Heˍlaˍsaˆ ve Liꞈ hpu awˬ tawn hkʼaw Baˍnaˍbaˆ leh tcuh yaˇ Pawˇluꞈ ve awˬ lawn laiˉ pawˆ kʼoˆ taˍ ve yoˬ. Chaw chi 2 gʼaˇ toˇ nyi shehˍ hpaˇ hpehꞈ leh awˉ lawˉ peuˇ ve Hkriꞈ yaˇ awˬ moˍ teˇ hpaˍ geh ca guiˇ˗e ve yoˬ. Aˬ htoꞈ ma pa taw le? Yawˇ huiˉ maˬ awˬ viˉ awˬ nyi Hkriꞈ yaˇ hkʼaˬ hkʼe hpehꞈ chehˇ ve htaꞈ dawˇ haˍ ve pa taw yoˬ. Pawˇluꞈ kʼoˆ ve, yawˇ “awˬ viˉ awˬ nyi teˇ hpaˍ hkʼaˬ hkʼe hpehꞈ chehˇ ve htaꞈ ca kʼawꞈ toˇ nyi” gaˇ ve yoˬ. Yawˇ hui htaꞈ awˬ gʼaˇ piˇ tuˬ, yawˇ laiˉ ha kiˇ loˇ te toˇ ve yoˬ. (Tcuh yaˇ 15:36) Chi beuꞈ teˇ co˗e ve toˇ nyi shehˍ hpaˇ kaꞈ oˇ hkʼe te gaˇ ve yoˬ.

Yawˇ hui ngaˬ hui htaꞈ awˬ gʼaˇ peꞈ laˇ ve yoˬ. Toˇ nyi shehˍ hpaˇ Hkriꞈ yaˇ awˬ moˍ teˇ kaˬ ve hkʼaw 1 hkʼawꞈ 2 pawˆ ca guiˇ˗e ve yoˬ. Teˇ pawˆ le le yawˇ 1 shinˉ chehˇ ve yoˬ. Toˇ nyi shehˍ hpaˇ teˇ gʼaˇ Hkriꞈ yaˇ awˬ moˍ aˬ laˬ hkʼe 20 kaˬ kʼai ve yoˬ. Yawˇ leh yawˇ ve awˬ miˇ ma laiˉ ceuˬ gʼa hpuˇ ve pa taw, ngaˬ hui htaꞈ hkʼa dehꞈ ga laˇ gʼa ve yoˬ. Yawˇ hui coˇ caˇ leh chaw mawˇ maˇ kʼoˆ, yaˇ nehˬ maˇ kʼoˆ, teˇ gʼaˇ le le htaꞈ shiˍ daꞈ tuˬ te ve yoˬ. Ngaˬ hui geh teˇ geh hto toˇ leh Liꞈ hpu henˇ chehˇ ve chaw htaꞈ teˇ geh ca maˍ piˇ˗e ve yoˬ. Toˇ nyi shehˍ hpaˇ lehˬ nyi haꞈ shaˉ paˍ geh teˇ geh awˬ viˉ awˬ nyi htaꞈ awˬ gʼaˇ ca piˇ˗e ve yoˬ. Ngaˬ hui co ha hpawˇ uiˍ la mvuh la tuˬ, hpawnˬ daꞈ lonˉ leh Hkriꞈ yaˇ awˬ moˍ hkʼaw hpawnˬ daꞈ ve hkʼaw yawˇ hui bon maˍ ve yoˬ.—Tcuh yaˇ 15:35.

Yawˇ hui teˇ gʼaˇ le le htaꞈ dawˇ nyi piˇ ve yoˬ. Toˇ nyi shehˍ hpaˇ lehˬ Hkriꞈ yaˇ awˬ moˍ co ha hpawˇ hkʼaˬ hkʼe hpehꞈ chehˇ ve htaꞈ dawˇ haˍ ve yoˬ. Yawˇ nyi haꞈ shaˉ paˍ leh ga piˇ shehˍ hpaˇ geh hpawnˬ daꞈ leh, Hkriꞈ yaˇ awˬ moˍ hkʼaˬ hkʼe te uiˍ la mvuh la gʼa tuˬ, leh yawˇ hui ve awˬ vuiˬ daꞈ ve hkʼaw hkʼaˬ hkʼe te leh te gʼa tuˬ beˆ maˍ piˇ ve yoˬ. Yawˇ hui gʼuˇ suhˍ peuˍ ve chaw kanˉ daꞈ ve hkʼaw te gʼa tuˬ ga piˇ leh, hpawnˬ daꞈ la ve chaw awˬ suhˉ htaꞈ kaꞈ shiˍ daꞈ gaˇ ve yoˬ. Yawˇ hui co ha hpawˇ hkʼaˬ hkʼe te uiˍ la mvuh la ve htaꞈ yawˇ a yeˇ yuˬ ve yoˬ. Awˬ viˉ awˬ nyi chi teˇ hpaˍ ngaˬ hui geh “teˇ geh kanˉ te shehˍ hpaˇ” hpehꞈ ve yoˬ. (2 Kawˇrenˍhtuˆ 8:23) Yawˇ hui ve yonˍ hkʼaˇ leh Gʼuiˬ sha htaꞈ yawˆ yan ve nyi ma ngaˬ hui henˇ yuˬ cawˇ ve yoˬ. —Heˍbrehˇ 13:7.

• Toˇ nyi shehˍ hpaˇ aˬ htoꞈ ma te Hkriꞈ yaˇ awˬ moˍ geh ca guiˇ la ve le?

• Yawˇ hui laˬ htaˇ, nawˬ aˬ htoꞈ ma awˬ bon gʼa tuˬ le?