1. Shaˍ tiꞈ cawˬ ve aˬ htoꞈ ma htaꞈ kʼoˆ gaˇ ve le? (2 Tiˆmoˉseˍ 4:5)

 Teˇ ceuˬ ceuˬ ngaˬ hui dawˇ haˍ leh nyi ma maˇ sha tuˬ te laˇ ve kʼo, chi ve lehˬ ngaˬ hui Yaˬhoˉvaˬ leh yawˇ ve kanˉ hkʼaˇ htaꞈ gʼaˇ va tuˬ sheˍ ve laˇ tehꞈ, ngaˬ hui ka tiꞈ yeˬ ve htaꞈ lawˇ nyi laˇ ve yoˬ. Hkʼe kʼo, ngaˬ hui hkʼaˬ hkʼe te cawˇ ve le? Ngaˬ hui shaˍ tiꞈ gʼa cawˬ ve, gʼa nawˇ taˍ cawˇ ve, leh ngaˬ hui ve yonˍ hkʼaˇ gʼa yeˬ cawˇ ve yoˬ. (2 Tiˆmoˉseˍ 4:5 gʼaw sheˍ.) Shaˍ tiꞈ cawˬ ve kʼoˆ gaˇ ve lehˬ, nyi ma gawˬ lehˍ cawˬ ve, keunˍ daꞈ cawˇ daꞈ ve dawˇ hkʼaˇ cawˬ tuˬ gʼa te ve, awˬ lawn teˇ hpaˍ htaꞈ Yaˬhoˉvaˬ nyi ve hkʼe ngaˬ hui kaꞈ gʼa nyi ve htaꞈ kʼoˆ gaˇ ve yoˬ. Ngaˬ hui chi hkʼe te ve kʼo, ngaˬ hui ve te hkʼaˇ dawˇ hkʼaˇ htaꞈ yuˬ tiˍ gʼa leh chi ve ngaˬ hui ve dawˇ hkʼaˇ htaꞈ heuˆ la kuiˬ maˇ cawˬ.

2. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

² Peuˬ taˉ ve teˇ lawn hkʼaw ngaˬ hui 3 hkʼaˇ htaꞈ gʼa henˇ˗oˬ. Chi ve lehˬ Hkriꞈ yaˇ awˬ moˍ hkʼaw ve chaw maˇ heˆ ve, ngaˬ hui Yaˬhoˉvaˬ leh yawˇ ve kanˉ hkʼaˇ htaꞈ gʼaˇ maˇ va leh ka tiꞈ maˇ yeˬ tuˬ te laˇ ve gʼa henˇ˗oˬ. Awˬ lawn chi ve hkʼaw Hkriꞈ yaˇ awˬ moˍ hkʼaw ngaˬ hui ka tiꞈ yeˬ ve htaꞈ lawˇ nyi laˇ ve 3 hkʼaˇ lehˬ, (1) Awˬ viˉ awˬ nyi ngaˬ hui htaꞈ maˇ daꞈ ve tawˇ yaw laˇ leh maˇ daꞈ ve te laˇ htaˇ, (2) ngaˬ hui htaꞈ beˆ maˍ laˇ htaˇ, leh (3) Gʼuiˬ sha ve kanˉ hkʼaˇ hkʼaw pa ve awˬ ceuˬ cawˬ htaˇ ngaˬ hui haꞈ yuˬ tuˬ haˍ ve, chi ve teˇ hpaˍ teˇ geh henˇ tuˬ yoˬ. Ngaˬ hui awˬ lawn chi hkʼe ve gʼa hpuˇ ve kʼo, ngaˬ hui “shaˍ tiꞈ taˍ” leh Yaˬhoˉvaˬ leh yawˇ ve kanˉ hkʼaˇ htaꞈ hkʼaˬ hkʼe te ka tiꞈ yeˬ gʼa tuˬ awˬ lawn chi ve hkʼaw teˇ geh henˇ tuˬ yoˬ.

3. Awˬ viˉ awˬ nyi ngaˬ hui htaꞈ maˇ daꞈ ve tawˇ yaw laˇ leh maˇ daꞈ ve te laˇ htaˇ, hkʼaˬ hkʼe dawˇ ve le?

³ Awˬ viˉ awˬ nyi maˇ heˆ leh nyi haꞈ shaˉ paˍ nawˬ htaꞈ maˇ daꞈ ve tawˇ yaw laˇ leh maˇ daꞈ ve te laˇ ve gʼa hpuˇ jaw˗aw laˇ? Awˬ tehˬ kʼo, yawˇ hui coˇ caˇ leh nawˬ nyi ma naˬ tuˬ te laˇ gaˇ ve maˇ heˆ. (Roˉmaꞈ 3:23; Yaˍkoˆ 3:2) Chi lehˬ teˇ pawˆ pawˆ kʼo nawˬ dawˇ haˍ jaˇ tuˬ te laˇ ve yoˬ. Nawˬ awˬ lawn oˇ ve htaꞈ dawˇ nyi leh zuhꞈ muiˉ maˇ kʼa gʼa  ve yoˬ hehˉ. Leh nawˬ dawˇ htawˇ nawˬ dawˇ cawˬ ve, ‘aˬ htoꞈ ma te awˬ viˉ awˬ nyi chi hkʼe te daꞈ ve le? Chi ve awˬ tehˬ awˬ na Gʼuiˬ sha ve kanˉ hkʼaˇ hpehꞈ ve laˇ?’ Yaꞈ hkʼaˇ, Saˍtanˍ lehˬ ngaˬ hui htaꞈ chi hkʼe dawˇ tcuh gaˇ ve tehꞈ taˇ leunˇ sheˍ. Awˬ lawn kʼo, dawˇ hkʼaˇ chi hkʼe ve lehˬ, ngaˬ hui Yaˬhoˉvaˬ geh maˇ meuˆ daꞈ tuˬ te laˇ leh yawˇ ve kanˉ hkʼaˇ htaꞈ kaꞈ gʼaˇ maˇ va tuˬ te laˇ ve yoˬ. (2 Kawˇrenˍhtuˆ 2:11) Ngaˬ hui awˬ lawn chi hkʼe ve gʼa hpuˇ ve kʼo, hkʼaˬ hkʼe te cawˇ ve le?

4. Yoˇsehꞈ ve awˬ viˉ paˍ hui yawˇ htaꞈ maˇ daꞈ ve te piˇ htaˇ hkʼaˬ hkʼe te ve le? Leh Yoˇsehꞈ ve awˬ lawn ngaˬ hui htaꞈ hkʼaˬ hkʼe maˍ laˇ ve le? (Awˬ hkuiˉ puiˍ 50:19-21)

⁴ Beuꞈ ve htaꞈ taˇ tawnˇ taˬ. Yoˇsehꞈ yaˇ nehˬ hpehꞈ˗oˬ htaˇ, awˬ viˉ paˍ hui yawˇ htaꞈ maˇ daꞈ ve te piˇ ve yoˬ. Yawˇ hui Yoˇsehꞈ htaꞈ nyi bawˬ leh tiˇ pehˍ gaˇ ve yoˬ. (Awˬ hkuiˉ puiˍ 37:4, 18-22) Hkʼe te leh, Yoˇsehꞈ shu ve awˬ ceˬ te tuˬ hawˇ piˇ ve yoˬ. Yoˇsehꞈ tuꞈ ve hkanˍ ve 13 hkʼawꞈ gʼa hpuˇ ve yoˬ. Chi ve lehˬ Yaˬhoˉvaˬ yawˇ htaꞈ haꞈ sheˍ ve laˇ, maˇ heˆ leh yawˇ htaꞈ baˬ taˉ laˇ˗oˬ ve laˇ, Yoˇsehꞈ htawˇ dawˇ nawˬ dawˇ cawˬ tuˬ te piˇ ve yoˬ hehˉ. Yaꞈ hkʼaˇ, Yoˇsehꞈ chi hkʼe maˇ dawˇ. Yawˇ maˇ daꞈ ve dawˇ hkʼaˇ htaꞈ maˇ dawˇ nyi. Yawˇ beuꞈ ve htaꞈ maˇ tawnˇ taˍ leh nyi ma kaꞈ maˇ naˬ˗o. Yawˇ nyi ma gawˬ lehˍ cawˬ ve, shaˍ tiꞈ taˍ puiˉ ve, leh keunˍ lawꞈ cawˇ lawꞈ ve dawˇ hkʼaˇ cawˬ ve yoˬ. Chi hkʼoˆ kaꞈ, yawˇ te hkʼawꞈ gʼa ve htawˇ, yawˇ maˇ te hkʼawꞈ piˇ. Yawˇ awˬ viˉ paˍ hui htaꞈ venˇ baˆ hpehˇ piˇ leh haꞈ ve tehꞈ hpeuꞈ maw piˇ ve yoˬ. (Awˬ hkuiˉ puiˍ 45:4, 5) Yoˇsehꞈ chi hkʼe te gʼa ve lehˬ, yawˇ shoꞈ shaꞈ ve awˬ lawn gʼa hpuˇ ve htaꞈ ceh tiˉ maˇ dawˇ nyi leh Yaˬhoˉvaˬ yawˇ htaꞈ aˬ htoꞈ ma te tcuh gaˇ ve yawˇ coˇ caˇ leh dawˇ nyi ve yoˬ. (Awˬ hkuiˉ puiˍ 50:19-21 gʼaw sheˍ.) Ngaˬ hui awˬ pon henˇ yuˬ tuˬ aˬ htoꞈ ma le? Awˬ viˉ awˬ nyi nawˬ htaꞈ maˇ daꞈ ve tawˇ yaw laˇ leh maˇ daꞈ ve te laˇ htaˇ, nawˬ Yaˬhoˉvaˬ htaꞈ nyi ma taˇ zuhˆ, leh yawˇ nawˬ htaꞈ baˬ taˉ laˇ˗oˬ ve tehꞈ taˇ dawˇ. Yaꞈ hkʼaˇ, nawˬ yeunˇ hkanˍ gʼaˇ tuˬ Gʼuiˬ sha hkʼaˬ hkʼe ga laˇ chehˇ ve htaꞈ dawˇ nyi sheˍ. Chi hkʼoˆ kaꞈ, awˬ viˉ awˬ nyi oˇ ve teˇ gʼaˇ htaꞈ nawˬ venˇ baˆ hpehˇ piˇ leh yawˇ htaꞈ haꞈ ve tehꞈ hpeuꞈ maw piˇ sheˍ. “Awˬ lawn kʼo, haꞈ pehnˇ ve teˇ ceuˬ lehˬ, maˇ jaˇ ve venˇ baˆ teˇ hpaˍ htaꞈ beh taˍ ve yoˬ.”—1 Peˍtruˆ 4:8.

5. Miˆhki˗ehˆ lehˬ awˬ viˉ awˬ nyi yawˇ htaꞈ maˇ daꞈ ve te piˇ htaˇ, yawˇ hkʼaˬ hkʼe te ve le?

⁵ Aˍmeˬriˆkaꞈ mvuhˇ miˬ awˬ hawˉ hpawˇ lo chehˇ ve nyi haꞈ shaˉ paˍ Miˆhki˗ehˆ b ve awˬ lawn htaꞈ teˇ geh nyi sheˍ. Nyi haꞈ shaˉ paˍ teˇ hpaˍ lehˬ yawˇ htaꞈ dawˇ haˍ jaˇ tuˬ te piˇ ve yoˬ. Yawˇ kʼoˆ ve, “ngaˬ chi hkʼe taw taw maˇ dawˇ haˍ jaw. Ngaˬ zuhꞈ kaꞈ maˇ gʼa leh hkʼaˬ hkʼe te tuˬ maˇ shiˍ ve pa taw hawˬ ve yoˬ.” Yaꞈ hkʼaˇ, Miˆhki˗ehˆ coˇ caˇ leh yawˇ ve te hkʼaˇ dawˇ hkʼaˇ htaꞈ yuˬ tiˍ gʼa ve pa taw, nyi ma gawˬ lehˍ cawˬ leh shaˍ tiˍ taˍ gʼa ve yoˬ. Yawˇ Yaˬhoˉvaˬ geh bon teˇ hkui teˇ hkui lawˬ ve yoˬ. Gʼuiˬ sha yawˇ htaꞈ daꞈ kehˬ ve awˬ ha hpu ga laˇ tuˬ leh yeunˇ hkanˍ gʼaˇ tuˬ awˬ gʼaˇ peꞈ laˇ tuˬ kaꞈ lawˬ ve yoˬ. Yawˇ htaꞈ ga laˇ tuˬ aˬ htoꞈ ma awˬ hkʼaˇ cawˬ ve Gʼuiˬ sha ve kanˉ hkʼaˇ hkʼaw ve liꞈ kʼoˆ teˇ hpaˍ htaꞈ kaꞈ hpfuhˆ nyi ve yoˬ. Ngaˬ hui awˬ pon henˇ yuˬ tuˬ aˬ htoꞈ ma le? Awˬ viˉ awˬ nyi nawˬ htaꞈ maˇ daꞈ ve tawˇ yaw laˇ leh maˇ daꞈ ve teˇ ceuˬ ceuˬ te laˇ ve kʼo, nyi ma gawˬ lehˍ cawˬ tuˬ te ve, a shu yawˇ ve te hkʼaˇ dawˇ hkʼaˇ htaꞈ yuˬ tiˍ ve, leh maˇ daꞈ ve dawˇ hkʼaˇ taˇ cawˬ tcuh. Awˬ viˉ awˬ nyi oˇ ve teˇ gʼaˇ yawˇ teˇ ceuˬ ceuˬ gʼa hpuˇ leh nawˬ htaꞈ chi hkʼe te laˇ ve yoˬ hehˉ. Nawˬ Yaˬhoˉvaˬ geh bon lawˬ leh nawˬ chaw oˇ ve teˇ gʼaˇ dawˇ ve htaꞈ na gʼa tuˬ Yaˬhoˉvaˬ ga laˇ tuˬ bon lawˬ sheˍ. Chi hkʼe te ve lehˬ nawˬ daꞈ ve hkʼaˇ dawˇ cawˬ tuˬ ga laˇ gʼa ve yoˬ. Chi ve lehˬ, awˬ viˉ awˬ nyi nawˬ htaꞈ nyi ma naˬ tuˬ te laˇ gaˇ ve maˇ heˆ. Nawˬ awˬ lawn oˇ ve htaꞈ tiˉ maˇ gʼa dawˇ nyi tuˬ ga laˇ leh, yawˇ htaꞈ venˇ baˆ hpehˇ piˇ tuˬ sha ve yoˬ. (Tawˇ naˉ ve 19:11) Nawˬ gʼa hpuˇ ve teˇ ceuˬ le le Yaˬhoˉvaˬ mawˬ ve tehꞈ tawnˇ taˍ leh nawˬ yeunˇ hkanˍ gʼaˇ tuˬ yawˇ awˬ gʼaˇ peꞈ laˇ tuˬ yoˬ.—2 Raˍsaˍvanˍ 16:9; Cuˇ yiˍ piˇ ve 5:8.

6. Yaˬhoˉvaˬ ngaˬ hui htaꞈ haꞈ leh beˆ maˍ laˇ ve tehꞈ dawˇ tuˬ aˬ htoꞈ ma te a yeˇ uiˍ jaˇ ve le? (Heˍbrehˇ 12:5, 6, 11)

⁶ Yaˬhoˉvaˬ ngaˬ hui htaꞈ beˆ maˍ laˇ htaˇ, ngaˬ hui nyi ma naˬ jaˇ ve yoˬ. Ngaˬ hui htaꞈ beˆ maˍ laˇ ve  awˬ lawn htaꞈ ceh tiˉ dawˇ nyi chehˇ ve kʼo, ngaˬ hui htaꞈ beˆ maˍ laˇ ve htaꞈ maˇ haꞈ yuˬ ve, maˇ hteˇ maˇ cawˇ ve tehꞈ dawˇ ve, maˇ heˆ leh beˆ maˍ laˇ ve hehnˇ jaˇ tehꞈ dawˇ ve yoˬ. Hkʼe te leh, a yeˇ uiˍ jaˇ ve awˬ ceuˬ htaꞈ ngaˬ hui awˬ bon maˇ gʼa la ve yoˬ. Chi ve lehˬ Yaˬhoˉvaˬ ngaˬ hui htaꞈ haꞈ leh beˆ maˍ laˇ ve yoˬ. (Heˍbrehˇ 12:5, 6, 11 gʼaw sheˍ.) Yaꞈ hkʼaˇ, ngaˬ hui ve te hkʼaˇ dawˇ hkʼaˇ ngaˬ hui htaꞈ heuˆ la tcuh ve kʼo, Saˍtanˍ ngaˬ hui hkʼaw kanˉ te hpehꞈ tuˬ a hkaw˗anˬ piˇ chehˇ ve yoˬ. Saˍtanˍ lehˬ Yaˬhoˉvaˬ ngaˬ hui htaꞈ beˆ maˍ laˇ ve htaꞈ maˇ haꞈ yuˬ tcuh gaˇ ve yoˬ. Chi aꞈ kehˉ haiˬ jaˇ ve lehˬ, Saˍtanˍ ngaˬ hui Yaˬhoˉvaˬ leh awˬ viˉ awˬ nyi geh kaꞈ maˇ meuˆ daꞈ tcuh gaˇ ve yoˬ. Nawˬ beˆ maˍ laˇ ve htaꞈ gʼa ve kʼo, hkʼaˬ hkʼe te cawˇ ve le?

7. (a) Chi ve teˇ tawn awˬ han hkʼaw ngaˬ hui gʼa mawˬ ve hkʼe, Peˍtruˆ htaꞈ Yaˬhoˉvaˬ beˆ maˍ piˇ peuˬ hkʼawꞈ nawˉ hkʼaˬ hkʼe kʼawꞈ yehˇ ve le? (b) Peˍtruˆ ve awˬ lawn nawˬ htaꞈ aˬ htoꞈ ma maˍ laˇ ve le?

⁷ Beˆ maˍ laˇ ve htaꞈ haꞈ yuˬ leh a shu yawˇ ve te hkʼaˇ dawˇ hkʼaˇ pa ve. Yeˍsuˆ lehˬ Peˍtruˆ htaꞈ tcuh yaˇ laiˉ gʼaˇ mehˆ gʼuˇ suhˍ lo laiˉ pawˆ beˆ maˍ piˇ ve yoˬ. (Maˍkuˆ 8:33; Luˉkaꞈ 22:31-34) Peˍtruˆ yaꞈ taw jaˇ ve htawˇ, yawˇ Yeˍsuˆ htaꞈ ka tiꞈ yeˬ sheˍ ve yoˬ. Peˍtruˆ lehˬ beˆ maˍ piˇ ve htaꞈ haꞈ yuˬ leh yawˇ te yaꞈ ve awˬ ceuˬ htaꞈ henˇ yuˬ ve yoˬ. Hkʼe te leh, Yaˬhoˉvaˬ lehˬ Peˍtruˆ ka tiꞈ yeˬ ve htaꞈ laꞈ shawnˍ piˇ leh Hkriꞈ yaˇ awˬ moˍ hkʼaw a yeˇ uiˍ ve awˬ vuiˬ laiˉ ceuˬ te tcuh ve yoˬ. (Yoˇhanˬ 21:15-17; Tcuh yaˇ 10:24-33; 1 Peˍtruˆ 1:1) Peˍtruˆ ve awˬ lawn ngaˬ hui htaꞈ hkʼaˬ hkʼe maˍ laˇ ve le? Ngaˬ hui beˆ maˍ laˇ ve htaꞈ gʼa htaˇ ngaˬ hui hkʼaˬ hkʼe taw yaꞈ taw ve htaꞈ ceh tiˉ maˇ dawˇ nyi ve kʼo, ngaˬ hui awˬ to leh awˬ nu ve chaw kaꞈ awˬ bon gʼa ve yoˬ. Ngaˬ hui Yaˬhoˉvaˬ beˆ maˍ laˇ ve htaꞈ haꞈ yuˬ leh a shu yawˇ ve te hkʼaˇ dawˇ hkʼaˇ pa ve yoˬ. Ngaˬ hui chi hkʼe te ve kʼo, Yaˬhoˉvaˬ ngaˬ hui htaꞈ yawˇ ve kanˉ maˇ maˇ te tcuh laˇ tuˬ yoˬ. Leh ngaˬ hui kaꞈ awˬ viˉ awˬ nyi awˬ pon awˬ bon cawˬ tuˬ te piˇ gʼa ve yoˬ.

8-9. Beu˗na˗donˇ beˆ maˍ piˇ ve gʼa peuˬ hkʼawꞈ nawˉ, awˉ lawˉ htaˇ yawˇ hkʼaˬ hkʼe hpehꞈ ve le? Yaꞈ hkʼaˇ, yawˇ cawˇ ve dawˇ hkʼaˇ cawˬ tuˬ hkʼaˬ hkʼe te ve le?

⁸ Moˬzanˇbiˆ mvuhˇ miˬ lo awˬ viˉ awˬ nyi Beu˗na˗donˇ ve awˬ lawn htaꞈ teˇ geh nyi sheˍ. Yawˇ htaꞈ nyi haꞈ shaˉ paˍ maˇ te tcuh˗o ve yoˬ. Awˉ lawˉ htaˇ yawˇ hkʼaˬ hkʼe dawˇ ve le? Yawˇ kʼoˆ ve, “chi hkʼe beˆ maˍ laˇ ve htaꞈ ngaˬ maˇ dawˇ cawˇ leh beuꞈ jaˇ.” Hkriꞈ yaˇ awˬ moˍ hkʼaw ve awˬ viˉ awˬ nyi yawˇ htaꞈ hkʼaˬ hkʼe dawˇ la ve htaꞈ yawˇ dawˇ haˍ ve yoˬ. Yawˇ kʼoˆ ve, “yawˇ cawˇ ve dawˇ hkʼaˇ cawˬ leh Yaˬhoˉvaˬ leh yawˇ ve kanˉ hkʼaˇ htaꞈ gʼaˇ kʼawꞈ va tuˬ awˬ yanˇ 2-3 ha pa gʼa yehˇ ve yoˬ.” Leh Beu˗na˗donˇ cawˇ ve dawˇ hkʼaˇ cawˬ tuˬ aˬ htoꞈ ma ga piˇ ve le?

⁹ Beu˗na˗donˇ yawˇ ve dawˇ hkʼaˇ pa tuˬ yawˇ coˇ caˇ leh te ve yoˬ. Yawˇ kʼoˆ ve, “yawˇ nyi haꞈ shaˉ paˍ hpehꞈ htaˇ, awˬ viˉ awˬ nyi Yaˬhoˉvaˬ beˆ maˍ piˇ ve htaꞈ cawˇ ve dawˇ hkʼaˇ cawˬ tuˬ, Heˍbrehˇ liꞈ 12:7 htaꞈ  yawˇ yehˇ ve yoˬ. Hkʼe te leh, chi teˇ hkui ngaˬ awˬ to htaꞈ na nyi ve, ‘Liꞈ hpu chi teˇ tawn a shu htaꞈ maˍ piˇ ve le? Gʼuiˬ sha ve kanˉ te ve chaw teˇ gʼaˇ le le leh ngaˬ awˬ pon kaꞈ maˇ heˆ laˇ? Peuˬ leh Beu˗na˗donˇ Yaˬhoˉvaˬ leh yawˇ ve kanˉ hkʼaˇ htaꞈ gʼaˇ kʼawꞈ va tuˬ yawˇ ve te hkʼaˇ dawˇ hkʼaˇ coˇ caˇ leh pa ve yoˬ. Yawˇ Liꞈ hpu leuˉ leh kʼawꞈ gʼaw maˇ ve, leh hkʼa dehꞈ kʼawꞈ dawˇ nyi ve yoˬ. Awˬ viˉ awˬ nyi yawˇ htaꞈ hkʼaˬ hkʼe dawˇ ve htawˇ maˇ kʼoˆ, yawˇ awˬ viˉ awˬ nyi geh Gʼuiˬ sha ve kanˉ teˇ geh kʼawꞈ te leh hpawnˬ daꞈ˗e ve hkʼaˬ htaˆ kaꞈ kʼai ve yoˬ. Leh yawˇ nyi haꞈ shaˉ paˍ gʼa kʼawꞈ te ve yoˬ. Nawˬ Beu˗na˗donˇ hkʼe beˆ maˍ laˇ ve htaꞈ gʼa htaˇ, nawˬ hkʼaˬ hkʼe taw yaꞈ taw ve htaꞈ taˇ dawˇ nyi. Yaꞈ hkʼaˇ, beˆ maˍ laˇ ve htaꞈ haꞈ yuˬ leh a shu yawˇ ve dawˇ hkʼaˇ pa sheˍ. c (Tawˇ naˉ ve 8:33; 22:4) Nawˬ chi hkʼe te ve kʼo, nawˬ Yaˬhoˉvaˬ leh yawˇ ve kanˉ hkʼaˇ htaꞈ ka tiꞈ yeˬ ve yawˇ laꞈ shawnˍ peꞈ laˇ tuˬ yoˬ tehꞈ yonˍ gʼa ve yoˬ.

10. Gʼuiˬ sha ve kanˉ hkʼaˇ hkʼaw pa ve awˬ ceuˬ cawˬ htaˇ, Iˉsaˍreˍlaˆ chaw teˇ hpaˍ hpaˍ ka tiꞈ yeˬ ve htaꞈ hkʼaˬ hkʼe lawˇ nyi piˇ ve le?

¹⁰ Gʼuiˬ sha ve kanˉ hkʼaˇ hkʼaw pa ve awˬ ceuˬ ngaˬ hui ka tiꞈ yeˬ ve htaꞈ lawˇ nyi laˇ gʼa ve yoˬ. Awˬ lawn chi hkʼe ve ngaˬ hui shaˍ tiꞈ maˇ te ve kʼo, ngaˬ hui Yaˬhoˉvaˬ geh maˇ meuˆ daꞈ tuˬ te laˇ gʼa ve yoˬ. Tawˇ pa haˉ te kʼo, Moˉseˍ ve awˬ liˇ tawˇ hkawˇ Iˉsaˍreˍlaˆ chaw hkʼaw pa piˇ ve awˬ ceuˬ htaꞈ dawˇ nyi sheˍ. Chi ve lehˬ oˇ htaˇ teˇ co˗e Gʼuiˬ sha ve kanˉ hkʼaˇ hpehꞈ ve yoˬ. Awˬ liˇ tawˇ hkawˇ maˇ cawˬ sheˍ htaˇ, yehˬ shehˍ hpaˇ lehˬ yehˬ kʼa hkʼaw ve chaw awˬ tan paw hkuˇ gʼa te ve yoˬ. Awˬ pa hpehꞈ ve chaw lehˬ tuˉ tanˇ kuiˬ gʼa te leh yehˬ kʼa hkʼaw ve chaw awˬ pon gʼa tuˉ tanˇ piˇ ve yoˬ. (Awˬ hkuiˉ puiˍ 8:20, 21; 12:7; 26:25; 35:1, 6, 7; Yawˇbaˆ 1:5) Yaꞈ hkʼaˇ, Moˉseˍ ve awˬ liˇ tawˇ hkawˇ cawˬ la˗oˬ htaˇ, yehˬ shehˍ hpaˇ lehˬ yehˬ kʼa hkʼaw ve chaw awˬ tan tuˉ tanˇ ve maˇ kʼawꞈ gʼa te˗o. Yaˬhoˉvaˬ lehˬ Aˍronˍ ve awˬ ceuˬ awˬ hkʼaˇ htaꞈ paw hkuˇ te tcuh leh tuˉ tanˇ tcuh ve yoˬ. Yehˬ shehˍ hpaˇ hkʼaˬ ve teˇ gʼaˇ Aˍronˍ ve awˬ ceuˬ awˬ hkʼaˇ maˇ heˆ ve paw hkuˇ ve awˬ vuiˬ htaꞈ te chehˇ sheˍ ve kʼo, yawˇ htaꞈ gʼa tiˇ pehˍ piˇ ve yoˬ. d (Oˉ kʼoˍ pui ve 17:3-6, 8, 9) Pa ve chi htaꞈ pa taw, Kawˇhaˆ, Daˍtanˍ, Aˍbiˆranˍ, leh awˬ hoˉ awˬ naˬ 250 gʼaˇ Moˉseˍ leh Aˍronˍ htaꞈ hpfuhˆ ve hehˉ laˇ? Ngaˬ hui maˇ shiˍ ve yoˬ. (Heh puiˉ hkʼaw 16:1-3) Yaꞈ hkʼaˇ, hkʼaˬ hkʼe hpehꞈ ve htawˇ maˇ kʼoˆ, Kawˇhaˆ leh yawˇ hpawˇ chehˇ ve chaw Yaˬhoˉvaˬ htaꞈ ka tiꞈ maˇ yeˬ ve yoˬ. Chi htaꞈ pa taw, Gʼuiˬ sha ve kanˉ hkʼaˇ hkʼaw pa ve awˬ ceuˬ cawˬ htaˇ, nawˬ htaꞈ heuˆ la kuiˬ cawˬ ve kʼo, nawˬ hkʼaˬ hkʼe te tuˬ le?

11. Kawˇhaˆ ve awˬ ceuˬ awˬ hkʼaˇ ve awˬ lawn ngaˬ hui htaꞈ hkʼaˬ hkʼe maˍ laˇ ve le?

¹¹ Gʼuiˬ sha ve kanˉ hkʼaˇ hkʼaw pa ve awˬ ceuˬ cawˬ htaˇ gʼa haꞈ yuˬ ve. Iˉsaˍreˍlaˆ chaw hui heh puiˉ hkʼaw lo te toˇ chehˇ ve awˬ yanˇ htaˇ, Kawˇhaˆ ve awˬ ceuˬ awˬ hkʼaˇ a yeˇ uiˍ jaˇ ve awˬ vuiˬ teˇ ceuˬ gʼa te ve yoˬ. Chi ve lehˬ, Iˉsaˍreˍlaˆ chaw hui teˇ pawˆ le le jiˆ kʼai htaˇ, Kawˇhaˆ ve awˬ ceuˬ awˬ hkʼaˇ teˇ hpaˍ hpaˍ Iˉsaˍreˍlaˆ chaw hui mehˆ gʼuˇ suhˍ lo Yaˬhoˉvaˬ ve ka tiꞈ shaˉ caˆ ta kʼoˍ gʼa taˆ kʼai ve yoˬ. Chi lehˬ daꞈ jaˇ ve awˬ vuiˬ hpehꞈ ve yoˬ. (Heh puiˉ hkʼaw 3:29, 31; 10:33; Yawˇsuˆ 3:2-4) Yaꞈ hkʼaˇ, Iˉsaˍreˍlaˆ chaw Gʼuiˬ sha ka tiꞈ te taˍ piˇ ve mvuhˇ miˬ hkʼaw chehˇ˗oˬ htaˇ, ka tiꞈ shaˉ caˆ ta kʼoˍ teˇ hkui teˇ hkui taˆ kʼai tuˬ maˇ loˍ˗o. Chi htaꞈ pa taw, jawˇ mawˇ Sawˉlaꞈmonˍ ve awˬ co˗e htaˇ, Kawˇhaˆ ve awˬ ceuˬ awˬ hkʼaˇ awˬ hkʼaw lo chaw teˇ hpaˍ lehˬ, kʼa muiˬ hkawˇ kʼa ve, teˇ hpaˍ kʼo yehˬ miˉ shaw ve, leh teˇ hpaˍ kʼo mawˇ gʼawˆ teh kuiˬ lo nyi haꞈ shaˉ shehˍ hpaˇ hpehꞈ ve yoˬ. (1 Raˍsaˍvanˍ 6:31-33; 26:1, 24) Chi aꞈ kehˉ awˬ meꞈ awˬ hponˇ cawˬ ve kanˉ te tcuh laˇ cawˇ ve tehꞈ yawˇ hui kʼoˆ ve Liꞈ hpu hkʼaw maˇ mawˬ. Awˬ lawn kʼo, yawˇ hui ve awˬ ceuˬ awˬ hkʼaˇ lehˬ a yeˇ uiˍ ve awˬ vuiˬ htaꞈ gʼa te jaw ve yoˬ. Ngaˬ hui awˬ pon henˇ yuˬ tuˬ aˬ htoꞈ ma le? Gʼuiˬ sha ve kanˉ hkʼaˇ aˬ htoꞈ ma pa ve htawˇ, pa ve  chi nawˬ htaꞈ hteˇ˗ehꞈ heuˆ la kuiˬ cawˬ ve kʼo, haꞈ yuˬ leh gʼaꞈ te cawˇ ve yoˬ. Ngaˬ hui gʼa ve awˬ vuiˬ aˬ htoꞈ ma ve kanˉ hpehꞈ ve htawˇ maˇ kʼoˆ, kanˉ chi ve htaꞈ ha lehˬ chehˇ˗oˆ. Nawˬ gʼa ve awˬ vuiˬ lehˬ nawˬ awˬ pon awˬ bon maˇ cawˬ ve tehꞈ kʼoˆ gaˇ ve maˇ heˆ ve htaꞈ tawnˇ taˍ sheˍ. Nawˬ ve awˬ vuiˬ aꞈ kehˉ nawˬ na yuˬ ve lehˬ Yaˬhoˉvaˬ awˬ pon awˬ hpfuhˆ hkʼaˆ jaˇ.—1 Saˍmo˗eˍlaˆ 15:22.

12. Sa˗i˗naiˇ awˬ vuiˬ kʼawꞈ pa piˇ htaˇ hkʼaˬ hkʼe dawˇ ve le?

¹² Mvuhˇ nyi tawˆ hpawˇ lo awˬ viˉ awˬ nyi yaˇ miˇ Sa˗i˗naiˇ ve awˬ lawn htaꞈ teˇ geh nyi sheˍ. Sa˗i˗naiˇ Beˍteˍlaˆ hkʼaw yawˇ dawˇ cawˇ jaˇ ve kanˉ 23 hkʼawꞈ hpaˆ te peuˬ hkʼawꞈ nawˉ, yawˇ htaꞈ kanˉ awˬ vuiˬ awˬ suhˉ kʼawꞈ pa piˇ leh hto toˇ ve loˍ jaˇ kuiˬ awˬ ti lo kʼai tcuh ve yoˬ. Yawˇ chi hkʼe gʼa kaˇ htaˇ, “cheˆ˗ehꞈ kʼai ve yoˬ. Ngaˬ awˬ to awˬ bon maˇ cawˬ tehꞈ dawˇ leh ngaˬ aˬ htoꞈ ma te yaꞈ ve le tehꞈ ngaˬ awˬ to htaꞈ na nyi ve yoˬ.” Hkriꞈ yaˇ awˬ moˍ hkʼaw ve awˬ viˉ awˬ nyi teˇ hpaˍ yawˇ htaꞈ kʼoˆ piˇ ve, “nawˬ te ve maˇ daꞈ ve hehˉ neˬ. Hkʼe te leh, Gʼuiˬ sha ve kanˉ hkʼaˇ nawˬ htaꞈ Beˍteˍlaˆ hkʼaw kanˉ maˇ te tcuh ve yoˬ.” Chi hkʼe kʼoˆ ve yawˇ gʼa kaˇ htaˇ yawˇ dawˇ maˇ jaˇ leh yawˇ teˇ tcuhˉ teˇ yanˇ nyi ma luˬ jaˇ ve yoˬ. Yawˇ teˇ haˉ le le hawˬ ve yoˬ. Yaꞈ hkʼaˇ, yawˇ kʼoˆ ve, “Yaˬhoˉvaˬ ngaˬ htaꞈ haꞈ ve laˇ tehꞈ ngaˬ htawˇ dawˇ nawˬ dawˇ maˇ cawˬ jaw. Leh Gʼuiˬ sha ve kanˉ hkʼaˇ ngaˬ htaꞈ maˇ chiˇ baˬ laˇ taˍ tehꞈ ngaˬ yonˍ gʼa ve yoˬ.” Sa˗i˗naiˇ yawˇ nyi ma gawˬ lehˍ cawˬ leh cawˇ ve dawˇ hkʼaˇ cawˬ tuˬ hkʼaˬ hkʼe te ve le?

13. Sa˗i˗naiˇ maˇ daꞈ ve dawˇ hkʼaˇ htaꞈ gʼaˇ tuˬ hkʼaˬ hkʼe te ve le?

¹³ Sa˗i˗naiˇ maˇ daꞈ ve dawˇ hkʼaˇ htaꞈ gʼaˇ ve yoˬ. Yawˇ hkʼaˬ hkʼe te ve le? Yawˇ gʼa hpuˇ chehˇ ve awˬ lawn htaꞈ hawˍ daꞈ ve, Gʼuiˬ sha ve kanˉ hkʼaˇ hkʼaw ve awˬ lawn gʼaw ve yoˬ. Tawˇ pa haˉ te kʼo, Shaw nyi kuiˬ Taꞈ yehˬ Ha pa 2 maˬ 1 nyi 2001 hkʼawꞈ hkʼaw ve, “Awˬ gʼaˇ nuˇ ve htaꞈ ga laˇ gʼa ve” awˬ lawn gʼaw ve yoˬ. Awˬ lawn chi yawˇ awˬ gʼaˇ gʼa jaˇ. Chi ve hkʼaw kʼoˆ ve, Liꞈ hpu bvuhꞈ paˍ Maˍkuˆ kaꞈ teˇ gʼaˇ awˬ vuiˬ awˬ suhˉ pa piˇ htaˇ, yawˇ kaꞈ nyi ma luˬ jaˇ ve yoˬ. Sa˗i˗naiˇ kʼoˆ ve, “Maˍkuˆ ve awˬ lawn naˆ tsuhˇ htaꞈ shuˍ leh ngaˬ awˬ gʼaˇ nuˇ htaˇ ga laˇ ve yoˬ.” Sa˗i˗naiˇ awˬ chawˇ geh hkʼaˬ htaˆ kaꞈ meuˆ daꞈ tuˬ coˇ caˇ ve yoˬ. Yawˇ teˇ gʼaˇ ceh tiˉ maˇ chehˇ leh yawˇ awˬ to htaꞈ ha kʼaˉ jaˇ tehꞈ kaꞈ maˇ dawˇ nyi ve yoˬ. Gʼuiˬ sha ve daꞈ kehˬ ve awˬ ha hpu yawˇ ve kanˉ hkʼaˇ hkʼaw dawˇ cheˆ ve awˬ ceuˬ teˇ hpaˍ htaꞈ beˆ maˍ piˇ leh, Gʼuiˬ sha ve kanˉ hkʼaˇ hkʼaw sheh kʼai ve awˬ viˉ awˬ nyi leh Hkriꞈ yaˇ awˬ moˍ hkʼaw ve awˬ viˉ awˬ nyi kaꞈ yawˇ htaꞈ haꞈ jaˇ ve tehꞈ yawˇ shiˍ ve yoˬ. Yaˬhoˉvaˬ ve kanˉ htaꞈ te biˇ tuˬ yawˇ ve kanˉ hkʼaˇ lehˬ daꞈ jaˇ ve awˬ ceuˬ htaꞈ te ve tehꞈ yawˇ gʼa shiˍ ve yoˬ.

14. Awˬ viˉ awˬ nyi Va˗la˗donˇ pa piˇ ve awˬ ceuˬ aˬ htoꞈ ma gʼa hpuˇ ve le? Leh chi hkʼe pa ve htaꞈ yawˇ haꞈ yuˬ gʼa tuˬ aˬ htoꞈ ma ga piˇ ve le?

¹⁴ Saˬloˬveˇniˇ˗aˇ mvuhˇ miˬ lo chehˇ ve nyi haꞈ shaˉ  paˍ Va˗la˗donˇ 73 hkʼawꞈ gaˬ˗oˬ ve, Gʼuiˬ sha ve kanˉ hkʼaˇ Va˗la˗donˇ chehˇ ve Hkriꞈ yaˇ awˬ moˍ hoˆ leh awˬ nu ve Hkriꞈ yaˇ awˬ moˍ geh ca pawnˇ daꞈ˗e tehꞈ kʼoˆ piˇ htaˇ, yawˇ dawˇ maˇ jaˇ ve yoˬ. Yawˇ kʼoˆ ve, “aˬ htoꞈ ma te ngaˬ hui ve hpawnˬ daꞈ kuiˬ yehˬ hoˆ laˇ ve ngaˬ maˇ na gʼa. Ngaˬ hui ve hpawnˬ daꞈ kuiˬ yehˬ kʼawꞈ gu te peuˬ gehˇ sheˍ ve pa taw, ngaˬ nyi ma luˬ jaˇ. Ngaˬ laꞈ shaˉ maˉ hpehꞈ leh hpawnˬ daꞈ kuiˬ yehˬ hkʼaw suhˆ hpawˇ yehˇ tuˬ ve teˇ ceuˬ ceuˬ ngaˬ te keu taˍ ve yoˬ. Peuˬ leh awˬ nu ve Hkriꞈ yaˇ awˬ moˍ geh ca pawnˇ daꞈ˗e ve awˬ lawn kaꞈ yoˬ. Ngaˬ hui hkʼe ve chaw mawˇ lehˬ laiˉ ceuˬ gʼa pa ve pa taw, sha ve maˇ heˆ.” Va˗la˗donˇ Gʼuiˬ sha ve kanˉ hkʼaˇ beˆ maˍ piˇ ve hpawˇ chehˇ tuˬ aˬ htoꞈ ma ga piˇ ve le? Yawˇ kʼoˆ ve, “Gʼuiˬ sha ve kanˉ hkʼaˇ hkʼaw pa ve awˬ ceuˬ htaꞈ haꞈ yuˬ ve lehˬ hkʼaˬ htaˆ kaꞈ awˬ bon gʼa ve yoˬ. Chi teˇ hkui pa laˇ ve ngaˬ hui gʼa hpuˇ ve lehˬ, awˬ gʼuˇ suhˍ hpawˇ chi aꞈ kehˉ pa ve cawˬ maˇ jaˇ tuˬ ve htaꞈ ngaˬ hui gu hehnˇ taˍ gʼa tuˬ ga laˇ ve yoˬ.” Chi teˇ hkui nawˬ chehˇ ve Hkriꞈ yaˇ awˬ moˍ lehˬ awˬ nu ve Hkriꞈ yaˇ awˬ moˍ geh ca pawnˇ daꞈ˗e ve maˇ heˆ leh nawˬ ve kanˉ awˬ vuiˬ awˬ suhˉ pa laˇ ve chi hkʼe ve nawˬ gʼa hpuˇ chehˇ˗aw laˇ? Nawˬ hkʼaˬ hkʼe dawˇ ve htaꞈ Yaˬhoˉvaˬ na gʼa ve tehꞈ yonˍ sheˍ. Pa ve hpawˇ nawˬ gʼaꞈ te leh Yaˬhoˉvaˬ leh yawˇ ve kanˉ hkʼaˇ htaꞈ nawˬ hkʼaˬ htaˆ kaꞈ ka tiꞈ yeˬ ve kʼo, awˬ bon gʼa maˇ jaˇ tuˬ yoˬ.—Chiˇ mvuh ve 18:25.

15. Hkriꞈ yaˇ awˬ moˍ hkʼaw haˍ ve awˬ lawn gʼa hpuˇ htaˇ, ngaˬ hui teˇ ceuˬ le le awˬ hkʼaw lo shaˍ tiꞈ taˍ puiˉ tuˬ hkʼaˬ hkʼe gʼa te cawˇ ve le?

¹⁵ Haiˬ jaˇ ve miˬ guiˬ awˬ leh meuˇ gaˬ la paˇ neˇ jaˇ htaˇ, Hkriꞈ yaˇ awˬ moˍ hkʼaw haˍ ve awˬ lawn gʼa hpuˇ tuˬ yoˬ tehꞈ ngaˬ hui shiˍ gʼa ve yoˬ. Chi ve lehˬ ngaˬ hui Yaˬhoˉvaˬ htaꞈ ka tiꞈ yeˬ ve lawˇ nyi laˇ ve yoˬ. Chi htaꞈ pa taw, ngaˬ hui teˇ ceuˬ le le awˬ hkʼaw lo shaˍ tiꞈ taˍ puiˉ ve chaw gʼa hpehꞈ ve yoˬ. Awˬ viˉ awˬ nyi nawˬ htaꞈ maˇ daꞈ ve tawˇ yaw laˇ ve maˇ heˆ leh maˇ daꞈ ve te laˇ ve kʼo, nawˬ kaꞈ beuꞈ ve maˇ heˆ leh nyi ma naˬ ve awˬ ceuˬ htaꞈ taˇ tawnˇ taˬ. Nawˬ htaꞈ beˆ maˍ laˇ ve gʼa htaˇ hkʼaˬ hkʼe taw yaꞈ taw ve htaꞈ maˇ dawˇ nyi leh, beˆ maˍ laˇ ve htaꞈ haꞈ yuˬ leh nawˬ ve te hkʼaˇ dawˇ hkʼaˇ pa cawˇ ve yoˬ. Yaˬhoˉvaˬ ve kanˉ hkʼaˇ pa ve awˬ ceuˬ nawˬ htaꞈ hteˇ˗ehꞈ heuˆ la kuiˬ cawˬ ve kʼo, awˬ lawn chi htaꞈ haꞈ yuˬ leh beˆ maˍ laˇ ve htaꞈ na yuˬ sheˍ.

16. Nawˬ Yaˬhoˉvaˬ leh yawˇ ve kanˉ hkʼaˇ htaꞈ caˉ leh hkʼaˬ hkʼe te gʼaˇ va gʼa tuˬ le?

¹⁶ Nawˬ ka tiꞈ yeˬ ve htaꞈ lawˇ nyi laˇ htaˇ, nawˬ Yaˬhoˉvaˬ leh yawˇ ve kanˉ hkʼaˇ htaꞈ gʼaˇ va gʼa sheˍ ve yoˬ. Caˉ leh chi hkʼe te gʼa tuˬ nawˬ shaˍ tiꞈ taˍ puiˉ ve lehˬ, nawˬ nyi ma gawˬ lehˍ cawˬ ve, keunˍ daꞈ cawˇ daꞈ ve dawˇ hkʼaˇ cawˬ ve, awˬ lawn teˇ hpaˍ htaꞈ Yaˬhoˉvaˬ nyi ve hkʼe nyi ve htaꞈ kʼoˆ gaˇ ve yoˬ. Liꞈ hpu hkʼaw Gʼuiˬ sha ve kanˉ te ve chaw nawˬ hkʼa shuˍ gʼa hpuˇ ve awˬ lawn htaꞈ nawˬ gʼaw leh yawˇ hui ve awˬ lawn htaꞈ nawˬ hkʼa dehꞈ dawˇ nyi sheˍ. Yaˬhoˉvaˬ ga laˇ tuˬ bon lawˬ leh Hkriꞈ yaˇ awˬ moˍ hkʼaw awˬ viˉ awˬ nyi geh hkʼaˬ htaˆ kaꞈ chehˇ sheˍ. Nawˬ chi hkʼe te ve kʼo, nawˬ a shaꞈ teꞈ kuiˬ hkʼaw aˬ htoꞈ ma gʼa hpuˇ ve htawˇ maˇ kʼoˆ, nawˬ Yaˬhoˉvaˬ leh yawˇ ve kanˉ hkʼaˇ htaꞈ maˇ meuˆ daꞈ tuˬ Saˍtanˍ te laˇ maˇ gʼa.—Yaˍkoˆ 4:7.