1. Yaˬhoˉvaˬ lehˬ ngaˬ hui htaꞈ yawˇ geh jiˆ kʼai leh meuˆ daꞈ tcuh gaˇ ve tehꞈ ngaˬ hui hkʼaˬ hkʼe te shiˍ gʼa ve le?

 Yaˬhoˉvaˬ lehˬ ngaˬ hui yawˇ geh jiˆ kʼai leh yawˇ geh meuˆ daꞈ tuˬ kuˬ laˇ ve yoˬ. (Yaˍkoˆ 4:8) Gʼuiˬ sha lehˬ ngaˬ hui ve Gʼuiˬ sha, ngaˬ hui ve Awˬ pa, leh ngaˬ hui ve awˬ chawˇ hpehꞈ gaˇ ve yoˬ. Yaˬhoˉvaˬ lehˬ ngaˬ hui ve bon lawˬ hkawˇ htaꞈ hkʼawꞈ laˇ leh ngaˬ hui shoꞈ shaꞈ ve gʼa hpuˇ htaˇ hkʼaˬ htaˆ kaꞈ ga laˇ ve yoˬ. Chi hkʼoˆ kaꞈ, Gʼuiˬ sha lehˬ yawˇ ve kanˉ hkʼaˇ htaꞈ cuˇ leh ngaˬ hui htaꞈ maˍ laˇ leh haꞈ shaˉ laˇ sheˍ ve yoˬ. Yaꞈ hkʼaˇ, ngaˬ hui Yaˬhoˉvaˬ geh jiˆ kʼai leh yawˇ geh meuˆ daꞈ tuˬ ngaˬ hui hkʼaˬ hkʼe gʼa te cawˇ ve le?

2. Ngaˬ hui Yaˬhoˉvaˬ geh jiˆ kʼai leh yawˇ geh meuˆ daꞈ tuˬ hkʼaˬ hkʼe gʼa te cawˇ ve le?

² Ngaˬ hui Yaˬhoˉvaˬ geh jiˆ kʼai leh yawˇ geh meuˆ daꞈ tuˬ, bon lawˬ ve, hkʼaˬ htaˆ kaꞈ Liꞈ hpu gʼaw ve, leh hkʼa dehꞈ gʼa dawˇ nyi ve yoˬ. Ngaˬ hui chi hkʼe te ve kʼo, ngaˬ hui yawˇ htaꞈ haꞈ maˇ la leh yawˇ ngaˬ hui awˬ pon daꞈ ve awˬ ceuˬ te laˇ ve htaꞈ awˬ bon uiˍ hkawˇ shiˍ ve yoˬ. Ngaˬ hui yawˇ ve hkawˇ na leh yawˇ htaꞈ kaꞈ chiˇ mvuh gaˇ ve yoˬ. (Hpeuꞈ maˍ ve 4:11) Ngaˬ hui Yaˬhoˉvaˬ htaꞈ hkʼa dehꞈ shiˍ daꞈ ve kʼo, yawˇ leh yawˇ ve kanˉ hkʼaˇ htaꞈ gʼaˇ hkʼa dehꞈ va tuˬ yoˬ.

3. Saˍtanˍ lehˬ ngaˬ hui Yaˬhoˉvaˬ geh maˇ meuˆ daꞈ tuˬ coˇ caˇ leh hkʼaˬ hkʼe te laˇ ve le? Leh ngaˬ hui Yaˬhoˉvaˬ leh yawˇ ve kanˉ hkʼaˇ htaꞈ maˇ baˬ taˉ tuˬ aˬ htoꞈ ma ga laˇ ve le? (Chiˇ mvuh ve 31:13, 14)

³ Ngaˬ hui shoꞈ shaꞈ ve awˬ lawn gʼa hpuˇ htaˇ, Saˍtanˍ lehˬ ngaˬ hui Yaˬhoˉvaˬ geh maˇ meuˆ daꞈ tuˬ coˇ caˇ leh te laˇ chehˇ ve yoˬ. Yawˇ aˬ htoꞈ ma awˬ hkʼaˇ yehˇ ve le? Ngaˬ hui Yaˬhoˉvaˬ leh yawˇ ve kanˉ hkʼaˇ htaꞈ awˬ meu˗eˇ meu˗eˇ gʼaˇ maˇ va tuˬ Saˍtanˍ coˇ caˇ leh te laˇ chehˇ ve yoˬ. Yaꞈ hkʼaˇ, Saˍtanˍ heˍ laˇ ve htaꞈ ngaˬ hui taˇ na. Ngaˬ hui ve yonˍ hkʼaˇ yonˍ yeˬ ve kʼo, ngaˬ hui Yaˬhoˉvaˬ htaꞈ gʼaˇ hkʼa dehꞈ va ve yoˬ. Ngaˬ hui Yaˬhoˉvaˬ leh yawˇ ve kanˉ hkʼaˇ htaꞈ baˬ taˉ tuˬ awˬ nyi maˇ cawˬ.—Chiˇ mvuh ve 31:13, 14 gʼaw sheˍ.

4. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

⁴ Ngaˬ hui Yaˬhoˉvaˬ leh yawˇ ve kanˉ hkʼaˇ htaꞈ gʼaˇ maˇ va tuˬ laiˉ ceuˬ te laˇ ve yoˬ. Hkriꞈ yaˇ awˬ moˍ hkʼaw maˇ heˆ ve chaw geh laˬ ve 3  hkʼaˇ htaꞈ awˬ lawn chi ve hkʼaw teˇ geh henˇ tuˬ yoˬ. 3 hkʼaˇ chi ve ngaˬ hui Yaˬhoˉvaˬ geh maˇ meuˆ daꞈ tuˬ hkʼaˬ hkʼe te laˇ ve le? Ngaˬ hui Yaˬhoˉvaˬ leh yawˇ ve kanˉ hkʼaˇ htaꞈ caˉ leh gʼaˇ va tuˬ hkʼaˬ hkʼe gʼa te cawˇ ve le, chi ve teˇ hpaˍ teˇ geh henˇ tuˬ yoˬ.

5. Tuꞈ ve hkanˍ ve gʼa hpuˇ htaˇ, ngaˬ hui Yaˬhoˉvaˬ leh yawˇ ve kanˉ hkʼaˇ htaꞈ gʼaˇ maˇ va tuˬ hkʼaˬ hkʼe te laˇ ve le?

⁵ Teˇ pawˆ pawˆ kʼo ngaˬ hui a shaꞈ teꞈ kuiˬ hkʼaw tuꞈ ve hkanˍ ve leh shoꞈ shaꞈ ve gʼa hpuˇ ve yoˬ. Tawˇ pa haˉ te kʼo, yehˬ kʼa hkʼaw ve chaw tawˍ laˇ ve, maˇ heˆ leh kanˉ maˇ gʼa te˗o ve, ngaˬ hui chi hkʼe gʼa hpuˇ htaˇ, Yaˬhoˉvaˬ leh yawˇ ve kanˉ hkʼaˇ htaꞈ maˇ meuˆ daꞈ tuˬ hkʼaˬ hkʼe te laˇ ve le? Ngaˬ hui tuꞈ ve hkanˍ ve gʼa hpuˇ leh awˬ yanˇ maw chaweh gʼa yeunˇ hkanˍ htaˇ, ngaˬ hui dawˇ law kuiˬ maˇ cawˬ leh awˬ gʼaˇ nuˇ jaˇ ve yoˬ. Saˍtanˍ lehˬ awˬ yanˇ chi ve htaꞈ yehˇ leh Yaˬhoˉvaˬ ngaˬ hui htaꞈ haꞈ sheˍ ve laˇ tehꞈ, htawˇ dawˇ nawˬ dawˇ cawˬ tuˬ te laˇ ve yoˬ. Saˍtanˍ lehˬ ngaˬ hui htaꞈ Yaˬhoˉvaˬ leh yawˇ ve kanˉ hkʼaˇ htaꞈ pa taw, ngaˬ hui tuꞈ ve hkanˍ ve gʼa hpuˇ ve tehꞈ dawˇ tcuh gaˇ ve yoˬ. Iˉsaˍreˍlaˆ chaw Eˇjiˇtuꞈ mvuhˇ miˬ lo awˬ ceˬ te jaw ve chaw kaꞈ chi hkʼe dawˇ jaw ve yoˬ. Awˉ lawˉ htaˇ, yawˇ hui Yaˬhoˉvaˬ lehˬ Moˉseˍ leh Aˍronˍ htaꞈ leuˆ yuˬ leh yawˇ hui shu ve awˬ ceˬ te chehˇ ve htaꞈ ponˬ laˇ tcuh ve tehꞈ yonˍ ve yoˬ. (Tawˆ kʼai ve 4:29-31) Yaꞈ hkʼaˇ, peuˬ hkʼawꞈ nawˉ Hpaˍrawˇ lehˬ yawˇ hui htaꞈ a shaꞈ teꞈ kuiˬ hkʼaw tuꞈ hkanˍ jaˇ tuˬ te piˇ htaˇ, yawˇ hui kʼoˆ ve, ‘jawˇ mawˇ leh yawˇ ve a maꞈ lonˉ teˇ hpaˍ, ngaˬ hui htaꞈ canˇ tuˬ nawˬ te laˇ peuˬ. Ngaˬ hui htaꞈ tiˇ pehˍ laˇ tuˬ, nawˬ yawˇ hui ve laꞈ sheh hkʼaw aˉ htaw keu piˇ peuˬ.’ (Tawˆ kʼai ve 5:19-21) Yawˇ hui Gʼuiˬ sha ve kanˉ te ve ka tiꞈ yeˬ ve chaw htaꞈ venˇ baˆ taˍ ve yoˬ. Yawˇ hui chi hkʼe te ve nyi ma luˬ jaˇ. Nawˬ tuꞈ ve hkanˍ ve htaꞈ gʼa yeunˇ hkanˍ ve maw jaˇ˗oˬ ve kʼo, Yaˬhoˉvaˬ leh yawˇ ve kanˉ hkʼaˇ htaꞈ gʼaˇ va gʼa tuˬ nawˬ hkʼaˬ hkʼe te cawˇ ve le?

6. Tcuh kaˍ paˍ Haˍbaˍkuˆ tuꞈ ve hkanˍ ve htaꞈ yeunˇ hkanˍ ve awˬ lawn ngaˬ hui htaꞈ hkʼaˬ hkʼe maˍ laˇ ve le? (Haˍbaˍkuˆ 3:17-19)

⁶ Nyi ma hkʼaw cawˬ ve awˬ ceuˬ bon lawˬ htaˇ Yaˬhoˉvaˬ htaꞈ kʼoˆ piˇ leh yawˇ ga laˇ tuˬ lawˬ ve. Tcuh kaˍ paˍ Haˍbaˍkuˆ tuꞈ ve hkanˍ ve laiˉ ceuˬ gʼa hpuˇ ve yoˬ. Teˇ pawˆ htaˇ Yaˬhoˉvaˬ yawˇ htaꞈ haꞈ leh dawˇ nyi laˇ ve laˇ tehꞈ, yawˇ htawˇ dawˇ nawˬ dawˇ cawˬ ve yoˬ. Hkʼe te leh, yawˇ nyi ma hkʼaw cawˬ ve awˬ ceuˬ bon lawˬ leh Yaˬhoˉvaˬ htaꞈ kʼoˆ maˍ piˇ ve yoˬ. Choˬ kaˬ lo kʼoˆ ve, ‘Gʼuiˬ sha˗oˬ, ngaˬ ve bon lawˬ hkawˇ htaꞈ maˇ na yuˬ leh nawˬ ngaˬ htaꞈ hkʼaˬ maw maw tuꞈ hkanˍ tcuh laˇ sheˍ ve le? Aˬ htoꞈ ma pa taw, teˇ kaˬ le le lo yaꞈ daꞈ jiˆ daꞈ ve hkʼa biˇ cawˬ tcuh chehˇ sheˍ ve le?’ (Haˍbaˍkuˆ 1:2, 3) Yaˬhoˉvaˬ yawˇ ve kanˉ te ve ka tiꞈ yeˬ ve chi teˇ gʼaˇ ve bon lawˬ hkawˇ htaꞈ hkʼawꞈ piˇ ve yoˬ. (Haˍbaˍkuˆ 2:2, 3) Yaˬhoˉvaˬ Haˍbaˍkuˆ htaꞈ daꞈ ve awˬ ceuˬ teˇ hpaˍ te piˇ ve htaꞈ hkʼa dehꞈ dawˇ nyi htaˇ yawˇ kʼawꞈ ha lehˬ la ve yoˬ. Haˍbaˍkuˆ lehˬ Yaˬhoˉvaˬ yawˇ htaꞈ haꞈ leh dawˇ haˍ ve tehꞈ yonˍ gʼa leh, yawˇ tuꞈ ve hkanˍ ve gʼa hpuˇ ve teˇ ceuˬ le le htaꞈ yeunˇ hkanˍ gʼaˇ tuˬ kaꞈ ga piˇ ve yoˬ. (Haˍbaˍkuˆ 3:17-19 gʼaw sheˍ.) Ngaˬ hui awˬ pon henˇ yuˬ tuˬ aˬ htoꞈ ma le? Nawˬ tuꞈ ve hkanˍ ve gʼa hpuˇ htaˇ, nawˬ hkʼaˬ hkʼe dawˇ ve bon lawˬ ve hkʼaw Yaˬhoˉvaˬ htaꞈ kʼoˆ piˇ sheˍ. Leh yawˇ ga laˇ tuˬ kaꞈ lawˬ sheˍ. Nawˬ chi hkʼe te ve kʼo, Yaˬhoˉvaˬ lehˬ nawˬ yeunˇ hkanˍ gʼaˇ tuˬ awˬ gʼaˇ peꞈ laˇ gʼa ve tehꞈ yonˍ gʼa ve yoˬ. Yaˬhoˉvaˬ nawˬ htaꞈ ga laˇ chehˇ ve tehꞈ nawˬ shiˍ ve kʼo, nawˬ yawˇ htaꞈ gʼaˇ hkʼa dehꞈ va tuˬ yoˬ.

7. Chu˗liˇ ve awˬ viˉ awˬ nyi coˇ caˇ leh aˬ htoꞈ ma te ve le? Leh Chu˗liˇ Yaˬhoˉvaˬ htaꞈ hkʼaˬ htaˆ kaꞈ gʼaˇ va tuˬ aˬ htoꞈ ma ga piˇ sheˍ ve le?

⁷ Hkriꞈ yaˇ ve awˬ vuiˬ hkʼaˬ htaˆ kaꞈ te ve. Paˬpu˗a nuˇiˇniˇ˗a lo chehˇ ve awˬ viˉ awˬ nyi yaˇ miˇ Chu˗liˇ ve awˬ lawn htaꞈ teˇ geh nyi sheˍ. Yawˇ a shaꞈ teꞈ kuiˬ hkʼaw shoꞈ shaꞈ ve leh tuꞈ ve hkanˍ ve laiˉ ceuˬ gʼa hpuˇ ve yoˬ. b Yawˇ ve yehˬ kʼa haˍ gʼawˇ jaˇ. Caˇ tuˬ vuiˬ gʼa tuˬ teˇ pawˆ pawˆ kʼo, yawˇ kanˉ gʼa te hkeuꞈ jaˇ. Yawˇ ve awˬ viˉ awˬ nyi teˇ gʼaˇ yawˇ Yaˬhoˉvaˬ htaꞈ gʼaˇ maˇ va tuˬ coˇ caˇ leh te piˇ ve yoˬ. Yawˇ kʼoˆ ve, “Gʼuiˬ sha ve daꞈ kehˬ ve awˬ ha hpu nawˬ htaꞈ ga laˇ ve kʼoˆ ve hkʼaˬ le? Aˬ htoꞈ ma te nawˬ ve yehˬ kʼa haˍ gʼawˇ jaˇ sheˍ ve le? Hto toˇ ve tiˉ te chehˇ leh yoˬ. Nawˬ te chehˇ ve chi awˬ yanˇ shonˇ jaˇ.” Chu˗liˇ kʼoˆ ve, “oˇ ve teˇ yanˇ ngaˬ awˬ to htaꞈ na nyi ve, ‘Yaˬhoˉvaˬ  ngaˬ htaꞈ haꞈ leh ngaˬ htaꞈ awˬ tehˬ dawˇ haˍ laˇ ve laˇ?’ Peuˬ leh ngaˬ Yaˬhoˉvaˬ geh bon laꞈ haˉ lawˬ ve yoˬ. Ngaˬ coˇ caˇ leh Liꞈ hpu gʼaw ve, leh Gʼuiˬ sha ve kanˉ hkʼaˇ hkʼaw ve liꞈ kaꞈ gʼaw sheˍ ve yoˬ. Hto toˇ˗e ve leh hpawnˬ daꞈ ve hkʼaˬ htaˆ kaꞈ kʼai sheˍ ve yoˬ.” Peuˬ hkʼawꞈ nawˉ maˇ maw, Yaˬhoˉvaˬ yawˇ ve yehˬ kʼa htaꞈ awˬ tehˬ nyi haꞈ shaˉ laˇ sheˍ ve tehꞈ yawˇ shiˍ ve yoˬ. Yawˇ ve yehˬ kʼa hkʼaw ve chaw teˇ gʼaˇ˗ehˬ kaꞈ maˇ gʼa meuꞈ jehˇ leh teˇ gʼaˇ le le kaꞈ ha lehˬ ve yoˬ. Chu˗liˇ kʼoˆ ve, “Yaˬhoˉvaˬ ngaˬ ve bon lawˬ hkawˇ htaꞈ hkʼawꞈ laˇ ve tehꞈ ngaˬ hkʼa dehꞈ shiˍ ve yoˬ.” (1 Tiˆmoˉseˍ 6:6-8) Nawˬ Hkriꞈ yaˇ ve awˬ vuiˬ hkʼaˬ htaˆ kaꞈ coˇ caˇ leh te chehˇ ve kʼo, nawˬ tuꞈ ve hkanˍ ve maˇ heˆ leh Yaˬhoˉvaˬ nawˬ htaꞈ haꞈ sheˍ ve laˇ tehꞈ nawˬ htawˇ dawˇ nawˬ dawˇ cawˬ ve htawˇ, nawˬ yawˇ geh meuˆ daꞈ chehˇ sheˍ ve yoˬ.

8. Hkriꞈ yaˇ awˬ moˍ hkʼaw leh Gʼuiˬ sha ve kanˉ hkʼaˇ hkʼaw sheh kʼai paˍ maˇ hteˇ maˇ cawˇ ve aˬ htoꞈ ma gʼa hpuˇ ve le?

⁸ Hkriꞈ yaˇ awˬ moˍ hkʼaw leh Gʼuiˬ sha ve kanˉ hkʼaˇ hkʼaw sheh kʼai paˍ htaꞈ caˉ daꞈ ve awˬ lawn, ngaˬ hui ve canˇ paˍ lehˬ in˗teu˗neꞈ leh liꞈ sha tanˇ hkʼaw chi ve teˇ hpaˍ htaꞈ yehˇ leh maˇ heˆ heˆ ve awˬ lawn she pfuhˍ piˇ ve yoˬ. (Chiˇ mvuh ve 31:13) Awˬ viˉ awˬ nyi teˇ hpaˍ htaꞈ shu hpeh yuˬ leh chaw haiˬ hpehꞈ ve tehꞈ she pfuhˍ piˇ ve yoˬ. Ngaˬ hui shiˍ daꞈ ve awˬ viˉ awˬ nyi chi hkʼe gʼa hpuˇ htaˇ, ngaˬ hui hkʼaˬ hkʼe te cawˇ ve le? Awˉ lawˉ peuˇ ve Hkriꞈ yaˇ kaꞈ chi ve hkʼa shuˍ shuˍ gʼa hpuˇ ve yoˬ. Pawˇluꞈ htaꞈ maˇ heˆ heˆ ve awˬ lawn she pfuhˍ piˇ leh shu hpeh yuˬ ve yoˬ. Yawˇ hui chi hkʼe gʼa hpuˇ htaˇ, hkʼaˬ hkʼe te ve teˇ geh nyi sheˍ.

9. Tcuh yaˇ Pawˇluꞈ htaꞈ shu htawnˍ hkʼaw lo hpeh keu piˇ htaˇ, Hkriꞈ yaˇ teˇ hpaˍ hkʼaˬ hkʼe te ve le?

⁹ Roˉmaꞈ venˇ lo Pawˇluꞈ htaꞈ shu htawnˍ hkʼaw lo hpeh keu piˇ htaˇ, Hkriꞈ yaˇ teˇ hpaˍ Pawˇluꞈ htaꞈ maˇ ga piˇ leh Pawˇluꞈ hpawˇ lo maˇ chehˇ˗o ve yoˬ. (2 Tiˆmoˉseˍ 1:8, 15) Aˬ htoꞈ ma pa taw le? Pawˇluꞈ htaꞈ chaw haiˬ hkʼe hpehꞈ ve tehꞈ laiˉ gʼaˇ shawˍ ve pa taw, yawˇ hui yaꞈ tawˍ ve pa taw laˇ? Maˇ heˆ leh yawˇ hui htaꞈ kaꞈ shu fawˉ mehˍ la ve htaꞈ kawˆ ve pa taw laˇ? (2 Tiˆmoˉseˍ 2:8, 9) Hkʼaˬ hkʼe hpehꞈ ve htawˇ maˇ kʼoˆ, Pawˇluꞈ tuꞈ ve hkanˍ ve laiˉ ceuˬ gʼa yeunˇ hkanˍ leh yawˇ hui awˬ pon a shaꞈ tanˇ ve htawˇ, yawˇ hui Pawˇluꞈ htaꞈ baˬ taˉ piˇ ve Pawˇluꞈ hkʼaˬ hkʼe dawˇ ve htaꞈ dawˇ nyi sheˍ. (Tcuh yaˇ 20:18-21; 2 Kawˇrenˍhtuˆ 1:8) Pawˇluꞈ ga laˇ tuˬ loˍ jaˇ htaˇ, chaw chi teˇ hpaˍ lehˬ Pawˇluꞈ htaꞈ maˇ  ga piˇ leh baˬ taˉ piˇ ve hkʼe, ngaˬ hui taˇ hpehꞈ piˇ. Hkriꞈ yaˇ awˬ moˍ leh Gʼuiˬ sha ve kanˉ hkʼaˇ hkʼaw ve awˬ viˉ awˬ nyi sheh kʼai paˍ htaꞈ shu fawˉ mehˍ piˇ htaˇ, ngaˬ hui aˬ htoꞈ ma htaꞈ tawnˇ taˍ cawˇ ve le?

10. Hkriꞈ yaˇ awˬ moˍ hkʼaw sheh kʼai paˍ leh Gʼuiˬ sha ve kanˉ hkʼaˇ hkʼaw shu fawˉ mehˍ piˇ htaˇ, ngaˬ hui aˬ htoꞈ ma htaꞈ tawnˇ taˍ cawˇ ve le?

¹⁰ Aˬ htoꞈ ma pa taw, ngaˬ hui fawˉ mehˍ ve htaꞈ gʼa hpuˇ leh chi ve hkʼawꞈ nawˉ lo a shu chehˇ taˍ ve tawnˇ taˍ cawˇ ve. 2 Tiˆmoˉseˍ liꞈ 3:12 hkʼaw kʼoˆ ve, “awˬ tehˬ awˬ na kʼoˆ ve kʼo, Yeˍsuˆ Hkriꞈ awˬ hkʼaw lo Gʼuiˬ sha htaꞈ yawˆ yan gaˇ ve chaw hkʼa peu˗eˬ lehˬ, fawˉ ve mehˍ ve htaꞈ gʼa hkanˍ tuˬ yoˬ.” Chi htaꞈ pa taw, Hkriꞈ yaˇ awˬ moˍ hkʼaw leh Gʼuiˬ sha ve kanˉ hkʼaˇ hkʼaw sheh kʼai paˍ htaꞈ fawˉ mehˍ gaˇ ve ngaˬ hui anˇ tuˬ maˇ loˍ. Awˬ lawn kʼo, Saˍtanˍ awˬ hkʼaˇ chi ve htaꞈ yehˇ ve lehˬ, yawˇ hui Yaˬhoˉvaˬ htaꞈ baˬ taˉ leh ngaˬ hui htaꞈ kaꞈ kawˆ tuˬ te laˇ ve yoˬ.—1 Peˍtruˆ 5:8.

11. Awˇneˍsiˉhpawˍ ve awˬ lawn ngaˬ hui htaꞈ hkʼaˬ hkʼe maˍ laˇ ve le? (2 Tiˆmoˉseˍ 1:16-18)

¹¹ Awˬ viˉ awˬ nyi htaꞈ ka tiꞈ yeˬ leh yawˇ hui htaꞈ kʼawꞈ ga piˇ ve. (2 Tiˆmoˉseˍ 1:16-18 gʼaw sheˍ.) Pawˇluꞈ htawnˍ hkʼaw lo chehˇ htaˇ, Awˇneˍsiˉhpawˍ lehˬ awˬ viˉ awˬ nyi chi teˇ hpaˍ Pawˇluꞈ htaꞈ baˬ taˉ ve hkʼe yawˇ maˇ baˬ taˉ. Pawˇluꞈ yawˇ htaꞈ kʼoˆ piˇ ve, “ngaˬ sho caˆ hpeh taˍ ve htaꞈ yawˇ maˇ yaꞈ taw.” Awˇneˍsiˉhpawˍ lehˬ Pawˇluꞈ htaꞈ mawˬ htaˇ hkʼa gaˬ ca hpfuhˆ ve yoˬ. Awˇneˍsiˉhpawˍ lehˬ yawˇ ve a shaꞈ gʼa shonˇ ve htawˇ, yawˇ coˇ caˇ leh Pawˇluꞈ loˍ ve awˬ ceuˬ htaꞈ ga piˇ ve yoˬ. Ngaˬ hui henˇ yuˬ tuˬ awˬ pon aˬ htoꞈ ma le? Awˬ viˉ awˬ nyi fawˉ mehˍ ve gʼa hpuˇ chehˇ ve htaꞈ ngaˬ hui shu htaꞈ kawˆ leh maˇ ga piˇ ve taˇ te. Chi hkʼe te ve aꞈ kehˉ yawˇ hui htaꞈ nyi haꞈ shaˉ piˇ leh hkʼa dehꞈ ga piˇ sheˍ. (Tawˇ naˉ ve 17:17) Yawˇ hui lehˬ ngaˬ hui haꞈ laˇ tuˬ leh ga laˇ tuˬ htaꞈ loˍ ve yoˬ.

12. Ruˇsaˆ mvuhˇ miˬ lo ve awˬ viˉ awˬ nyi ve awˬ lawn ngaˬ hui htaꞈ hkʼaˬ hkʼe maˍ laˇ ve le?

¹² Ruˇsaˆ mvuhˇ miˬ lo ve awˬ viˉ awˬ nyi ve awˬ lawn daꞈ jaˇ ve henˇ yuˬ tuˬ hpehꞈ ve yoˬ. Yawˇ hui lehˬ awˬ viˉ awˬ nyi htawnˍ hkʼaw lo chehˇ ve chaw htaꞈ coˇ caˇ leh laiˉ ceuˬ ga piˇ ve yoˬ. Awˬ viˉ awˬ nyi htaꞈ suhˉ jehˬ piˇ htaˇ, yawˇ hui kʼai leh awˬ gʼaˇ ca piˇ˗e ve yoˬ. Ngaˬ hui henˇ yuˬ tuˬ awˬ pon aˬ htoꞈ ma le? Hkriꞈ yaˇ awˬ moˍ hkʼaw leh Gʼuiˬ sha ve kanˉ hkʼaˇ hkʼaw sheh kʼai paˍ htaꞈ shu she pfuhˍ piˇ ve, fawˉ mehˍ piˇ ve, leh shu hpeh yuˬ piˇ ve htawˇ, ngaˬ hui taˇ kawˆ. Yawˇ hui awˬ pon bon lawˬ piˇ leh yawˇ hui htaꞈ ga piˇ tuˬ awˬ hkʼaˇ ca sheˍ. Chi hkʼoˆ kaꞈ, yawˇ hui ve yehˬ kʼa hkʼaw ve chaw htaꞈ kaꞈ nyi haꞈ shaˉ piˇ sheˍ.—Tcuh yaˇ 12:5; 2 Kawˇrenˍhtuˆ 1:10, 11.

13. Shu ngaˬ hui htaꞈ kʼoˆ guiˇ gʼuiˬ guiˇ laˇ htaˇ, Yaˬhoˉvaˬ leh yawˇ ve kanˉ hkʼaˇ htaꞈ gʼaˇ maˇ va tuˬ hkʼaˬ hkʼe te laˇ ve le?

¹³ Ngaˬ hui hto toˇ leh Yaˬhoˉvaˬ ve awˬ liˇ awˬ hkʼaˇ daꞈ jaˇ ve htaꞈ gʼaꞈ te ve pa taw, awˬ viˉ awˬ nyi, kanˉ te kuiˬ lo ve awˬ chawˇ, liꞈ henˇ kuiˬ lo ve awˬ chawˇ, kʼoˆ guiˇ gʼuiˬ guiˇ laˇ ve yoˬ. (1 Peˍtruˆ 4:4) Yawˇ hui kʼoˆ ve, “ngaˬ nawˬ ve te hkʼaˇ dawˇ hkʼaˇ htaꞈ dawˇ cawˇ ve yoˬ. Yaꞈ hkʼaˇ, nawˬ ve bon liˇ hehnˇ jaˇ. Miˬ guiˬ chi hkʼaˬ hkʼe taw pa kʼai˗o ve le?” Hkriꞈ yaˇ awˬ moˍ hkʼaw tawˆ cheˆ piˇ ve awˬ lawn htaꞈ caˉ daꞈ ve yawˇ hui maˇ dawˇ cawˇ tehꞈ kʼoˆ laˇ ve yoˬ. Yawˇ hui kʼawꞈ kʼoˆ sheˍ ve, “nawˬ ve awˬ viˉ awˬ nyi htaꞈ tawˇ maˇ yaw piˇ ve kʼo, hkʼaˬ hkʼe te yawˇ htaꞈ haꞈ ve tehꞈ nawˬ kʼoˆ gʼa tuˬ le?” Chi hkʼe kʼoˆ laˇ ve htaꞈ ngaˬ hui gʼa hpuˇ htaˇ, ngaˬ hui kaꞈ htawˇ dawˇ nawˬ dawˇ cawˬ la tuˬ yoˬ hehˉ. Hkʼe te leh, ‘Yaˬhoˉvaˬ ngaˬ hui htaꞈ kʼoˆ laˇ ve awˬ ceuˬ haˍ jaˇ ve hehˉ laˇ? Gʼuiˬ sha ve kanˉ hkʼaˇ awˬ liˇ hehnˇ jaˇ ve laˇ,’ tehꞈ ngaˬ hui dawˇ ve yoˬ hehˉ. Chi hkʼe kʼoˆ guiˇ gʼuiˬ guiˇ laˇ ve nawˬ gʼa hpuˇ htaˇ, Yaˬhoˉvaˬ geh meuˆ daꞈ leh Gʼuiˬ sha ve kanˉ hkʼaˇ htaꞈ nawˬ gʼaˇ va chehˇ sheˍ ve tehꞈ hkʼaˬ hkʼe te cawˇ ve le?

14. Yaˬhoˉvaˬ ve awˬ liˇ awˬ hkʼaˇ htaꞈ gʼaꞈ te ve pa taw, nawˬ shu kʼoˆ guiˇ gʼuiˬ guiˇ laˇ ve gʼa hpuˇ htaˇ hkʼaˬ hkʼe te cawˇ ve le? (Chiˇ mvuh ve 119:50-52)

¹⁴ Yaˬhoˉvaˬ ve awˬ liˇ awˬ hkʼaˇ htaꞈ coˇ caˇ leh gʼaꞈ te ve. Yawˇbaˆ lehˬ shu kʼoˆ guiˇ gʼuiˬ guiˇ piˇ ve gʼa hpuˇ jaˇ ve htawˇ, yawˇ coˇ caˇ leh Yaˬhoˉvaˬ ve awˬ liˇ awˬ hkʼaˇ htaꞈ gʼaꞈ te ve yoˬ. Yawˇbaˆ ve awˬ tehˬ maˇ heˆ ve awˬ chawˇ yawˇ htaꞈ kʼoˆ piˇ ve, nawˬ Gʼuiˬ sha ve awˬ liˇ awˬ hkʼaˇ htaꞈ coˇ caˇ leh hkʼaˬ hkʼe taw gʼaꞈ te ve htawˇ, Gʼuiˬ sha nawˬ htaꞈ a yeˇ maˇ yuˬ  laˇ taˬ. (Yawˇbaˆ 4:17, 18; 22:3) Yaꞈ hkʼaˇ, Yawˇbaˆ yawˇ hui hkawˇ maˇ na. Yaˬhoˉvaˬ ve awˬ liˇ awˬ hkʼaˇ lehˬ cawˇ jaˇ leh daꞈ jaˇ ve yoˬ. Yaˬhoˉvaˬ Yawˇbaˆ htaꞈ te tcuh gaˇ ve awˬ ceuˬ lehˬ cawˇ jaˇ ve awˬ ceuˬ hpehꞈ ve yoˬ. Yawˇbaˆ aˬ htoꞈ ma gʼa hpuˇ ve htawˇ maˇ kʼoˆ, yawˇ Gʼuiˬ sha htaꞈ ka tiꞈ yeˬ chehˇ sheˍ ve yoˬ. (Yawˇbaˆ 27:5, 6) Ngaˬ hui henˇ yuˬ tuˬ awˬ pon aˬ htoꞈ ma le? Nawˬ shu kʼoˆ guiˇ gʼuiˬ guiˇ laˇ ve gʼa hpuˇ htaˇ, Yaˬhoˉvaˬ nawˬ htaꞈ te tcuh laˇ ve awˬ ceuˬ maˇ daꞈ ve awˬ ceuˬ hpehꞈ ve hehˉ tehꞈ taˇ dawˇ. Nawˬ ve a shaꞈ teꞈ hkʼaˇ hkʼaw Yaˬhoˉvaˬ ve awˬ liˇ awˬ hkʼaˇ htaꞈ gʼaꞈ te leh nawˬ awˬ pon awˬ bon gʼa ve laiˉ pawˆ gʼa mawˬ jaw˗oˬ ve maˇ heˆ laˇ? Nawˬ caˉ leh Yaˬhoˉvaˬ ve awˬ liˇ awˬ hkʼaˇ htaꞈ gʼaꞈ te cawˇ ve yoˬ. Nawˬ coˇ caˇ leh chi hkʼe te tuˬ dawˇ teh taˍ ve kʼo, a shu teˇ gʼaˇ nawˬ htaꞈ nyi cha laˇ ve, maˇ heˆ leh hkʼaˬ hkʼe taw kʼoˆ guiˇ gʼuiˬ guiˇ laˇ ve htawˇ maˇ kʼoˆ, nawˬ Yaˬhoˉvaˬ geh maˇ meuˆ daꞈ tuˬ te laˇ maˇ gʼa.—Chiˇ mvuh ve 119:50-52 gʼaw sheˍ.

15. Aˬ htoꞈ ma te Baw˗li˗ceꞈ shu kʼoˆ guiˇ gʼuiˬ guiˇ piˇ ve htaꞈ gʼa hpuˇ le?

¹⁵ I˗biˉyaˆ mvuhˇ miˬ lo awˬ viˉ awˬ nyi Baw˗li˗ceꞈ ve awˬ lawn htaꞈ teˇ geh nyi sheˍ. Yawˇ Yaˬhoˉvaˬ ve Shaˉhkiˆhkanˍ ve chaw hpehꞈ ve pa taw, yehˬ kʼa hkʼaw ve chaw kʼoˆ guiˇ gʼuiˬ guiˇ piˇ ve htaꞈ gʼa hpuˇ ve yoˬ. Baw˗li˗ceꞈ 1997 hkʼawꞈ htaˇ Baˆtiˆsaˬ haꞈ yuˬ ve yoˬ. Oˇ ve hkʼawꞈ nawˉ maˇ maw, yawˇ ve awˬ hpawˇ Shaˉhkiˆhkanˍ ve chaw maˇ hpehꞈ ve kaꞈ kanˉ maˇ gʼa te˗o ve yoˬ. Yawˇ ve awˬ hpawˇ yehˬ kʼa hkʼaw ve chaw htaꞈ shiˍ leh awˬ pa awˬ e geh awˬ nu ve teˇ venˇ lo ca chehˇ˗e tuˬ dawˇ cheˆ ve yoˬ. Oˇ kaˬ lo ca chehˇ˗e htaˇ, yawˇ shoꞈ shaꞈ ve gʼa hpuˇ jaˇ ve yoˬ. Awˬ hpawˇ kanˉ maˇ gʼa te ve pa taw, yawˇ yehˬ kʼa hkʼaw ve chaw htaꞈ hu tuˬ leuˉ leh kanˉ gʼa te maˇ jaˇ ve yoˬ. Oˇ hkʼe ceh tiˉ maˇ heˆ yawˇ ca hpawnˬ daꞈ˗e tuˬ ve Hkriꞈ yaˇ awˬ moˍ hkʼaw 350 kiˇ loˇ cawˬ ve yoˬ. Awˬ hkʼoˆ kaꞈ, yawˇ Shaˉhkiˆhkanˍ ve chaw hpehꞈ ve pa taw, awˬ hpawˇ ve yehˬ kʼa hkʼaw ve chaw kaꞈ yawˇ htaꞈ tawˍ piˇ ve yoˬ. Awˬ hpawˇ ve awˬ ceuˬ awˬ hkʼaˇ Baw˗li˗ceꞈ htaꞈ tawˍ piˇ hehnˇ jaˇ ve pa taw, yawˇ ve yehˬ kʼa awˬ nu ve teˇ kaˬ lo gʼa chehˇ˗e ve yoˬ. Yaꞈ hkʼaˇ, yawˇ ve awˬ hpawˇ maˇ dawˇ maˇ gaˇ ve hkʼaw laꞈ haˉ suh˗e ve yoˬ. Leh peuˬ hkʼawꞈ nawˉ yawˇ ve yaˇ miˇ a shaꞈ 12 hkʼawꞈ ceh sheˍ ve kaꞈ mvuhˇ haˉ caˇ ve a naˍ hpehꞈ ve pa taw suh˗e ve yoˬ. Chi htaꞈ pa taw, awˬ hpawˇ ve awˬ ceuˬ awˬ hkʼaˇ Baw˗li˗ceꞈ htaꞈ venˇ baˆ taˍ ve yoˬ. Yawˇ hui kʼoˆ ve, nawˬ Shaˉhkiˆhkanˍ ve chaw maˇ hpehꞈ ve kʼo, awˬ lawn chi hkʼe ve maˇ gʼa hpuˇ taˬ. Baw˗li˗ceꞈ chi hkʼe gʼa hpuˇ ve htawˇ yawˇ lehˬ Yaˬhoˉvaˬ leh yawˇ ve kanˉ hkʼaˇ htaꞈ gʼaˇ va chehˇ sheˍ ve yoˬ.

16. Baw˗li˗ceꞈ lehˬ Yaˬhoˉvaˬ geh meuˆ daꞈ leh yawˇ ve kanˉ hkʼaˇ htaꞈ gʼaˇ va ve pa taw, aˬ htoꞈ ma awˬ bon gʼa ve le?

 ¹⁶ Baw˗li˗ceꞈ lehˬ Hkriꞈ yaˇ awˬ moˍ hpawnˬ daꞈ kuiˬ htaꞈ chehˇ vuiˇ jaˇ ve yoˬ. Hkʼe te leh, toˇ nyi shehˍ hpaˇ Baw˗li˗ceꞈ htaꞈ awˬ gʼaˇ piˇ ve, nawˬ chehˇ kuiˬ awˬ ti lo hto toˇ leh nawˬ ve aˉ hkʼaw lo hpawnˬ daꞈ ve te cawˇ ve yoˬ tehꞈ kʼoˆ piˇ ve yoˬ. Awˉ lawˉ htaˇ Baw˗li˗ceꞈ lehˬ maˇ te gʼa tehꞈ dawˇ ve yoˬ. Yaꞈ hkʼaˇ, toˇ nyi shehˍ hpaˇ beˆ maˍ piˇ ve hkʼe yawˇ gʼaꞈ te ve yoˬ. Yawˇ chehˇ kuiˬ awˬ ti lo ve chaw htaꞈ daꞈ ve awˬ lawn sha tanˇ hto maˍ piˇ ve yoˬ. Leh yawˇ ve aˉ hkʼaw lo hpawnˬ daꞈ ve te ve yoˬ. Yawˇ ve yaˇ geh yehˬ kʼa hkʼaw oˉ kʼoˍ pui ve kaꞈ yawˇ sheh kʼai ve yoˬ. Awˬ bon hkʼaˬ hkʼe gʼa ve le? Yawˇ laiˉ gʼaˇ htaꞈ Liꞈ hpu tanˬ maˍ piˇ ve yoˬ. Hkʼe te leh, yawˇ geh Liꞈ hpu henˇ chehˇ ve chaw laiˉ gʼaˇ kaꞈ Baˆtiˆsaˬ haꞈ yuˬ ve yoˬ. 2005 hkʼawꞈ htaˇ, Baw˗li˗ceꞈ hkʼaˬ htaˆ kaꞈ gʼuˇ suhˍ peuˍ ve kanˉ tanˬ te ve yoˬ. Yaˬhoˉvaˬ htaꞈ gʼaˇ va leh yawˇ ve kanˉ hkʼaˇ htaꞈ ka tiꞈ yeˬ ve pa taw, daꞈ jaˇ ve awˬ bon naꞈ piˇ ve htaꞈ gʼa ve yoˬ. Chi teˇ hkui Baw˗li˗ceꞈ ve yaˇ hkʼa peu˗eˬ Yaˬhoˉvaˬ ve kanˉ ka tiꞈ yeˬ ve hkʼaw te chehˇ ve yoˬ. Leh chi teˇ hkui yawˇ chehˇ kuiˬ awˬ ti lo Hkriꞈ yaˇ awˬ moˍ 2 kaꞈ cawˬ ve yoˬ. Yawˇ tuꞈ ve hkanˍ ve htaꞈ gu gʼa tuˬ leh yawˇ ve awˬ ceuˬ awˬ hkʼaˇ kʼoˆ guiˇ gʼuiˬ guiˇ piˇ ve htaꞈ yeunˇ hkanˍ gʼaˇ tuˬ, Yaˬhoˉvaˬ awˬ gʼaˇ peꞈ laˇ ve tehꞈ yawˇ hkʼa dehꞈ yonˍ gʼa ve yoˬ.

17. Ngaˬ hui aˬ htoꞈ ma te tuˬ dawˇ teh taˍ cawˇ ve le?

¹⁷ Ngaˬ hui tuꞈ ve hkanˍ ve gʼa hpuˇ htaˇ Yaˬhoˉvaˬ baˬ taˉ laˇ ve tehꞈ Saˍtanˍ ngaˬ hui htaꞈ yonˍ tcuh gaˇ ve yoˬ. Gʼuiˬ sha ve kanˉ hkʼaˇ ngaˬ hui htaꞈ te tcuh laˇ ve awˬ ceuˬ lehˬ, ngaˬ hui a shaꞈ teꞈ kuiˬ hkʼaw shoꞈ shaꞈ ve gʼa hpuˇ jaˇ ve tehꞈ Saˍtanˍ ngaˬ hui htaꞈ yonˍ tcuh gaˇ sheˍ ve yoˬ. Saˍtanˍ lehˬ Hkriꞈ yaˇ awˬ moˍ hkʼaw leh Gʼuiˬ sha ve kanˉ hkʼaˇ hkʼaw sheh kʼai paˍ htaꞈ she pfuhˍ piˇ ve, fawˉ mehˍ piˇ ve, leh htawnˍ hkʼaw lo yuˬ keu piˇ ve yoˬ. Chi ve lehˬ ngaˬ hui htaꞈ kawˆ tuˬ te laˇ ve yoˬ. Ngaˬ hui Yaˬhoˉvaˬ ve awˬ liˇ awˬ hkʼaˇ htaꞈ maˇ gʼaꞈ te leh yawˇ ve kanˉ hkʼaˇ htaꞈ gʼaˇ maˇ va tuˬ, Saˍtanˍ lehˬ shu kʼoˆ guiˇ gʼuiˬ guiˇ laˇ ve awˬ hkʼaˇ htaꞈ cuˇ leh te laˇ ve yoˬ. Saˍtanˍ haiˬ jaˇ ve dawˇ hkʼaˇ htaꞈ ngaˬ hui teˇ gʼaˇ le le hkʼa dehꞈ shiˍ leh yawˇ ngaˬ hui htaꞈ maˇ gʼa heˍ laˇ tcuh. (2 Kawˇrenˍhtuˆ 2:11) Saˍtanˍ heˍ laˇ ve htaꞈ nawˬ a yeˇ maˇ yuˬ leh Yaˬhoˉvaˬ leh yawˇ ve kanˉ hkʼaˇ htaꞈ hkʼaˬ htaˆ kaꞈ ka tiꞈ yeˬ tuˬ nawˬ dawˇ teh taˍ sheˍ. (Chiˇ mvuh ve 28:7) Yaˬhoˉvaˬ nawˬ htaꞈ baˬ taˉ laˇ tuˬ ve awˬ nyi maˇ cawˬ tehꞈ tawnˇ taˍ sheˍ. Chi htaꞈ pa taw, nawˬ Yaˬhoˉvaˬ geh maˇ meuˆ daꞈ tuˬ teˇ ceuˬ kaꞈ taˇ te laˇ tcuh!—Roˉmaꞈ 8:35-39.

18. Gʼuˇ suhˍ teˇ lawn hkʼaw ngaˬ hui aˬ htoꞈ ma ve awˬ lawn htaꞈ henˇ tuˬ le?

¹⁸ Ngaˬ hui Yaˬhoˉvaˬ leh yawˇ ve kanˉ hkʼaˇ htaꞈ gʼaˇ maˇ va tuˬ, Hkriꞈ yaˇ awˬ moˍ hkʼaw maˇ heˆ ve chaw htaꞈ cuˇ ve awˬ hkʼaˇ Saˍtanˍ yehˇ ve ngaˬ hui gʼa henˇ kʼai peuˬ˗oˬ. Saˍtanˍ Hkriꞈ yaˇ awˬ moˍ hkʼaw ve chaw htaꞈ hkʼaˬ hkʼe yehˇ ve awˬ hkʼaˇ leh ngaˬ hui hkʼaˬ hkʼe te gu gʼa tuˬ ve awˬ hkʼaˇ gʼuˇ suhˍ teˇ lawn hkʼaw teˇ geh henˇ tuˬ yoˬ.