ 24:14) Yaꞈ hkʼaˇ, miˬ guiˬ hkʼa peu˗eˬ hkʼoˆ hto toˇ ve kanˉ chi hkʼaˬ hkʼe te peuˬ tuˬ le? Yeˍsuˆ miˬ guiˬ hkʼoˆ chehˇ htaˇ te jaw ve hkʼa shuˍ gʼa te ve yoˬ.—Luˉkaꞈ 8:1.

Chaw teˇ hpaˍ htaꞈ yawˇ hui ve aˉ hkʼaw lo ca mawˬ daꞈ˗e ve yoˬ. Teˇ yehˬ peuˬ teˇ yehˬ daꞈ ve awˬ lawn sha tanˇ hto toˇ tuˬ, Yeˍsuˆ awˬ laꞈ gʼawˇ hui htaꞈ maˍ piˇ ve yoˬ. (Maꞈhtehˍ 10:11-13; Tcuh yaˇ 5:42; 20:20) Awˉ lawˉ peuˇ ve Hkriꞈ yaˇ hto toˇ ve kanˉ te kuiˬ pehˬ daꞈ leh te ve yoˬ. (Maꞈhtehˍ 10:5, 6; 2 Kawˇrenˍhtuˆ 10:13) Chi beuꞈ teˇ co˗e htawˇ oˇ htaˇ hkʼa shuˍ, hto toˇ ve kanˉ chi hkʼa dehꞈ gu taˍ leh, Hkriꞈ yaˇ awˬ moˍ teˇ kaˬ le le hto toˇ ve kanˉ te kuiˬ pehˬ laˇ ve htaꞈ gʼa ve yoˬ. Chi hkʼe te htaˇ, Yeˍsuˆ kʼoˆ taˉ ve hkʼa shuˍ ngaˬ hui chaw yaˇ htaꞈ “bon maˍ piˇ” leh “shaˉ hkiˆ hkanˍ” gʼa ve yoˬ.—Tcuh yaˇ 10:42.

Chaw chehˇ kuiˬ teˇ kaˬ le le lo ngaˬ hui coˇ caˇ leh hto toˇ ve yoˬ. Gʼuiˬ po paˇ lo maˇ kʼoˆ, hkʼaˆ hkʼaw ve nanˬ bawˍ paˇ lo maˇ kʼoˆ, chaw yaˇ chehˇ taˍ kuiˬ teˇ kaˬ le le lo hto toˇ tuˬ, Yeˍsuˆ te maˍ laˇ taˉ ve yoˬ. (Maˍkuˆ 4:1; Yoˇhanˬ 4:5-15) Ngaˬ hui kaꞈ yaꞈ kʼaw hpuiˇ lo, mawˇ hawˇ kuiˬ lo, chaw guiˇ kuiˬ lo, maˇ heˆ leh tawˇ yaw tuˬ awˬ hkʼeun yehˇ leh te gʼa ve hkʼe teˇ kaˬ le le lo Liꞈ hpu awˬ lawn shu geh yaw daꞈ ve yoˬ. Ngaˬ hui ve awˬ viˉ awˬ nyi leh hkʼaˆ hkʼaw, kanˉ te kuiˬ, liꞈ henˇ yehˬ lo ve awˬ chawˇ htaꞈ keunˍ daꞈ ve awˬ yanˇ htaˇ ngaˬ hui hto maˍ piˇ ve yoˬ. Kanˉ chi te ve pa taw, miˬ guiˬ hkʼoˆ laiˉ lanˬ gʼaˇ “ponˬ laˇ peuˬ ve daꞈ ve awˬ lawn” htaꞈ gʼa kaˇ ve yoˬ. —Chiˇ mvuh ve 96:2.

Gʼuiˬ sha ve mvuhˇ miˬ daꞈ ve awˬ lawn leh awˬ gʼuˇ suhˍ hpawˇ ve dawˇ law kuiˬ nawˬ a shu htaꞈ hto piˇ gaˇ ve le? Awˬ lawn chi a shu yawˇ hkʼaˇ yawˇ taˇ gʼawˆ teh taˍ. Shu htaꞈ haˆ haˆ hto piˇ mehˍ!

• “Daꞈ ve awˬ lawn sha tanˇ” ngaˬ hui gʼa hto toˇ cawˇ ve aˬ htoꞈ ma le?

• Yeˍsuˆ hto toˇ ve awˬ hkʼaˇ htaꞈ Yaˬhoˉvaˬ ve Shaˉhkiˆhkanˍ ve chaw hkʼaˬ hkʼe gʼaꞈ te chehˇ ve le?