Aˬ sho˗eˬ htaˇ tanˬ leh, yehˬ kʼa hkʼaw ve chaw Yaˬhoˉvaˬ geh meuˆ daꞈ tuˬ, teˇ gʼaˇ leh teˇ gʼaˇ kaꞈ meuˆ daꞈ tuˬ, Yaˬhoˉvaˬ yawˇ hui htaꞈ hkʼaˬ htaˆ kaꞈ teˇ geh chehˇ tcuh gaˇ ve yoˬ. (Bon maˍ ve 6:6, 7) Chi htaꞈ pa taw, Yaˬhoˉvaˬ ve Shaˉhkiˆhkanˍ ve chaw teˇ shinˉ le le awˬ yanˇ fuiˍ teh taˍ leh yehˬ kʼa hkʼaw oˉ kʼoˍ teˇ geh pui ve yoˬ. Liꞈ hpu hkʼaw yawˇ hui htaꞈ hawˍ daꞈ ve awˬ lawn gawˬ lehˍ ve hkʼaw teˇ geh jehˬ daꞈ ve yoˬ. Teˇ gʼaˇ tiˉ chehˇ ve htawˇ, Gʼuiˬ sha geh meuˆ daꞈ tuˬ nawˬ hkʼaˇ nawˬ Liꞈ hpu awˬ tawn leuˆ yuˬ leh henˇ gʼa ve yoˬ.

Yaˬhoˉvaˬ geh meuˆ daꞈ maˇ la tuˬ ve awˬ yanˇ hpehꞈ ve yoˬ. “Gʼuiˬ sha geh jiˆ laˬ˗oꞈ. Hkʼe te kʼo, yawˇ nawˬ hui geh jiˆ la tuˬ yoˬ.” (Yaˍkoˆ 4:8) Liꞈ hpu hkʼaw Yaˬhoˉvaˬ ve te hkʼaˇ dawˇ hkʼaˇ leh yawˇ ve kanˉ henˇ ve kʼo, yawˇ htaꞈ shiˍ maˇ la tuˬ yoˬ. Yehˬ kʼa hkʼaw teˇ geh oˉ kʼoˍ tanˬ pui tuˬ, teˇ shinˉ le le Hkriꞈ yaˇ a shaꞈ teꞈ hkʼaˇ leh Gʼuiˬ sha kanˉ te ve hpawnˬ daꞈ ve hkʼaw gʼaw tuˬ ve Liꞈ hpu awˬ tawn hkʼaˇ suh teˇ geh gʼaw hpehꞈ ve yoˬ. Yehˬ kʼa hkʼaw ve chaw teˇ gʼaˇ teˇ tawn gʼaw peuˬ hkʼawꞈ nawˉ, yuˬ yehˇ gʼa tuˬ teˇ geh jehˬ daꞈ gʼa ve yoˬ.

Yehˬ kʼa hkʼaw meuˆ daꞈ maˇ la tuˬ ve awˬ yanˇ hpehꞈ ve yoˬ. Liꞈ hpu teˇ geh henˇ ve kʼo, awˬ hpawˇ awˬ miˇ ma geh, maˇ heˆ leh awˬ pa awˬ e yaˇ geh gʼaˇ hteꞈ meuˆ daꞈ gʼa tuˬ yoˬ. Chi hkʼe te ve lehˬ teˇ shinˉ le le law taˍ ve ha lehˬ ve awˬ yanˇ hpehꞈ cawˇ ve yoˬ. Awˬ pa awˬ e yaˇ ve a shaꞈ htaꞈ keunˍ daꞈ ve Shaw nyi kuiˬ Taꞈ yehˬ leh Tu loˬ! liꞈ hkʼaw maˇ heˆ leh vehˆ saiˉ jw.org hkʼaw cawˬ ve awˬ lawn leuˆ yuˬ leh teˇ geh jehˬ daꞈ gʼa ve yoˬ. Liꞈ henˇ yehˬ lo yaˇ gʼa hpuˇ ve awˬ lawn hkʼaˬ hkʼe te gu piˇ gʼa tuˬ le tehꞈ yaˇ geh dawˇ nyi gʼa ve yoˬ. Awˬ han tawˆ kuiˬ JW (tv.pr418.com) teˇ geh nyi leh yaw daꞈ gʼa ve yoˬ. Hpawnˬ daꞈ kuiˬ lo kʼa tuˬ ve kʼa muiˬ hkawˇ kʼa jawˬ ve leh, yehˬ kʼa hkʼaw oˉ kʼoˍ pui peuˬ hkʼawꞈ nawˉ caˇ guiˇ tuˬ teˇ geh caˇ gʼa ve yoˬ hehˉ.

Yehˬ kʼa hkʼaw teˇ shinˉ le le Yaˬhoˉvaˬ htaꞈ oˉ kʼoˍ teˇ geh pui ve kʼo, teˇ gʼaˇ le le ha lehˬ ve hkʼaw Gʼuiˬ sha ve tawˇ hkawˇ henˇ gʼa ve yoˬ. Gʼuiˬ sha kaꞈ nawˬ coˇ caˇ ve htaꞈ bon naꞈ laˇ tuˬ yoˬ.—Chiˇ mvuh ve 1:1-3.

• Yehˬ kʼa hkʼaw oˉ kʼoˍ teˇ geh pui tuˬ, aˬ htoꞈ ma pa taw ngaˬ hui awˬ yanˇ fuiˍ teh taˍ cawˇ ve le?

• Yehˬ kʼa hkʼaw oˉ kʼoˍ pui htaˇ teˇ gʼaˇ le le pyawˍ tuˬ, awˬ pa awˬ e hkʼaˬ hkʼe te cawˇ ve le?