Aˬ htoꞈ ma pa taw chaw chi teˇ hpaˍ ha lehˬ jaˇ ve le? Yawˇ hui hpawnˬ daꞈ lonˉ lo chehˇ ve pa taw yoˬ. Aˬ sho˗eˬ htaˇ, Gʼuiˬ sha htaꞈ oˉ kʼoˍ pui ve chaw teˇ hkʼawꞈ ve hkʼaw 3 pawˆ teˇ gʼaˇ le le teˇ geh hpawnˬ daꞈ tuˬ awˬ liˇ tawˇ hkawˇ cawˬ taˍ ve yoˬ. (Bon maˍ ve 16:16) Chi beuꞈ teˇ co˗e ngaˬ hui kaꞈ hkʼa shuˍ te gʼa ve ha lehˬ jaˇ. Teˇ hkʼawꞈ le le ngaˬ hui hpawnˬ daꞈ lonˉ teˇ nyi hkʼa peu˗eˬ 2 pawˆ cawˬ leh hpawnˬ daꞈ lonˉ shehˆ nyi 1 pawˆ cawˬ ve yoˬ. Hpawnˬ daꞈ ve chi teˇ hpaˍ hkʼaw ngaˬ hui aˬ htoꞈ ma awˬ bon gʼa ve le?

Ngaˬ hui Hkriꞈ yaˇ awˬ viˉ awˬ nyi geh meuˆ daꞈ maˇ la tuˬ ga laˇ ve yoˬ. Iˉsaˍreˍlaˆ chaw lehˬ “chaw moˍ lonˉ hpawnˬ daꞈ kuiˬ hkʼaw lo” Yaˬhoˉvaˬ htaꞈ chiˇ mvuh htaˇ ha lehˬ ve hkʼa shuˍ, ngaˬ hui kaꞈ hpawnˬ daꞈ lonˉ hkʼaw yawˇ htaꞈ ha lehˬ ve hkʼaw oˉ kʼoˍ teˇ geh pui gʼa ve yoˬ. (Chiˇ mvuh ve 26:12; 111:1) Hpawnˬ daꞈ lonˉ chi ve hkʼaw laiˉ hkʼaˆ leh laiˉ mvuhˇ miˬ lo laˬ ve awˬ viˉ awˬ nyi htaꞈ ngaˬ hui gʼa mawˬ daꞈ leh awˬ chawˇ te daꞈ gʼa ve yoˬ. Sha gʼuˇ htaˇ hpawnˬ daꞈ kuiˬ hkʼaw awˍ teˇ geh caˇ ve pa taw, ngaˬ hui awˬ chawˇ te daꞈ ve ha lehˬ jaˇ. (Tcuh yaˇ 2:42) Oˇ kaˬ lo miˬ guiˬ hkʼa peu˗eˬ hkʼoˆ chehˇ ve “awˬ viˉ awˬ nyi teˇ hpaˍ” haꞈ pehnˇ ve htaꞈ ngaˬ hui a shu yawˇ hkʼaˇ yawˇ gʼa mawˬ ve yoˬ.—1 Peˍtruˆ 2:17.

Ngaˬ hui co ha hpawˇ uiˍ la mvuh la tuˬ ga laˇ ve yoˬ. Gʼuiˬ sha ve “awˬ liˇ tawˇ hkawˇ teˇ hpaˍ htaꞈ na gʼa” tuˬ, sheh kʼai paˍ tcuhˉ kuiˬ yuˬ tawˆ leh maˍ piˇ ve pa taw, Iˉsaˍreˍlaˆ chaw awˬ bon gʼa ve yoˬ. (Neˍhaˍmiˆ 8:8, 12) Hpawnˬ daꞈ lonˉ hkʼaw Liꞈ hpu htaꞈ cuˇ leh maˍ ve lehˬ ngaˬ hui ha lehˬ tuˬ te laˇ ve yoˬ. Hpawnˬ daꞈ lonˉ hkʼaw awˬ lawn teˇ lawn le le Liꞈ hpu htaꞈ cuˇ ve yoˬ. Ngaˬ hui Gʼuiˬ sha ve a loˍ awˬ hkʼaˇ suh gʼaꞈ te gʼa tuˬ, bon maˍ hkawˇ leh te maˍ ve hkʼa peu˗eˬ maˍ laˇ ve yoˬ. Haˍ ve awˬ yanˇ awˬ hkʼaw lo awˬ nu ve Hkriꞈ yaˇ kaꞈ tuꞈ hkanˍ ve gʼa hpuˇ leh gʼaˇ ve yoˬ. Yawˇ hui awˬ lawn kʼoˆ maˍ laˇ htaˇ, ngaˬ hui awˬ gʼaˇ gʼa ve yoˬ. Hpawnˬ daꞈ lonˉ shehˆ nyi htaˇ Liꞈ hpu hkʼaw ve awˬ lawn awˬ han cawˬ leh, maˍ laˇ ve chi awˬ tehˬ awˬ na yuˬ yehˇ gʼa ve yoˬ. Hpawnˬ daꞈ lonˉ lo teˇ pawˆ le le hkʼaw Gʼuiˬ sha htaꞈ awˬ to chiˇ aꞈ piˇ ve chaw awˬ pon Baˆtiˆsaˬ haꞈ yuˬ kuiˬ gu taˍ ve yoˬ.

• Aˬ htoꞈ ma pa taw ngaˬ hui hpawnˬ daꞈ lonˉ lo kʼai htaˇ ha lehˬ ve le?

• Hpawnˬ daꞈ lonˉ lo kʼai ve kʼo, nawˬ aˬ htoꞈ ma awˬ bon gʼa tuˬ le?