Awˉ lawˉ peuˇ Hkriꞈ yaˇ ve awˬ co˗e htaˇ, a yeˇ uiˍ ve awˬ lawn htaꞈ Hkriꞈ yaˇ awˬ moˍ hkʼa peu˗eˬ awˬ tan jehˬ cheˆ tuˬ “Yeˍruˆsaˍlehnˍ venˇ lo chehˇ ve tcuh yaˇ hui leh awˬ hoˉ chaw mawˇ teˇ hpaˍ” uˉ peunˍ ve kawˍmiˍtiˍ kanˉ teˇ geh te ve yoˬ. (Tcuh yaˇ 15:2) I ve awˬ moˍ chi Liꞈ hpu awˬ tawn teˇ hpaˍ hkʼa dehꞈ chaˬ nyi leh Gʼuiˬ sha ve awˬ ha hpu beˆ maˍ piˇ ve awˬ hkʼaˇ suh gʼaꞈ te ve pa taw, yawˇ hui nyi ma teˇ shiˍ tiˉ taˍ ve hkʼaw jehˬ cheˆ gʼa ve yoˬ. (Tcuh yaˇ 15:25) Chi beuꞈ teˇ co˗e htawˇ, oˇ htaˇ hkʼa shuˍ gʼaꞈ te ve yoˬ.

Gʼuiˬ sha yawˇ hui htaꞈ yehˇ leh yawˇ ve a loˍ gʼaꞈ te tcuh ve yoˬ. Uˉ peunˍ ve Kawˍmiˍtiˍ hkʼaw chehˇ ve chaw lehˬ awˬ viˉ awˬ nyi hawˉ hkʼaˆ leuˆ yuˬ taˍ ve chaw hpehꞈ ve yoˬ. Yawˇ hui Gʼuiˬ sha ve tawˇ hkawˇ a yeˇ te jaˇ leh Gʼuiˬ sha ve kanˉ leh co ha hpawˇ ve awˬ lawn nyi haꞈ shaˉ ve maw jaˇ˗oˬ. Yawˇ hui teˇ shinˉ le le hpawnˬ daꞈ leh miˬ guiˬ hkʼa peu˗eˬ hkʼoˆ awˬ viˉ awˬ nyi loˍ ve htaꞈ teˇ geh chaˬ nyi ve yoˬ. Awˉ lawˉ peuˇ ve Hkriꞈ yaˇ awˬ co˗e htaˇ hkʼa shuˍ, Uˉ peunˍ ve Kawˍmiˍtiˍ Liꞈ hpu htaꞈ cuˇ leh beˆ maˍ laˇ tuˬ, ngaˬ hui htaꞈ liꞈ bvuhꞈ feu laˇ ve, maˇ heˆ leh toˇ nyi shehˍ hpaˇ leh awˬ kaˍ awˬ nu ve chaw htaꞈ cuˇ leh maˍ laˇ ve yoˬ. Chi htaꞈ pa taw, yawˇ hui Gʼuiˬ sha ve chaw hkʼa peu˗eˬ htaꞈ te hkʼaˇ dawˇ hkʼaˇ hawˍ daꞈ tcuh laˇ ve yoˬ. (Tcuh yaˇ 16:4, 5) Uˉ peunˍ ve Kawˍmiˍtiˍ co ha hpawˇ ve caˇ tuˬ pehˬ piˇ leh, Gʼuiˬ sha ve mvuhˇ miˬ awˬ lawn hto toˇ ve kanˉ hkʼa dehꞈ te tuˬ ngaˬ hui htaꞈ awˬ gʼaˇ peꞈ laˇ ve yoˬ. Awˬ viˉ awˬ nyi htaꞈ awˬ vuiˬ aꞈ piˇ tuˬ ve awˬ hkʼaˇ kaꞈ yawˇ hui nyi haꞈ shaˉ ve yoˬ.

Gʼuiˬ sha ve awˬ ha hpu beˆ maˍ piˇ ve awˬ hkʼaˇ suh yawˇ hui gʼaꞈ te ve yoˬ. Uiˍ jaˇ mvuh jaˇ ve Uˉ peunˍ shehˍ hpaˇ Yaˬhoˉvaˬ leh Hkriꞈ yaˇ awˬ moˍ ve awˬ hoˉ Yeˍsuˆ beˆ maˍ piˇ ve htaꞈ Uˉ peunˍ ve Kawˍmiˍtiˍ gʼaꞈ te ve yoˬ. (1 Kawˇrenˍhtuˆ 11:3; Eˇfeˇsuꞈ 5:23) Uˉ peunˍ ve Kawˍmiˍtiˍ hkʼaw teˇ gʼaˇ leh teˇ gʼaˇ Gʼuiˬ sha ve chaw awˬ hkʼoˆ awˬ hoˉ te ve tehꞈ yawˇ hui maˇ shawˍ. Yawˇ hui leuˆ yuˬ taˍ ve Hkriꞈ yaˇ teˇ gʼaˇ le le geh teˇ geh “Yawˬ ehˉ [Yeˍsuˆ] hkʼa kʼai kuiˬ teˇ kaˬ le le lo awˬ hkʼaˇ suh kʼai” ve yoˬ. (Hpeuꞈ maˍ ve 14:4) Uˉ peunˍ ve Kawˍmiˍtiˍ ngaˬ hui htaꞈ yawˇ hui awˬ pon bon lawˬ tcuh gaˇ ve yoˬ.

• Awˉ lawˉ peuˇ ve Hkriꞈ yaˇ ve awˬ co˗e htaˇ, uˉ peunˍ ve kawˍmiˍtiˍ hkʼaw a shu chehˇ ve le?

• Chi beuꞈ teˇ co˗e, Uˉ peunˍ ve Kawˍmiˍtiˍ Gʼuiˬ sha beˆ maˍ piˇ ve htaꞈ hkʼaˬ hkʼe gʼaꞈ te ve le?