Yeˍsuˆ yawˇ ve awˬ laꞈ gʼawˇ htaꞈ kʼoˆ piˇ ve, “nawˬ hui htawˇ awˬ gʼeuˆ ba piˇ˗oˆ. Oˇ hkʼe te ve kʼo, nawˬ hui ve daꞈ ve kanˉ htaꞈ shu gʼa mawˬ htaˇ, mvuhˇ naw ma hkʼoˆ chehˇ ve nawˬ hui ve Awˬ pa htaꞈ chiˇ uiˍ chiˇ mvuh piˇ tuˬ yoˬ.” (Maꞈhtehˍ 5:16) Ngaˬ hui oˇ hkʼe te gʼa tuˬ, In˗teu˗neꞈ htaꞈ htawˇ yehˇ ve yoˬ. Yaˬhoˉvaˬ ve Shaˉhkiˆhkanˍ ve chaw ve yonˍ hkʼaˇ leh kanˉ teˇ hpaˍ shu htaꞈ shiˍ tcuh tuˬ, ngaˬ hui ve vehˆsaiˉ jw.org ga piˇ gʼa ve yoˬ. Vehˆsaiˉ chi ve hkʼaw aˬ htoꞈ ma cawˬ ve le?

Laiˉ gʼaˇ shiˍ gaˇ ve awˬ lawn Liꞈ hpu hkʼaw hkʼawꞈ laˇ hkawˇ cawˬ ve yoˬ. Chaw yaˇ shiˍ gaˇ jaˇ ve a yeˇ uiˍ ve awˬ lawn laiˉ lawn kʼoˆ maˍ laˇ ve yoˬ. Tawˇ pa haˉ te kʼo, Tuꞈ hkanˍ dawˇ haˍ ve peuˬ kʼai tuˬ awˬ nyi cawˬ˗aw laˇ? leh Suh peuˬ ve chaw kʼawꞈ teꞈ la hpehꞈ ve laˇ? liꞈ kʼoˆ ehˉ chi teˇ hpaˍ 600 hpaˆ chaw ceuˬ tawˇ hkawˇ cawˬ ve yoˬ. Chi hkʼoˆ kaꞈ, Miˬ guiˬ awˬ suhˉ yuˬ tawˆ ve Liꞈ hpu 130 hpaˆ chaw ceuˬ tawˇ hkawˇ cawˬ ve yoˬ. Liꞈ hpu ngaˬ hui htaꞈ aˬ htoꞈ ma maˍ laˇ gʼa ve le?, Shaw nyi kuiˬ Taꞈ yehˬ, Tu loˬ!, leh Liꞈ hpu henˇ tuˬ ve awˬ nu ve liꞈ kaꞈ cawˬ ve yoˬ. Liꞈ chi teˇ hpaˍ vehˆsaiˉ hkʼaw gʼaw gʼa leh awˬ hkawˇ na gʼa ve yoˬ. Maˇ heˆ kʼo, MP3, PDF, EPUB dao lonꞈ gʼa ve yoˬ. Nyi ma pfuhˇ ve chaw yawˇ hui ve chaw ceuˬ tawˇ hkawˇ ve liꞈ nawˬ hkaw hpi˗u teuˇ (computer) yehˇ leh liꞈ kʼoˆ yanˍ piˇ gʼa ve yoˬ! Laꞈ sheh te ve tawˇ hkawˇ awˬ han htawˇ, laiˉ chaw ceuˬ tawˇ hkawˇ cawˬ ve yoˬ. Liꞈ hpu gʼaw ve, Liꞈ hpu gʼaw ve awˬ hkawˇ tawˆ ve awˬ han, leh na sha ve kʼa muiˬ hkawˇ htaꞈ nawˬ tanˇ htaˇ na hpehꞈ ve yoˬ.

Yaˬhoˉvaˬ ve Shaˉhkiˆhkanˍ ve chaw htaꞈ caˉ daꞈ ve cawˇ ve awˬ lawn cawˬ ve yoˬ. Awˬ lawn sha tanˇ awˬ suhˉ, miˬ guiˬ hkʼa peu˗eˬ hkʼoˆ ngaˬ hui ve kanˉ htaꞈ caˉ daꞈ ve VDO, Yaˬhoˉvaˬ ve Shaˉhkiˆhkanˍ ve chaw htaꞈ heuˆ la kuiˬ cawˬ ve awˬ lawn leh ngaˬ hui shu htaꞈ ga piˇ ve awˬ lawn chi teˇ hpaˍ kaꞈ vehˆsaiˉ hkʼaw cawˬ ve yoˬ. Gaˬ la paˇ neˇ ve hpawnˬ daꞈ lonˉ shehˆ nyi ve awˬ yanˇ leh awˬ ti leh Awˬ tcuhˆ puiˍ teˇ hpaˍ htaꞈ caˉ daꞈ tuˬ awˬ hkʼaˇ nawˬ ca gʼa ve yoˬ.

Awˬ hkʼaˇ chi teˇ hpaˍ htaꞈ pa taw, miˬ guiˬ chi hkʼoˆ vuiˇ jaˇ kuiˬ lo ngaˬ hui awˬ gʼeuˆ ba piˇ chehˇ ve yoˬ. Miˬ guiˬ hkʼa peu˗eˬ hkʼoˆ ve chaw yaˇ leh Anˍtaˍtiˆ miˬ guiˬ lo chehˇ ve chaw htawˇ, awˬ bon gʼa ve yoˬ. ‘Yaˬhoˉvaˬ ve tawˇ hkawˇ haˆ haˆ bvuhˬ kʼai leh yawˇ awˬ meꞈ awˬ hponˇ’ gʼa tuˬ, ngaˬ hui bon lawˬ ve yoˬ.—2 Hteˇsaˍlawˇniˆ 3:1.

• Liꞈ hpu hkʼaw ve awˬ tehˬ ve laiˉ gʼaˇ henˇ gʼa tuˬ, vehˆsaiˉ jw.org hkʼaˬ hkʼe ga piˇ chehˇ ve le?

• Ngaˬ hui ve vehˆsaiˉ hkʼaw nawˬ aˬ htoꞈ ma ca nyi gaˇ ve le?