Ngaˬ hui ve kanˉ hkʼaˇ awˬ hkʼaw lo gʼaˇ hpfuhˇ caˇ ve saˍ laꞈ maˇ cawˬ. Awˉ lawˉ peuˇ ve Hkriꞈ yaˇ awˬ moˍ tanˬ htaˇ hkʼa shuˍ, chi beuꞈ kaꞈ keunˍ ve nyi haꞈ shaˉ paˍ htaꞈ leuˆ teh ve yoˬ. (Tcuh yaˇ 20:28) Nyi haꞈ shaˉ paˍ chi teˇ hpaˍ lehˬ co ha hpawˇ uiˍ la mvuh la peuˬ ve hawˉ hkʼaˆ hpehꞈ ve yoˬ. Yawˇ hui Hkriꞈ yaˇ awˬ moˍ hkʼaw sheh kʼai leh nyi haꞈ shaˉ htaˇ, tawˇ hkawˇ chi htaꞈ gʼaꞈ te ve yoˬ. “Shu hkawˇ leuˉ maˇ gʼa leh te ve teˇ ceuˬ taˇ hpehꞈ piˇ. Ha lehˬ ha kʼa te˗o. Hpu gʼa gaˇ leh te ve kaꞈ taˇ hpehꞈ piˇ. Nyi ma pfuhˇ leh te˗o.” (1 Peˍtruˆ 5:1-3) Ngaˬ hui awˬ pon yawˇ hui aˬ htoꞈ ma kanˉ te ve le?

Ngaˬ hui htaꞈ nyi haꞈ shaˉ laˇ ve yoˬ. Nyi haꞈ shaˉ paˍ lehˬ Hkriꞈ yaˇ awˬ moˍ htaꞈ co ha hpawˇ lo beˆ maˍ leh haꞈ shaˉ piˇ ve yoˬ. A yeˇ uiˍ ve awˬ vuiˬ chi Gʼuiˬ sha peꞈ laˇ ve tehꞈ yawˇ hui shiˍ ve yoˬ. Hkʼe te leh, yawˇ hui Gʼuiˬ sha ve chaw htaꞈ maˇ nyiˉ piˇ leh, dawˇ sha tuˬ leh ha lehˬ tuˬ ga piˇ ve yoˬ. (2 Kawˇrenˍhtuˆ 1:24) Yawˬ hawˉ shehˍ hpaˇ yawˬ teˇ hkeh le le htaꞈ hkʼa dehꞈ nyi haꞈ shaˉ ve hkʼa shuˍ, nyi haꞈ shaˉ paˍ htawˇ Hkriꞈ yaˇ awˬ moˍ hkʼaw ve chaw teˇ gʼaˇ le le htaꞈ coˇ caˇ leh shiˍ daꞈ ve yoˬ.—Tawˇ naˉ ve 27:23.

Ngaˬ hui Gʼuiˬ sha ve a loˍ htaꞈ gʼaꞈ te tuˬ maˍ laˇ ve yoˬ. Teˇ shinˉ le le nyi haꞈ shaˉ paˍ Hkriꞈ yaˇ awˬ moˍ hpawnˬ daꞈ ve htaꞈ sheh kʼai leh, ngaˬ hui ve yonˍ hkʼaˇ uiˍ la mvuh la tuˬ ga laˇ ve yoˬ. (Tcuh yaˇ 15:32) Gʼuiˬ sha htaꞈ yawˆ yan ve hawˉ hkʼaˆ chi teˇ hpaˍ lehˬ hto toˇ ve sheh kʼai leh, ngaˬ hui geh Gʼuiˬ sha ve kanˉ teˇ geh te leh te jawˬ tcuh laˇ ve yoˬ.

Ngaˬ hui teˇ gʼaˇ leh teˇ gʼaˇ htaꞈ awˬ gʼaˇ peꞈ laˇ ve yoˬ. Ngaˬ hui Yaˬhoˉvaˬ geh meuˆ daꞈ gʼa tuˬ, nyi haꞈ shaˉ paˍ aˉ hkʼaw lo maˇ heˆ leh Gʼuiˬ sha ve mvuhˇ miˬ Hpawnˬ daꞈ kuiˬ yehˬ lo ngaˬ hui geh yaw daꞈ ve yoˬ. Yawˇ hui Liꞈ hpu htaꞈ cuˇ leh ngaˬ hui htaꞈ ga laˇ leh awˬ gʼaˇ peꞈ laˇ ve yoˬ.—Yaˍkoˆ 5:14, 15.

Hkriꞈ yaˇ awˬ moˍ ve kanˉ awˬ hkʼoˆ kaꞈ, nyi haꞈ shaˉ paˍ maˇ˗awˍ ve lehˬ kanˉ gʼa te caˇ leh yawˇ hui ve yehˬ kʼa htaꞈ kaꞈ hkʼa dehꞈ gʼa nyi haꞈ shaˉ ve yoˬ. Kanˉ te hkeuꞈ ve awˬ viˉ awˬ nyi hawˉ hkʼaˆ chi teˇ hpaˍ htaꞈ ngaˬ hui yawˆ yan piˇ cawˇ ve yoˬ.—1 Hteˇsaˍlawˇniˆ 5:12, 13.

• Hkriꞈ yaˇ awˬ moˍ hkʼaw nyi haꞈ shaˉ paˍ aˬ htoꞈ ma awˬ vuiˬ cawˬ ve le?

• Nyi haꞈ shaˉ paˍ ngaˬ hui htaꞈ hkʼaˬ hkʼe ga laˇ ve le?