Chaw laiˉ gʼaˇ bon ca lawˬ˗e htaˇ, co ha hpawˇ beˆ maˍ laˇ ve leh awˬ gʼaˇ maˇ gʼa ve pa taw, yawˇ hui maˇ kʼai˗o ve yoˬ. Yaꞈ hkʼaˇ, aˬ htoꞈ ma pa taw nawˬ Yaˬhoˉvaˬ ve Shaˉhkiˆhkanˍ ve chaw geh ca hpawnˬ daꞈ˗e cawˇ ve le? Nawˬ oˇ kaˬ lo aˬ htoꞈ ma gʼa mawˬ ve le?

Haꞈ daꞈ leh dawˇ nyi puiˉ ve chaw geh chehˇ ve pa taw, nawˬ gʼa ha lehˬ ve yoˬ. Awˉ lawˉ peuˇ ve Hkriꞈ yaˇ htaꞈ Hkriꞈ yaˇ awˬ moˍ cawˬ tcuh ve yoˬ. Gʼuiˬ sha htaꞈ oˉ kʼoˍ pui tuˬ, Liꞈ hpu henˇ tuˬ, leh awˬ gʼaˇ piˇ daꞈ tuˬ yawˇ hui hpawnˬ daꞈ ve yoˬ. (Heˍbrehˇ 10:24, 25) Teˇ gʼaˇ le le haꞈ daꞈ ve pa taw, yawˇ hui awˬ tehˬ ve awˬ chawˇ leh co ha hpawˇ ve awˬ viˉ awˬ nyi hpehꞈ ve tehꞈ dawˇ ve yoˬ. (2 Hteˇsaˍlawˇniˆ 1:3; 3 Yoˇhanˬ 14) Yawˇ hui htaꞈ henˇ yuˬ ve pa taw, ngaˬ hui kaꞈ yawˇ hui hkʼa shuˍ dawˇ ve yoˬ.

Liꞈ hpu hkʼaw ve awˬ liˇ awˬ hkʼaˇ gʼa henˇ leh yuˬ yehˇ ve pa taw, nawˬ awˬ bon gʼa ve yoˬ. Liꞈ hpu ve awˬ co˗e hkʼa shuˍ, hawˉ hkʼaˆ yaˇ miˇ yaˇ ehˉ teˇ gʼaˇ le le teˇ geh hpawnˬ daꞈ ve yoˬ. Liꞈ hpu hkʼaw ve awˬ liˇ awˬ hkʼaˇ a shaꞈ teꞈ kuiˬ hkʼaw yuˬ yehˇ ve awˬ hkʼaˇ ngaˬ hui shiˍ tuˬ, awˬ vuiˬ te keunˍ ve hawˉ hkʼaˆ Liꞈ hpu htaꞈ cuˇ leh maˍ laˇ ve yoˬ. (Bon maˍ ve 31:12; Neˍhaˍmiˆ 8:8) Hkriꞈ yaˇ ve dawˇ law kuiˬ cawˬ ve tehꞈ hpeuꞈ maw piˇ tuˬ, ngaˬ hui teˇ gʼaˇ le le na hkawˇ hkʼawꞈ leh kʼa muiˬ hkawˇ kʼa gʼa ve yoˬ.—Heˍbrehˇ 10:23.

Gʼuiˬ sha htaꞈ yonˍ ve teˇ ceuˬ uiˍ la mvuh la ve yoˬ. Tcuh yaˇ Pawˇluꞈ Hkriꞈ yaˇ awˬ moˍ teˇ moˍ htaꞈ kʼoˆ piˇ ve, ‘nawˬ hui htaꞈ ngaˬ mawˬ gaˇ jaˇ ve yoˬ. Ngaˬ yonˍ ve leh nawˬ hui yonˍ ve awˬ hkʼaw lo, teˇ gʼaˇ htaꞈ teˇ gʼaˇ awˬ gʼaˇ piˇ daꞈ tuˬ awˬ pon yoˬ.’ (Roˉmaꞈ 1:11, 12) Hpawnˬ daꞈ kuiˬ lo hkʼaˬ htaˆ kaꞈ kʼai leh yonˍ hkʼaˇ hkʼa shuˍ˗ehˬ ve chaw geh awˬ chawˇ te daꞈ ve kʼo, ngaˬ hui ve yonˍ hkʼaˇ kaꞈ uiˍ la mvuh la leh ngaˬ hui Hkriꞈ yaˇ hkʼe a shaꞈ teꞈ tuˬ awˬ gʼaˇ gʼa ve yoˬ.

Awˬ ceuˬ chi teˇ hpaˍ htaꞈ nawˬ hkʼaˇ nawˬ gʼa shiˍ tuˬ, ngaˬ hui geh hpawnˬ daꞈ la sheˍ. Ngaˬ hui nawˬ htaꞈ ha lehˬ ha kʼa haꞈ yuˬ laˇ tuˬ yoˬ. Hpawnˬ daꞈ ve chi hpu peuˬ tuˬ maˇ loˍ, teˇ gʼaˇ le le laˬ hpehꞈ ve yoˬ.

• Ngaˬ hui hpawnˬ daꞈ ve awˬ hkʼaˇ a shu htaꞈ henˇ yuˬ ve le?

• Ngaˬ hui geh hpawnˬ daꞈ la ve kʼo, aˬ htoꞈ ma awˬ bon gʼa ve le?