“Gʼuˇ suhˍ peuˍ ve chaw” kʼoˆ ve tcuhˉ kuiˬ lehˬ awˬ kaˍ awˬ nu ve chaw gʼaꞈ kʼai tuˬ awˬ ti awˬ suhˉ yaꞈ kʼaw hpaw ve chaw hpehꞈ ve yoˬ. Yeˍsuˆ kaꞈ gʼuˇ suhˍ peuˍ ve chaw hkʼe hpehꞈ ve yoˬ. Chaw yaˇ htaꞈ a shaꞈ piˇ ve kanˉ yawˇ te tuˬ, Gʼuiˬ sha yawˇ htaꞈ miˬ guiˬ hkʼoˆ lo peu laˇ ve yoˬ. (Maꞈhtehˍ 20:28) Chi beuꞈ teˇ co˗e htawˇ, Yeˍsuˆ awˬ hkʼaˇ suh gʼaꞈ te ve chaw yawˇ htaꞈ henˇ yuˬ leh ‘chaw ceuˬ hkʼa peu˗eˬ awˬ laꞈ gʼawˇ hpehꞈ la tuˬ,’ coˇ caˇ leh te gʼa ve hkʼe te ve yoˬ. (Maꞈhtehˍ 28:19, 20) Teˇ hpaˍ hpaˍ gʼuˇ suhˍ peuˍ ve kanˉ te ve yoˬ.

Gʼuˇ suhˍ peuˍ ve chaw lehˬ awˬ yanˇ hkʼa biˇ hto toˇ ve chaw hpehꞈ ve yoˬ. Yaˬhoˉvaˬ ve Shaˉhkiˆhkanˍ ve chaw teˇ gʼaˇ le le lehˬ daꞈ ve awˬ lawn sha tanˇ hto toˇ ve chaw hpehꞈ ve yoˬ. Yaꞈ hkʼaˇ, teˇ hpaˍ hpaˍ coˇ caˇ leh hkʼaˬ htaˆ kaꞈ gʼuˇ suhˍ peuˍ ve chaw te ve yoˬ. Yawˇ hui hto toˇ ve kanˉ teˇ ha pa le le 70 naˍ riˍ te ve yoˬ. Chi hkʼe te tuˬ, laiˉ gʼaˇ a shu yawˇ ve a shaꞈ hu tuˬ kanˉ awˬ yanˇ hkʼa biˇ maˇ te. Awˬ nu ve chaw teˇ hpaˍ hto toˇ ve chaw loˍ jaˇ kuiˬ lo tcuh peu ve gʼuˇ suhˍ peuˍ ve chaw te ve yoˬ. Yawˇ hui teˇ ha pa le le 130 naˍ riˍ hpaˆ Gʼuiˬ sha ve kanˉ te ve yoˬ. Yawˇ hui ve a shaꞈ teꞈ hkʼaˇ caˇ lawꞈ dawˬ lawꞈ te leh, loˍ ve awˬ ceuˬ hkʼa peu˗eˬ Yaˬhoˉvaˬ piˇ laˇ tuˬ tehꞈ yawˇ hui hkʼa dehꞈ yonˍ ve yoˬ. (Maꞈhtehˍ 6:31-33; 1 Tiˆmoˉseˍ 6: 6-8) Awˬ yanˇ hkʼa biˇ gʼuˇ suhˍ peuˍ ve maˇ te gʼa ve htawˇ, chaw teˇ hpaˍ hpaˍ teˇ tcuhˉ teˇ yanˇ gʼuˇ suhˍ peuˍ ve chaw te gʼa sheˍ ve yoˬ. Yawˇ hui teˇ ha pa 30 maˇ heˆ leh 50 naˍ riˍ hto toˇ ve yoˬ.

Gʼuˇ suhˍ peuˍ ve chaw lehˬ Gʼuiˬ sha leh chaw yaˇ htaꞈ haꞈ ve pa taw kanˉ chi te ve yoˬ. Yeˍsuˆ gʼa mawˬ ve hkʼa shuˍ, chi beuꞈ ve chaw laiˉ gʼaˇ Gʼuiˬ sha ve awˬ lawn leh yawˇ ve a loˍ htaꞈ gʼa shiˍ ve tehꞈ ngaˬ hui gʼa mawˬ ve yoˬ. (Maˍkuˆ 6:34) Yaꞈ hkʼaˇ, daꞈ ve awˬ lawn ngaꞈ hui shiˍ taˍ ve lehˬ yawˇ htaꞈ chi teˇ hkui ga piˇ gʼa leh awˬ gʼuˇ suhˍ hpawˇ yeˬ ve dawˇ law kuiˬ htaꞈ htawˇ yawˇ cawˬ gʼa ve yoˬ. Gʼuˇ suhˍ peuˍ ve chaw awˬ paˇ awˬ kui chehˇ ve chaw htaꞈ haꞈ ve pa taw, daꞈ ve awˬ lawn sha tanˇ shu shiˍ la tuˬ, yawˇ hui ve awˬ yanˇ leh awˬ gʼaˇ awˬ shaˉ hkʼa dehꞈ yehˇ ve yoˬ. (Maꞈhtehˍ 22:39; 1 Hteˇsaˍlawˇniˆ 2:8) Oˇ hkʼe te ve pa taw, gʼuˇ suhˍ peuˍ ve chaw yawˇ hui ve yonˍ hkʼaˇ uiˍ la mvuh la ve, Gʼuiˬ sha htaꞈ meuˆ daꞈ maˇ la ve, leh ha lehˬ jaˇ ve yoˬ.—Tcuh yaˇ 20:35.

• Gʼuˇ suhˍ peuˍ ve chaw hkʼaˬ hkʼe hpehꞈ ve le?

• Aˬ htoꞈ ma pa taw teˇ hpaˍ hpaˍ gʼuˇ suhˍ peuˍ ve chaw te gaˇ ve le?