Liꞈ hpu hkʼaw kʼoˆ taˍ ve, Yeˍsuˆ Hkriꞈ suh peuˬ hkʼawꞈ nawˉ, Liꞈ hpu hkʼaw awˬ tehˬ ve htaꞈ te luˬ tuˬ awˉ lawˉ teˇ co˗e ve Hkriꞈ yaˇ hkʼaw maˇ heˆ heˆ ve maˍ paˍ cawˬ la tuˬ yoˬ. (Tcuh yaˇ 20:29, 30) Chi awˬ tehˬ hpehꞈ la ve yoˬ. Yawˇ hui Yeˍsuˆ maˍ hkawˇ htaꞈ lawˇ kiˍ yaˇ ve dawˇ hkʼaˇ hkʼaw hkʼawꞈ daꞈ maˍ ve yoˬ. Hkʼe te leh, maˇ heˆ heˆ ve Hkriꞈ yaˇ tanˬ cawˬ la ve yoˬ. (2 Tiˆmoˉseˍ 4:3, 4) Hkʼe kʼo, chi beuꞈ teˇ co˗e Liꞈ hpu hkʼaw awˬ tehˬ ve htaꞈ ngaˬ hui na gʼa˗oˬ tehꞈ hkʼaˬ hkʼe te shiˍ gʼa ve le?

Yaˬhoˉvaˬ awˬ tehˬ ve htaꞈ hpeuꞈ maw laˇ tuˬ awˬ yanˇ gaˬ˗oˬ ve yoˬ. Yawˇ kʼoˆ taˍ ve, ‘awˬ leh meuˇ ve awˬ yanˇ htaˇ, awˬ tehˬ ve maˇ maˇ cawˬ la tuˬ yoˬ.’ (Daˍyeˍlaˆ 12:4, MGS) 1870 hkʼawꞈ htaˇ, awˬ tehˬ ve htaꞈ gʼaꞈ ca ve chaw i ve awˬ moˍ teˇ moˍ lehˬ bon yehˬ hkʼaw maˍ ve teˇ hpaˍ Liꞈ hpu hkʼaw laˬ ve maˇ heˆ tehꞈ shiˍ la ve yoˬ. Chi htaꞈ pa taw, awˬ hkuiˉ puiˍ htaˇ Liꞈ hpu hkʼaw aˬ htoꞈ ma maˍ ve yawˇ hui tanˬ hpfuhˆ nyi leh, co ha hpawˇ ve awˬ lawn na gʼa tuˬ Yaˬhoˉvaˬ yawˇ hui htaꞈ awˬ bon naꞈ piˇ ve yoˬ.

Nyi ma hteˇ ve chaw Liꞈ hpu htaꞈ hkʼa dehꞈ henˇ ve yoˬ. Nyi ma hteˇ ve Liꞈ hpu Henˇ yaˇ ve Liꞈ hpu chaˬ nyi tuˬ awˬ hkʼaˇ htaꞈ chi beuꞈ teˇ co˗e ngaˬ hui kaꞈ yehˇ chehˇ sheˍ. Yawˇ hui Liꞈ hpu hkʼaw teˇ lawn peuˬ teˇ lawn chaˬ nyi ve yoˬ. Liꞈ hpu hkʼaw haˍ ve awˬ lawn na gʼa tuˬ, yawˇ hui awˬ nu ve Liꞈ hpu awˬ tawn gʼaꞈ ca ve yoˬ. Hawˍ daꞈ ve Liꞈ hpu awˬ tawn ca mawˬ htaˇ, yawˇ hui bvuhꞈ keu taˍ ve yoˬ. Chi hkʼe te ve pa taw, Gʼuiˬ sha ve awˬ meh, Gʼuiˬ sha ve mvuhˇ miˬ, chaw yaˇ leh miˬ guiˬ awˬ pon yawˇ ve a loˍ, suh peuˬ ve chaw ve awˬ lawn, leh teꞈ tu la ve dawˇ law kuiˬ chi teˇ hpaˍ yawˇ hui teˇ pawˆ kʼawꞈ ca mawˬ ve yoˬ. Yawˇ hui ca hpfuhˆ ve pa taw, maˇ heˆ heˆ ve yonˍ hkʼaˇ leh awˬ liˇ awˬ hkʼaˇ htaꞈ gʼa ponˬ ve yoˬ.—Yoˇhanˬ 8:31, 32.

1879 hkʼawꞈ gaˬ htaˇ, awˬ tehˬ ve chi teˇ kaˬ le le lo kaˇ tcuh tuˬ, awˬ yanˇ gaˬ la peuˬ tehꞈ Liꞈ hpu Henˇ yaˇ na gʼa ve yoˬ. Oˇ teˇ hkʼawꞈ htaˇ, yawˇ hui Shaw nyi kuiˬ Taꞈ yehˬ Yaˬhoˉvaˬ ve Mvuhˇ miˬ Kaˇ laˇ ve liꞈ htaꞈ tanˬ te tawˆ ve yoˬ. Liꞈ kʼoˆ chi ngaˬ hui chi beuꞈ kaꞈ yanˍ tawˆ chehˇ sheˍ ve yoˬ. Chi teˇ hkui, Liꞈ hpu hkʼaw awˬ tehˬ ve 750 hpaˆ chaw ceuˬ tawˇ hkawˇ 240 mvuhˇ miˬ hkʼaw ngaˬ hui hto piˇ chehˇ ve yoˬ. Awˬ tehˬ ve chi hkʼe taw biˇ ve maˇ cawˬ jaw sheˍ!

• Yeˍsuˆ Hkriꞈ suh peuˬ hkʼawꞈ nawˉ, Liꞈ hpu hkʼaw awˬ tehˬ ve hkʼaˬ hkʼe hpehꞈ la ve le?

• Liꞈ hpu hkʼaw awˬ tehˬ ve htaꞈ ngaˬ hui hkʼaˬ hkʼe te teˇ pawˆ kʼawꞈ ca mawˬ ve le?