Teˇ hkʼawꞈ le le ngaˬ hui ve kanˉ hkʼaˇ Liꞈ hpu leh awˬ nu ve liꞈ laiˉ ha lanˬ kʼoˆ yanˍ tawˆ leh chaw yaˇ htaꞈ a hkʼe leˇ pehˬ piˇ ve yoˬ. Ngaˬ hui Gʼuiˬ sha ve mvuhˇ miˬ Hpawnˬ daꞈ kuiˬ yehˬ leh Awˬ tcuhˆ puiˍ teˇ hpaˍ kaꞈ gu leh awˬ suhˉ kʼawꞈ te ve yoˬ. Beˍteˍlaˆ hkʼaw kanˉ te ve chaw leh miˍshenˍnaˍliˍ laiˉ hinˉ gʼaˇ htaꞈ kaꞈ ngaˬ hui nyi haꞈ shaˉ piˇ ve yoˬ. Kawˆ tuˬ dawˇ haˍ tuˬ hpehꞈ la htaˇ, ngaˬ hui ca ga piˇ ve yoˬ. Chi teˇ hpaˍ te tuˬ hpu hkʼaˬ kaˬ lo yuˬ laˬ ve le tehꞈ nawˬ htawˇ dawˇ nawˬ dawˇ cawˬ ve yoˬ hehˉ.

Ngaˬ hui hpu tanˇ maˇ shaw leh teˇ chi pun teˇ pun maˇ te. Hto toˇ ve kanˉ te gʼa tuˬ hpu gʼa yehˇ maˇ jaˇ ve htawˇ, ngaˬ hui hpu tanˇ maˇ shaw. Peuˬ taˉ ve 100 hkʼawꞈ hpaˆ htaˇ, Shaw nyi kuiˬ Taꞈ yehˬ liꞈ nyiˇ kʼoˆ teˇ kʼoˆ hkʼaw kʼoˆ ve, Yaˬhoˉvaˬ ngaˬ hui htaꞈ ga laˇ chehˇ ve tehꞈ ngaˬ hui yonˍ ve pa taw, “chaw yaˇ geh hpu lawˬ tuˬ ve maˇ heˆ.” Leh ngaˬ hui chi hkʼe maˇ te jaw!—Maꞈhtehˍ 10:8.

Ngaˬ hui ha lehˬ ve hkʼaw hpu tanˇ piˇ ve yoˬ. Ngaˬ hui Liꞈ hpu maˍ ve awˬ bon cawˬ ve yoˬ tehꞈ laiˉ gʼaˇ dawˇ leh kanˉ chi awˬ pon hpu tanˇ piˇ ve yoˬ. Miˬ guiˬ hkʼoˆ Gʼuiˬ sha ve a loˍ htaꞈ gʼaꞈ te tuˬ, Shaˉhkiˆhkanˍ ve chaw lehˬ awˬ yanˇ, awˬ gʼaˇ, hpu, leh awˬ nu ve awˬ ceuˬ ha lehˬ ve hkʼaw tanˇ piˇ ve yoˬ. (1 Raˍsaˍvanˍ 29:9) Hpawnˬ daꞈ kuiˬ yehˬ hkʼaw leh hpawnˬ daꞈ lonˉ hkʼaw hpu tanˇ keu kuiˬ cawˬ leh a shu teˇ gʼaˇ hpu tanˇ tanˇ gaˇ ve kʼo, keu gʼa ve yoˬ. Maˇ heˆ leh ngaˬ hui ve vehˆsaiˉ jw.org hkʼaw loꞈ˗e hpehꞈ ve yoˬ. Hpu tanˇ maˇ˗awˍ ve paw sha ve chaw geh gʼa ve maˇ heˆ. Mehˇ chawˇ ma pehꞈ shanˍ 2 pehꞈ hpu tanˇ keu kuiˬ lo keu ve teˇ gʼaˇ htaꞈ Yeˍsuˆ kʼoˆ taˍ ve yoˬ. Laiˉ gʼaˇ yawˇ htaꞈ shuˍ ve yoˬ. (Luˉkaꞈ 21:1-4) Chi htaꞈ pa taw, ngaˬ hui dawˇ teh taˍ ve hkʼe “hpu tanˇ piˇ tuˬ awˬ pon yuˬ tawˆ leh haꞈ shaˉ taˍ” gʼa ve yoˬ.—1 Kawˇrenˍhtuˆ 16:2; 2 Kawˇrenˍhtuˆ 9:7.

Yaˬhoˉvaˬ htaꞈ yawˆ yan gaˇ leh yawˇ ve kanˉ ga piˇ gaˇ ve chaw teˇ hpaˍ htaꞈ Yaˬhoˉvaˬ yawˇ hui ve nyi ma hkʼaw dawˇ pawnˍ piˇ chehˇ ve yoˬ. Chi hkʼe te ve lehˬ yawˇ ve a loˍ biˇ la tuˬ te piˇ chehˇ ve yoˬ.—Tawˇ naˉ ve 3:9.

• Aˬ htoꞈ ma pa taw ngaˬ hui ve kanˉ hkʼaˇ awˬ nu ve bon liˇ htaꞈ peun daꞈ ve le?

• Hpu tanˇ tanˇ taˍ ve htaꞈ ngaˬ hui hkʼaˬ hkʼe te yehˇ ve le?