‘Mvuhˇ miˬ teˇ peˆ le le, awˬ ceuˬ awˬ hkʼaˇ teˇ ceuˬ le le, tawˇ hkawˇ teˇ ceuˬ le le, chaw ceuˬ teˇ ceuˬ le le’ hkʼaw “ha lehˬ ve bon hkawˇ” hto maˍ piˇ gʼa tuˬ, ngaˬ hui liꞈ kʼoˆ 750 hpaˆ chaw ceuˬ tawˇ hkawˇ yanˍ tawˆ ve yoˬ. (Hpeuꞈ maˍ ve 14:6) Hkʼaˬ hkʼe te leh ngaˬ hui maˇ maˇ te gʼa ve le? Liꞈ bvuhꞈ paˍ leh yuˬ tawˆ ve chaw laiˉ mvuhˇ miˬ lo laˬ ve ngaˬ hui htaꞈ ga laˇ chehˇ ve yoˬ. Yawˇ hui teˇ gʼaˇ le le Yaˬhoˉvaˬ ve Shaˉhkiˆhkanˍ ve chaw hpehꞈ ve yoˬ.

Awˉ lawˉ htaˇ awˬ lawn teˇ hpaˍ Kaˇlaˇ hkawˇ hkʼaw bvuhꞈ taˍ ve yoˬ. Awˬ tcuhˆ puiˍ lonˉ lo Uˉ peunˍ ve Kawˍmiˍtiˍ Liꞈ bvuhꞈ ve hpawˇ htaꞈ nyi haꞈ shaˉ ve yoˬ. Awˬ tcuhˆ puiˍ lonˉ leh Awˬ nu ve awˬ tcuhˆ puiˍ lo chehˇ ve liꞈ bvuhꞈ paˍ teˇ hpaˍ htaꞈ awˬ vuiˬ gʼa tuˬ, Liꞈ bvuhꞈ ve hpawˇ ga piˇ ve yoˬ. Liꞈ bvuhꞈ paˍ laiˉ mvuhˇ miˬ lo laˬ ve pa taw, ngaˬ hui ve liꞈ kʼoˆ hkʼaw chaw liˇ vaˇ liˇ laiˉ ceuˬ htaꞈ caˉ daꞈ ve awˬ lawn cawˬ leh laiˉ mvuhˇ miˬ ve chaw gʼaw gaˇ ve yoˬ.

Awˬ lawn teˇ hpaˍ yuˬ tawˆ ve chaw htaꞈ feu piˇ ve yoˬ. Awˬ lawn teˇ hpaˍ gu leh chaˬ nyi peuˬ hkʼawꞈ nawˉ, miˬ guiˬ hkʼa peu˗eˬ hkʼoˆ yuˬ tawˆ ve awˬ moˍ htaꞈ hkaw hpi˗u teuˇ hkʼaw feu piˇ ve yoˬ. Yawˇ hui Kaˇlaˇ hkawˇ gʼaw leh yawˇ hui ve chaw ceuˬ tawˇ hkawˇ hkʼaw “na sha ve tawˇ teˇ hpaˍ” htaꞈ leuˆ yuˬ ve yoˬ.—Cuˇ yiˍ piˇ ve 12:10.

Kanˉ haˆ peuˬ tuˬ hkaw hpi˗u teuˇ yehˇ ve yoˬ. Liꞈ bvuhꞈ paˍ leh yuˬ tawˆ ve chaw awˬ tan hkaw hpi˗u teuˇ kanˉ te maˇ gʼa. Yaꞈ hkʼaˇ, hkaw hpi˗u teuˇ hkʼaw tawˇ hkawˇ tcuhˉ kuiˬ maˍ laˇ ve liꞈ, chaw ceuˬ tawˇ hkawˇ yehˇ ve htaꞈ ga laˇ tuˬ, leh hpfuhˆ nyi tuˬ teˇ hpaˍ cawˬ ve pa taw, yawˇ hui kanˉ haˆ haˆ te gʼa ve yoˬ. Yaˬhoˉvaˬ ve Shaˉhkiˆhkanˍ ve chaw Hkaw hpi˗u teuˇ hkʼaw laiˉ chaw ceuˬ tawˇ hkawˇ yanˍ tawˆ tuˬ ve awˬ hkʼeun (MEPS) te tawˆ ve yoˬ. Awˬ hkʼeun chi htaꞈ pa taw, ngaˬ hui ve liꞈ kʼoˆ laiˉ ha chaw ceuˬ tawˇ hkawˇ te gʼa ve, awˬ han cawˬ gʼa ve, leh yanˍ tawˆ gʼa ve yoˬ.

Chaw ceuˬ tawˇ hkawˇ teˇ hpaˍ hpaˍ kʼo, chaw hkʼaˬ nyiˇ hinˉ gʼaˇ maˇ yehˇ ve htawˇ, ngaˬ hui yuˬ tawˆ ve yoˬ. Aˬ htoꞈ ma pa taw ngaˬ hui chi taw taw coˇ caˇ ve le? Awˬ lawn kʼo, Yaˬhoˉvaˬ lehˬ “chaw hkʼa peu˗eˬ htaiˍ hkʼawꞈ ve htaꞈ gʼa tuˬ ve awˬ hkʼoˆ kaꞈ, hteˇ ve cawˇ ve htaꞈ shiˍ la tuˬ yawˇ heuˆ gaˇ ve yoˬ.”—1 Tiˆmoˉseˍ 2:3, 4.

• Ngaˬ hui ve liꞈ kʼoˆ hkʼaˬ hkʼe te leh te tawˆ la gʼa ve le?

• Aˬ htoꞈ ma pa taw ngaˬ hui ve liꞈ kʼoˆ laiˉ chaw ceuˬ tawˇ hkawˇ hkʼaw yuˬ tawˆ ve le?