Awˉ lawˉ peuˇ ve Hkriꞈ yaˇ hpawnˬ daꞈ htaˇ, yawˇ hui awˬ liˇ awˬ hkʼaˇ gʼaꞈ te ve ceh tiˉ maˇ heˆ. Yawˇ hui kʼa muiˬ hkawˇ kʼa ve, bon lawˬ ve, leh Liꞈ hpu gʼaw leh dawˇ nyi ve yoˬ. (1 Kawˇrenˍhtuˆ 14:26) Ngaˬ hui hpawnˬ daꞈ ve lehˬ oˇ htaˇ teˇ co˗e ve htaꞈ shuˍ daꞈ jaˇ.

Maˍ laˇ ve awˬ lawn lehˬ Liꞈ hpu htaꞈ cuˇ leh awˬ tehˬ yuˬ yehˇ gʼa ve yoˬ. Hkawꞈ nyi maˇ heˆ kʼo Shinˉ nyi htaˇ, Hkriꞈ yaˇ awˬ moˍ teˇ kaˬ le le lo Liꞈ hpu hkʼaw bon maˍ hkawˇ cawˬ ve yoˬ. Bon maˍ hkawˇ chi awˬ yanˇ 30 miꞈ niꞈ yehˇ leh ngaˬ hui chehˇ taˍ ve awˬ co˗e leh Liꞈ hpu awˬ tawn teˇ hpaˍ a shaꞈ teꞈ hkʼaˇ htaꞈ hkʼaˬ hkʼe te caˉ daꞈ ve kʼoˆ maˍ laˇ ve yoˬ. Teˇ gʼaˇ le le a shu yawˇ ve Liꞈ hpu hkʼaw gʼaꞈ nyi ve yoˬ. Peuˬ hkʼawꞈ nawˉ, awˬ yanˇ teˇ naˍ riˍ yehˇ leh “Shaw nyi kuiˬ Taꞈ yehˬ” henˇ ve yoˬ. Hpawnˬ daꞈ chehˇ ve chaw teˇ gʼaˇ le le teˇ geh jehˬ daꞈ ve yoˬ. Liꞈ hpu hkʼaw beˆ maˍ laˇ hkawˇ ngaˬ hui hkʼaˬ hkʼe te yuˬ yehˇ gʼa tuˬ, jehˬ daꞈ ve chi ga laˇ gʼa ve yoˬ. Miˬ guiˬ hkʼa peu˗eˬ hkʼoˆ Hkriꞈ yaˇ awˬ moˍ 110,000 kaˬ hpaˆ awˬ hkʼaw lo awˬ lawn hkʼa shuˍ˗ehˬ henˇ ve yoˬ.

Ngaˬ hui maˍ puiˉ la tuˬ ga laˇ ve yoˬ. Teˇ shinˉ le le awˬ hkʼaw lo teˇ nyi ngaˬ hui teˇ pawˆ kʼawꞈ hpawnˬ daꞈ ve yoˬ. Ngaˬ hui Hkriꞈ yaˇ a shaꞈ teꞈ hkʼaˇ leh Gʼuiˬ sha kanˉ te ve meh ve hpawnˬ daꞈ ve chi shehˆ tawn cawˬ leh, A shaꞈ teꞈ hkʼaˇ leh Gʼuiˬ sha kanˉ te ve Hpawnˬ daꞈ ve te jawˬ tuˬ liꞈ kʼoˆ htaꞈ cuˇ ve yoˬ. Awˉ lawˉ teˇ tawn lehˬ, Liꞈ hpu hkʼaw awˬ hpfuhˇ hkʼaˆ ve awˬ ceuˬ meh ve leh, awˬ viˉ awˬ nyi awˉ lawˉ gʼaw cawˇ ve Liꞈ hpu awˬ tawn htaꞈ hkʼa dehꞈ kʼoˆ maˍ laˇ ve yoˬ. Nyiˇ tawn teˇ tawn lehˬ, Nawˬ hto toˇ kuiˬ lo yuˬ yehˇ tuˬ ve awˬ lawn meh ve leh, shu geh Liꞈ hpu jehˬ daꞈ tuˬ te maˍ laˇ ve yoˬ. Ngaˬ hui gʼaw puiˉ leh tawˇ yaw ve awˬ hkʼaˇ shiˍ la tuˬ, beˆ maˍ laˇ paˍ ga laˇ ve yoˬ. (1 Tiˆmoˉseˍ 4:13) Awˬ leh meuˇ teˇ tawn lehˬ, Hkriꞈ yaˇ ve a shaꞈ teꞈ hkʼaˇ meh ve leh, Liꞈ hpu hkʼaw ve awˬ liˇ awˬ hkʼaˇ ngaˬ hui a shaꞈ te kuiˬ hkʼaw yehˇ tuˬ kʼoˆ maˍ laˇ ve yoˬ. Liꞈ hpu hkʼaw hkʼa dehꞈ na gʼa tuˬ, na hkʼawꞈ daꞈ ve kaꞈ cawˬ ve yoˬ.

Nawˬ ngaˬ hui geh hpawnˬ daꞈ la htaˇ, Liꞈ hpu htaꞈ cuˇ leh maˍ ve daꞈ jaˇ ve pa taw nawˬ dawˇ cawˇ tuˬ yoˬ.—Iˉsaˍyaˆ 54:13.

• Yaˬhoˉvaˬ ve Shaˉhkiˆhkanˍ ve chaw ve hpawnˬ daꞈ ve hkʼaw aˬ htoꞈ ma cawˬ ve le?

• Nawˬ hpawnˬ daꞈ ve hkʼaˬ teˇ tawn hkʼaw kʼai gaˇ ve le?